Jekjōn 69
Revelesōn letok kōn Josep Smith Rikanaan eo, ilo Hiram, Ohio, Nobōm̧ba 11, 1831. Ae in revelesōn ko kar ļōmņak in likūt ilo bok im̧aanļo̧k ekar eļļā ilo kwelo̧k ejenolo̧k ilo an Nobōm̧ba 1–2. Ilo Nobōm̧ba 3, revelesōn in waļo̧k ijin āinwōt jekjōn 133, tokālik ņa etan Appendix eo, kar kobaiktok. Oliver Cowdery kar m̧oktaļo̧k jitōn̄e bwe en bōkļo̧k manuscript in revelesōn ko im kien ko kobaiktok n̄an Independence, Missouri, n̄an print. Eaar barāinwōt itōn bōk jāān eo kar ko̧kkuņaņaiki n̄an kalōk ļo̧k Kabun̄ eo ilo Missouri. Revelesōn in ej tōl Jon Whitmer n̄an apareļo̧k Oliver Cowdery im barāinwōt jiron̄ļo̧k Whitmer n̄an etal in aini material ko rejelōt bwebwenato ilo kūr eo an āinwōt juon rilale bwebwenato im riļo̧o̧k.
1–2, Jon Whitmer ej itōn etal ippān Oliver Cowdery ļo̧k n̄an Missouri; 3–8, E ej barāinwōt itōn kwaļo̧k im n̄an aini, ļo̧o̧ke, im jei ļo̧o̧ki bwebwenato ko.
1 Eo̧ron̄ e Eō, Irooj ami Anij ej ba, n̄an em̧m̧an eo an karejera aOliver Cowdery. Ej jab mālōtlōt ilo N̄a bwe ren lōke e kōn kien ko im m̧ani ko me enaaj bōki n̄an āneen Zaion, ijello̧kun wōt n̄e juon ej etal ippān eo enaaj m̧ool im tiljek.
2 Kōn menin, N̄a, Irooj, Ikōņaan bwe rikarejera, aJon Whitmer, en etal ippān rikarejera Oliver Cowdery;
3 Im barāinwōt bwe enaaj wōnm̧aanļo̧k wōt ilo jei im kōm̧m̧an juon abwebwenato in aolep men ko reaorōk me enaaj loi im jeļā kaki kōn kabun̄ eo Aō;
4 Im barāinwōt en bōk akapilōk im jipan̄ jān rikarejera Oliver Cowdery im ro jet.
5 Im barāinwōt, ro rikarejera rejjeplōklōk ilo laļ ren jilkinļo̧k bwebwenato ko kōn aeddo ko aer n̄an āneen Zaion;
6 Bwe āneen Zaion enaaj jea eo im jikin eo n̄an bōk im kōm̧m̧ani aolep men kein otemjeļo̧k.
7 Mekarta, kōtļo̧k rikarejera Jon Whitmer bwe en ito-itak elōn̄ alen jān jikin n̄an jikin, im jān jarlepju in rijar n̄an jarlepju in rijar, bwe en maron̄ pidodoļo̧k an bōk jeļāļo̧kjeņ—
8 Im kwaļo̧k naan im kōketak, jeje, malen, kāālet, im bōki aolep men ko me renaaj n̄an em̧m̧an eo an kabun̄ in, im n̄an epepen ko rej wanlōn̄tak im renaaj eddekļo̧k ioon āneen aZaion, n̄an bōk e jān epepen n̄an epepen, indeeo im indeeo. Amen.