Kenning og sáttmálar

45. kafli

Opinberun gefin með spámanninum Joseph Smith til kirkjunnar, í Kirtland, Ohio, 7. mars 1831 (History of the Church, 1:158–163). Í formála sínum að þessari opinberun segir spámaðurinn, að „á þessu tímabili kirkjunnar ... hafi margar falskar frásagnir ... og heimskulegar sögur verið gefnar út ... og þeim dreift ... til að hindra fólk í að rannsaka starfið eða taka við trúnni ... En hinum heilögu til gleði ... meðtók ég eftirfarandi,”(History of the Church, 1:158).

1–5, Kristur er málsvari okkar hjá föðurnum; 6–10, Fagnaðarerindið er boðberi, sem greiðir Drottni veg; 11–15, Drottinn tók sjálfur á móti Enok og bræðrum hans; 16–23, Kristur opinberaði tákn um komu sína, eins og gefin voru á Olíufjallinu; 24–38, Fagnaðarerindið verður endurreist, tími Þjóðanna mun uppfylltur og eyðandi sjúkdómur mun hylja landið; 39–47, Tákn, undur og upprisan fylgja síðari komunni; 48–53, Kristur mun standa á Olíufjallinu, og Gyðingar munu sjá sárin á höndum hans og fótum; 54–59, Drottinn mun ríkja í þúsund ár; 60–62, Spámanninum er sagt að hefja þýðingu á Nýja testamentinu, en þar munu mikilvægar upplýsingar kunngjörðar; 63–75, Hinum heilögu er boðið að sameinast og byggja Nýju Jerúsalem, en þangað mun fólk frá öllum þjóðum koma.

  HLÝÐIÐ á, ó, þér sem í kirkju minni eruð, sem eignast hafið ríkið. Hlýðið þér á og ljáið honum eyra, sem lagði grundvöll jarðarinnar, sem gjörði himnana og alla herskara þeirra og gjörði allt, sem lifir og hrærist og er til.

  Og enn segi ég, hlýðið raust minni, svo að dauðinn komi eigi yfir yður á þeirri stundu, þegar þér teljið að sumarið sé enn ekki á enda runnið né uppskeru lokið, og sálir yðar eru ekki hólpnar.

  Hlustið á hann, sem er málsvari hjá föðurnum, sem talar máli yðar hjá honum—

  Og segir: Faðir, sjá þjáningar og dauða hans, sem enga synd drýgði, og þú hafðir velþóknun á. Sjá blóð sonar þíns, sem úthellt var, blóð hans, sem þú gafst, svo að þú mættir sjálfur dýrðlegur verða—

  Faðir, þyrm því þessum bræðrum mínum, sem trúa á nafn mitt, svo að þeir megi koma til mín og öðlast ævarandi líf.

  Hlýðið á, þér sem í kirkju minni eruð og þér öldungar, hlustið saman og heyrið rödd mína meðan enn heitir í dag og herðið eigi hjörtu yðar—

  Því að sannlega segi ég yður, að ég er Alfa og Ómega, upphafið og endirinn, ljós og líf heimsins—ljós, sem skín í myrkrinu, en myrkrið skynjar það ekki.

  Ég kom til minna eigin og mínir eigin tóku ekki á móti mér. En öllum, sem tóku á móti mér, gaf ég kraft til að gjöra mörg kraftaverk og til að verða synir Guðs, og þeim sem trúðu á nafn mitt gaf ég jafnvel kraft til að öðlast eilíft líf.

  Já, og þannig hef ég sent heiminum ævarandi sáttmála minn, til að vera ljós fyrir heiminn og merki fyrir fólk mitt, sem Þjóðirnar geta leitað til, og vera boðberi á undan mér til að greiða mér veg.

  10 Gangist þess vegna undir hann, og við þann sem kemur mun ég rökræða eins og við menn til forna, og ég mun sýna yður sterk rök mín.

  11 Hlýðið því allir saman á og látið mig sýna yður sjálfa visku mína, visku hans, sem þér segið vera Guð Enoks og bræðra hans—

  12 Sem numdir voru frá jörðu og ég sjálfur tók á móti—borg, sem geymd skal, þar til dagur réttlætisins rennur upp—dagur sem allir heilagir menn leituðu en fundu ekki vegna ranglætis og viðurstyggðar—

  13 Og viðurkenndu, að þeir væru ókunnugir og pílagrímar á jörðu—

  14 En fengu fyrirheit um, að þeir skyldu finna hana og sjá hana í holdinu.

  15 Hlýðið þess vegna á og ég mun rökræða við yður, og ég mun tala til yðar og spá, eins og til manna áður fyrr.

  16 Og ég mun sýna það greinilega eins og ég sýndi lærisveinum mínum, þegar ég stóð frammi fyrir þeim í holdinu og talaði til þeirra og sagði: Þar sem þér hafið spurt mig um tákn komu minnar, þess dags, er ég mun koma í dýrð minni í skýjum himins til að uppfylla fyrirheitin, sem ég hef gefið feðrum yðar—

  17 Þar sem þér hafið litið sem ánauð hinn langa viðskilnað anda yðar við líkamann, mun ég sýna yður hvernig dagur endurlausnarinnar kemur og einnig endurreisn hins tvístraða Ísraelslýðs.

