1 Ti paltiing ni Jesucristo iti katulonganna a ni Joseph Smith, Jun., ken innem nga elder, iti panamagkaykaysada iti puspusoda ken ^apanangipukkawda iti timekda iti ngato.

2 Wen, ti balikas ti Apo maipanggep iti simbaanna, a naipasdek kadagiti maudi nga aldaw para iti ^apannakaisubli dagiti taona, kas nasaona babaen ti ngiwat dagiti ^bpropetana, ken iti pannakaummong dagiti ^csantona nga agtakder iti ^dBantay Zion, nga isunto ti siudad ti ^eBaro a Jerusalem.

3 Ti siudad a pagbangonanto, manipud iti solar ti ^atemplo, nga intuding ti ramay ti Apo, kadagiti beddeng iti lumaud ti Estado ti Missouri, ken indaton ti ima ni Joseph Smith, Jun., ken dadduma pay a nakaay-aywan ti Apo.

4 Pudno daytoy a balikas ti Apo, a mabangonto ti siudad a ^aBaro a Jerusalem babaen ti panaguummong dagiti santo, manipud iti daytoy a lugar, nga isu ti lugar ti ^btemplo, a pakaipatakderanto ti templo iti daytoy a kaputotan.

5 Ta pudno a saan a matay amin daytoy a kaputotan agingga a mabangon ti balay a para iti Apo, ken sumalukob ti ulep iti daytoy, ulep nga isunto ti ^adayag ti Apo, a mangpunnonto iti balay.

6 Ket dagiti annak ni Moises, a maibatay iti Nasantuan a Kinasaserdote nga inawatna babaen ti ^aima ti katuganganna a lalaki, a ni ^bJetro;

7 Ket inawat ni Jetro daytoy babaen ti ima ni Caleb;

8 Ket inawat ni Caleb daytoy babaen ti ima ni Eliu;

9 Ket ni Eliu babaen ti ima ni Jeremias;

10 Ket ni Jeremias babaen ti ima ni Gad;

11 Ket ni Gad babaen ti ima ni Isaias;

12 Ket inawat ni Isaias daytoy babaen ti ima ti Dios.

13 Nagbiag met ni Isaias idi panawen ni Abraham, ken nabendisionan kenkuana—

14 Nga inawat ni ^aAbraham ti kinasaserdote manipud ken ni ^bMelchizedek, a nangawat iti daytoy babaen ti kapuonan dagiti ammana, nga agingga ken ni ^cNoe;

15 Ket manipud ken ni Noe agingga ken ni ^aEnoc, babaen ti kapuonan dagiti ammada;

16 Ken manipud ken ni Enoc agingga ken ni ^aAbel, a napapatay babaen ti ^bpannakikunsabo ti kabsatna, nga ^cimmawat iti kinasaserdote babaen dagiti bilin ti Dios, babaen ti ima ti amana a ni ^dAdan, nga isu ti immuna a tao—

17 Ti ^akinasaserdote a nagtultuloy iti simbaan ti Dios iti amin a kaputotan, nga awanan iti punganay nga aldaw wenno ngudo ti tawen.

18 Ket pinatalgedan met ti Apo ti ^akinasaserdote ken ni ^bAaron ken dagiti bukelna, iti intero a kaputotanda, ti kinasaserdote a nagtultuloy met ken ^cmaikappeng iti agnanayon iti kinasaserdote a mainaig iti kasantuan nga arnos ti Dios.

19 Ket annongen daytoy nabilbileg a kinasaserdote ti ebanghelio ken iggemna ti tulbek dagiti ^akinadatdatlag ti pagarian, nga isu ti tulbek ti ^bpannakaammo ti Dios.

20 Ngarud, kadagiti ^aordinansa iti daytoy, naipakita ti bileg ti kinadios.

21 Ket no awan dagiti ordinansa iti daytoy, ken ti ^apanangituray ti kinasaserdote, saan a maipakita ti bileg ti kinadios kadagiti tao iti lasag;

22 Ta no awan daytoy awan ti ^atao a makakita iti rupa ti Dios, nga isu ti Ama, ken sibibiag.

23 Ita nalawag nga insuro daytoy a ^aMoises kadagiti ubbing ti Israel iti langalang, ket dinawatna a sireregta a ^bmapasanto dagiti taona tapno ^cmaimutektekanda ti rupa ti Dios;

24 Ngem ^apinatangkenda ti puspusoda ket dida mabaelan ti kaaddana; ngarud, iti ^bpungtot ti Apo, ta naaronan ti gurana kadakuada, nakaro a dida ^cpakastrekan iti paginanaanna bayat ti kaaddada iti langalang, a daytoy a panaginana isu ti pakabuklan ti dayagna.

