Tufa’a 137
E ’ōrama i hōro’ahia ia Iosepha Semita te peropheta, i roto i te hiero i Kirtland, i Ohio, i te 21 nō Tēnuare 1836. Te tumu, nō ni’a ïa i te ravera’a i te mau ’ōro’a ’ei fa’aineinera’a nō te ha’amo’ara’a o te hiero.
1–6, ’Ua ’ite atu te peropeta i tōna taea’e ia Alvin i roto i te bāsileia tiretiera ; 7–9, ’Ua heheuhia mai te mau ha’api’ira’a tumu nō te fa’aorara’a nō te feiā pohe ; 10, E fa’aorahia te mau tamari’i ato’a i roto i te bāsileia tiretiera.
1 ’Ua vētea a’era te mau ra’i i ni’a ia mātou, ’e ’ua ’ite atu ra vau i te bāsileia tiretiera o te Atua, ’e te hanahana ato’a nō te reira, i roto ānei i te tino ’e ’aore rā i rāpae, ’aita e ti’a iā’u ’ia parau.
2 ’Ua ’ite atu ra vau i te nehenehe fāito ’ore o te ’ūputa e nā reira te feiā ’āi’a nō taua bāsileia ra i te tomo atu, ’e ’ua au ho’i te reira i te ha’amenemenera’a auahi ;
3 ’Oia ato’a ’ua ’ite atu ra vau i te terōno hanahana o te Atua, ’e tē pārahi ra te Metua ’e te Tamaiti i ni’a i te reira.
4 ’Ua ’ite atu ra vau i te mau purūmu nehenehe o te reira bāsileia, mai te mea ra ē ’ua hāmanihia te reira i te ’auro.
5 ’Ua ’ite atu ra vau i tō tātou Metua ia Adamu ’e Aberahama ; ’e tō’u metua tāne ’e tō’u metua vahine ; ’e tō’u tua’ana ra ia Alvin, ’o tei pohe a’ena.
6 ’E ’ua māere roa vau e mea nāhea ho’i ’oia i fāri’i ai i te ’āi’ara’a i roto i te reira bāsileia, nō te mea ho’i ’ua fa’aru’e ’ē mai na ’oia i teie orara’a hou te Fatu i fa’atoro mai ai i tōna rima nō te ha’aputuputu ia ’Īserā’ela i te piti o te taime, ’e ’aita ho’i ’oia i bāpetizohia nō te fa’a’orera’a i tāna ra mau hara.
7 Nō reira ’ua tae mai ra te reo o te Fatu iā’u, nā ’ō mai ra : ’O rātou ato’a ’o tei pohe ma te ’ite ’ore i teie nei ’evanelia, ’o tei fāri’i rā i te reira ’āhiri rātou i fa’ati’ahia ’ia ora noa, e riro ïa rātou ’ei feiā ’āi’a nō te bāsileia tiretiera o te Atua ;
8 ’Oia ato’a ’o rātou ato’a ’o tē pohe mai teie atu taime ma te ’ite ’ore i te reira, ’o tei ti’a rā ’ia fāri’i i te reira ma tō rātou ’ā’au ato’a, e riro ïa rātou ’ei feiā ’āi’a nō te reira bāsileia ;
9 Nō te mea nā’u, nā te Fatu, e ha’avā i te mau ta’ata ato’a mai te au i tā rātou ra mau ’ohipa, ’e mai te au ho’i i te hina’aro o tō rātou ra mau ’ā’au.
10 ’E ’ua ’ite ato’a atu ra vau ē te mau tamari’i ato’a ’o tei pohe nā mua a’e i taeahia ai te fāito tano nō tō rātou matahiti ’a ta’a ai ia rātou tō rātou iho mana’o, ’ua fa’aorahia ïa i roto i te bāsileia tiretiera nō te ao ra.