1 Te tupura’a o te ’Ēkālesia a te Mesia i teie mau mahana hope’a nei, ’oia ho’i i te matahiti hō’ē tauatini ’e va’u hānere ’e toru ’ahuru, mai te taera’a mai o tō tātou Fatu ’e te Fa’aora ’o Iesu Mesia i roto i te tino nei. ’Ua fa’ati’a-mau-hia ’e ’ua fa’atumu-mau-hia ho’i mai te au i te mau ture o tō mātou nei hau fenua, nā roto i te hina’aro ’e te mau fa’auera’a a te Atua, i te maha o te ’āva’e, ’e i te ono o te mahana nō te ’āva’e tei parauhia ’Ēperēra ra—

2 ’Ua hōro’ahia mai taua mau fa’auera’a ra ia Iosepha Semita, tamaiti, ’o tei mā’itihia e te Atua ra, ’e ’ua fa’atōro’ahia ’ei ’āpōsetolo nā Iesu Mesia, ’e ’ua riro ’oia te peresibutero mātāmua nō teie nei ’ēkālesia ;

3 ’E ia Oliver Cowdery ho’i, ’o tei mā’iti-ato’a-hia e te Atua ’ei ’āpōsetolo nā Iesu Mesia, ’e ’ua riro ’oia te piti o te peresibutero nō teie nei ’ēkālesia, ’e ’ua fa’atōro’ahia ’oia i raro a’e i tōna rima.

4 ’E ’ua nā-reira-hia nā roto i te maita’i o tō tātou Fatu ’e tō tātou Fa’aora ’o Iesu Mesia, ’ei iāna ho’i te hanahana ato’a, i teienei ē a muri noa atu. ’Āmene.

5 I muri a’e i te fa’a’ite-pāpū-ra’a-hia i taua peresibutero mātāmua ra ’e ’ua matara tāna ra mau hara, ’ua fifi fa’ahou ’oia i te mau mana’o ’ā’au teitei o teie nei ao ;

6 I muri a’e i tōna tātarahapara’a ’e tōna fa’aha’eha’ara’a iāna iho ma te ’ā’au tae, nā roto i te fa’aro’o, ’ua poihere ihora te Atua iāna nā roto i te hō’ē melahi mo’a, ’e ’ua au tōna mata mai te uira, ’e ’ua ’ahuhia ’oia i te ’ahu hau roa a’e i te vi’ivi’i ’ore ’e te teatea i te mau huru teatea ato’a ra ;

7 ’E ’ua hōro’a mai ra iāna te hō’ē mau fa’auera’a ’o tei fa’auru mai iāna ra ;

8 ’E ’ua hōro’a mai ra iāna te mana nō ni’a mai ra, nā roto i nā rāve’a ’o tei fa’aineine-’ē-hia na, nō te ’īritira’a i te parau nō te Buka a Moromona ;

9 Tei roto i te reira te pāpa’a parau nō te hō’ē nūna’a ta’ata i hi’a ra, ’e te ’īra’a ho’i o te ’evanelia a Iesu Mesia i te mau ’Ētene ’e i te ’āti Iuda ato’a ra ;

10 ’O tei hōro’ahia mai nā roto i te fa’aurura’a, ’e ’ua ha’apāpūhia mai ia vetahi ’ē ra nā roto i te utuutura’a a te mau melahi, ’e ’ua fa’a’ite-pāpū-hia mai i tō te ao nei e rātou ra—

11 ’Ei ha’apāpūra’a te reira i tō te ao nei ē e parau mau te mau pāpa’ira’a mo’a, ’e tē fa’auru mau mai nei te Atua i te ta’ata nei, ’e tē mā’iti nei ho’i ia rātou ’ia rave i tāna ’ohipa mo’a i teie nei tau ’e i teie nei u’i, mai tō te mau ’anotau i muta’a ihora ;

12 Nā roto i te reira tē fa’a’itehia mai nei ē, ’o ’oia te Atua hō’ē inanahi ra, i teienei mahana, ē a muri noa atu. ’Āmene.

