Tusitusiga Paia
Mataupu Faavae ma Feagaiga 118


Vaega 118

Faaaliga na tuuina mai e ala mai ia Iosefa Samita le Perofeta, i Far West, Misuri, i le aso 8 o Iulai, 1838, i le tali mai i le talosaga, “Faailoa mai ia i matou lou finagalo, le Alii e, e faatatau i le Toasefululua.”

1–3, O le a tuu mai e le Alii mea mo aiga o le Toasefululua; 4–6, Ua faatutumu avanoa i le Toasefululua.

1 E Moni, ua faapea ona fetalai mai o le Alii: Ia tuu atu ia faia faavave se konafesi; ia tuu atu ia faatulaga le Toasefululua; ma ia tuu atu ia tofia ni alii e asui i tulaga o i latou ua pa’uū.

2 Ia tuu atu i la’u auauna o aThomas e nofo pea mo se vaitau i le laueleele o Siona, e faasalalau atu la’u upu.

3 Ia tuu atu i e o totoe e faaauau pea ona talai atu mai lena itula, ma afai latou te faia lenei mea i le maualalo atoa o le loto, i le agamalu ma le alotomaualalo, ma le etali-tiga, o A’u, o le Alii, Ou te tuu atu ia i latou se folafolaga o le a Ou tuu atu mea mo o latou aiga; ma o le a tatalaina se faitotoa aoga mo i latou, mai le taimi lena ma le agai i luma.

4 Ma o le tautotogo a sau, ia tuu atu i latou e o atu i luga o vai tetele, ma folafola atu iina la’u talalelei, o lona atoatoaga, ma molimau atu i lo’u igoa.

5 Ia tuu atu ia te i latou e o ese atu mai la’u au paia i le aai o Fa Uesi, i le aso luasefulu-ono o Aperila e sosoo ai, i le fasi fanua o le a fausia ai lo’u fale, ua fetalai mai ai le Alii.

6 Ia tuu atu i la’u auauna o Ioane Taylor, ma la’u auauna foi o John E. Page, ma la’u auauna foi o Wilford Woodruff, ma la’u auauna foi o Willard Richards, ia tofia e faatutumu tulaga o i latou o e ua pa’u’ū, ma ia faafesootai aloaia i latou e uiga i o latou tofiga.