Tusitusiga Paia
Mataupu Faavae ma Feagaiga 12


Vaega 12

Faaaliga na tuuina mai e ala mai ia Iosefa Samita le Perofeta, ia Iosefa Knight Matua, i Haramoni, Penisilevania, Me 1829. Sa talitonu Iosefa Knight i tautinoga a Iosefa Samita e uiga i lona umia o papatusi o le Tusi a Mamona ma le galuega o le faaliliuga sa faia i le taimi lena, ma sa ia tuu atu i le tele o taimi ni mea e fesoasoani ia Iosefa Samita ma lana tusiupu, ia mafai ai ona laua faaauau pea le faaliliuga. I le talosaga a Iosefa Knight, na ole atu ai le Perofeta i le Alii ma maua ai le faaaliga lenei.

1–6, O e e galulue i le tovine o le a latou maua le olataga; 7–9, O i latou uma o e e mananao i ai ma ua agavaa e mafai ona fesoasoani i le galuega a le Alii.

1 Ua le pine ona oo mai ao se galuega tele ma le ofoofogia i le fanauga a tagata.

2 Faauta, o A’u o le Atua; uai mai i la’u upu, lea ua vave ma mamana, ua maai sili atu nai lo se pelu mata-lua, i le vavaeina o sooga ma le su o ivi; o lea, ia uai mai ai i la’u upu.

3 Faauta, ua sinasina le fanua ua saunia e selesele; o lea, ai se e fia selesele, ia tuu o ia e sasau atu lana selesaito ma lona malosi, ma selesele mai manū o ao, ina ia mafai ona teu e ia mo lona agaga le olataga tumau e faavavau i le malo o le Atua.

4 Ioe, ai se e fia sasau atu lana selesaito ma selesele mai, o ia lava lea ua valaaulia e le Atua.

5 O lea, afai e te ole mai ia te a’u o le a e maua; afai e te tuitui mai o le a tatalaina atu ia te oe.

6 O lenei, ona ua e ole mai, faauta, Ou te fai atu ia te oe, tausi i a’u poloaiga, ma saili e aumai i luma ma faatuina le faamoemoe o Siona.

7 Faauta, Ou te tautala atu ia te oe, ma i latou uma foi o e ua i ai manaoga e aumai i luma ma faatuina lenei galuega;

8 Ma e leai se tasi e mafai ona fesoasoani i lenei galuega vagana ai ua alotomaualalo o ia ma tumu i le ealofa, ua i ai le ifaatuatua, ofaamoemoe, ma le ualofa mama, ua faautauta i mea uma, i soo se mea e tuu atu i lana tausiga.

9 Faauta, o A’u, o lē ua tautala atu i nei upu, o le malamalama ma le ola o le lalolagi, o lea ia uai mai ma lou malosi, ona valaaulia ai lea o oe. Amene.