13 Nō reira, nō te mea tē vai ra te mau ’ite pāpū roa, nā roto i te reira tō te ao nei e ha’avāhia ai, ’e tae noa atu ia rātou ato’a ’o tē noa’a ia rātou te ’ite i teie nei ’ohipa a muri atu.

14 ’E ’o rātou ’o tē fāri’i mai i te reira nā roto i te fa’aro’o, ma te rave i te parauti’a ra, e fāri’i ïa rātou i te korona nō te ora mure ’ore ;

15 ’O rātou rā ’o tē fa’a’eta’eta i tō rātou ’ā’au ma te ti’aturi ’ore, ’e ’o te pāto’i i te reira, e riro te reira ’ei fa’ahapara’a ia rātou iho—

16 Nō te mea nā te Fatu ra o te Atua i parau mai te reira. ’E ’ua fa’aro’o mātou, te mau peresibutero nō te ’ēkālesia, ’e tē fa’a’ite atu nei mātou ē ’ua ’ite mātou i te mau parau a te Ari’i hanahana i ni’a ra, ’ei iāna ra te hanahana ē a muri noa atu. ’Āmene.

17 Nā roto i teie nei mau mea mātou i ’ite ai ē, tē vai nei te Atua i ni’a i te ra’i ’e tei iāna te mau mana ato’a, ’e e huru mure ’ore tōna, ’e tē ora noa ra ’oia mai tahito mai ā ē a muri noa atu ’ei Atua taui ’ore ; ’e nāna i hāmani i te ra’i ’e te fenua, ’e te mau mea ato’a ho’i i roto i taua nā vāhi ra ;

18 ’E ’ua hāmani ’oia i te ta’ata nei, te tāne ’e te vahine, mai te au i tōna iho hōho’a ’e tōna iho huru, ’oia i hāmani ai ia rāua.

19 ’E ’ua hōro’a mai ra i te mau fa’auera’a ia rāua ’ia here ’e ’ia tāvini ho’i rāua iāna, i te Atua ora ’e te parau mau ana’e ra, ’e ’o ’oia ana’e tā rāua e ha’amori.

20 Nā roto rā i te ’ōfatira’a i teie nei mau ture mo’a, ’ua riro te ta’ata i te hina’aro o te tino nei mai te diabolo ra te huru, ’e ’ua riro ’ei ta’ata hi’a.

21 Nō reira, ’ua hōro’a mai ra te Atua Manahope i tāna Tamaiti fānau tahi, mai te au i tei pāpa’ihia i roto i taua mau pāpa’ira’a mo’a i hōro’ahia mai e ana ra.

22 ’Ua ro’ohia ’oia i te fa’ahemara’a, ’aita rā ’oia i ha’apa’o i taua mau mea ra.

23 ’Ua fa’asātaurohia ’oia, ’ua pohe, ’e ’ua ti’afa’ahou mai i te toru o te mahana ra ;

24 ’E ’ua haere atu ra ’oia i ni’a i te ra’i ra, nō te pārahi i raro i te pae ’atau o te Metua, ’e nō te fa’atere ari’i mai te au i te hina’aro o te Metua ra ;

25 ’Ia rātou ato’a ’o tē ti’aturi ’e ’o tē bāpetizohia i roto i tōna i’oa mo’a, ’e ’o tē ha’apa’o maita’i ē tae noa atu i te hope’a ra, e fa’aorahia ïa rātou—

26 E ’ere ’o rātou ana’e ’o tei ti’aturi i muri a’e i tōna taera’a mai i te ’āfa ti’a o te mau tau ra, i roto i te tino tāhuti nei, ’o rātou ato’a rā mai te mātāmua mai ā, ’o rātou ato’a ’o tei pārahi i’ō nei hou tōna taera’a mai, ’o tei ti’aturi i te mau parau a te mau peropheta mo’a ra, ’o tei parau atu mai te au i tō rātou ra fa’aurura’ahia e te hōro’a a te Vārua Maita’i, ’o tei fa’a’ite pāpū mai i te parau mau nōna i te mau mea ato’a ra, e noa’a ïa ia rātou pā’āto’a te ora mure ’ore,

