83. kafli

Opinberun gefin með spámanninum Joseph Smith í Independence, Missouri, 30. apríl 1832 (History of the Church, 1:269–270). Þessa opinberun meðtók spámaðurinn, er hann sat í ráði með bræðrunum.

1–4, Konur og börn eiga kröfu á eiginmenn sína og feður um framfærslu; 5–6, Ekkjur og munaðarleysingjar eiga kröfu á kirkjuna um framfærslu sína.

  SANNLEGA, svo segir Drottinn til viðbótar lögum kirkjunnar, varðandi konur og börn, sem tilheyra kirkjunni og misst hafa eiginmenn sína eða feður:

  Konur eiga kröfu á eiginmenn sína um framfærslu, þar til eiginmenn þeirra eru burtu teknir. Og séu þær ekki brotlegar, skulu þær eiga samfélag í kirkjunni.

  En reynist þær ekki staðfastar, skulu þær ekki eiga samfélag í kirkjunni. Samt mega þær halda erfðahluta sínum í samræmi við lög landsins.

  Öll börn eiga kröfu á foreldra sína um framfærslu, þar til þau eru myndug.

  Og eftir það eiga þau kröfu á kirkjuna, eða með öðrum orðum á forðabúr Drottins, hafi foreldrar þeirra ekki tök á að veita þeim erfðahluta.

  Og forðabúri skal við haldið með helgun kirkjunnar. Og séð skal fyrir ekkjum og munaðarleysingjum, sem og fátækum. Amen.