Tufa’a 81
E heheura’a tei hōro’ahia mai nā roto ia Iosepha Semita te peropheta, i Hiram, i Ohio, i te 15 nō Māti 1832. ’Ua pi’ihia Frederick G. Williams ’ia riro ’ei tahu’a rahi ’e ’ei tauturu i roto i te peresidenira’a nō te Autahu’ara’a teitei. Tē fa’a’ite ra te mau pāpa’a parau ē i te taime i fāri’ihia ai teie heheura’a i te ’āva’e Māti 1832, ’ua pi’ihia Jesse Gause i te tōro’a tauturu nō Iosepha Semita i roto i te Peresidenira’a. Terā rā, nō tōna manuia ’ore ’ia tāvini maita’i i roto i teie pi’ira’a, ’ua fa’ataehia teie pi’ira’a i ni’a ia Frederick G. Williams. ’Ua ti’a roa i teie heheura’a (no te ’āva’e Māti 1832) ’ia fa’arirohia ’ei ta’ahira’a nō te fa’anahonahora’a mau o te Peresidenira’a Mātāmua, ’oia mau iho ā, te pi’ira’a nō te tōro’a ’ei tauturu i roto i taua pupu ra ’e te ha’amāramaramara’a i te hanahana nō te pi’ira’a. ’Ua tāvini te taea’e Gause nō te hō’ē taime iti ’e ’ua hurihia ’oia i rāpae i te ’Ēkālesia i te ’āva’e Tītema 1832. ’Ua fa’atōro’ahia te taea’e William i taua tōro’a ra i te 18 nō Māti 1833.
1–2, ’Ua mau te Peresidenira’a Mātāmua i te mau tāviri nō te bāsileia i te mau taime ato’a ; 3–7, Mai te mea e ha’apa’o maita’i noa Frederick G. Williams i roto i tōna pi’ira’a, e fāri’i ’oia i te ora mure ’ore.
1 ’Oia mau, ’oia mau, tē parau atu nei au ia ’oe e tō’u tāvini e Frederick G. Williams : ’A fa’aro’o mai na i te reo nōna ’o tē parau mai ra, i te parau a te Fatu tō ’oe Atua, ’e ’a ha’apa’o na i te pi’ira’a i pi’ihia ai ’oe, ’oia ’ia riro ’ei tahu’a rahi i roto i tā’u nei ’ēkālesia, ’e ’ei tauturu nō tō’u tāvini ra ’o Iosepha Semita, tamaiti ;
2 ’O tā’u i hōro’a atu i te mau tāviri nō te bāsileia, ’o tei mauhia i te mau taime ato’a e te peresidenira’a nō te Autahu’ara’a teitei :
3 Nō reira, ’oia mau, ’ua ’ite au iāna ’e e ha’amaita’i ho’i au iāna, ’e ’ia ’oe ato’a ho’i, mai te mea e ha’apa’o maita’i ’oe i te ’ohipa fa’aa’o, i roto i te tōro’a tā’u i fa’ata’a nō ’oe na, i te pure noa i te mau taime ato’a, ma te reo ’e ma te ’ā’au ato’a, i te vāhi ta’ata ’e i te vāhi ta’ata ’ore ho’i, ’e i roto ato’a i te ’ohipa mo’a i te poro-haere-ra’a i te ’evanelia i te fenua nō te feiā e ora nei, ’e i rotopū ho’i i tō ’oe na mau taea’e.
4 ’E nā roto i te ravera’a i teie mau mea nei, e rahi roa te maita’i tā ’oe e fa’atupu i tō ’oe na mau ta’ata tupu, ’e e fa’arahi ho’i i te hanahana nōna ’oia ho’i tō ’oe Fatu.
5 Nō reira, ’a ha’apa’o maita’i ; ’a rave noa i te ’ohipa i roto i te tōro’a tā’u i fa’ata’a nō ’oe na ; ’a aupuru i te feiā paruparu, ’a ’āfa’i mai i ni’a te mau rima e tautau ra i raro, ’e ’a fa’a’eta’eta i te mau turi ’āvae paruparu.
6 ’E mai te mea e ha’apa’o maita’i noa ’oe ē tae noa atu i te hope’a, e noa’a ïa ia ’oe te korona nō te tāhuti ’ore, ’e te ora mure ’ore ho’i i roto i te mau aora’i tā’u i fa’aineine i roto i te fare o tō’u ra Metua.
7 Inaha, e inaha ho’i, ’o te mau parau ho’i teie a Alepha ’e a Omega, ’oia ’o Iesu Mesia. ’Āmene.