Pāpa’ira’a mo’a
Te Ha’api’ira’a Tumu ’e te mau Fafaura’a 58


Tufa’a 58

E heheura’a tei hōro’ahia mai nā roto ia Iosepha Semita te peropheta, i Ziona, i te mata’eina’a nō Jackson, i Missouri, i te 1 nō ’Ātete 1831. I mua atu, i te Sābati mātāmua i muri a’e i te taera’a mai te peropheta ’e te tahi pupu ta’ata i te mata’eina’a nō Jackson, i Missouri, ’ua fa’aterehia te hō’ē putuputura’a ’ēkālesia, ’e ’ua fāri’ihia e to’opiti nā melo nā roto i te bāpetizora’a. I taua hepetoma ra, ’ua tae mai te tahi pae o te feiā mo’a nō Colesville mai, nō te ’āma’a Thompson (’a hi’o i te tufa’a 54). E rave rahi te ta’ata tei ’ana’anatae roa ’ia ’ite i te hina’aro o te Fatu nō ni’a iho ia rātou i teie vāhi putuputura’a ’āpī.

1–5, ’O rātou ’o tei fa’aitoito i roto i tō rātou ’ati rahi e fa’akoronahia ïa rātou i te hanahana ; 6–12, ’Ua tītauhia i te feiā mo’a ’ia fa’aineine nō te fa’aipoipora’a a te ’Ārenio ’e nō te ’amura’a mā’a ahiahi a te Fatu ; 13–18, ’O te mau ’episekōpo te mau ha’avā nō ’Īserā’ela ; 19–23, ’Ua tītauhia te feiā mo’a ’ia ha’apa’o i te mau ture o te fenua ; 24–29, ’Ua tītauhia te mau ta’ata ’ia fa’a’ohipa i tō rātou ti’amāra’a nō te rave i te ’ohipa maita’i ; 30–33, Nā te Fatu e hōro’a mai i te mau fa’auera’a ’e nāna ho’i e tāpe’a atu ; 34–43, Nō te tātarahapa, e mea ti’a roa i te mau ta’ata ’ia fā’i ’e ’ia ha’apae i tā rātou mau hara ; 44–58, ’Ua tītauhia te feiā mo’a ’ia ho’o mai i tō rātou iho fenua ’āi’a ’e ’ia ha’aputuputu i Missouri ; 59–65, ’Ua ti’a roa i te ’evanelia ’ia porohia i te mau ta’ata ato’a.

1 ’A ha’apa’o mai na ’o ’outou e te mau peresibutero nō tā’u nei ’ēkālesia, ’e ’a fa’aro’o mai na tō ’outou tari’a i tā’u nei parau, ’e ’a ha’api’i i te mau mea nō’u nei mai tā’u i hina’aro ia ’outou na, ’e nō ni’a ho’i i teie nei fenua tā’u i tono atu ia ’outou na.

2 Nō te mea ’oia mau tē parau atu nei au ia ’outou na, e ao tōna ’o tei ha’apa’o i tā’u mau fa’auera’a i roto i te orara’a nei ’e ’aore rā i roto i te pohe ; ’e ’o ’oia ’o tē ha’apa’o maita’i i roto i te ’ati rahi ra, ’ua hau a’e ïa tāna utu’a maita’i i te bāsileia o te ao ra.

3 ’Aore e ti’a ia ’outou i teie nei taime ’ia ’ite nā roto i tō ’outou mata tāhuti nei, i te ’ōpuara’a a tō ’outou Atua nō ni’a i te mau mea ’o tē tupu a muri atu ra, ’e te hanahana ho’i ’o tē tae mai i muri a’e i te mau ’ati rahi e rave rahi ra.

4 Nō te mea, i muri a’e i te mau ’ati rahi e rave rahi ra, e tae mai ai te mau ha’amaita’ira’a. Nō reira, tē tae mai ra te mahana ’outou e fa’akoronahia ai i te hanahana rahi ; ’aita ā i tae te hora, tē fātata mai ra rā.

5 ’A ha’amana’o i teie, ’o tā’u e fa’a’ite atu ia ’outou nā mua, ’ia ti’a ia ’outou ’ia tāpe’a i te reira i te ’ā’au ra, ’e ’ia fāri’i ho’i i te reira ’o tē tae mai i muri iho ra.

