Tshooj 65
Kev tshwm sim txog kev thov Vajtswv uas tau muab los ntawm tus Yaj Saub Joseph Smith, nyob hauv Hiram, Ohio, lub Kaum Hli Ntuj hnub tim 30, xyoo 1831.
1–2, Tus Tswv muab cov yawm sij ntawm Vajtswv lub nceeg vaj cob rau neeg nyob hauv ntiaj teb, thiab tej ntsiab cai ntawm txoj moo zoo yuav kov yeej; 3–6, Lub nceeg vaj ceeb tsheej hauv hnub nyoog Milenias yuav los thiab koom nrog Vajtswv lub nceeg vaj nyob hauv ntiaj teb.
1 Cia li mloog, thiab xyuas seb, ib lub suab zoo li los ntawm tus uas Vajtswv xa los saum ntuj los, tus uas muaj zog thiab muaj hwj chim, tus uas yuav mus thoob plaws lub ntiaj teb, muaj tseeb tiag, tus uas muaj lub suab hais rau tib neeg—Nej cia li npaj tus Tswv txoj kev, kho nws tej kev kom ncaj.
2 Tus Tswv muab cov yawm sij ntawm Vajtswv lub nceeg vaj cob rau neeg nyob hauv ntiaj teb, thiab txij ntawd mus txoj moo zoo yuav dov mus kom thoob rau ntiaj teb, ib yam li lub pob zeb uas muab txam tawm saum lub roob los uas tsis yog neeg txam, es yuav dov mus, kom txog thaum lub pob zeb puv tag nrho lub ntiaj teb.
3 Muaj tseeb tiag, ib lub suab qw tias—Nej cia li npaj tus Tswv txoj kev, nej cia li npaj tus Me Nyuam Yaj pluas hmo, npaj kom txhij tos tus Nraug Vauv.
4 Thov tus Tswv, hu txog nws lub npe dawb huv, qhia txog nws tej hauj lwm zoo kawg nkaus ua rau cov neeg paub.
5 Cia li thov tus Tswv, kom nws lub nceeg vaj yuav ri mus rau hauv ntiaj teb, kom tej neeg nyob haud yuav txais tau nws lub nceeg vaj, thiab npaj rau tej hnub yuav los, thaum uas Neeg Leej Tub yuav los saum ntuj ceeb tsheej los, nws lub yeeb koob ci ntsa iab ib puag ncig, los cuag Vajtswv lub nceeg vaj uas tsa rau hauv lub ntiaj teb.
6 Yog li ntawd, thov kom Vajtswv lub nceeg vaj yuav ri mus, kom lub nceeg vaj ceeb tsheej yuav los, kom koj, auj Vajtswv, yuav tau yeeb koob saum ntuj ceeb tsheej ib yam li hauv ntiaj teb, kom kov yeej koj cov yeeb ncuab; vim lub sam xeeb, lub hwj chim thiab lub yeeb koob yog koj li, mus ib txhiab thiab ib txhis. Amees.