25 Ngarud, inruarna ni ^aMoises iti ikubda, ken kasta met ti Nasantuan a ^bKinasaserdote;

26 Ket nagtultuloy ti nababbaba a ^akinasaserdote, ti kinasaserdote nga agiggem iti ^btulbek ti ^cpanagserserbi dagiti anghel ken ti pangisagana nga ebanghelio;

27 Nga ebanghelio nga isu ti ebanghelio ti ^apanagbabawi ken ^bpanagbuniag, ken ti ^cpannakaugas dagiti basol, ken ti ^dpaglintegan dagiti ^enailubongan a bilin, nga iti pungtot ti Apo imbilinna a maituloy iti balay ni Aaron kadagiti annak ti Israel agingga a ^fnapunno ni ^gJuan, a tinaripato ti Dios, iti Espiritu Santo manipud iti saklulo ti inana.

28 Ta nabuniagan idi ubing pay, ken inordenan ti anghel ti Dios idi walo nga aldawna pay laeng iti daytoy a bileg, a mangparmek iti pagarian dagiti Hudio, ken ^amanglinteg iti dana ti Apo iti imatang dagiti taona, a mangisagana kadakuada iti yaay ti Apo, a dayta nga ima ti nakaitedan ti ^bamin a bileg.

29 Ket manen, napateg a ^anayon iti nangato a kinasaserdote dagiti takem ti elder ken ti obispo.

30 Ket manen, napateg a nayon iti nababbaba a kinasaserdote dagiti takem ti maestro ken ti diakono, a kinasaserdote a naipatalged ken ni Aaron ken dagiti annakna a lallaki.

31 Ngarud, kas nasaokon maipanggep kadagiti lallaki nga annak ni Moises—ta dagiti lallaki nga annak ni Moises ken kasta met dagiti lallaki nga annak ni Aaron mangidatondanto iti mabalin a ^amaidaton ken sakripisio iti balay ti Apo, balay a mabangonto iti Apo iti daytoy a kaputotan, iti naikkan-pateg a ^bdisso a naitudingkon—

32 Ket mapnonto dagiti lallaki nga annak ni Moises ken ni Aaron iti ^adayag ti Apo, iti ^bBantay Zion iti balay ti Apo, a dakayo dagita lallaki nga annak; ken kasta met nga adu kadakuada ti tinudingak ken imbaonko a mangbangon iti ^csimbaanko.

33 Ta asino man a ^anapudno iti pananggun-odda kadagitoy dua a ^bkinasaserdote a nasaokon, ken mangipateg iti akemda, ^cpasantuen ti Espiritu iti pannakapabaro dagiti bagida.

34 Agbalinda nga annak ni Moises ken ni Aaron ken ^abukel ni ^bAbraham, ken simbaan ken pagarian, ken ^cpili ti Dios.

35 Ken kasta met nga asino man nga umawat iti daytoy a kinasaserdote awatennak, kinuna ti Apo;

36 Ta isu nga umawat kadagiti katulongak ^aawatennak;

37 Ket isu nga ^aumawat kaniak awatenna ti Amak;

38 Ket isu nga umawat iti Amak awatenna ti pagarian ti Amak; ngarud ^aamin nga adda iti Amak maitedto kenkuana.

39 Ket maibatay daytoy iti ^asapata ken katulagan nga agpaay iti kinasaserdote.

40 Ngarud, amin nga umawat iti kinasaserdote, awatenda daytoy sapata ken katulagan ti Amak, a dina malabsing, wenno magaraw.

41 Ngem asino man nga ^aaglabsing iti daytoy a katulagan kalpasan ti panangawatna, ket sangsangkapaminsan ti panangtallikudna, ^bawanto ti pannakapakawan dagiti basolna iti daytoy a lubong wenno iti lubong nga umay.

