Tusitusiga Paia
Mataupu Faavae ma Feagaiga 53


Vaega 53

Faaaliga na tuuina mai e ala mai ia Iosefa Samita le Perofeta, ia Algernon Sini Gilbert, i Katelani, Ohaio, i le aso 8 o Iuni, 1831. I le talosaga a Sini Gilbert, na ole atu ai le Perofeta i le Alii e faatatau i le galuega ma le tofiga o le Uso o Gilbert i le Ekalesia.

1–3, O le valaauga ma le filifiliga o Sini Gilbert i le Ekalesia o le faauuina lea ia avea o se toeaina; 4–7, Ia auauna atu foi o ia o se sui o le epikopo.

1 Faauta, Ou te fai atu ia te oe, la’u auauna, o Sini Gilbert, ua Ou faalogoina au tatalo; ma sa e valaau mai ia te a’u ia faailoa atu ia te oe, e le Alii lou Atua, e uiga i lou valaauga ma lou afilifiliga i le ekalesia, lea ua faatuina i luga e A’u, o le Alii, i aso nei e gata ai.

2 Faauta, o A’u, o le Alii, o lē na afaasatauroina mo agasala a le lalolagi, Ou te tuu atu ia te oe se poloaiga ia e elafoai i le lalolagi.

3 Ia e ave i ou luga la’u faauuga, o le toeaina lea, e talai atu le faatuatua ma le salamo ma le afaamagaloina o agasala, e tusa ma la’u upu, ma le mauaina o le Agaga Paia e ala i le faaee atu o elima;

4 Ma avea foi o se asui mo lenei ekalesia i le nofoaga lea o le a tofia e le epikopo, e tusa ma poloaiga o le a tuuina atu pe a mavae nei.

5 O lenei foi, e moni Ou te fai atu ia te oe, ia alu lau malaga faatasi ma a’u auauna o Iosefa Samita, Le Itiiti, ma Sini Rikitone.

6 Faauta, o sauniga muamua nei o le a e maua; ma o le toega o le a faailoa atu i se taimi o le a oo mai, e tusa ma lau galuega i lo’u tovine.

7 O lenei foi, Ou te manao ia e iloa, e na’o ia o lē e atumau e oo i le iuga e faaolaina. E faapea lava. Amene.