19. kafli

Opinberun gefin með Joseph Smith í Manchester, New York, í mars 1830 (History of the Church, 1:72–74). Í sögu sinni kynnir spámaðurinn hana sem „boðorð Guðs en ekki manna til Martins Harris, gefið af honum, sem eilífur er” (History of the Church, 1:72).

1–3, Kristur hefur allt vald; 4–5, Allir menn verða að iðrast eða þjást; 6–12, Eilíf refsing er Guðs refsing; 13–20, Kristur þjáðist fyrir alla, svo að þeir þyrftu ekki að þjást, ef þeir iðruðust; 21–28, Prédikið fagnaðarerindi iðrunar; 29–41, Boðið gleðitíðindi.

  ÉG er Alfa og Ómega, Kristur Drottinn. Já, ég er einmitt hann, upphafið og endirinn, lausnari heimsins.

  Ég hef leitt til lykta og fullnað vilja hans, sem ég tilheyri, já, föðurins, hvað mig varðar— það hef ég gjört, svo að allt geti orðið mér undirgefið—

  Ég hef allt vald, jafnvel til að tortíma Satan og verki hans við endalok veraldar og hinn síðasta mikla dómsdag, sem ég mun láta koma yfir íbúa hennar, og dæmi hvern mann í samræmi við verk hans og þær dáðir, sem hann drýgði.

  Og vissulega verður hver maður að iðrast eða þjást, því að ég, Guð, er óendanlegur.

  Þess vegna afturkalla ég ekki þá dóma, sem ég felli, en vei mun verða, grátur, kvein og gnístran tanna, já, hjá þeim sem verða mér á vinstri hönd.

  Engu að síður er ekki skráð, að enginn endir verði á kvöl þessari, en skrifað stendur óendanleg kvöl.

  Enn fremur stendur skrifað eilíf fordæming. Þess vegna er það greinilegra en aðrar ritningargreinar, svo að það geti haft áhrif á hjörtu mannanna barna, einvörðungu nafni mínu til dýrðar.

  Ég mun þess vegna útskýra fyrir þér þennan leyndardóm, því að rétt er að þú þekkir hann eins og postular mínir.

  Ég tala til þín, sem útvalinn ert í þessu, já, sem hinn eini, svo að þú megir inn ganga til hvíldar minnar.

  10 Því að sjá hversu mikill leyndardómur guðleikans er! Því að sjá, ég er óendanlegur og sú refsing, sem hönd mín veitir, er óendanleg refsing, því að Óendanlegur er nafn mitt. Þess vegna—

  11 Eilíf refsing er Guðs refsing.

  12 Óendanleg refsing er Guðs refsing.

  13 Þess vegna býð ég þér að iðrast og halda boð þau, sem þú hefur meðtekið í mínu nafni af hendi þjóns míns Josephs Smith yngri—

  14 Og það er með almáttugu valdi mínu að þú hefur meðtekið þau—

  15 Þess vegna býð ég þér að iðrast— iðrast þú, ella mun ég ljósta þig með munnsprota mínum og með bræði minni og heilagri reiði, og þjáningar þínar verða sárar— hversu sárar veist þú ekki, hversu nístandi veist þú ekki, já, hversu erfiðar að bera veist þú ekki.

  16 Því að sjá, ég, Guð, hef þolað þetta fyrir alla, svo að þeir þurfi ekki að þjást, ef þeir iðrast—

  17 En iðrist þeir ekki, verða þeir að þjást, alveg eins og ég—

  18 Þjáningu, sem varð þess valdandi, að ég, sjálfur Guð, æðstur allra, skalf af sársauka og blóð draup úr hverri svitaholu, og þjáðist bæði á líkama og í anda—og með hrolli óskaði ég þess að þurfa ekki að bergja þennan beiska bikar—

  19 Dýrð sé föðurnum eigi að síður, og ég tæmdi hann og lauk undirbúningi mínum fyrir mannanna börn.

  20 Þess vegna býð ég þér enn að iðrast, ella auðmýki ég þig með almáttugu valdi mínu, og að þú játir syndir þínar, ella verður þú að þola þær refsingar, sem ég hef talað um og þú reyndir í örlitlum mæli, já, í hinum alsmæsta, þegar ég dró anda minn í hlé.

  21 Og ég býð þér að prédika ekkert nema iðrun, og sýna þetta ekki heiminum fyrr en ég tel það viturlegt.

  22 Því að þeir þola ekki kjöt nú, en mjólk verða þeir að fá. Þess vegna mega þeir ekki vita þetta, svo að þeir farist ekki.

  23 Lær af mér og hlusta á orð mín. Gakk í hógværð anda míns og þú munt eiga frið í mér.

  24 Ég er Jesús Kristur. Ég kom að vilja föðurins og ég gjöri hans vilja.

  25 Og enn býð ég þér, að þú skalt ekki girnast konu náunga þíns, né sækjast eftir lífi náunga þíns.

  26 Og enn býð ég þér, að þú skalt ekki horfa í eigur þínar, heldur láta þær fúslega af hendi til prentunar Mormónsbókar, sem geymir sannleikann og orð Guðs—

  27 Sem er orð mitt til Þjóðanna, svo að brátt geti það borist Gyðingum, sem Lamanítar eru leifar af, svo að þeir megi trúa fagnaðarerindinu, en vænti ekki komu Messíasar, sem þegar hefur komið.

  28 Og enn býð ég þér, að þú skalt biðja upphátt jafnt og í hjarta þínu. Já, frammi fyrir heiminum jafnt og í leynum, opinberlega jafnt og í einrúmi.

  29 Og þú skalt boða gleðitíðindi, já, birta þau á fjöllunum og á hverri hæð, meðal allra þeirra, sem þér verður leyft að sjá.

  30 Og þú skalt gjöra það í fullri auðmýkt og treysta á mig og lasta ekki lastmælendur.

  31 Og þú skalt ekki ræða kennisetningar, heldur boða iðrun og trú á frelsarann og fyrirgefningu syndanna með skírn og með eldi, já, sjálfum heilögum anda.

  32 Sjá, þetta eru mikil boð og þau síðustu, sem ég gef þér varðandi þetta mál, því að þetta mun nægja þér á daglegri göngu þinni, já, allt til æviloka þinna.

  33 Og vansæld muntu hljóta, ef þú lítilsvirðir þessar ráðleggingar, já, bæði tortímingu þína og eigna þinna.

  34 Lát af hendi hluta eigna þinna, já, jafnvel hluta lands þíns, allt utan þess, sem þarf til framfærslu fjölskyldu þinnar.

  35 Greið þú skuldina sem þú hefur samið um við prentarann. Losa þig úr ánauð.

  36 Yfirgef hús þitt og heimili, nema þegar þú æskir að sjá fjölskyldu þína—

  37 Og tala frjálst til allra. Já, prédika, hvetja, boða sannleikann, já, hárri röddu, með gleðihljómi og hrópa—Hósanna! Hósanna! Blessað sé nafn Drottins Guðs!

  38 Bið ávallt og ég mun úthella anda mínum yfir þig og mikil verður blessun þín—já, jafnvel meiri en þó að þú hlytir fjársjóði á jörðu og spillingarhneigð í sama mæli.

  39 Sjá, getur þú lesið þetta án þess að fagna og lyfta hjarta þínu í gleði

  40 Eða getur þú ráfað um lengur eins og blindur leiðsögumaður

  41 Eða getur þú verið auðmjúkur og hógvær og hagað þér viturlega frammi fyrir mér? Já, kom til mín, frelsara þíns. Amen.