42 Ket ay-ayto amin dagiti saan nga umay iti daytoy a kinasaserdote nga inawatyo, nga ipatalgedko ita kadakayo nga adda iti daytoy nga aldaw, babaen ti bukodko a timek nga agtaud iti langit; ken kasta met a nayawatkon kadagiti nailangitan a pangen ken ^aanghelko ti panangaywanda kadakayo.

43 Ket itedko ti bilin kadakayo ita nga agannad iti bagbagiyo, a mangipasnek a ^adumngeg kadagiti balikas ti agnanayon a biag.

44 Ta ^aagbiagkayonto iti tunggal balikas nga agaon iti ngiwat ti Dios.

45 Ta kinapudno ti ^abalikas ti Apo, ket silaw ti ania man a ^bkinapudno, ket Espiritu ti ania man a silaw, nga isu ti Espiritu ni Jesucristo.

46 Ket ikkan ti Espiritu iti ^asilaw ti ^btunggal tao nga umay iti lubong; ket lawlawagan ti Espiritu ti tunggal tao babaen ti lubong, a dumngeg iti timek ti Espiritu.

47 Ket tunggal maysa a dumngeg iti timek ti Espiritu umasideg iti Dios, nga isu ti Ama.

48 Ket ^aisuro ti Ama kenkuana ti ^bkatulagan a pinabarona ken impatalgedna kadakayo, a naipatalged kadakayo para iti pagimbaganyo, ken saan la a para iti pagimbaganyo, ngem para iti pagimbagan ti sangalubongan.

49 Ket nagsadag ti ^asangalubongan iti basol, ket nagasug iti ^bkasipngetan ken iti panangadipen ti basol.

50 Ket babaen daytoy maammuanyo nga ^aadipenda iti ^bbasol, gapu ta saanda nga umasideg kaniak.

51 Ta asino man a di umasideg kaniak adipen ti basol.

52 Ket asino man a di umawat iti timekko saanna a mailasin ti ^atimekko, ket saan a para kaniak.

53 Ket babaen daytoy maam-ammuanyo ti nalinteg manipud iti nadangkes, ken ^aagasug itan ti ^bsangalubongan iti ^cbasol ken iti kasipngetan uray itan.

54 Ket nasipngetan ti pampanunotyo iti napalabas gapu iti diyo ^apanamatpati, ken gapu ta tinagtagilag-anyo dagiti banag nga inawatyo—

55 Dayta ^akinaparammag ken kinaawan ti pammati ti nangiturong iti sibubukel a simbaan iti pakakedngan.

56 Ket naipataw daytoy a pakakedngan kadagiti annak ti Zion, uray pay ti amin.

57 Ket agtalinaeddanto iti daytoy a pakakedngan agingga nga agbabawida ken malagipda ti baro a ^akatulagan, nga isu ti ^bLibro ni Mormon ken dagiti ^csigud a bilin nga intedko kadakuada, saan laeng nga iti sao, ngem ^daramidenda a maibatay iti insuratko—

58 A mangidatagda iti bunga para iti pagarian ti Ama; no saan agtalinaed ti panagsagaba ket mayetnag ti panangukom kadagiti annak ti Zion.

59 Ta mansaanto kadi dagiti annak iti pagarian ti nasantuan a daga? Pudno, kunak kadakayo, Saan.

60 Pudno, pudno, kunak kadakayo a dumdumngeg ita kadagiti ^abalikasko, nga isu ti timekko, mabendisionankayo no la ketdi awatenyo dagitoy a banag;

61 Ta ^apakawanekto dagiti basolyo iti daytoy a bilin—tapno agtalinaedkayo a natibker iti pampanunotyo a ^bsipapasnek ken iti espiritu ti kararag, iti panangiburayyo iti pammaneknek iti sangalubongan kadagiti banag a naisao kadakayo.

62 Ngarud, ^amapankayo iti sangalubongan; ket maibaonkayo iti ania man a lugar a diyo pakapanan, tapno maitedyo ti pammaneknek iti sangalubongan iti tunggal parsua.

63 Ket kas nasaok kadagiti apostolko, a kas iti ibagak kadakayo, ta dakayo ti ^aapostolko, a kas dagiti nangato a saserdote ti Dios; dakayo ti ^binted kaniak ti Amak; dakayo ti ^cgagayyemko;

64 Ngarud, sawek manen kadakayo a kas ti naibagakon kadagiti apostolko, a tunggal ^akararua a ^bmamati kadagiti balikasyo, ken mabuniagan babaen iti danum para iti ^cpannakaugas ti basbasol, awatennanto ti ^dEspiritu Santo.