6 Inaha, ’oia mau tē parau atu nei au ia ’outou na, nō teie mea vau i tono atu ai ia ’outou—’ia riro ’outou ’ei feiā ha’apa’o maita’i, ’e ’ia fa’aineinehia tō ’outou ’ā’au nō te fa’a’ite i te ’itera’a pāpū nō ni’a i te mau mea ’o tē tupu mai ;

7 ’E teie ato’a, ’ia fa’aturahia ’outou i te ha’amaura’a i te niu, ’e i te paraura’a atu i te parau fa’a’ite nō te fenua, ’ei reira te Ziona o te Atua e fa’ati’ahia ai ;

8 ’E teie ato’a, ’ia fa’aineinehia te hō’ē fa’a’amu’a maitata’i nā te feiā veve, ’oia ïa, ’ei fa’a’amu’a i te mau mea poria, ’e te uaina tahito i fa’aateate-maita’i-hia ra, ’ia ’ite tō te fenua nei ē, e ’ore roa te vaha o te mau peropheta e hape ;

9 ’Oia ïa ’ei ’amura’a mā’a ahiahi nō te fare o te Fatu, i fa’aineine-maita’i-hia, ’e e anihia mai ho’i tō te mau nūna’a ato’a nei ’ia ’amu i reira.

10 Nā mua te feiā tao’a ’e te feiā ’ite roa, te feiā ’aravihi ’e te hanahana ho’i ;

11 ’E i muri iho i te reira e tae mai ai te mahana nō tō’u mana, ’ei reira te feiā veve, te piri’o’i, te matapō, ’e te tari’a turi e haere mai ai i roto i te fa’aipoipora’a a te ’Ārenio ra, ’e e ’amu i te ’amura’a ahiahi a te Fatu, i fa’aineinehia nō te mahana rahi e tae mai ra.

12 Inaha, nā’u, nā te Fatu, i parau i te reira.

13 ’E ’ia fa’ahaerehia atu te ’itera’a pāpū nā Ziona atu, ’oia ïa, mai roto mai i te vaha o te ’oire nō te ’āi’a o te Atua ra—

14 ’Oia ïa, nō reira vau i tono atu ai ia ’outou i teie vāhi, ’e ’ua mā’iti ho’i i tō’u tāvini ra ia Edward Partridge, ’e ’ua fa’ata’a atu iāna i tāna ’ohipa i teie nei fenua.

15 Terā rā, ’ia ’ore ’oia ’ia tātarahapa i tāna mau hara, ’oia ho’i te ti’aturi ’ore ’e te ’ā’au ’eta’eta, ’ia ara māite ’oia ’ia ’ore ’oia ’ia hi’a.

16 Inaha, ’ua hōro’ahia atu tāna ’ohipa iāna ra, ’e e’ita ho’i e hōro’a-fa’ahou-hia.

17 ’E ’o ’oia ’o tē ti’a mai i roto i teie ’ohipa, ’ua fa’ata’ahia ïa ’oia ’ia riro ’ei ha’avā i ’Īserā’ela, mai te au i tei ravehia i muta’a ihora, ’ia tātufa’a i te mau fenua nō te ’āi’a o te Atua i tāna ra mau tamari’i ;

18 ’E ’ia ha’avā i tōna ra mau ta’ata nā roto i te ’itera’a pāpū o te feiā parauti’a ra, ’e nā roto ho’i i te tauturura’a a tōna nā tauturu, mai te au i te mau ture o te bāsileia ’o tei hōro’ahia mai e te mau peropheta a te Atua ra.

19 Nō te mea ’oia mau tē parau atu nei au ia ’outou na, e ha’apa’ohia tā’u ture i ni’a i teie nei fenua.

20 ’Eiaha te hō’ē ta’ata ’ia mana’o ē, e fa’atere hau ’oia ; nā te Atua rā e fa’atere iāna ’o tē ha’avā ra, mai te au i tōna iho hina’aro, ’oia ho’i, ’o ’oia ’o tē a’o ’e ’aore rā ’o tē pārahi i ni’a i te pārahira’a ha’avā ra.

21 ’Eiaha te ta’ata ’ia ’ōfati i te mau ture o te fenua, nō te mea ’o ’oia ’o tē ha’apa’o i te mau ture a te Atua ra, ’aore ïa ’oia e ’ōfati i te mau ture o te fenua.

22 Nō reira, ’ia auraro atu i te mau mana e vai nei, ē tae noa atu i te taime e fa’atere ari’i ai ’oia ’o tei ti’a ’ia fa’atere ari’i, ’e ’a ha’avī atu ai i te mau ’enemi ato’a i raro a’e i tōna ’āvae.