27 ’E ’o rātou ato’a ’o tē tae mai a muri a’era, ’o tē ti’aturi i te mau hōro’a ’e te mau pi’ira’a a te Atua nā roto i te Vārua Maita’i, ’o tē fa’a’ite mai i te parau nō te Metua ’e nō te Tamaiti ho’i ;

28 ’E ’o taua Metua ra, ’e te Tamaiti, ’e te Vārua Maita’i ra, hō’ē ïa Atua mure ’ore, ma te hope’a ’ore, ’e ’aita tō rātou e ’ōti’a. ’Āmene.

29 ’E ’ua ’ite mātou ē, ’ia tātarahapa te mau ta’ata ato’a ’e ’ia ti’aturi i te i’oa o Iesu Mesia e ti’a ai, ’e ’ia ha’amori i te Metua nā roto i tōna ra i’oa, ’e ’ia ha’apa’o maita’i nā roto i te fa’aro’o i tōna ra i’oa ē tae noa atu i te hope’a ra, ’ia ’ore rā e ’ore ho’i ïa rātou e fa’aorahia i roto i te bāsileia o te Atua.

30 ’E ’ua ’ite mātou ē, e mea ti’a ’e e parau mau te fa’ati’ara’a ta’ata nā roto i te maita’i o tō tātou Fatu te Fa’aora ra ’o Iesu Mesia ;

31 ’E ’ua ’ite ato’a mātou ē, e mea ti’a ’e e parau mau te ha’amo’ara’a ta’ata nā roto i te maita’i o tō tātou Fatu te Fa’aora ra ’o Iesu Mesia, ’ia rātou ato’a ’o tē here ’e ’o tē tāvini i te Atua ma tō rātou itoito ato’a, ’e te mana’o ato’a, ’e te pūai ato’a.

32 E nehenehe rā i te ta’ata ’ia hi’a atu mai roto atu i te maita’i ’e ’ia fa’aru’e i te Atua ora ;

33 Nō reira, ’ia ara tō te ’ēkālesia ma te pure tu’utu’u ’ore, ’oi topa rātou i roto i te fa’ahemara’a ;

34 ’Oia ïa, ’e ’ia ara ato’a ho’i te feiā i ha’amo’ahia ra.

35 ’E ’ua ’ite mātou ē e parau mau teie nei mau mea, mai te au i te mau heheura’a a Ioane ra, ’aore i ’āmui atu ’aore ho’i i ’īriti mai i te hō’ē mea nō roto mai i te parau tohu o tāna ra buka, te mau pāpa’ira’a mo’a, ’e te mau heheura’a a te Atua ’o tē tae mai a muri atu nā roto i te hōro’a ’e te mana o te Vārua Maita’i, te reo o te Atua, ’e te utuutura’a a te mau melahi ra.

36 ’E nā te Fatu ra nā te Atua i parau mai i te reira ; ’ei iāna te tura, te mana, ’e te hanahana i tōna i’oa mo’a, i teienei ē a muri noa atu. ’Āmene.

37 ’E teie fa’ahou ā, nā roto i te fa’auera’a i te ’ēkālesia nō ni’a i te rāve’a nō te bāpetizora’a—’O rātou ato’a ’o tē fa’aha’eha’a ia rātou iho i mua i te Atua, ’e ’o tē hina’aro ’ia bāpetizohia ra, ’e ’ia haere mai ma te ’ā’au ’oto ’e te vārua ha’eha’a, ’e ’o tē fa’a’ite mai i mua i te ’ēkālesia ē, ’ua tātarahapa mau rātou i tā rātou ra mau hara ato’a, ’e tē hina’aro nei rātou ’ia rave i te i’oa o Iesu Mesia i ni’a iho ia rātou ra, ma te hina’aro mau ’ia tāvini iāna ē tae noa atu i te hope’a ra, ’e ’ia fa’a’ite pāpū roa mai nā roto i tā rātou ra mau ’ohipa ē ’ua fāri’i rātou i te hō’ē tufa’a nō te Vārua o te Mesia nō te ha’amatarara’a i tā rātou ra mau hara, e fāri’ihia rātou nā roto i te bāpetizora’a i roto i tāna ra ’ēkālesia.