65 Ket sarunuento dagitoy a ^atanda dagiti mamati—

66 Babaen ti naganko agaramiddanto iti adu a ^anakakaskasdaaw nga aramid;

67 Babaen ti ^anaganko paksiatendanto dagiti sairo;

68 Babaen ti naganko ^aagasandanto dagiti masaksakit;

69 Babaen ti naganko luktandanto dagiti mata dagiti bulsek, ken ikkatenda ti sullat dagiti lapayag dagiti tuleng;

70 Ket agbalikasto ti dila dagiti umel;

71 Ket no addanto man tao a ^amangsabidong kadakuada saandanto a madangran;

72 Ket awanto ti bileg ti gita ti uleg a mangdangran kadakuada.

73 Ngem itedko kadakuada ti bilin, a saandanto a ^apagpannakkel dagitoy a banag, wenno irakurak iti lubong; ta naited dagitoy a banag kadakayo a para iti pagimbagan ken pannakaisalakanyo.

74 Pudno, pudno, kunak kadakayo, isuda a di mamati kadagiti balikasyo, ket saan a ^amabuniagan iti danum babaen ti naganko, para iti pannakaugas ti basbasolda, tapno maawatda ti Espiritu Santo, ^bmailunodto, ket saandanto a makaumay iti pagarian ti Amak a yanmi iti Amak.

75 Ket daytoy a paltiing kadakayo, ken bilin, maipatungpal manipud iti daytoy a kanito iti sangalubongan, ket maidiayanto ti ebanghelio kadagiti amin a di immawat iti daytoy.

76 Ngem, pudno kunak kadagiti amin a nakaitedan ti pagarian—manipud kadakayo a nasken a maikasabanto kadakuada, tapno agbabawidanto kadagiti napalabas a dakes nga aramidda; ta maungtandanto iti dakes a panagpuspuso a di panamatpati, ken dagiti kabsatyo iti Zion gapu iti panagsukirda kadakayo idi imbaonkayo.

77 Ket kunak manen kadakayo, gagayyemko, ta manipud ita awagankayon iti gagayyem, nasken unay nga itedko kadakayo daytoy a bilin, tapno agbalinkayo a kas kadagiti gayyemko kadagidi aldaw a kaaddak kadakuada, nga agdaldaliasat a mangikasaba iti ebanghelio babaen ti bilegko;

78 Ta imbilinko kadakuada a di mangitugot iti ^apetaka wenno maleta, wenno uray dua nga amerikana.

79 Adtoy, ibaonkayo a mangsubok iti lubong, ket maikari ti agtrabaho a ^amatangdanan.

80 Ket asino man a tao a mapanto ^amangikasaba iti daytoy nga ^bebanghelio ti pagarian, ken saan nga agkamtud a mangituloy a napudno kadagiti amin a banag, saanto a mabannog ti panunotna, wenno masipngetan, uray pay ti bagina, piskel, wenno nagsusuopan; ket awanto ti ^cbuokna a matnag a di madlaw. Ket saandanto a mabisinan, wenno mawawan.

81 Ngarud, diyo ^apanunoten ti sumaruno nga aldaw, no ania ti kanenyonto, wenno ti inumenyonto, wenno anianto ti paglupotyo.

82 Ta, kitaenyo dagiti lirio iti talon, no kasano ti panagdakkelda, dida agtalon, wenno agabel; ken dagiti pagarian iti lubong, iti amin a dayagda, awan ti pakaimudinganda iti uray maysa kadagitoy.

83 Ta ti ^aAmayo, nga adda iti langit, ^bammona a kasapulanyo amin dagitoy a banag;

84 Ngarud, bay-anyo a ti sumaruno nga aldaw ti ^amangpanunot kadagiti banagna.

85 Diyo met isaksakbay a panunoten ti ^asawenyonto; ngem ^bitalimengyo iti panunotyo a naynay dagiti balikas ti biag, ket ^cmaitedto kadakayo iti umno nga oras dayta bingay a maisangratto iti tunggal tao.

