Pāpa’ira’a mo’a
Te Ha’api’ira’a Tumu ’e te mau Fafaura’a 28


Tufa’a 28

E heheura’a tei hōro’ahia mai nā roto ia Iosepha Semita te peropheta, ia Oliver Cowdery, i Fayette, i New York, i te ’āva’e Tetepa 1830. ’Ua roa’a ia Hiram Page, e melo ’oia nō te ’Ēkālesia, te hō’ē ’ōfa’i, ’e ’ua parau fa’ahua noa ’oia ē, tē fāri’i ra ’oia i te tahi mau heheura’a nā roto i te reira, nō ni’a i te fa’atupura’a ia Ziona ’e nō te fa’anahonahora’a i roto i te ’Ēkālesia. ’Ua vare te tahi mau melo i teie nei mau parau, ’e ’ua arata’i-hape-hia ’o Oliver Cowdery nā roto i te reira. Nā mua noa a’e i te ha’amatara’a nō te hō’ē ’āmuira’a i fa’ata’ahia, ’ua ani ti’a atu ra te peropheta i te Fatu nō ni’a i te reira, ’e ’ua hōro’ahia mai teie nei heheura’a.

1–7, ’Ua fāri’i Iosepha Semita i te mau tāviri nō te mau parau ’aro, ’e ’o ’oia ana’e tē fāri’i i te mau heheura’a nō ni’a i te ’Ēkālesia ; 8–10, ’Ua tītauhia Oliver Cowdery ’ia poro i te ’evanelia i te mau ’āti Lamana ; 11–16, ’Ua ha’avare Sātane ia Hiram Page ’e ’ua hōro’a ’oia i te mau heheura’a hape iāna.

1 Inaha, tē parau atu nei au ia ’oe na, e Oliver, e hōro’ahia ïa ia ’oe ’ia fa’aro’ohia ’oe e tō te ’ēkālesia i roto i te mau mea ato’a tā ’oe e ha’api’i ia rātou nā roto i te Fa’aa’o, te mau mea nō ni’a i te mau heheura’a ’e te mau fa’auera’a ho’i tā’u i hōro’a atu.

2 Terā rā, inaha, ’oia mau, ’oia mau, tē parau atu nei au ia ’oe na, ’aita roa te hō’ē ta’ata e mā’itihia ’ia fāri’i i te mau fa’auera’a ’e te mau heheura’a i roto i teie nei ’ēkālesia maori rā ’o tō’u tāvini ra ’o Iosepha Semita, tamaiti, nō te mea tē fāri’i nei ’oia i te reira mai te au i tā Mose i nā reira.

3 ’E ’ia ha’apa’o ’oe i te mau mea tā’u e hōro’a atu iāna ra, mai ia Aarona ato’a, ’ia fa’a’ite ti’a atu i te mau fa’auera’a ’e te mau heheura’a, ma te mana ’e te ha’amanara’a i tō te ’ēkālesia.

4 ’E mai te mea e arata’i te Fa’aa’o ia ’oe, i te hō’ē noa atu taime ’e ’aore rā i te mau taime ato’a, ’ia parau ’e ’aore rā ’ia ha’api’i nā roto i te fa’auera’a i tō te ’ēkālesia, e ti’a ïa ia ’oe ’ia nā reira.

5 Terā rā, ’eiaha roa ’oe e pāpa’i nā roto i te fa’auera’a, nā roto rā i te pa’ari ;

6 ’E ’eiaha roa ’oe e fa’atere iāna ’o tei riro ’ei upo’o nō ’oe, ’e te upo’o ho’i nō te ’ēkālesia ;

7 Nō te mea ’ua hōro’a atu vau iāna i te mau tāviri nō te mau parau ’aro, ’e te mau heheura’a ’o tei tāpirihia ra, ē tae noa atu i te taime au e fa’ata’a ai i te tahi ’ē ’ei mono nōna ia rātou ra.

8 ’E i teienei, inaha, tē parau atu nei au ia ’oe na, e haere atu ’oe i te mau ’āti Lamana ’e e a’o atu i tā’u ’evanelia ia rātou ra ; ’e ’ia fāri’i mai rātou i tā ’oe ra mau ha’api’ira’a, e fa’ati’a ïa ’oe i tā’u ’ēkālesia i rotopū ia rātou ra ; ’e e noa’a ia ’oe te mau heheura’a ; terā rā ’eiaha ’oe e pāpa’i i te reira nā roto i te fa’auera’a.

9 ’E i teienei, inaha, tē parau atu nei au ia ’oe na ē ’aita te reira i heheuhia mai, ’e ’aita ho’i e ta’ata i ’ite i te vāhi e patuhia ai te ’oire nō Ziona, ’āre’a rā e hōro’ahia mai te reira a muri atu. Inaha, tē parau atu nei au ia ’oe ē tei te mau hiti fenua te reira, tāpiri ti’a i te mau ’āti Lamana ra.

10 ’Eiaha ’oe e fa’aru’e i teie nei vāhi ē tae noa atu i te otira’a o te ’āmuira’a ; ’e e fa’ata’ahia tō’u tāvini ra ’o Iosepha ’ia peresideni i ni’a i te ’āmuira’a ’e te reo nō te reira ; ’e ’o tāna e parau atu ia ’oe ra, ’o tā ’oe ïa e parau atu.

11 ’E teie fa’ahou ā, e rave ’oe i tō ’oe taea’e ra ia Hiram Page, ’o ’ōrua ana’e, ’e e fa’a’ite atu ’oe iāna ē e ’ere nā’u nei terā mau mea tāna i pāpa’i nā roto i taua ’ōfa’i ra, ’e ’ua ha’avare Sātane iāna ;

12 Inaha ho’i, ’aita roa teie nei mau mea i fa’ata’ahia nāna, ’e ’aita roa ato’a ho’i te hō’ē noa atu mea e fa’ata’ahia nā te hō’ē noa atu melo ’o tē ’ore e au i te mau fafaura’a a te ’ēkālesia.

13 E mea ti’a roa ho’i i te mau mea ato’a ’ia rave-’āfaro-hia ’e nā roto ho’i i te fāri’i-tāhō’ē-ra’a tāhō’ē a tō te ’ēkālesia pā’āto’a, nā roto i te pure fa’aro’o.

14 ’E e tauturu ’oe i te fa’aotira’a i teie nei mau mea ato’a, mai te au i te mau fafaura’a a te ’ēkālesia, hou ’oe e haere atu ai i tō ’oe tere i rotopū i te mau ’āti Lamana.

15 ’E e hōro’ahia atu ia ’oe mai te taime ’oe e haere atu ai, ē tae noa atu i te taime ’oe e ho’i mai ai, te ’ohipa tā ’oe e rave.

16 ’E e mea ti’a ia ’oe ’ia hāmama i tō ’oe vaha i te mau taime ato’a, ma te fa’a’ite atu i tā’u nei ’evanelia ma te reo ’oa’oa. ’Āmene.