Jeje Ko Rekwojarjar
Kadkad In

Kadkad In

Katak im Bujen Ko ej juon koba in revelesōn ko jān lan̄ im kean̄ ko jān jetōb kar liļo̧k n̄an jutak eo im kajeikik eo an aelōn̄ eo an Anij ioon laļ ilo raan ko āliktata. Men̄e enan̄in aolepān jekjōn kein rej iiokļo̧k ro uwaan Kabun̄ eo an Jisōs Kraist im Armej ro Rekwōjarjar ilo Raan ko Āliktata, ennaan ko, kakkōl ko, im naan in kōketak ko rej n̄an em̧m̧anļo̧k eo an aolepān laļ im ewōr ie juon karuwainene n̄an aolep armej ijoko jabdewōt n̄an ron̄jake ainikien Irooj Jisōs Kraist, ej kōnono n̄an er kōn em̧m̧anļo̧k eo aer ilo kanniōk im lo̧mo̧o̧r eo ejjeļo̧k jem̧ļo̧kin aer.

Enan̄in aolepān revelesōn ko ilo koba in kar bōki kōn Josep Smith Jr., rikanaan eo im president eo m̧oktata an Kabun̄ eo an Jisōs Kraist im Armej ro Rekwōjarjar ilo Raan ko Āliktata. Ko jet rekar letok in jet ian ro rekar bōk jikin ilo Presidency in (lale kōmmeļeļe ko ijōbbōran K&B 135, 136, im 138, im Kean̄ Jān Kabun̄ 1 im 2).

Bok in Katak im Bujen Ko ej juon ian jeje ko rekwōjarjar an Kabun̄ in koba ippān Baibōļ eo Ekwōjarjar, Bok in Mormon, im Bōōr eo Eļap Wōņāān. Ijoke, Katak im Bujen Ko ejenolo̧k kōnke ej jab juon ukok in bok ko etto, ak ijjino eo an ej ilo raan kein im kar letok jān Anij kōn rikanaan ro kāālet An n̄an jepļaaktok eo an jerbal eo ekwōjarjar An im jutak eo an aelōn̄ eo an Anij ioon laļ ilo raan kein āliktata. Ilo revelesōn kein, juon ej ron̄jake ainikien eo an Irooj Jisōs Kraist emera ak edim ej kōnono bar juon alen ilo tarlep in tōrean iien bōk eddo ko; im jerbal in ej ijjino ijin ej m̧aanjāppopo eo n̄an Itok eo An Kein Karuo, ilo kakūrm̧ool in im ilo wōt errā ippān naan ko an aolep rikanaan ro rekwōjarjar jān wōt kar jino in laļ.

Josep Smith Jr., eaar ļotak ilo Tijem̧ba 23, 1805, ilo Sharon, Windsor Kounty, Vermont. Ilo iiō ko im̧aan ilo mour eo an, eaar em̧m̧akūtļo̧k ippān baam̧le eo an n̄an jikin eo raan kein etan in Manchester, ilo turilikin New York. E kar ilo iien eo ej jokwe ijo ilo jinoin rak ilo 1820, ke eaar jon̄oulemān iiō dettan, ke eaar bōk visōn eo an m̧oktata, eo ie Anij, Jemān Indeeo, im eo Nejin Jisōs Kraist, raar loļo̧k e. Kar jiron̄ e ilo visōn in bwe Kabun̄ eo an Jisōs Kraist em̧ool im kar kajutake ilo iien ko an Kallim̧ur Ekāāl, eo im eaar kōm̧akūtkūt tarlep in gospel eo, eaar jab pād ioon laļ. Bar jet lotok ko jān lan̄ rekar itok ālikin ko ie kar katakin e jān elōn̄ enjeļ ro; kar kwaļo̧k n̄an e bwe ewōr juon jerbal ejenolo̧k n̄an e jān Anij im bwe kōn e Kabun̄ eo an Jisōs Kraist enaaj kar bar jepļaaktok n̄an laļ.