23 Inaha, te mau ture tā ’outou i fāri’i i tō’u nei rima, ’o te mau ture ïa nō te ’ēkālesia, ’e nā roto i teie nei māramarama ’outou e fa’a’ite atu ai i te reira. Inaha, tei ’ō nei ā te pa’ari.

24 ’E i teienei, mai te au i tā’u i parau atu nō ni’a i tō’u tāvini, ia Edward Partridge, ’o teie fenua nei ’o tōna ïa fenua pārahira’a, ’e nō rāua ho’i ’o tāna i fa’ata’a ’ei nā tauturu nōna ; ’e ’o te fenua pārahira’a ato’a ïa nōna ’o tā’u i fa’ata’a ’ei ha’apa’o i tā’u fare vaira’a tao’a ;

25 Nō reira, ’ia ’āfa’i mai rātou i tō rātou ra mau ’utuāfare i teie nei fenua, mai te au i tā rātou e ’āparau i rotopū ia rātou iho ’e iā’u ato’a nei.

26 Inaha ho’i, e ’ere i te mea ti’a iā’u ’ia fa’aue atu i te mau mea ato’a ; nō te mea ’o ’oia ’o tē fa’ahepohia i roto i te mau mea ato’a, e tāvini fa’atau ïa ’oia, e ’ere ho’i i te mea pa’ari ; nō reira, ’aita ’oia e fāri’i i te utu’a maita’i.

27 ’Oia mau tē parau atu nei au, e mea ti’a i te ta’ata nei ’ia rave ’ana’anatae i te ’ohipa maita’i, ’e ’ia rave ho’i i te mau ’ohipa e rave rahi nā roto i tō rātou iho hina’aro, ’e ’ia fa’atupu fa’arahi ho’i i te parauti’a ;

28 Tei roto ho’i ia rātou te mana, i riro ai rātou ’ei ti’a’au ia rātou iho. ’E mai te mea e rave te ta’ata nei i te maita’i e ’ore roa rātou e ’ere i te utu’a maita’i.

29 ’Āre’a rā, ’o ’oia ’o tē ’ore e rave i te hō’ē mea ē tae noa atu i te taime ’oia e fa’auehia ai, ’e ’o tē fāri’i ho’i i te hō’ē fa’auera’a ma te ’ā’au fē’a’a, ’e ’o tē ha’apa’o i te reira ma te fa’atau, ’ua fa’autu’ahia ïa ’oia.

30 ’O vai ho’i au ’o tei hāmani i te ta’ata nei, tē nā reira mai ra te Fatu, ’e ’o tē fa’ariro iāna ’ei ta’ata hara ’ore ’o tei ’ore i ha’apa’o i tā’u nei mau fa’auera’a ?

31 ’O vai ho’i au, tē nā reira mai ra te Fatu, ’o tei fafau mai ’e ’aita i fa’atupuhia ?

32 Tē fa’aue atu nei au, ’e ’aore te ta’ata nei e ha’apa’o ; e fa’a’ore atu ïa vau, ’e ’aita rātou e fāri’i i te ha’amaita’ira’a.

33 ’E i reira rātou e parau mai ai i roto i tō rātou ’ā’au ē : E ’ere teie i te ’ohipa nā te Fatu, nō te mea ’aita tāna mau fafaura’a i fa’atupuhia. E ’ati rā tō te reira huru ta’ata, nō te mea nō raro mai tā rātou ra utu’a, e ’ere nō ni’a mai.

34 ’E i teienei, tē hōro’a atu nei au i te tahi atu ā mau parau ha’amāramarama ia ’outou nō ni’a i teie nei fenua.

35 E pa’ari ïa i roto iā’u nei ’ia riro tō’u tāvini ra ’o Martin Harris ’ei hi’ora’a nā tō te ’ēkālesia, i te tu’ura’a atu i tāna ra mau moni i mua i te ’episekōpo nō te ’ēkālesia.

36 ’E teie ato’a, e ture teie nā te mau ta’ata ato’a ’o tē tae mai i teie nei fenua nō te fāri’i i te hō’ē ’āi’a ; ’e e ha’apa’o ’oia i tāna mau moni mai te au i tei fa’ata’ahia mai e te ture.

37 ’E e mea pa’ari ato’a ïa ’ia ho’ohia mai te mau fenua i Independence, vāhi nō te fare vaira’a tao’a, ’e nō te fare nene’ira’a parau ato’a ho’i.