38 Te ’ohipa a te mau peresibutero, te mau tahu’a, te mau ha’api’i, te mau diakono, ’e te mau melo nō te ’ēkālesia a te Mesia—E peresibutero ho’i te ’āpōsetolo, ’e tāna ’ohipa ra ’ia bāpetizo ïa ;

39 ’E ’ia fa’atōro’a i te tahi atu ā mau peresibutero, te mau tahu’a, te mau ha’api’i, ’e te mau diakono ;

40 ’E ’ia ha’amaita’i i te pāne ’e te uaina—nā tāpa’o nō te ’i’o ’e te toto o te Mesia—

41 ’E ’ia ha’amau ia rātou ’o tei bāpetizohia i roto i te ’ēkālesia, nā roto i te tu’ura’a rima nō te bāpetizora’a i te auahi ’e te Vārua Maita’i, mai te au i te mau pāpa’ira’a mo’a ra ;

42 ’E ’ia ha’api’i, tātara i te parau, fa’aitoito, bāpetizo, ’e ha’apa’o ho’i i tō te ’ēkālesia ;

43 ’E ’ia ha’amau i tō te ’ēkālesia nā roto i te tu’ura’a rima, ’e te hōro’ara’a atu i te Vārua Maita’i ;

44 ’E ’ia arata’i i te mau putuputura’a ato’a.

45 E arata’i te mau peresibutero i te mau putuputura’a mai te au i te arata’ira’a a te Vārua Maita’i, ’ia au i te mau fa’auera’a ’e te mau heheura’a a te Atua.

46 E ’ohipa nā te tahu’a ’ia a’o, ’ia ha’api’i, ’ia tātara i te parau, ’e ’ia fa’aitoito, ’e ’ia bāpetizo, ’e ’ia ha’amaita’i ho’i i te ’ōro’a,

47 ’E ’ia hāhaere i te fare o te mau melo tāta’itahi, ’e ’ia fa’aitoito atu ia rātou ’ia pure vaha ’e i te vāhi mo’emo’e ho’i, ’e ’ia ha’apa’o ho’i i te mau ’ohipa nō te ’utuāfare.

48 E ti’a ato’a iāna ’ia fa’atōro’a i te tahi atu mau tahu’a, te mau ha’api’i ’e te mau diakono.

49 ’E e arata’i ’oia i te mau putuputura’a mai te mea ’aita e peresibutero tō reira ;

50 Terā rā, mai te mea e peresibutero tō reira, teie ana’e iho tē ti’a iāna ’ia rave, ’oia ho’i, ’ia a’o, ’ia ha’api’i, ’ia tātara i te parau, ’ia fa’aitoito, ’e ’ia bāpetizo,

51 ’E ’ia hāhaere i te fare o te mau melo tāta’itahi, ma te fa’aitoito atu ia rātou ’ia pure vaha ’e i te vāhi mo’emo’e ho’i, ’e ’ia ha’apa’o ho’i i te mau ’ohipa nō te ’utuāfare.

52 I roto i teie nei mau ’ohipa ato’a, e tauturu te tahu’a i te peresibutero ’ia tītauhia mai.

53 Te ’ohipa a te ha’api’i ra ’o te ha’apa’o ïa i tō te ’ēkālesia i te mau taime ato’a, ’e ’ia pārahi noa i pīha’i iho ia rātou, ’e ’ia fa’aitoito ia rātou ra ;

54 ’E ’ia hi’o noa ’ia ’ore te ’ohipa ’ī’ino ’ia ō mai i roto i te ’ēkālesia, ’eiaha ato’a te ’ā’au ’eta’eta te tahi i te tahi, ’eiaha ato’a te ha’avare, te ’ōhumu, ’e te paraura’a i te parau ’ino ;

55 ’E ’ia hi’o ato’a ’ia ha’aputuputu pinepine tō te ’ēkālesia, ’e ’ia hi’o ato’a ’ia rave te mau melo ato’a i tā rātou ’ohipa.