Ālikin jidik iien, Josep Smith kar kōmaron̄ e jān jipan̄ jān lan̄ n̄an ukōte im kajeedede Bok in Mormon. Ilo ejja iien in wōt e im Oliver Cowdery kar kapit erro n̄an Priesthood eo an Aron jān Jon Peptaij ilo Māe 1829 (lale K&B 13), im ejjab to ālikin iien eo rekar bar ekkapit n̄an Melkizedek Priesthood eo jān Rijjilōk ro etto Piter, Jemes, im Jon (lale K&B 27:12). Ekkapit ko jet rekar itok tok ālik ekar itok ippāer ki ko an priesthood rekar likūt jān Moses, Ilaija, im Elias, im elōn̄ rikanaan ro etto (lale K&B 110; 128:18, 21). Ekkapit kein, ilo m̧ool eo, kar jepļaaktok eo an maron̄ eo an lan̄ n̄an armej ioon laļ. Ilo Eprōļ 6, 1830, ium̧win tōl jān lan̄, Rikanaan Josep Smith eaar karōke Kabun̄ eo, im āindein Kabun̄ eo em̧ool an Jisōs Kraist ej bar juon alen em̧m̧akūt āinwōt juon doulul ilubwiljin armej, kōn maron̄ eo n̄an katakin kōn gospel eo im kōm̧akūtkūt kain̄i ko an lo̧mo̧o̧r. (Lale K&B 20 im Bōōr Eo Eļap Wōņāān, Josep Smith—Bwebwenato 1.)

Revelesōn ekwōjarjar kein kar bōki ilo uwaak in jar, ilo iien aikuj ko, im rekar jebar jān jekjek in mour ko rem̧ool im rekitbuuj lukkuun armej. Rikanaan eo im ritōl ro m̧ōttan rekar pukpukot tōl jān lan̄, im revelesōn kein rekar kam̧ool ke rekar bōk e. Ilo revelesōn kein juon ej lo jepļaaktok eo im erļo̧k eo an gospel eo an Jisōs Kraist im kilaaktok in tōre in tarlep in tōrean iien bōk eddo ko. Em̧m̧akūt eo n̄an rilik an Kabun̄ in jān New York im Pennsylvania n̄an Ohio, n̄an Missouri, n̄an Illinois, im āliktata n̄an Great Basin in Amedka iturilik im kijejeto ko reļļap an Ro Rekwōjarjar ilo kajjion̄ in kalōk Zaion ioon laļ ilo raan kein rej barāinwōt waļo̧k ilo revelesōn kein.

Jet ian jekjōn ko im̧aanļo̧k rekitbuuj men ko rejelōt ukok eo im ajeeded eo an Bok in Mormon (lale jekjōn kein 3, 5, 10, 17, im 19). Jet jekjōn ko tokālik rej kwaļo̧k jerbal eo an Rikanaan Josep Smith ilo an kōm̧m̧ane ukok eo ekabab-laļ an Baibōļ eo, ilo iien eo elōn̄ jekjōn ko kar bōki im eļap katak ko ie (lale, n̄an waanjon̄ok, jekjōn kein 37, 45, 73, 76, 77, 86, 91, im 132, kajjojo iaer ewōr ie jet kadkadier n̄an ukok eo an Baibōļ eo).

Ilo revelesōn kein, katak ko an gospel eo rej ellaajrak ippān kōmmeļeļe ko kōn men ko reaorōk āinwōt nememen Anij raņ, jinoin armej, m̧ool in Setan, unin mour in, aikuj eo kōn pokake, im aikuj in ukeļo̧k, jerbal ko an Jetōb Kwōjarjar, kain̄i ko im kōm̧m̧an ko rej ekkejelļo̧k n̄an lo̧mo̧o̧r, ilju eo an laļ, tam̧m̧we ko an armej ilju im jekļaj ālikin Jerkakpeje eo im Ekajet eo, im indeeo eo an kōtaan eo an m̧are, im indeeo eo an baam̧le eo. Ejja āinwōt in wōt, jidik ilo̧k jidik erļo̧k ļo̧k in karkan Kabun̄ in ej waļo̧k ippān kūr ko an bisop ro, Presidency eo Kein Kajuon, Ko̧o̧njeļ eo an Jon̄oulruo, im Jiljilimjuonn̄oul im jutak in opij in tōl ko jet im doulul ko. Āliktata, kam̧ool eo kar letok kōn Jisōs Kraist—kaninlan̄ eo An, wōj eo An, wānōk eo An, iakwe eo An, im kajoor in pinmuur eo An—ekōm̧m̧an bwe bok in kanooj aorōk n̄an aolep baam̧le eo an armej im “eļapļo̧k aorōkin n̄an Kabun̄ eo jān m̧weie ko an aolepān Laļ in” (lale kōmmeļeļe an K&B 70).