86 Ngarud, awan ti uray maysa kadakayo, ta agpaay daytoy a bilin kadagiti amin a ^anapudno a tinudingan ti Dios nga agserbi iti simbaan, manipud iti daytoy nga oras ti mangitugot iti petaka wenno maletana, a mapan mangipakdaar iti daytoy nga ebanghelio ti pagarian.

87 Adtoy, ^aibaonkayo a mangbabalaw iti lubong kadagiti amin a di nalinteg nga aramidda, ket isuroyo kadakuada ti dumtengto a panangukom.

88 Ket asino man a ^amangawat kadakayo, addaakto met sadiay, ta addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti ^banghelko, a mangtarabay kadakayo.

89 Asino man ti mangawat kadakayo awatendak; ket isuda met ti mangpakan kadakayo, ken mangkawes kadakayo, ken mangted iti kuarta kadakayo.

90 Ket isu a mangpakan kadakayo, wenno mangkawes kadakayo, wenno mangted iti kuarta kadakayo, awanto ti gapuna a ^amapukawna ti gunggonana.

91 Ket saanko a disipulo ti saan a mangaramid kadagitoy a banag; babaen daytoy maam-ammoyo dagiti ^adisipulok.

92 Isu a di mangawat kadakayo, panawanyo nga agmaymaysa, ket ^adalusanyo dagiti dapanyo iti danum, iti natarnaw a danum, napudot man wenno nalamiis, ket ipaneknekyo iti Amayo nga adda iti langit, ket saankayo nga agsubli manen iti dayta a tao.

93 Ket iti sadino man a purok wenno siudad a serkenyo, aramidenyo met ti kasta.

94 Nupay kasta, agsapulkayo a sireregta ket awan ti libtawanyo; ket ay-ayto dayta a balay, wenno dayta purok wenno siudad a mangsupring kadakayo, wenno dagiti balikasyo, wenno ti pammaneknekyo maipanggep kaniak.

95 Ay-ay, kunak manen, dayta a balay, wenno dayta a purok wenno siudad a mangsupring kadakayo, wenno dagiti balikasyo, wenno ti pammaneknekyo kaniak.

96 Ta siak, ti ^aMannakabalin, naiturongkon ti imak kadagiti pagilian, a ^bmangdusa kadakuada iti ^ckinadangkesda.

97 Ket maisaknapto ti angol, ket saandanto a maipanaw iti daga agingga a malpasko ti aramidko, nga ^aapagbiit a maiwakas iti kinalinteg—

98 Agingga a maam-ammodakto ti amin, a mabati, manipud iti kababaan agingga iti kangatuan, ken mapnonto iti pannakaammo iti Apo, ken ^amakipinnerrengdanto, ket rumkuasto ti timekda, ket iti dayta a timek ^bikantadanto a sangsangkamaysa ti baro a kanta, a kunada:

99 Inyeg manen ti Apo ti Zion;^aNasubboten ti Apo dagiti taona, nga ^bIsrael,A maibatay iti ^cpannakapili ti ^dparabur,A naaramid babaen ti pammatiKen ^ekatulagan dagiti ammada.

100 Nasubboten ti Apo dagiti taona;Ket ^anairakeden ni Satanas ken awanen ti panawen.^bNapagkaykaysan ti Apo dagiti amin a banag.Naibaban ti Apo ti ^cZion manipud iti ngato.^dNaingaton ti Apo ti Zion manipud iti baba.

101 Nakapagpasngayen ti ^adaga ket nagsublin ti pigsana;Nabukelen ti kinapudno iti lalaemna;Ket iniseman ti langit;Ket nakawesanen iti ^bdayag ti Diosna;Ta nagtakder iti abay dagiti taona.

102 Dayag, ken dayaw, ken bileg, ken pigsa,Maipaayto iti Diostayo; ta napno iti ^apanangngaasi,Linteg, parabur ken kinapudno, ken ^bkappia,Iti agnanayon nga awan inggana. Amen.

103 Ket manen, pudno, pudno, kunak kadakayo, nasken unay a tunggal tao a mapan mangipakdaar iti agnanayon nga ebangheliok, a no la ketdi adda kaamaanda, ket umawatda iti kuarta a kas sagut, nga ipatulodda kadakuada nga aramatenda wenno agpaay iti pagimbaganda, kas panangiturong kadakuada ti Apo, ta kasta ti makitak a nasayaat.

