Seksyon 59
Rebelasyon nga ginhatag paagi kay Joseph Smith nga Propeta, sa Sion, Jackson Country, Missouri sang ika-7 sang Agosto 1831. Antes sining rebelasyon, ginkonsagrar ang duta suno sa ginsugo sang Ginuo, kag gindedikar ang lugar para sa palaabuton nga templo. Sa adlaw nga nabaton ining rebelasyon, napatay si Polly Knight, ang una nga miyembro sang Simbahan nga napatay sa Sion nga asawa ni Joseph Knight Sr. Ginlaragway sang pionero nga mga miyembro ining rebelasyon bilang “pagtudlo sa mga Santos kon paano tumanon ang adlaw nga inugpahuway kag kon paano magpuasa kag magpangamuyo.”
1–4, Pagabugayan ang tampad nga mga Santos sa Sion; 5–8, Dapat higugmaon kag alagaran nila ang Ginuo kag tumanon ang Iya mga kasugoan; 9–19, Paagi sa pagpabilin sang adlaw sang Ginuo nga balaan, ginabugayan ang mga Santos sing dutan-on kag espirituwal; 20–24, Ang matarong ginpromisahan sang paghidaet sa sining kalibutan kag sa kabuhi nga wala’y katapusan sa kalibutan nga magaabot.
1 Tan-awa, siling sang Ginuo, bulahan sila nga nagkadto sa sini nga duta nga may mata nga tampad sa akon himaya suno sa akon mga kasugoan.
2 Kay inang mga buhi magapanubli sang duta kag inang mapatay magapahuway sa tanan nila nga pagpangabudlay, kag ang ila mga binuhatan magasunod sa ila; kag magabaton sila sang korona sa mga mansyon sang akon Amay nga akon ginhanda para sa ila.
3 Huo, bulahan sila nga ang ila mga tiil nagatindog sa duta sang Sion nga nagtuman sang akon ebanghelyo; kay magabaton sila sang mga maayo sang duta bilang ila padya, kag magapatubas ang duta sa ila sa iya sini kabuganaan.
4 Kag pagakoronahan man sila sang mga bugay halin sa ibabaw, huo, kag sing madamo nga kasugoan kag sang mga rebelasyon sa nagakaigo nga panahon—sila nga tampad kag matutum sa akon atubang.
5 Gani, ginahatagan ko sila sang kasugoan nga nagasiling: Higugmaa ang Ginuo sa bug-os mo nga tagipusuon, sa bug-os mo nga ikasarang, panghunahuna, kag kusog; kag alagaran mo sia sa ngalan ni Jesucristo.
6 Higugmaa ang imo isigkatawo pareho sang imo kaugalingon. Indi ka magpangawat; ukon magpanginbabayi ukon magpanginlalaki, ukon magpatay, ukon maghimo sing bisan ano nga pareho sini.
7 Pasalamati ang Ginuo nga imo Dios sa tanan nga butang.
8 Maghatag ka sang halad sa Ginuo nga imo Dios sa pagkamatarong nga amo ang masinulub-on nga tagipusuon kag mahinulsulon nga espiritu.
9 Kag agud nga mas lubos mo nga mapabilin ang imo kaugalingon nga wala’y mantsa sa kalibutan, magkadto ka sa balay sang pagpangamuyo kag maghalad sang imo mga sakramento sa akon balaan nga adlaw;
10 Kay sa pagkamatuod ini isa ka adlaw nga ginhatag sa inyo sa pagpahuway sa inyo mga pagpangabudlay, kag sa paghatag sang inyo mga pagdayaw sa Labing Mataas;
11 Bisan pa ihatag ninyo ang inyo mga panaad sa pagkamatarong sa tanan nga adlaw kag sa tanan nga tinion;
12 Apang dumduma nga sa sini nga adlaw, nga adlaw sang Ginuo, maghatag kamo sang inyo mga halad kag inyo mga sakramento sa Labing Mataas nga nagakumpisar sang inyo mga sala sa inyo mga kauturan sa simbahan kag sa atubang sang Ginuo.
13 Kag sa sini nga adlaw wala kamo sing himuon nga iban luwas nga ang inyo pagkaon ihanda nga may mainampuon nga tagipusuon agud nga mangin lubos ang inyo pagpuasa, ukon sa iban nga pulong, agud nga mangin bug-os ang inyo kalipay.
14 Sa pagkamatuod, ini ang pagpuasa kag pagpangamuyo, ukon sa iban nga pulong, pagkasadya kag pagpangamuyo.
15 Kag kon himuon ninyo ang mga ini nga may pagpasalamat, nga may kalipay sa inyo mga tagipusuon kag mga nawong, nga wala sing tuman nga pagkinadlaw kay sala ini, kundi nga may masadya nga tagipusuon kag malipayon nga nawong—
16 Sa pagkamatuod ginasiling ko nga kon himuon ninyo ini, inyo ang kabug-osan sang duta, ang mga kasapatan sang kapatagan kag ang mga kapispisan sang kahanginan, kag inang mga nagataklas sa mga kahoy kag mga nagalakat sa duta;
17 Huo, kag ang mga dahon-nga-bulong, kag ang mga maayo nga nagahalin sa duta, kon bilang mga pagkaon ukon bilang mga panapton, ukon bilang mga balay, ukon bilang mga balay-talagoan, ukon bilang mga prutasan, ukon bilang mga ugsaran, ukon bilang mga ulubasan;
18 Huo, ang tanan nga nagahalin sa duta sa ila sini husto nga panahon ginhimo para sa benepisyo kag sa paggamit sang tawo, sa pagpalipay sang mata pati sa pagpasadya sang tagipusuon;
19 Huo, para sa mga pagkaon kag para sa mga panapton, para sa pagtilaw kag para sa pagsinghot agud pabakuron ang lawas kag agud pagpapagsikon ang kalag.
20 Kag nagapalipay sa Dios nga ginhatag niya ini tanan sa tawo; kay sa sini nga katuyoan ginhimo ang mga ini agud gamiton nga may kaalam, indi nga nagasulobra, kag indi man paagi sa pagpangilkil.
21 Kag wala sa bisan ano nga paagi nga makasala ang tawo sa Dios ukon wala sing bisan sin-o nga makapadabadaba sa iya kaakig luwas sinang wala nagaako sang iya kamot sa tanan nga butang, kag wala nagatuman sang iya mga kasugoan.
22 Tan-awa, suno ini sa layi kag sa mga propeta; karon, indi na ako paggamuha pa parte sini.
23 Apang, hibaloa nga sia nga nagahimo sang mga buluhaton sang pagkamatarong magabaton sang iya padya nga amo ang paghidaet sa sining kalibutan kag kabuhi nga wala’y katapusan sa kalibutan nga magaabot.
24 Ako, nga Ginuo, naghambal sini kag nagapamatuod ang Espiritu. Amen.