56 ’E e arata’i ’oia i te mau ha’aputuputura’a, mai te mea ’aore e peresibutero ’e ’aore ato’a e tahu’a tō reira—

57 ’E e tauturuhia ’oia i te mau taime ato’a i roto i tāna mau ’ohipa i roto i te ’ēkālesia, e te mau diakono mai te mea e tītauhia mai.

58 Terā rā, ’aita tō te mau ha’api’i ’e te mau diakono e mana ’ia bāpetizo, ’ia ha’amaita’i i te ’ōro’a, ’e ’ia tu’u i te rima.

59 ’Āre’a rā, e ti’a ia rātou ’ia fa’aara, ’ia tātara i te parau, ’ia fa’aitoito, ’e ’ia ha’api’i, ’e ’ia ani atu i te mau ta’ata ato’a ’ia haere mai i te Mesia ra.

60 E fa’atōro’ahia te mau peresibutero tāta’itahi, te mau tahu’a tāta’itahi, te mau ha’api’i tāta’itahi, ’e te mau diakono tāta’itahi mai te au i te mau hōro’a ’e te mau mā’itira’a a te Atua iāna ra ; ’e e fa’atōro’ahia ’oia nā roto i te mana o te Vārua Maita’i, ’o tē vai ra i roto i te ta’ata ’o tē fa’atōro’a ra iāna.

61 E ha’aputuputu mai te mau peresibutero nō teie nei ’ēkālesia a te Mesia i roto i te hō’ē ’āmuira’a i te hō’ē taime i roto i nā ’āva’e e toru ra, ’e ’aore rā i terā taime e i terā taime, mai te au i te fa’ata’ahia e taua mau putuputura’a ra ;

62 ’E e ravehia i roto i taua mau ’āmuira’a ra te mau ’ohipa ato’a a te ’ēkālesia ’o tē ti’a ’ia ravehia i te reira taime.

63 E mea ti’a i te mau peresibutero ’ia fāri’i i tā rātou ra mau parau fa’ati’a nā roto i te tahi atu mau peresibutero, nā roto i te mā’itira’a a tō te ’ēkālesia nō reira mai rātou ra, ’e ’aore rā nā roto i te mau ’āmuira’a.

64 E mea ti’a i te mau tahu’a, te mau ha’api’i, ’e te mau diakono tāta’itahi, ’o tē fa’atōro’ahia e te hō’ē tahu’a, ’ia rave mai i te hō’ē fa’a’itera’a nā te tahu’a tei fa’atōro’a iāna. ’Ia fa’a’itehia atu teie parau fa’a’ite i te hō’ē peresibutero, e roa’a ïa te parau fa’ati’a i te ta’ata i fa’atōro’ahia nō te ha’amana iāna ’ia rave i te mau ’ohipa nō tōna tōro’a, ’e ’aore rā e fāri’i ’oia i te reira nā roto i te hō’ē ’āmuira’a.

65 ’Eiaha te hō’ē ta’ata ’ia fa’atōro’ahia i te hō’ē noa atu tōro’a i roto i teie nei ’ēkālesia, i te vāhi tē vai ra te hō’ē ’āma’a i ha’amauhia i reira, maori rā ’ia fāri’ihia te reira nā mua nā roto i te mā’itira’a a tō te ’ēkālesia ;

66 Terā rā, e ti’a ïa i te mau peresibutero peresideni, te mau ’episekōpo hāhaere, te mau melo nō te ’āpo’ora’a teitei, te mau tahu’a rahi, ’e te mau peresibutero ho’i, ’ia fa’atōro’a i te ta’ata i te mau vāhi ’aore tō reira e ’āma’a nō te ’ēkālesia nō te mā’itira’a.

