Tufa’a 4
E heheura’a tei hōro’ahia mai nā roto ia Iosepha Semita, te peropheta, i tōna ra metua tāne, ia Iosepha Semita, metua, i Harmony, i Pennsylvania, i te ’āva’e Fepuare 1829.
1–4, Nā te tāvinira’a itoito e fa’aora i te mau tāvini o te Fatu ; 5–6, nā roto i te pe’era’a i te mau huru o te Atua e ti’a ai ia rātou ’ia rave i tāna ’ohipa ; 7, E mea ti’a roa ’ia ’imi māite i te mau mea nō ’ō mai i te Atua ra.
1 I teienei inaha, tē fātata mai nei te tau e tupu mai ai te hō’ē ’ohipa māere i rotopū i te mau tamari’i a te ta’ata nei.
2 Nō reira, ’o ’outou ’o tē rave i te ’ohipa a te Atua, ’a mata nā ’outou ’ia tāvini iāna ma tō ’outou ’ā’au ato’a, ma tō ’outou pūai, ma tō ’outou mana’o ’e ma tō ’outou itoito ho’i, ’ia ti’a parauti’a mai ’outou i mua i te aro o te Atua ’ia tae i te mahana hope’a ra.
3 Nō reira, mai te mea e hina’aro tō ’outou ’ia tāvini i te Atua, ’ua mā’itihia ïa ’outou nō te ’ohipa.
4 Inaha ho’i ’ua teatea te ’āua ’e ’ua ineine roa nō te tau ’auhune ; ’e inaha, ’o ’oia ’o tē fa’a’ohipa i te mauha’a ’ō’oti ma tōna pūai, ’o ’oia ïa ’o tē ha’aputuputu mai ’ia ’ore ’oia ’ia mou, ’ia noa’a rā te ora i tōna vārua ;
5 ’E nā te fa’aro’o, te ti’aturi, te aroha mau ’e te here, ma te mata rōtahi i te hanahana o te Atua e fa’aineine iāna nō te ’ohipa.
6 ’A ha’amana’o noa i te fa’aro’o, te vi’ivi’i ’ore, te ’ite, te hitahita ’ore, te fa’a’oroma’i, te aroha taea’e, te huru paieti, te aroha mau, te ’ā’au ha’eha’a, ’e te itoito.
7 ’A ani, ’e e fāri’i ïa ’outou ; ’a pātōtō, ’e e ’īritihia mai ïa ia ’outou. ’Āmene.