Pāpa’ira’a mo’a
Te Ha’api’ira’a Tumu ’e te mau Fafaura’a 87


Tufa’a 87

Te hō’ē heheura’a ’e te tohura’a nō ni’a i te tama’i, i hōro’ahia mai nā roto ia Iosepha Semita te peropheta, i Kirtland ’e ’aore rā te mau vāhi nā reira, i Ohio, i te 25 nō Tītema 1832. I taua taime ra, tē rahi noa atu ra te tātama’ira’a i te fenua Marite nō ni’a i te fa’atītīra’a o te ta’ata ’e te ha’afaufa’a-ore-ra’a a te tuha’a fenua South Carolina i te mau tute a te hau nui. Tē fa’ati’a nei te ’ā’amu nō Iosepha Semita ē, tē rahi noa atu ra te « fa’a’itera’a » nō te « hitira’a te mau ’āmahamahara’a i rotopū i te mau nūna’a » i mua i te mata o te peropheta, « i nā mua a’e i te ha’amatara’a te ’Ēkālesia i tōna tere mai roto mai i te mēdēbara ».

1–4, ’Ua tohuhia te parau nō te tama’i i rotopū i te mau tufa’a fenua nō te Pae Apato’erau ’e te mau tufa’a fenua nō te Pae Apato’a ; 5–8, E tae mai te mau ’ati rahi i ni’a i te mau ta’ata ato’a o te ao nei.

1 ’Oia mau, tē nā ’ō mai ra te Fatu nō ni’a i te mau tama’i ’o tē fātata roa i te tupu mai, ’o tē ha’amata nā roto i te ’ōrurera’a hau i South Carolina, ’e ’a hope atu ai nā roto i te pohe ’e te ’ati rahi o te mau ta’ata e rave rahi ;

2 ’E e tae mai te tau e tae atu ai te tama’i i ni’a i te mau nūna’a ato’a, ma te ha’amata i teie vāhi.

3 Inaha ho’i, e ’amaha te mau tufa’a fenua nō te Pae Apato’a ’e te mau tufa’a fenua nō te Pae Apato’erau, ’e e ti’aoro atu te mau tufa’a fenua Apato’a i te tahi mau nūna’a ’e’ē, ’oia te nūna’a o Baratāne Rahi, i parauhia ra, ’e e ti’aoro ato’a atu ho’i rātou i te tahi atu ā mau nūna’a ’e’ē, nō te pāruru mai ia rātou iho i te tahi mau nūna’a ’e’ē atu ā ; ’e i reira te tama’i e tae atu ai i ni’a i te mau nūna’a ato’a.

4 ’E a muri a’era, ’ia hope te mau mahana e rave rahi, e ti’a mai te mau tītī ’ōrurehau ’e e ’aro i tō rātou ra mau fatu, ’o tē fa’anahonahohia ’e ’o te ha’api’ihia nō te tama’i.

5 ’E a muri a’era e fa’anahonaho ato’a mai te mau toe’a o tō te fenua ia rātou iho ’e e tupu mai tō rātou riri rahi, ’e ’a ha’ape’ape’a atu ai i te mau ’Ētene i te ha’ape’ape’ara’a māuiui rahi.

6 ’E mai te reira, nā roto i te ’o’e ’e te ha’amani’ira’a toto e ’oto roa ai te mau ta’ata o te ao nei ; ’e nā roto i te o’e, ’e te ma’i rahi, ’e te ’āueuera’a fenua, ’e te pātiri nō te ra’i, ’e te uira ’anapa rahi ato’a, e ’ite ai te mau ta’ata o te ao nei i te riri ’ū’ana, ’e te au ’ore rahi, ’e te rima tā’iri o te Atua Manahope, ē tae noa atu i te taime nō te ha’apaura’a i fa’ata’ahia e ha’amou-roa-hia ai te mau nūna’a ato’a ;

7 ’Ia fa’a’orehia te ti’aorora’a a te feiā mo’a, ’e tā te toto o te feiā mo’a, i roto i nā tari’a o te Fatu Sabaota, mai ni’a mai i te ao nei, ’ia tāho’ohia atu ho’i tō rātou ra mau ’enemi.

8 Nō reira, ’a tia noa ’outou i te mau vāhi mo’a, ’e ’eiaha roa ’ia fa’anu’u-’ē-hia atu, ē tae noa atu i te taime e tae mai ai te mahana o te Fatu ; nō te mea inaha, tē tae ’oi’oi mai nei te reira, tē nā reira mai ra te Fatu. ’Āmene.