67 E fa’atōro’ahia te mau peresideni nō te autahu’ara’a teitei (’oia ho’i te peresibutero peresideni), te ’episekōpo, te melo nō te ’āpo’ora’a teitei, ’e te tahu’a rahi, i raro a’e i te fa’aterera’a a te hō’ē ’āpo’ora’a teitei ’e ’aore rā te ’āmuira’a rahi.

68 Te ’ohipa a te mau melo i muri a’e i tō rātou fāri’ira’ahia nā roto i te bāpetizora’a—E mea ti’a ’ia nava’i te taime nō te mau peresibutero ’e ’aore rā te mau tahu’a, ’ia tātara atu ia rātou te mau mea ato’a nō te ’ēkālesia a te Mesia, ’ia noa’a ia rātou te ’ite, hou tō rātou ravera’a i te ’ōro’a ’e tō rātou ha’amaura’ahia nā roto i te tu’ura’a rima o te mau peresibutero, ’ia ti’a i te mau mea ato’a ’ia ravehia ma te ’āfaro.

69 ’E e fa’a’ite te mau melo i mua i te ’ēkālesia, ’e i mua ato’a i te mau peresibutero, nā roto i te haere’a paieti ’e te mau parau paieti ē e mea ti’amā rātou, ’ia au te ’ohipa ’e te fa’aro’o i tei fa’a’itehia i roto i te mau pāpa’ira’a mo’a ra—ma te haere’a mo’a i mua i te Fatu.

70 Te mau melo ato’a nō te ’ēkālesia a te Mesia e tamari’i tā rātou, e ’āfa’i mai ïa rātou ia rātou i te mau peresibutero i mua i te ’ēkālesia, ’e nā rātou e tu’u i tō rātou pu’e rima i ni’a iho ia rātou nā roto i te i’oa o Iesu Mesia, ’e e ha’amaita’i ho’i ia rātou i roto i tōna ra i’oa.

71 ’Aita roa e ti’a i te hō’ē ta’ata ’ia fāri’ihia i roto i te ’ēkālesia a te Mesia maori rā ’ia tae i te matahiti e ti’a’aura’a tōna i mua i te Atua, ’e ’ua ti’a iāna ’ia tātarahapa.

72 E ravehia te bāpetizora’a mai teie i muri nei nō rātou ato’a ’o tei tātarahapa ra—

73 E haere te ta’ata ’o tei mā’itihia e te Atua, ’e ’o tei ha’amanahia e Iesu Mesia ’ia bāpetizo, ’e te ta’ata ato’a ’o tē tu’u atu iāna iho ’ia bāpetizohia, te tāne ’e ’aore rā te vahine, i roto i te pape, ’e e parau ’oia, ma te fa’ahiti i te i’oa o te tāne ’e ’aore rā te vahine : Nō te mana i tu’uhia mai iā’u e Iesu Mesia, tē bāpetizo nei au ia ’oe i te i’oa o te Metua, ’e nō te Tamaiti, ’e nō te Vārua Maita’i. ’Āmene.

74 ’Ei reira ’oia e fa’autuhi atu ai iāna, te tāne ’e ’aore rā te vahine, i raro a’e i te pape, ’e e haere fa’ahou mai i ni’a mai raro mai i te pape ra.

75 E mea ti’a i tō te ’ēkālesia ’ia ta’iruru pinepine mai nō te rave i te pāne ’e te uaina ’ei ha’amana’ora’a i te Fatu ra ia Iesu ;

76 ’E nā te peresibutero ’e ’aore rā nā te tahu’a e ha’amaita’i i te reira ; ’e mai teie te huru ’o tāna ha’amaita’ira’a i te reira—e tūturi ’oia ’e te ’ēkālesia ato’a i raro ’e e pure atu ’oia i te Atua nā roto i te pure ’ā’au marū, i te nā-’ō-ra’a ē :