104 Ket paitedyo kadagiti awanan iti kaamaan, nga umaw-awat iti ^akuarta, iti obispo ti Zion, wenno iti obispo ti Ohio, tapno maikkan-pateg para iti pannakaisaknap dagiti paltiing ken iti pannakaimaldit dagitoy, ken iti pannakabangon ti Zion.

105 Ket no ikkannakayo ti asino man iti amerikana, wenno iti terno, alaenyo ti daan ket itedyo kadagiti ^amarigrigat, ket ituloyyo ti magna a siraragsak.

106 Ket no asino man kadakayo ti napigsa ti Espirituna, ^apaikuyogyo kenkuana ti nakapsut, tapno maitandudo a ^bsidadayaw, tapno agbalin met a napigsa.

107 Ngarud, itugotyo dagiti naordenan iti ^anababbaba a kinasaserdote, ket ipasakbayyo ida a mangtinong iti miting, ken mangisagana iti aramiden, ken mangannong iti miting a diyo natungpal nga aramiden.

108 Adtoy, daytoy ti wagas dagidi apostolko, kadagidi punganay nga aldaw, iti panangbangonda iti simbaanko.

109 Ngarud, paaramidyo iti tunggal tao ti bukodna a saad, ket agtrabaho iti akemna; di koma kunaen ti ulo iti saka a dina kasapulan ti saka; ta no awan ti saka kasano koma ti pannakapagtakder ti bagi?

110 Kasta met a kasapulan ti bagi ti tunggal ^apaset, tapno maitan-ok ti amin a sangsangkamaysa, tapno agbalin a naan-anay ti tunos.

111 Ket adtoy, nasken nga agbaniaga dagiti ^anangato a saserdote, kasta met dagiti elder, kasta met dagiti ^bnababbaba a saserdote; ngem nasken a matudingan dagiti ^cdiakono ken ^dmaestro a ^emangaywan iti simbaan, a nakasagana a ministro iti simbaan.

112 Ket agbaniaga met ti obispo, ni Newel K. Whitney, iti aglawlaw ken kadagiti simbaan, a mangsapul kadagiti nakurapay a ^amangipaay kadagiti kasapulanda babaen ti ^bpanamagpakumbabana kadagiti baknang ken napalangguad.

113 Nasken met a manangdan iti ^amangibagi a makaammo a mangaramid kadagiti pagsapulanna a kas iti panangiwanwanna.

114 Nupay kasta, papanenyo ti obispo iti siudad ti Nueva York, kasta met iti siudad ti Albania, ken iti pay siudad ti Boston, ket ballaaganna dagiti tao kadagita a siudad babaen ti aweng ti ebanghelio, babaen ti napigsa a timek, dagiti ^arebba ken naan-anay a pannakarebbek nga agur-uray kadakuada no supringenda dagitoy a banag.

115 Ta no supringenda dagitoy a banag umasideg ti oras ti pannakaukomda, ket mabatinto ti balay kadakuada a ^analiday.

116 ^aPagtalkenyo kaniak ket saanto a ^bmaparmek; ket saanto a matnag ti ^cbuokna iti daga a di madlaw.

117 Ket pudno kunak kadakayo, dakayo a dadduma pay a katulongak, mapankayo no adda gundawayyo, kadagiti pagrebbenganyo, kadagiti dadakkel ken nalatak a siudad ken purok, a mangipaawat iti lubong iti kinalinteg kadagiti amin a saan a nalinteg ken saan a nadiosan nga aramid, a mangbinsabinsa ken mangilawlawag iti pannakadadael dagiti makarimon nga aramid kadagiti napalabas nga aldaw.

118 Ta, babaen kadakayo kinuna ti Apo a Mannakabalin, ^arippuogekto dagiti pagarianda; diakto la ^bdayyegen ti daga, ngem aggarigengento ti namituen a langit.

119 Ta siak, ti Apo, naitag-aykon ti imak a mangipatungpal iti bileg ti langit; diyo makita ita, ngem madamdama pay bassit makitayonton, ken ammoyonton a siak, ket ^aumayak a ^bmangituray kadagiti taok.

120 Siak ti ^aAlpha ken Omega, ti pangrugian ken panungpalan. Amen.