Wase 96
Na ivakatakila sa soli vei Josefa Simici na Parofita, ka vakaraitaki kina na ivakarau ni koro levu se na iteki ko Saioni mai Katiladi e Oaio, ena 4 ni June, 1833, a soli me ivakaraitaki vei ira na Yalododonu e Katiladi. A yaco ena gauna ni nodra koniferedi na bete levu, ka a ulutaga bibi ni veivosaki na vakayagataki ni qele ka yacana na iteitei na French, ka taukena na lotu volekati Katiladi. Era a sega ni duavata rawa ena koniferedi se ko cei me taura, ka ra mani taroga vua na Turaga.
1, Me vakabulabulataki na iteki kei Saioni mai Katiladi; 2–5, Me wasea na bisopi na nodra ivotavota vakawa na Yalododonu; 6–9, Me curu me lewe ni soqosoqo cokovata ko Joni Jonesoni.
1 Raica, au sa kaya vei kemudou, oqo ga na yalomatua, mo dou kila kina na ka mo dou kitaka ena ka oqo; io sa kilikili kei au me vakabulabulataki na aiteki oqo kau sa tauyavutaka me vakataudeitaki kina ko Saioni.
2 Ia me lewa ko Niueli K. Witini na noqu tamata, na cakacakataki ni vanua dou sa veivosakitaka tiko, io na vanua au sa lewa me tara kina na noqu vale tabu.
3 Kei na dua tale, me wasewasei ki na veiwasewase eso ena yalomatua, me yaga vei ira era segata me dua na nodra ivotavota vakawa, ia me lewai mai ena nomudou bose.
4 O koya mo dou ia sara ka vakayacora na ka oqo, kei na iwasewase oya me na yaga ki na noqu aisoqosoqo, ni sa kena inaki me vakatetei yani kina na noqu vosa vei ira na luve ni tamata.
5 Ia raica, au sa kaya vakaidina vei kemudou, sa noqu inaki levu duadua ga me vakatetei yani na noqu vosa vei ira na luve ni tamata, io me ra vakamalumalumutaka na yalodra na luve ni tamata mo ni vinaka kina. Io ena yaco dina. Emeni.
6 Kei na dua tale, au sa kaya vakaidina vei kemudou, sa noqu lewa yalomatua ka sa dodonu tale ga vei au me vakadonui ko Joni Jonesoni na noqu tamata, o koya ka’u sa rogoca na nona masu, io au sa yalataka tale ga vua na bula tawamudu, kevaka sa muria tiko na noqu vunau mai na gauna oqo ka lako yani—
7 Ni sa kawa i aJosefa ko koya ka sa vakaivotavota talega ena veivakalougatataki kei na yalayala a caka vei ira na nona qase—
8 Au sa kaya vakaidina vei kemudou, sa kilikili sara vei au me curu ko koya ki na isoqosoqo, io me veivuke tale ga ena kena vakatetei yani na noqu vosa vei ira na luve ni tamata.
9 Ia mo dou lesi koya ki na veivakalougatataki oqo, raica me segata vagumatua sara ko koya me sauma taucoko na dinau ni vale dou sa veivosakitaka tiko, me na vakaitikotiko kina ko koya. Io ena yaco vakakina. Emeni.