Revelesōn ko kar ļo̧o̧ki jinointata jān rijeje ro an Josep Smith, im ro uwaan Kabun̄ ekar itok limoier ilo jaketo-jaketak m̧alen ko ippān doon. N̄an ejaake juon ļo̧o̧k etōt, rijeje ro rekar kōm̧m̧an m̧alen ko an revelesōn ko ilo juon manuscript ļo̧o̧k bok ko, ko me ritōl ro an Kabun̄ rar kōjerbali ilo kōpooji revelesōn ko n̄an kar print i. Josep im Ro Rekwōjarjar jinoin rekar watōk revelesōn kein āinwōt aer watōke Kabun̄ in: remour im wāmourur, im jet ko me rej jejjetļo̧k ippān kobatok in bar revelesōn. Rekar bar kile bōd ko im kar kōm̧m̧ani ilo jirilo̧k emaron̄ kar ilo iien m̧aleni revelesōn ko im kōpooji n̄an publication. Āindein, juon kwelo̧k an Kabun̄ ekar kajjitōk ippān Josep Smith ilo 1831 n̄an “kajim̧wi bōd kein ak jirilo̧k kein me e emaron̄ kar loi jān Jetōb Kwōjarjar.”

Ālkin kar etali im kajim̧wi revelesōn ko ro uwaan Kabun̄ in ilo Missouri rekar jino likiti ilo juon bok taitōļ in A Book of Commandments for the Government of the Church of Christ (Bok in Kien Ko n̄an Kōm̧akūtkūt Kabun̄ eo an Kraist), eo me ie elōn̄ ian revelesōn ko im̧aanļo̧k jān Rikanaan eo. Ijoke, kajjion̄ in m̧oktata n̄an publish i revelesōn kein ekar bōjrak, ke jarlepiju nana eo ekar kakkure printing opij eo an Ro Rekwōjarjar ilo Jackson Kounty ilo Juļae 20, 1833.

Ke rekar jelā kōn kakkure eo an Missouri printing opij eo, Josep Smith im ritōl ro jet an Kabun̄ rekar jino m̧aanjabpopo ko n̄an publish i revelesōn kein ilo Kirtland, Ohio. N̄an bar kajim̧wi bōd ko, kalikkarļok naan ko, im kile eddōkļo̧k eo ilo katak ko im karōkan Kabun̄, Josep Smith ekar bōk eddo in kajim̧we ānbwinin jeje ko im jet ian revelesōn ko n̄an kōpooji n̄an publication ilo 1835 eo āinwōt Doctrine and Covenants of the Church of the Latter Day Saints (Katak im Bujen Ko an Kabun̄ eo An Armej ro Rekwōjarjar ilo Raan Ko Āliktata). Josep Smith ekar bar kōmālim bar juon lelkan in Katak im Bujen Ko, eo me ekar publish i allōn̄ ko wōt ālkin an kar mej Rikanaan eo kōn tōmak eo an ilo 1844.

Ro Rekwōjarjar jinoin rekar kaorōki revelesōn ko im watōki āinwōt enaan ko jān Anij. Ilo juon iien ilo jemļo̧k in ļo̧k 1831 eo, jet iaan elder ro an Kabun̄ in rekar lilo̧k naan in kam̧ool ko aer rekwōjarjar bwe Irooj Eaar kam̧ool n̄an jetōb ko aer kōn m̧ool eo an revelesōn kein. Naan in kam̧ool in kar publish i ilo lelkan eo an Katak im Bujen Ko ilo 1835 eo āinwōt juon naan in kam̧ool an Rijilōk Ro Jon̄oulruo:

Naan in kam̧ool eo an
Rijjilōk ro Jon̄oulruo kōn M̧ool eo an
Bok in Katak im Bujen ko

Naan in kam̧ool eo an Rikam̧ool ro an Bok in Kien ko An Irooj, kien ko Eaar liļo̧k n̄an Kabun̄ eo An kōn Josep Smith, Jun., eo kar jitōn̄ e jān ainikien Kabun̄ in kōn un in:

Kōmij, kōn menin, m̧ōņōņō in kwaļo̧k naan in kam̧ool n̄an aolepān laļ eo an armej, n̄an armej otemjej ioon mejān laļ, bwe Irooj eaar kam̧ool n̄an jetōb ko am, kōn lutōkleplep in Jetōb Kwōjarjar ioom, bwe kien kein kar litok jān kabab-laļ eo an Anij, im rej n̄an em̧m̧anļo̧k eo an aolep armej im rej lukkuun m̧ool.