38 ’E te tahi atu ā mau parau ha’amāramarama nō ni’a i tō’u tāvini ra ia Martin Harris, e hōro’ahia ïa iāna nā roto i te Vārua, ’ia ti’a iāna ’ia fāri’i i tōna ’āi’a mai te au i tōna ra hina’aro ;

39 ’E ’ia tātarahapa ’oia i tāna mau hara, nō te mea tē tītau ra ’oia i te ’āruera’a a tō te ao nei.

40 ’E ’a tu’u ato’a atu i tō’u tāvini ra ia William W. Phelps ’ia ti’a atu i roto i te tōro’a tā’u i fa’ata’a nōna ra, ’e ’ia fāri’i ho’i i tōna ’āi’a i teie fenua ;

41 ’E e mea ti’a ato’a iāna ’ia tātarahapa, nō te mea, ’aore au, ’o te Fatu i māuruuru iāna, nō te mea tē tītau nei ’oia ’ia hau a’e ’oia i ni’a, ’e ’aore ho’i i nava’i tōna marū i mua iā’u nei.

42 Inaha, ’o ’oia ’o tei tātarahapa i tāna ra mau hara, ’ua fa’a’orehia ïa te reira, ’e e ’ore ho’i au ’o te Fatu e ha’amana’o fa’ahou ā i te reira.

43 Nā roto i teie nei mea e ’ite ai ’outou ē, ’ua tātarahapa ānei te ta’ata i tāna ra mau hara—inaha, e fā’i mai ’oia i te reira ’e e ha’apae ’ē roa atu ho’i i te reira.

44 ’E i teienei, ’oia mau, tē parau atu nei au nō ni’a i te toe’a o te mau peresibutero nō tā’u nei ’ēkālesia, ’aore ā te taime i tae mai, e ma’iri ho’i te mau matahiti e rave rahi, e fāri’i ai rātou i tō rātou ra ’āi’a i teie nei fenua, maori rā ’ia tītau rātou i te reira nā roto i te pure fa’aro’o, i reira e fa’ata’a ai te Fatu i te reira nā rātou.

45 Inaha ho’i, e tūra’i ’āmui mai rātou i te mau ta’ata i te vāhi hō’ē, mai te mau hope’a mai o te fenua nei.

46 Nō reira, ’a ha’aputuputu mai ’outou ia ’outou iho i te vāhi hō’ē ra ; ’e ’o rātou ato’a ’o tei ’ore i fa’ata’ahia ’ia fa’aea mai i teie nei fenua, ’a tu’u atu ia rātou ’ia poro haere atu i te ’evanelia i te mau retioni ē ’ati noa a’e ra ; ’e ’ia oti te reira, ’a tu’u atu ia rātou ’ia ho’i atu i tō rātou ra mau ’utuāfare.

47 ’A tu’u atu ia rātou ia a’o nā te pae ’ē’a ’e ’ia fa’a’ite i tō rātou ’itera’a pāpū i te parau mau i te mau vāhi ato’a ra, ’e ’ia parau atu i te feiā tao’a, tei teitei e tei ha’eha’a, ’e te feiā veve ho’i ’ia tātarahapa.

48 ’E ’a tu’u atu ia rātou ’ia fa’atupu mai i te mau ’ēkālesia, mai te mea e tātarahapa mai tō te ao nei.

49 ’E ’ia fa’ata’ahia te hō’ē ta’ata ha’apa’o nā roto i te reo o tō te ’ēkālesia, nō te ’ēkālesia i Ohio, ’ia fāri’i i te mau moni nō te ho’ora’a mai i te mau fenua i Ziona.

50 ’E tē hōro’a atu nei au i tō’u nei tāvini ia Sidney Rigdon i te hō’ē fa’auera’a, ’ia pāpa’i ’oia i te hō’ē parau fa’a’ite nō ni’a i te huru o te fenua nō Ziona, ’e te hō’ē parau fa’a’ite ho’i nō ni’a i te hina’aro o te Atua, mai te au i te fa’a’itehia atu e te Vārua iāna ;

51 ’E te hō’ē ’episetole ’e te parau fa’aau, ’o tē fa’a’itehia atu i te mau ’ēkālesia ato’a ra, ’ia noa’a mai te mau moni, ’ia tu’uhia atu i roto i te rima o te ’episekōpo iho ’e ’aore rā nō te ta’ata ha’apa’o, mai te au i tōna ra mana’o ’e ’aore rā mai te au i tāna e fa’ata’a mai, ’ia ho’o mai i te mau fenua ’ei ’āi’a nō te mau tamari’i a te Atua.

