1 Tapno mapasingkedan ti pammaneknek iti daytoy a libro ken iti Libro ni Mormon, iwaragawagmi ti panagbalin a ^amartir da ^bJoseph Smith a Propeta, ken Hyrum Smith a Patriarka. Napaltoganda iti pagbaludan ti ^cCarthage, iti maika-27 ti Hunio, 1844, iti agarup a maika-lima iti malem, babaen dagiti armado a manangriribuk—a napintaan iti nangisit—a buklen ti 150 agingga iti 200 a tattao. Immuna a napaltogan ni ^dHyrum ket natuang a sitatalna nga inyesngawna: Matayakon! Pinanggep ni Joseph ti tumappuak iti tawa, ket napaltogan, nga inyesngawna: O Apo a Diosko! Napaltoganda pay laeng uray no nataydan, iti nakas-ang a wagas, ket agpadada nga immawat iti sagpapat a bala.

2 Da laeng ^aJohn Taylor ken Willard Richards, dua a kameng dagiti Sangapulo-ket-dua, kadagidi a kanito; nasalput ti immuna iti uppat a bala ngem nakalasat; nakapaglibas ti maikadua babaen ti tulong ti Dios a pulos a di nasagid ti robana.

3 Ni Joseph Smith, ti ^aPropeta ken ^bMammadto ti Apo, ti ad-adu ti naaramidna, malaksid ken ni Jesus, para iti pannakaisalakan dagiti tao iti daytoy a lubong, ngem iti asino man a tao a nagbiag ditoy. Iti uneg ti ababa a panawen ti duapulo-ket-uppat a tawen, nairuarna ti Libro ni Mormon, nga impatarusna babaen ti sagut ken bileg ti Dios, ken isu ti nakaigapuan ti pannakaipablaakna kadagiti dua a kontinente; naiwarasna ti ^cpakabuklan ti agnanayon nga ebanghelio, a linaonna, kadagiti uppat a suli ti daga; nairuarna dagiti paltiing ken bilin a nangbukel iti daytoy a libro ti Doktrina ken Katulagan, ken adu pay a sabsabali a nainsiriban a dokumento ken pangiwanwan para iti pagimbagan dagiti annak ti tattao; inummongna ti rinibribu a Santo iti Ud-udina nga Aldaw, binangonna ti naindaklan a ^dsiudad, ken nangibati iti dayaw ken nagan a saan a mapapatay. Nagbiag a naindaklan, ken natay a naindaklan iti imatang ti Dios ken dagiti taona; ket kas iti kangrunaan a tinudingan ti Apo kadagiti nagkauna a panawen, pinaneknekanna ti misionna ken dagiti aramidna babaen ti bukodna a ^edara; ken kasta met ni kabsatna a Hyrum. Iti biag saanda a nagsina, ket iti patay saanda a napagsina!

4 Idi napan ni Joseph iti Carthage a mangidatag iti bagina kadagiti sinsinan a kasapulan ti paglintegan, dua wenno tallo nga aldaw sakbay ti pannakapapatayna, kinunana: “Mapanak a kas iti ^akarnero iti pagpartian; ngem natalingenngenak a kas iti agsapa ti kalgaw; addaanak iti konsiensia a dinadael ti basol iti Dios, ken kadagiti amin a tao. Matayakto nga awanan basol, ket masasaoakto—napapatay nga awanan gaway.”—Iti dayta met la nga agsapa, idi nakarubuaten ni Hyrum a mapan—masaonto kadi iti pagpartian? Wen, isu a kasta—binasana ti sumaganad a binatog, iti asideg ti paggibusan ti maika-sangapulo-ket-dua a kapitulo ti Ether, iti Libro ni Mormon, ket linukibna ti binulong a yanna:

5 Ket napasamak nga inkararagko iti Apo nga ikkanna dagiti Gentil iti parabur, tapno maaddaanda iti kaasi. Ket napasamak a kinuna ti Apo kaniak: No awananda iti kaasi awan ti aniamanna kenka, sika a napudno; gapuna maaramidto a ^anadalus dagiti pagan-anaymo. Ket gapu ta nakitam ti pagkapsutam, mapapigsakanto, agingga iti pagtugawan iti lugar nga insaganak iti dakkel ken nadaeg a balay ti Amak. Ket ita siak…agpakadaakon kadagiti Gentil; wen, ken kasta met kadagiti kabsatko nga ay-ayatek, agingga nga agkikitatayo iti ^bpangukoman ni Cristo, a pakaammuan amin a tao a saan a natulawan ti pagan-anayko iti darayo. Natayen dagiti ^cmamaneknek, ket matungpalen ti testamento.

6 Uppat-a-pulo ti tawen ni Hyrum Smith idi Pebrero, 1844, ket tallopulo-ket-walo ni Joseph Smith idi Disiembre, 1843; ket kalpasan dayta maibilangen dagiti naganda kadagiti martir iti relihion; ket ti agbasa iti tunggal pagilian mapalagipanto a ti Libro ni Mormon, ken daytoy libro ti Doktrina ken Katulagan ti simbaan, agpateg iti kasayaatan a dara iti maika-sangapulo-ket-siam a siglo a mangidanon kadakuada para iti pannakaisalakan ti narebbek a lubong; ket no malayet ti apuy ti ^anaganus a kayo para iti dayag ti Dios, nalaklakana pay a puoran dagiti nagango a kayo a mangpatarnaw iti bangkag ti pannakadadael. Nagbiagda iti dayag; natayda iti dayag; ket ti kinadayag ti agnanayon a gunggonada. Agtalinaedto ti naganda iti panaglabas ti panawen kadagiti an-annabo a kas gameng kadagiti nasantuan.

7 Awan ti basolda iti ania man a krimen, a kas masansan a napaneknekanda idin, ken naibaludda laeng babaen ti panagkukunsabo dagiti mangliliput ken nadangkes a tattao; ket ti awanan basol a darada iti baldosa ti pagbaludan ti Carthage ti dakkel a timbre a nailanad iti “Mormonismo” a saan a maiwaksi iti ania man a korte iti daga, ket ti awanan basol a darada iti kalasag ti Estado ti Illinois, iti nadadael a pammati ti Estado a kas inkari ti gobernador, ti saksi iti kinapudno ti agnanayon nga ebanghelio a saan a mapadisi ti sangalubongan; ket ti awanan basol a darada iti wagayway ti wayawaya, ken iti magna carta ti Estados Unidos, ti embahador ti relihion ni Jesucristo, a mangsagid kadagiti puso dagiti nalinteg a tao kadagiti amin a pagilian; ket ti awanan basol a darada, a nailaok iti awanan basol a dara dagiti amin a martir iti sirok ti ^aaltar a nakita ni Juan, umararawto iti Apo ti Pangen agingga a maibalesna dayta a dara iti daga. Amen.