Tufa’a 130
Te tahi mau arata’ira’a i hōro’ahia mai e Iosepha Semita te peropheta, i Ramus, i Illinois, i te 2 nō ’Ēperēra 1843.
1–3, E nehenehe i te Metua ’e te Tamaiti ’ia fā roa mai i te ta’ata nei ; 4–7, Tē fa’aea nei te mau melahi i roto i te ao tiretiera ; 8–9, E riro te fenua tiretiera ’ei Urima ’e Tumima rahi ; 10–11, E hōro’ahia te hō’ē ’ōfa’i ’uo’uo i te mau ta’ata ato’a ’o tē tomo atu i roto i te ao tiretiera ; 12–17, ’Aita te taime nō te Tae-Piti-Ra’a mai i fa’a’itehia i te peropheta ; 18–19, E pe’e atu te ’ite tei noa’a ia tātou i roto i teie orara’a nā muri ia tātou i te Ti’afa’ahoura’a ; 20–21, E noa’a mai te mau ha’amaita’ira’a nā roto ana’e i te ha’apa’ora’a i te ture ; 22–23, E tino ’i’o ’e te ivi tō te Metua ’e te Tamaiti.
1 ’Ia fā mai te Fa’aora e ’ite ïa tātou iāna i tōna huru mau. E ’ite ïa tātou ē e ta’ata ’oia mai ia tātou ato’a nei.
2 E taua huru hoara’a e vai nei i rotopū ia tātou i’ō nei, e vai ato’a ïa i rotopū ia tātou i reira, terā rā e ’āpitihia atu te reira i te hanahana mure ’ore, ’aore ho’i te reira huru hanahana ia tātou i teienei.
3 Ioane 14:23—Te fāra’a mai o te Metua ’e te Tamaiti, i fa’a’itehia i roto i taua ’īrava ra, ’o te fāra’a mai ïa i roto i te tino mau ; ’e te mana’o ē tē pārahi nei te Metua ’e te Tamaiti i roto i te ’ā’au o te ta’ata nei e mana’o tahito roa ïa nō te mau ha’apa’ora’a ’e’ē, ’e e mea hape te reira.
4 Nō te pāhono i te uira’a ē—E ’ere ānei ē ’ua fa’aauhia te tai’ora’a i tō te Atua taime, tō te melahi taime, tō te peropheta taime, ’e tō te ta’ata nei taime, i te palaneta i pārahihia e rātou ra ?
5 Tē pāhono atu nei au ē, ’Ē. ’Āre’a rā ’aore e melahi ’o tē utuutu mai nei i teie nei ao maori rā ’o rātou ’o tei fa’ata’ahia ’e ’aore rā ’o tei fa’ata’a-’ē-hia na nō te reira.
6 ’Aita ho’i te mau melahi e pārahi nei i ni’a i te hō’ē palaneta mai te fenua nei te huru ;
7 Terā rā tē pārahi nei rātou i mua i te aro o te Atua, i ni’a i te hō’ē ao mai te hō’ē moana hi’o ’e te auahi te huru, ’ei reira te mau mea ato’a e fa’a’itehia mai ai nō tō rātou iho hanahana, ’o tei ma’iri i muri, ’o tē vai nei i teienei, ’e ’o tē vai a muri atu, ’e tē vai noa nei ho’i i mua i te Fatu i te mau taime ato’a.
8 Te vāhi e pārahihia nei e te Atua ’o te hō’ē ïa Urima rahi ’e te Tumima rahi.
9 E fa’arirohia teie nei ao, i roto i tōna huru mo’a ’e te tāhuti ’ore ho’i, mai te hi’o ateate te huru ’e e riro ho’i ïa ’ei Urima ’e te Tumima i te mau ta’ata ’o tē pārahi i ni’a iho i te reira, ’e nā roto i te reira te mau mea ato’a e fa’a’itehia mai ai ia rātou ’o tē pārahi i ni’a iho i te reira, te mau mea nō ni’a i te bāsileia iti a’e, ’e ’aore rā te mau bāsileia ato’a nō te fa’anahora’a i raro a’e i te reira ; ’e e riro teie nei ao nō te Mesia.