52 Inaha ho’i, ’oia mau tē parau atu nei au ia ’outou na, tē hina’aro nei te Fatu ’ia ’īriti mai te mau pipi ’e te mau tamari’i a te ta’ata i tō rātou ’ā’au, ’oia ’ia ho’ohia mai te tā’āto’ara’a nō teie tufa’a o te fenua nei, ’ia tae i te taime e au ’ia nā reira.

53 Inaha, tei ’ō nei te pa’ari. ’A tu’u atu ia rātou ’ia rave i teie nei mea ’oi ’ore ai rātou e fāri’i i te hō’ē ’āi’a, maori rā nā roto i te ha’amani’ira’a toto.

54 ’E teie fa’ahou ā mai te mea e fenua tei roa’a mai, ’ia tonohia atu te mau huru feiā rave ’ohipa ato’a i teie nei fenua, ’ia rave i te ’ohipa nō te feiā mo’a nō te Atua ra.

55 ’Ia rave-’āfaro-hia teie nei mau mea ato’a ; ’e ’ia fa’a’itehia mai te mau fa’ati’ara’a nō ni’a i te mau fenua i terā taime ’e i terā taime, e te ’episekōpo ’e ’aore rā e te ta’ata ha’apa’o nō te ’ēkālesia.

56 ’E ’eiaha te ’ohipa nō te ha’aputuputura’a ’ia rave-rū-noa-hia, ’eiaha ho’i nā roto i te horora’a ; ’ia ravehia rā te reira mai te au i te a’ohia e te mau peresibutero nō te ’ēkālesia i te mau ’āmuira’a, mai te au i te ’ite tā rātou e fāri’i i terā taime ’e i terā taime.

57 ’E ’a tu’u atu i tō’u nei tāvini ia Sidney Rigdon ’ia ha’amo’a ’e ’ia fa’ata’a i teie nei fenua, ’e te vāhi ho’i nō te hiero, i te Fatu ra.

58 ’E ’ia fa’aterehia te hō’ē ’āmuira’a ; ’e i muri iho, ’ia ho’i atu tō’u mau tāvini ’o Sidney Rigdon ’e Iosepha Semita, tamaiti, ’e ’o Oliver Cowdery ato’a nā muri iho ia rāua, nō te fa’aoti i te toe’a o te ’ohipa tā’u i fa’ata’a nā rātou i tō rātou iho fenua, ’e e fa’aterehia te toe’a e te mau ’āmuira’a.

59 ’E ’eiaha e tu’u atu i te hō’ē ta’ata ’ia ho’i atu mai teie fenua maori rā ’ia poro haere ’oia nā te pae ’ē’a, i tāna i ’ite pāpū ’e ’o tāna i ti’aturi pāpū.

60 ’Ia rave-’ē-hia atu ia Ziba Peterson te tōro’a i hōro’ahia iāna ; ’e ’ia ti’a noa ’oia ’ei melo noa i roto i te ’ēkālesia, ’e ’a tu’u atu iāna ’ia rave ’oia i te ’ohipa i tōna iho nā rima, i pīha’i iho i te mau taea’e, ē tae noa atu i te taime ’ua nava’i te fāito o tāna fa’autu’ara’a nō tāna mau hara ato’a ra ; nō te mea ’aore ho’i ’oia i fā’i mai i te reira, ’e tē mana’o nei ’oia i te huna atu i te reira.

61 ’A vaiiho i te toe’a nō te mau peresibutero nō teie nei ’ēkālesia, ’o tē haere mai i teie nei fenua, ’ia fa’atere ato’a i te hō’ē ’āmuira’a i ni’a i teie nei fenua, ’e ’ua ha’amaita’i-rahi-roa-hia ho’i te tahi pae o rātou.

62 ’E ’a tu’u atu i tō’u tāvini ra ia Edward Partridge ’ia fa’atere i te ’āmuira’a ’o tē fa’atupuhia e rātou ra.

63 ’E ’a tu’u ato’a atu ia rātou ’ia ho’i, ma te poro haere i te ’evanelia nā te pae ’ē’a, ma te fa’a’ite i te mau mea tei heheuhia mai ia rātou ra.

64 Inaha, ’oia mau, ’ia fa’ahaerehia atu te porora’a mai teie nei vāhi atu i te ao pā’āto’a nei e ti’a ai, ’e ē tae noa atu ho’i i te mau tufa’a ātea roa atu nō te fenua nei—’ia poro-haere-hia te ’evanelia i te mau ta’ata ato’a e ti’a ai, ’e e pe’e atu te mau tāpa’o ia rātou ’o tē ti’aturi.

65 ’E inaha tē tae mai ra te Tamaiti a te Ta’ata nei. ’Āmene.