Kōmij leļo̧k naan in kam̧ool in n̄an laļ in, Irooj ej am rijipan̄; im ej kōn jouj eo an Anij Jemān, im Nejin, Jisōs Kraist, bwe kar kōtļo̧k kōm n̄an bōk utiej in n̄an kwaļo̧k naan in kam̧ool in n̄an laļ in, eo ie kōmij m̧ōņōņō otem m̧ōņōņō, im jar n̄an Irooj aolep iien bwe ro nejin armej ren maron̄ jeraam̧m̧an jān e.

Āt ko etan ro Jon̄oulruo raar:

  • Tomas B. Marsh

  • Devid W. Patten

  • Brigham Young

  • Heber C. Kimball

  • Orson Hyde

  • William E. McLellin

  • Parley P. Pratt

  • Luk S. Johnson

  • William Smith

  • Orson Pratt

  • Jon F. Boynton

  • Lyman E. Johnson

Ilo edition ko tokālik an Katak im Bujen Ko, bar jet revelesōn ko ak bar jet men ko reaikuj ļo̧o̧ki rekar kobatok, ke kar bōki im āinwōt aer kar bōki jān kuk ko ak kwelo̧k ko an Kabun̄ in. Edition eo ilo 1876, eo Elder Orson Pratt ekar kōpooje iumin tōl an Brigham Young, ekar karōki revelesōn ko ekkar n̄an iien ko aer im kōm̧m̧ani kōmmeļeļe ko ijōbbōran jekjōn ko ippān naan in kwaļo̧k kadkad ko rekāāl ewōr m̧ōttan bwebwenato ie.

Ijjino ippān 1835 edition eo, juon lelkan in jiljilimjuon katak ko kōn Anij ekar barāinwōt kobatok; katak kein taitōl eo aer Lectures on Faith (Ekkōnono Ko Kōn Tōmak). Katak kein kar kōpooji n̄an kōjerbali ilo Jikuuļ eo an Rikanaan Ro ilo Kirtland, Ohio, jān 1834 n̄an 1835. Men̄e rekar kanooj em̧m̧an n̄an katak im katakin, lecture kein em̧ōj juļo̧k jān Katak im Bujen Ko jān wōt kar 1921 edition eo kōnke kar jab litok ak jakim̧aantak āinwōt revelesōn ko n̄an aolepān Kabun̄ in.

Ilo edition in Katak im Bujen Ko ilo 1981 eo ilo kajin In̄lij, jilu document rekar kobatok alen eo kein kajuon. Men kein rej jekjōn 137 im 138, ko rej tepiaakitok m̧eļeļe ko kōn lo̧mo̧o̧ren n̄an ro remej; im Kean̄ eo Jān Kabun̄ 2, eo ej kōjjeļā bwe aolep em̧m̧aan ro retello̧ke remaron̄ ekkapit n̄an priesthood eo ilo ejjeļo̧k watōk er ri ia ak mōran kilier.

Kajojo edition kāāl in Katak im Bujen Ko ekar kajim̧wi bōd ko rar kōm̧m̧an im̧aanļo̧k im kobaiktok m̧eļeļe ko rekāāl, elaptata ilo m̧ōttan ko ewōr bwebwenato ie ilo kōm̧eļeļe ko ijōbbōran jekjōn ko. Edition in kiiō elapļo̧k likliki raan ko im etan jikin ko im kōm̧m̧ani kajjim̧we ko jet ie. Oktak kein rekar kōm̧m̧an n̄an bōktok jeje kein bwe ren jejjet n̄an m̧eļeļe ko kōn bwebwenato rejim̧wetata. Bar jet m̧ōttan ko rejenolo̧k ilo edition in kiiō ekitbuuj mab ko rej kwaļo̧k jikin ko reaorōk im kar bōki revelesōn ko ie, koba ippān pija ko rem̧m̧anļo̧k kōn jikin bwebwenato ko kōn Kabun̄ in, eoon in jipan̄ ko, kōmmeļeļe ko ijōbbōran jekjōn ko, im kōkadudu in mennin ekkōnono ko, aolepāer em̧ōj ļami n̄an jipan̄ ro rej kōnono jān bok in n̄an m̧eļeļe im m̧ōņōņō ilo enaan eo an Irooj āinwōt letok ilo Katak im Bujen Ko. M̧elele ko litok ijōbbōran jekjōn ko kar būkitok jān Manuscript History of the Church im bok eo ededeļo̧k publish i etan History of the Church (kobaier ippān doon etan ilo kōmmeļeļe ko ijōbbōran jekjōn ko rej Bwebwenato eo an Josep Smith) im Joseph Smith Papers (Pepa Ko an Josep Smith).