10 ’Ei reira te ’ōfa’i teatea i fa’a’itehia mai i roto i te Apokalupo 2:17, e fa’arirohia ai ’ei Urima ’e te Tumima i te ta’ata tāta’itahi ’o tē fāri’i mai i te hō’ē, nā roto i te reira e fa’a’itehia mai ai te mau mea nō te fa’anahora’a nō te mau bāsileia i ni’a a’e ra ;
11 ’E e hōro’ahia te hō’ē ’ōfa’i teatea ia rātou tāta’itahi ato’a ’o tē tae i roto i te bāsileia tiretiera, ’e ’ua pāpa’ihia te hō’ē i’oa ’āpī i ni’a iho i te reira, ’e ’aita roa te hō’ē ta’ata i ’ite i te reira maori rā ’o ’oia ’o tei fāri’i i te reira. Te i’oa ’āpī ra ’o te parau tāviri ïa.
12 Tē tohu nei au, i roto i te i’oa o te Fatu ra te Atua ē, te ha’amatara’a o te mau fifi ’o tē fa’atupu i te ha’amani’i-rahi-ra’a i te toto hou te taera’a mai o te Tamaiti a te Ta’ata nei, e tupu ïa i South Carolina.
13 E tupu mai paha ïa nā roto i te parau nō ni’a i te fa’atītīra’a. ’Ua fa’a’ite mai te hō’ē reo i teie mea iā’u nei, ’a pure ’ū’ana atu ai au nō ni’a i teie tumu parau, i te 25 nō Tītema 1832.
14 Tē pure ’ū’ana ra vau i te hō’ē taime ’ia ’ite i te taime nō te taera’a mai o te Tamaiti a te Ta’ata, i fa’aro’o ai au i te hō’ē reo i te fa’ahitira’a mai i teie mau mea i muri nei :
15 E Iosepha, e tā’u tamaiti, mai te mea e ora noa ’oe ē tae noa atu i te va’u ’ahuru ma pae o tō ’oe matahiti, e ’ite ïa ’oe i te mata o te Tamaiti a te Ta’ata nei ; nō reira ’ua nava’i teie, ’e ’eiaha e ha’ape’ape’a fa’ahou mai iā’u nō ni’a i teie nei mea.
16 ’Ua vaiihohia vau mai te reira, ’e e’ita i nehenehe iā’u ’ia fa’aoti ē e parau ānei teie taera’a mai nō te ha’amatara’a o te mileniuma ’e ’aore rā i te tahi taera’a mai ānei, ’e ’aore rā e pohe ānei au ’e nā roto i te reira e ’ite ai i tōna mata.
17 Tē ti’aturi nei au ē e’ita te Tamaiti a te Ta’ata nei e tae mai hou te reira taime.
18 Te mau parau tumu nō te ’ite ’o tē noa’a mai ia tātou i roto i teie nei orara’a, e ti’a ato’a mai ïa te reira ’e ’o tātou i roto i te ti’afa’ahoura’a.
19 ’E mai te mea e hau a’e te ’ite ’e te māramarama e noa’a i te hō’ē ta’ata i roto i teie nei orara’a, nā roto i tōna itoito ’e tōna ha’apa’o i tō te tahi ra, e hau ato’a ïa tōna maita’i mai te reira ato’a te fāito i roto i te ao a muri atu.
20 Tē vai nei te hō’ē ture e’ita e nehenehe e fa’a’ore, ’o tei fa’aotihia i ni’a i te ra’i hou roa te fa’atumura’ahia ’o teie nei ao, ’e tei ni’a iho i te reira te mau ha’amaita’ira’a ato’a i fa’atumuhia ai—
21 ’E ’ia noa’a mai ia tātou te hō’ē noa atu ha’amaita’ira’a nō ’ō mai i te Atua ra, e mea nā roto ïa i te ha’apa’ora’a i terā ture i fa’atumuhia terā ha’amaita’ira’a.
22 E tino ’i’o ’e te ivi tō te Metua mai te au i tō te ta’ata nei te huru ; ’e tō te Tamaiti ato’a ho’i ; ’āre’a rā te Vārua Maita’i ra ’aita tōna e tino ’i’o ’e te ivi, e tino Vārua ana’e rā tōna. ’Āhiri ’aita ra, ’aita ïa e ti’a i te Vārua Maita’i ’ia pārahi i roto ia tātou nei.
23 E ti’a i te ta’ata nei ’ia fāri’i i te Vārua Maita’i, ’e e ti’a i te reira ’ia pou mai i ni’a iho iāna ma te fa’aea tāmau ’ore noa i ni’a iho iāna.