គោលលទ្ធិ និងសេចក្ដីសញ្ញា
ជាការប្រជុំវិវរណៈពីព្រះ និងសេចក្ដីប្រកាសដែលបំផុសគំនិតនៅថ្ងៃចុងក្រោយ។ ព្រះអម្ចាស់ទ្រង់ប្រទានរបស់ទាំងនេះដល់យ៉ូសែប ស៊្មីធ និងដល់ពួកអ្នកខ្លះក្រោយពីលោកទៅ សម្រាប់ការតាំង ហើយចាត់ចែងនគរព្រះនៅលើផែនដីនៅថ្ងៃចុងក្រាយបង្អស់។ គោលលទ្ធិ និងសេចក្ដីសញ្ញា ជាគម្ពីរបមាណីយមួយក្នុងសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ ជាមួយនឹងព្រះគម្ពីរប៊ីប ព្រះគម្ពីរមរមន និងមុក្ដាដ៏មានតម្លៃមហិមា។ គោលលទ្ធិ និងសេចក្ដីសញ្ញា ជារបស់ចម្លែកមួយ ពីព្រោះមិនមែនជាការបកប្រែចេញពីបញ្ជីបុរាណទេ។ ព្រះអម្ចាស់ទ្រង់ប្រទានវិវរណៈទាំងនេះដល់ពួកព្យាការីដ៏ជម្រើសរបស់ទ្រង់នៅបច្ចុប្បន្ននេះ ដើម្បីសាងនគរទ្រង់ឡើងវិញ។ នៅក្នុងវិវរណៈទាំងប៉ុន្មាននោះ ជននីមួយៗឮនូវសំឡេងដ៏ទន់ភ្លន់ និងមុតមាំនៃព្រះអម្ចាស់យេស៊ូវគ្រីស្ទ (គ. និង ស. ១៨:៣៥–៣៦)។
ព្យាការីយ៉ូសែប ស៊្មីធ មានប្រសាសន៍ថា គោលលទ្ធិ និងសេចក្ដីសញ្ញា ជាមូលដ្ឋាននៃសាសនាចក្រនៅគ្រាចុងក្រោយបង្អស់ ហើយជាផលប្រយោជន៍ដល់ពិភពលោក (គ. និង ស. ៧០:ចំណងជើង)។ វិវរណៈទាំងឡាយដែលនៅក្នុងនោះ ចាប់ផ្ដើមការរៀបចំផ្លូវចាំការយាងមកលើកទីពីរនៃព្រះអម្ចាស់ ក្នុងការសម្រេចនូវគ្រប់ទាំងពាក្យដែលបានពោលដោយពួកព្យាការី ចាប់តាំងពីកំណើតលោកិយមក។