Seksyon 25

Pagpadayag nga gihatag pinaagi ni Joseph Smith ang Propeta, sa Harmony, Pennsylvania, Hulyo 1830 (History of the Church, 1:103–104). (Tan-awa sa ulohan sa seksyon 24.) Kini nga pagpadayag nagpahayag sa kabubut-on sa Ginoo ngadto kang Emma Smith, ang asawa sa Propeta.

1–6, Si Emma Smith, pinili nga babaye, gitawag sa pagtabang ug paghupay sa iyang bana; 7–11, Siya usab gitawag sa pagsulat, pagpatin-aw sa mga kasulatan, ug pagpili sa mga himno sa simbahan; 12–14, Ang awit sa mga matarung usa ka pag-ampo ngadto sa Ginoo; 15–16, Mga baruganan sa pagkamasulundon niini nga pagpadayag magamit sa tanan.

  PATALINGHUG ngadto sa tingog sa Ginoo nga imong Dios, samtang Ako mamulong nganha kanimo, Emma Smith, akong anak nga babaye; kay sa pagkatinuod Ako moingon nganha kanimo, tanan kadto kinsa nakadawat sa akong ebanghelyo sila anak nga mga lalaki ug anak nga mga babaye sa akong gingharian.

  Usa ka pagpadayag Ako naghatag nganha kanimo mahitungod sa akong kabubut-on; ug kon ikaw magmatinud-anon ug maglakaw sa mga agianan nga maligdong diha sa akong atubangan, ako mopanalipod sa imong kinabuhi, ug ikaw makadawat sa kabilin sa Zion.

  Tan-awa, ang imong mga sala gipasaylo diha kanimo, ug ikaw ang pinili nga babaye, kinsa Ako nagtawag.

  Ayaw pagmulo tungod sa mga butang nga ikaw wala makakita, kay sila gitago gikan kanimo ug gikan sa kalibutan, nga mao ang kaalam ngari kanako diha sa panahon nga moabut.

  Ug ang buhatan sa imong katungdanan mao ang paghupay ngadto sa akong sulugoon, si Joseph Smith, Jun., imong bana, sa iyang mga pag-antus, uban sa makalipay nga mga pulong, sa espiritu sa kaaghup.

  Ug ikaw mouban kaniya sa takna sa iyang paglakaw, ug ngadto kaniya ikaw ang tigsulat, samtang wala pay usa ka tigsulat alang kaniya, nga Ako mahimo nga mopadala sa akong sulugoon, Oliver Cowdery, bisan asa Ako buot.

  Ug ikaw i-orden pinaagi sa iyang mga kamot sa pagpatin-aw sa mga kasulatan, ug pag-awhag sa simbahan, sumala sa ikahatag kanimo pinaagi sa akong Espiritu.

  Kay siya mopandong sa iyang mga kamot diha kanimo, ug ikaw makadawat sa Espiritu Santo, ug ang imong panahon ihatag ngadto sa pagsulat, ug sa daghan nga pagtuon.

  Ug ikaw kinahanglan dili mahadlok, kay ang imong bana motabang kanimo sa simbahan; kay ngadto kanila mao ang iyang balaan nga tawag, nga unta ang tanan nga mga butang mapadayag ngadto kanila, gani unsa nga Ako buot, sumala sa ilang hugot nga pagtuo.

  10 Ug sa pagkatinuod Ako moingon nganha kanimo, nga ikaw mosalikway sa mga butang niini nga kalibutan, ug pangitaa ang mga butang nga maayo.

  11 Ug ihatag nganha kanimo, usab, ang paghimo og pagpili sa sagrado nga mga himno, nga kini ihatag nganha kanimo, diin makapahimuot ngari kanako, alang sa akong simbahan.

  12 Kay ang akong kalag mahimuot sa awit sa kasingkasing; oo, ang awit sa mga matarung mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo.

  13 Busa, ipataas ang imong kasingkasing ug paglipay, ug hupot ngadto sa pakigsaad nga ikaw mihimo.

  14 Pagpadayon diha sa Espiritu sa kaaghup, ug pagbantay sa garbo. Himoa nga ang imong kalag mahimuot sa imong bana, ug ang himaya nga moabut diha kaniya.

  15 Paghupot sa akong mga sugo sa kanunay, ug ang korona sa pagkamatarung ikaw makadawat. Ug gawas kon ikaw mobuhat niini, kon hain Ako ikaw dili makaadto.

  16 Ug sa pagkatinuod, sa pagkatinuod, Ako moingon nganha kanimo, nga kini ang akong tingog ngadto sa tanan. Amen.