  18 Og sjá nú þetta musteri, sem er í Jerúsalem, sem þér kallið hús Guðs, og óvinir yðar segja, að þetta hús muni aldrei falla.

  19 En sannlega segi ég yður, að eyðingin kemur yfir þessa kynslóð eins og þjófur á nóttu, og þessu fólki verður tortímt og því tvístrað meðal allra þjóða.

  20 Og þetta musteri, sem þér nú sjáið, mun rifið niður, svo að ekki stendur eftir steinn yfir steini.

  21 Og svo ber við, að þessi kynslóð Gyðinga mun ekki líða undir lok fyrr en sérhver eyðing, sem ég hef sagt yður frá varðandi hana, hefur orðið.

  22 Þér segist vita, að endalok heimsins verði. Þér segist einnig vita, að himinn og jörð muni líða undir lok—

  23 Og þar mælið þér sannleika, því að þannig er það. En þetta, sem ég hef sagt yður, mun ekki verða fyrr en allt er uppfyllt.

  24 Og þetta hef ég sagt yður varðandi Jerúsalem. Og þegar sá dagur kemur, mun leifunum tvístrað meðal allra þjóða—

  25 En þeim mun safnað saman aftur, en þeir verða kyrrir þar til tímar Þjóðanna fullnast.

  26 Og á þeim degi munuð þér spyrja hernað og ófriðartíðindi og öll jörðin verður í uppnámi og hjörtu mannanna bregðast þeim og þeir munu segja, að Kristur seinki komu sinni, þar til jörðin líði undir lok.

  27 Og kærleikur manna mun kólna og misgjörðir verða miklar.

  28 Og þegar tímar Þjóðanna eru komnir mun ljós tendrast þeim sem í myrkri sitja og það verður fylling fagnaðarerindis míns—

  29 En þeir meðtaka það ekki, því að þeir skynja ekki ljósið, og þeir snúa hjörtum sínum frá mér vegna mannasetninga.

  30 Og með þeirri kynslóð munu tímar Þjóðanna fullnast.

  31 Og með þeirri kynslóð standa menn, sem ekki munu líða undir lok, fyrr en þeir hafa séð hina dynjandi svipu ríða yfir, því að eyðandi sjúkdómur munu herja landið.

  32 En lærisveinar mínir munu standa á helgum stöðum og eigi haggast, en á meðal hinna ranglátu munu menn hefja upp raust sína og formæla Guði og deyja.

  33 Og jarðskjálftar verða einnig á ýmsum stöðum og margskonar eyðing. Samt munu menn herða hjörtu sín gegn mér og þeir grípa til sverðsins hver gegn öðrum, og þeir munu vega hver annan.

  34 Og nú, þegar ég, Drottinn, hafði mælt þessi orð til lærisveina minna, urðu þeir áhyggjufullir.

  35 En ég sagði við þá: Verið eigi áhyggjufullir, því að þegar allt þetta verður, megið þér vita, að fyrirheitin, sem yður voru gefin, munu uppfyllast.

  36 Og þegar ljósið fer að brjótast fram, mun fara fyrir þeim eins og í dæmisögunni, sem ég mun segja yður—

  37 Gætið að og takið eftir fíkjutrjánum. Þér sjáið þau með eigin augum og þér segið, þegar þau fara að skjóta frjóöngum og laufin eru enn mjúk, að sumarið sé í nánd—

  38 Já, þannig skal það verða þann dag, er þeir sjá allt þetta, þá munu þeir vita, að stundin nálgast.

  39 Og svo ber við, að sá, sem óttast mig, mun huga að hinum mikla komudegi Drottins, já, að táknunum um komu mannssonarins.

  40 Og þeir munu sjá tákn og undur, því að þau munu sjást á himnum uppi og á jörðu niðri.

  41 Og þeir munu sjá blóð og eld og eimyrju.

  42 Og áður en dagur Drottins kemur, mun sólin sortna og tunglið breytast í blóð og stjörnurnar falla af himni.

  43 Og leifarnar munu sameinast á þennan stað—

  44 Og þá munu þeir huga að mér, og sjá, ég mun koma. Og þeir munu sjá mig í skýjum himins, íklæddan veldi og mikilli dýrð, ásamt öllum hinum heilögu englum. Og sá, sem ekki hugar að mér, mun útilokaður verða.

  45 En áður en armur Drottins fellur, mun engill þeyta básúnu sína og hinir heilögu, sem sofið hafa, koma til móts við mig í skýinu.

  46 Blessaðir eruð þér því, ef þér hafið sofið í friði. Því að eins og þér nú sjáið mig og vitið að ég er, einmitt þannig munuð þér koma til mín og sálir yðar munu lifa, og endurlausn yðar fullkomnast, og hinir heilögu munu safnast frá öllum jarðarskautum.

