99. kafli

Opinberun gefin með spámanninum Joseph Smith til Johns Murdock í ágúst 1832, í Hiram, Ohio. Þó að útgáfur Kenningar og sáttmála allt frá 1876 segi þessa opinberun gefna í Kirtland í ágúst 1833, gefa fyrri útgáfur og aðrar söguheimildir réttar upplýsingar.

1–8, John Murdock er kallaður til að boða fagnaðarerindið, og þeir, sem taka á móti honum, taka á móti Drottni og munu hljóta miskunn.

  SJÁ, svo mælir Drottinn til þjóns síns Johns Murdock: Þú ert kallaður til þess að fara til landsvæðanna í austri, hús úr húsi, þorp úr þorpi, borg úr borg, til þess að kunngjöra íbúum þeirra ævarandi fagnaðarerindi mitt, mitt í ofsóknum og ranglæti.

  Og hver, sem tekur á móti þér, tekur á móti mér, og þú munt hafa kraft til að boða orð mitt eins og hinn heilagi andi minn sýnir þér.

  Og hver, sem tekur á móti þér eins og lítið barn, tekur á móti ríki mínu. Og blessaðir eru þeir, því að þeir munu miskunn hljóta.

  En hverjum, sem hafnar þér, mun faðir minn hafna, og húsi hans. Og þú skalt hreinsa fætur þína á leyndum stöðum á leið þinni, sem vitnisburð gegn þeim.

  Og sjá og tak eftir, ég kem skjótt til að dæma, til að sannfæra alla um óguðleg verk þeirra, sem þeir hafa unnið gegn mér, eins og skráð er af mér í bókinni.

  Og sannlega segi ég þér nú, að ekki er æskilegt að þú farir fyrr en séð hefur verið fyrir börnum þínum og þau hafa umhyggjusamlega verið send til biskupsins í Síon.

  Og eftir nokkur ár, ef þú æskir þess af mér, mátt þú einnig fara til hins góða lands til að fá erfðahluta þinn—

  Að öðru leyti skalt þú halda áfram og boða fagnaðarerindi mitt, uns þú ert burtu numinn. Amen.