77 E te Atua, te Metua mure ’ore, tē ani atu nei mātou ia ’oe nā roto i te i’oa o tō Tamaiti, ’o Iesu Mesia, e ha’amaita’i mai ’e e ha’amo’a mai i teie nei pāne nā te mau vārua o te feiā ato’a ’o tē rave mai nei, ’ia ’amu rātou i te reira ma te ha’amana’o i te tino o tō Tamaiti, ’e ’ia fa’a’ite rātou ia ’oe, e te Atua, te Metua mure ’ore, e ti’a ia rātou i te rave i te i’oa o tō Tamaiti i ni’a iho ia rātou, ’e i te ha’amana’o ā iāna ē a muri noa atu, ma te ha’apa’o maita’i i tāna mau fa’aue tāna i hōro’a mai ia rātou ra ; ’ia vai noa tōna Vārua i roto ia rātou ē a muri noa atu. ’Āmene.

78 Te huru nō te ha’amaita’ira’a i te uaina—e rave ato’a ’oia i te ’āu’a, ’e e nā ’ō ai ē :

79 E te Atua, te Metua mure ’ore, tē ani atu nei mātou ia ’oe nā roto i te i’oa o tō Tamaiti, ’o Iesu Mesia, e ha’amaita’i mai ’e e ha’amo’a mai i teie nei uaina nā te mau vārua o te feiā ato’a ’o tē inu mai nei, ’ia inu rātou i te reira ma te ha’amana’o i te toto o tō Tamaiti i ha’amani’ihia nō rātou ra ; ’ia fa’a’ite rātou ia ’oe, ’e te Atua, te Metua mure ’ore, e ha’amana’o ā rātou iāna ē a muri noa atu, ’ia vai noa tōna Vārua i roto ia rātou. ’Āmene.

80 ’Ia ha’apa’o ’ore te hō’ē melo nō te ’ēkālesia a te Mesia, ’e ’aore rā ’ia ’itehia ’oia i roto i te hape, e fa’a’āfarohia ’oia mai te au i tā te mau pāpa’ira’a mo’a e fa’a’ite mai.

81 E hōpoi’a ïa nā te mau ’ēkālesia e rave rahi i roto i te ’ēkālesia a te Mesia, ’ia tono i te hō’ē ’e ’aore rā ’ia rahi atu ā o tā rātou ra mau ha’api’i i te mau ’āmuira’a ’o tē fa’aterehia e te mau peresibutero nō te ’ēkālesia.

82 E ’āfa’i mai rātou i te hō’ē tāpura nō te mau i’oa o te mau melo ’o tei ’āmui mai i roto i te ’ēkālesia mai te ’āmuira’a i ma’iri a’era ; ’e ’aore rā e ’āfa’ihia te reira e te rima o te hō’ē tahu’a ; ’ia tāpura-noa-hia te mau i’oa o tō te ’ēkālesia ato’a i roto i te hō’ē buka e te hō’ē peresibutero, ’o tā te mau peresibutero e mā’iti i terā taime ’e i terā taime.

83 ’E ’oia ato’a, mai te mea e hurihia te tahi i rāpae i te ’ēkālesia, ’ia ’īriti-’ē-hia atu ïa tō rātou ra mau i’oa i rāpae i te buka vaira’a i’oa a te ’ēkālesia.

84 ’Ia fa’aru’e ana’e te mau melo i tā rātou ’āmuira’a mātauhia, ’e ’ia reva atu rātou i te hō’ē ’āmuira’a ’aita rātou i ’ite-maita’i-hia i reira, e mea maita’i ’ia ’āfa’i rātou i te hō’ē rata nō te ha’apāpū ē e melo ti’ara’a maita’i iho ā rātou, ’ia pāpa’ihia taua rata ra i te i’oa o te hō’ē peresibutero ’e ’aore rā tahu’a, ’o tei ’ite-maita’i-hia e te melo ’o tē fāri’i ra i te rata, ’e ’aore rā ’ia pāpa’ihia te i’oa o te mau ha’api’i ’e ’aore rā te mau diakono nō te ’ēkālesia.