  47 Og síðan mun armur Drottins falla yfir þjóðirnar.

  48 Og síðan mun Drottinn stíga fæti sínum á þetta fjall og það mun klofna í tvennt og jörðin skjálfa og veltast fram og aftur og himnarnir munu einnig bifast.

  49 Og Drottinn mun hefja raust sína, og öll endimörk jarðar munu heyra hana og þjóðir jarðar munu trega og þeir, sem hlegið hafa, munu sjá heimsku sína.

  50 Og hörmungar munu herja gárungann og spottarinn mun eyðast og þeir, sem hafa sóst eftir misgjörðum, munu upp höggnir og þeim á eldinn kastað.

  51 Og síðan munu Gyðingarnir líta á mig og segja: Hvaða sár eru þetta á höndum þínum og fótum

  52 Þá munu þeir vita, að ég er Drottinn, því að ég mun segja við þá: Þessi sár eru sárin sem ég var særður í húsi vina minna. Ég er sá, sem upp var hafinn. Ég er Jesús, sem var krossfestur. Ég er sonur Guðs.

  53 Og þá munu þeir gráta misgjörðir sínar. Þá munu þeir harma vegna þess að þeir ofsóttu konung sinn.

  54 Og síðan munu hinar heiðnu þjóðir endurleystar, og þeir, sem engin lögmál þekktu, munu eiga hlut í fyrstu upprisunni, og það verður þeim bærilegt.

  55 Og Satan skal bundinn, svo að hann hafi ekkert rúm í hjörtum mannanna barna.

  56 Og á þeim degi, sem ég kem í dýrð minni, mun dæmisagan uppfyllast, er ég sagði um meyjarnar tíu.

  57 Því að þeir sem vitrir eru og hafa tekið á móti sannleikanum og haft hinn heilaga anda sér til leiðsagnar, og ekki látið blekkjast—sannlega segi ég yður, að þeir munu ekki upp höggnir og þeim eigi á eld kastað, heldur munu þeir standast daginn.

  58 Og þeir hljóta jörðina í arf. Og þeir munu margfaldast og verða sterkir og börn þeirra munu vaxa upp syndlaus til sáluhjálpar.

  59 Því að Drottinn verður mitt á meðal þeirra og dýrð hans mun hvíla á þeim, og hann verður konungur þeirra og löggjafi.

  60 Og sjá, nú segi ég yður, þér munuð ekki fá frekari vitneskju um þennan kafla, fyrr en Nýja testamentið verður þýtt, og í því verður allt þetta kunngjört—

  61 Þess vegna leyfi ég yður nú að þýða það, svo að þér verðið viðbúnir því sem koma skal.

  62 Því að sannlega segi ég yður, að miklir hlutir bíða yðar—

  63 Þér spyrjið hernað í öðrum löndum, en sjá, ég segi yður, hann er nálægur, jafnvel við dyr yðar, og innan fárra ára munuð þér spyrja hernað í yðar eigin löndum.

  64 Þess vegna hef ég, Drottinn, sagt: Safnist saman úr löndunum í austri. Safnist saman, þér öldungar kirkju minnar, farið til landanna í vestri. Kallið íbúana til iðrunar, og sem þeir iðrast, svo skuluð þér reisa mér kirkjur.

  65 Og sameinaðir í hjarta og huga skuluð þér safna saman auðæfum yðar, svo að þér getið keypt þann arf, sem síðar mun útnefndur yður.

  66 Og hann skal nefnast Nýja Jerúsalem, land friðar, borg athvarfs og staður öryggis fyrir hina heilögu hins æðsta Guðs—

  67 Og dýrð Drottins mun vera þar og ótti við Drottin mun einnig vera þar, þannig að hinir ranglátu munu ekki koma þangað, og hún skal nefnd Síon.

  68 Og svo ber við á meðal hinna ranglátu, að hver sá, sem ekki vill grípa til sverðs síns gegn náunga sínum, verður öryggis síns vegna að flýja til Síonar.

  69 Og til hennar verður safnast frá sérhverri þjóð undir himni, og þeir verða eina þjóðin, sem ekki á í stríði við aðra.

  70 Og sagt verður á meðal hinna ranglátu: Göngum ekki til orrustu við Síon, því að íbúar Síonar eru ógurlegir, því fáum við ei staðist.

  71 Og svo ber við, að hinum réttlátu verður safnað frá öllum þjóðum og þeir koma til Síonar, syngjandi söngva hinnar ævarandi gleði.

  72 Og nú segi ég yður, gætið þess að þetta fari ekki út um heiminn fyrr en mér þykir æskilegt, svo að þér fáið lokið þessu verki fyrir augum fólksins og fyrir augum óvina yðar, og þeir viti eigi um verk yðar fyrr en þér hafið lokið því, sem ég hef boðið yður—

  73 Svo að þegar þeir fá vitneskju um það, megi þeir íhuga þetta.

  74 Því að þegar Drottinn birtist, verður hann þeim ógurlegur, svo að óttinn nái tökum á þeim og þeir standi víðs fjarri og skjálfi.

  75 Og allar þjóðir munu skelfast vegna ógnar Drottins og krafts máttar hans. Já, vissulega. Amen.