1 Wan ^aTok blong Waes, blong gud blong kaonsel blong hae pris, we oli kam tugeta wanples long Ketlan, mo blong jos, mo tu, blong olgeta sent long Saeon—

2 we bae oli sendem olsem wan griting; i no olsem wan komanmen o fos, be tru long revelesen mo tok blong waes tingting, we i soemaot oda mo ^atingting blong God blong sevem evriwan long ol sent long taem we oli stap long wol long ol las dei ia—

3 we oli givim olsem wan prinsipol wetem wan ^apromes, we i stret long paoa blong olgeta we oli no strong mo olgeta ^bsent ia we oli no strong nating aot long evri sent, we oli, mo oli save singaotem olgeta ia, ol sent.

4 Luk, i tru, olsem ia nao Lod i talem long yufala: “From ol ^anogud samting mo ol plan we oli stap mo bambae oli stap long hat blong ol man we oli stap mekem ol ^bsikret samting long ol las dei, mi bin ^dwonem yufala, mo mi wonem yufala fastaem, taem mi givim long yufala tok blong waes tingting ia tru long revelesen—

5 se folem hamas we eni man i dring ^awaen o strong drink long medel blong yufala, luk, hem i nogud, mo tu, hem i no stret long fes blong Papa blong yufala; be nomo, taem yufala i kam tugeta wanples blong givim ol sakramen blong yufala long fored blong hem.

6 Mo luk, hemia bae i waen, yes waen ^awe i klin evriwan we i kam long frut blong grep, we yufala nomo i mekem.

7 Mo bakegen, ol ^astrong drink oli nogud long bel blong yufala, be nomo blong wasem bodi blong yufala.

8 Mo bakegen, tabak i no blong ^abodi blong man, mo tu, i no blong bel blong man, mo i nogud long man, be i wan grin lif blong mekem gud ol smol soa mo blong givim long evri buluk we oli sik, mo blong man i yusum wetem gud jajmen mo i blong man we i save gud olsem wanem blong yusum.

9 Mo bakegen, ol hot drink oli no blong bodi o blong bel blong man.

10 Mo bakegen, i tru, mi talem long yufala, evri gudfala ^agrin lif, God i putum blong gud laef, kriesen, mo blong man i yusum—

11 Evri grin lif, folem taem blong hem, mo evri frut folem taem blong hem; evriwan long olgeta samting ia, blong oli mas lukaot gud olsem wanem blong yusum mo blong oli yusum wetem fasin blong talem ^atangkyu.

12 Yes, mo tu, ^amit blong ol ^banimol mo ol pijin long skae, mi, Lod, mi bin putum blong man i yusum wetem fasin blong talem tangkyu; be oli mas yusum ^dwanwan taem;

13 Mo bambae mi glad blong oli no yusum, be long taem blong Winta nomo, o long taem blong kolkol, o long taem blong hadtaem blong kasem kaekae.

14 Evri ^asid, Lod i putum blong man i yusum mo blong animol i yusum, blong i sapot blong laef, i no blong man nomo, be i blong ol animol long plantesen, mo ol pijin long heven, mo evri wael animol we i ron o i wokbaot long bel blong hem long wol ia;

15 Mo olgeta animol ia, God i mekem blong man i yusum nomo long ol taem blong hadtaem blong kasem kaekae mo long taem blong bigfala hanggri.

16 Evri sid i gud blong kaekae blong man; mo tu, frut blong grep; hemia we i givim frut, nomata insaed long graon o antap long graon—

17 Be, wit i moa gud blong man, mo kon i moa gud blong buluk, mo ot i moa gud blong hos, mo rae i moa gud blong ol pijin mo blong pig, mo blong evri animol blong plantesen, mo bali i moa gud blong evri animol we oli save yusum, mo blong ol sopsop drink, mo ol narafala sid tu i gud blong hemia.

18 Mo evri sent we i tingbaot blong holemtaet mo mekem folem ol toktok ia, we i stap wokbaot long fasin blong obei long ol komanmen, bambae i kasem ^ahelt long bel blong olgeta mo strong kaekae long bun blong olgeta;

19 Mo bambae oli faenem ^awaes tingting mo ol bigfala rij ^bsave, we oli ol rij samting we oli haed;

20 Mo bambae oli ^aron mo bae oli no save taet, mo bambae oli wokbaot mo bae ae i no save dak.

21 Mo mi Lod, mi givim olgeta wan ^apromes, se bambae enjel we i spolem gud ol samting bae i ^bpasem olgeta nomo, semmak olsem ol pikinini blong Isrel, mo bambae i no kilimded olgeta.” Amen.