ជំនួយ​ការសិក្សា
លូកា


លូកា

ជា​អ្នក​និពន្ធ​ដំណឹង​ល្អ​តាម​លោក​លូកា និង​គម្ពីរ​កិច្ចការ​នៅ​ក្នុង​ព្រះ​គម្ពីរ​សញ្ញា​ថ្មី ហើយ​ជា​អ្នក​ផ្សាយ​សាសនា​គូកន​របស់​ប៉ុល។ លោក​បាន​កើត​មក​ពី​ឪពុក​ម្ដាយ​សាសន៍​ក្រេក ហើយ​បាន​ធ្វើ​គ្រូពេទ្យ (កូល៉ុស ៤:១៤)។ លូកា​ជា​អ្នក​រៀន​ចេះ​ដឹង​ណាស់។ លោក​បាន​ប្រាប់​ថា​ខ្លួន​ជា​គូកន​របស់​សាវក​ប៉ុល កាល​លោក​បាន​ចូល​រួម​ដំណើរ​នឹង​ប៉ុល​នៅ​ឯ​ទ្រ​អាស (កិច្ចការ ១៦:១០–១១)។ លូកា​ក៏​បាន​នៅ​ជា​មួយ​នឹង​ប៉ុល​នៅ​ឯ​ពី​លី​ព កាល​ប៉ុល​ធ្វើ​ដំណើរ​ទៅ​ក្រុង​យេរូសាឡិម​ចុង​ក្រោយ​បង្អស់ (កិច្ចការ ២០:៦) ហើយ​អ្នក​ទាំង​ពីរ​បាន​នៅ​ជា​មួយ​គ្នា រហូត​ដល់​ទៅ​ដល់​ក្រុង​រ៉ូម។ លូកា​ក៏​បាន​នៅ​ជាមួយ​នឹង​ប៉ុល នៅ​គ្រា​ប៉ុល​ត្រូវ​ពួក​រ៉ូម​ដាក់​គុក​លើក​ទី​ពីរ (២ ធីម៉ូ. ៤:១១)។ តាម​ទំនៀម​ទម្លាប់​ពោល​ថា លោក​ត្រូវ​ស្លាប់​ជា​ទុក្ករបុគ្គល។

ដំណឹង​ល្អ​តាម​លោក​លូកា 

ជា​ដំណើរ​រឿង​មួយ​ដែល​លូកា​បាន​សរសេរ​អំពី​ព្រះ​យេស៊ូវ​គ្រីស្ទ និង​ការងារ​បម្រើ​កាល​ទ្រង់​គង់​នៅ​លើ​ផែនដី។ គម្ពីរ​កិច្ចការ​របស់​ពួក​សាវក គឺជា​ការ​បន្ត​នូវ​ដំណឹង​ល្អ​តាម​លោក​លូកា។ លូកា​បាន​ទុក​ដំណើរ​រឿង​ដែល​បាន​សរសេរ​យ៉ាង​ក្បោះក្បាយ អំពី​ការងារ​បម្រើ​របស់​ព្រះ​យេស៊ូវ ដោយ​បង្ហាញ​ថា ព្រះ​យេស៊ូវ​ជា​ព្រះ​អង្គ​សង្គ្រោះ​នៃ​ពួក​សាសន៍​យូដា ព្រម​ទាំង​ពួក​សាសន៍​ដទៃ​ផង។ លោក​បាន​សរសេរ​ជា​ច្រើន​អំពី​ការ​បង្រៀន​ទាំង​ឡាយ​របស់​ព្រះ​យេស៊ូវ និង​អំពី​ព្រឹត្តិការណ៍​ទាំង​ឡាយ​របស់​ទ្រង់។ នៅ​ក្នុង​គម្ពីរ​លូកា យើង​បាន​ដឹង​ពី​ដំណើរ​រឿង​តែ​មួយ​អំពី​កាព្រីយ៉ែល​មក​ឯ​សាការី និង​នាង​ម៉ារា (លូកា ១); ពី​ពួក​អ្នក​គង្វាល​សត្វ​ចៀម​ទៅ​មើល​ទារក​យេស៊ូវ (លូកា ២:៨–១៨); ពី​ព្រះ​យេស៊ូវ​នៅ​ឯ​ព្រះ​វិហារ​បរិសុទ្ធ កាល​ទ្រង់​មាន​ព្រះ​ជន្មាយុ ១២ ឆ្នាំ (លូកា ២:៤១–៥២); ពី​ការ​ហៅ និង​ចាត់​ពួក​៧០ នាក់​ឲ្យ​ទៅ (លូកា ១០:១–២៤); ពី​ព្រះ​យេស៊ូវ​បែកញើស​ទៅ​ជា​ដំណក់​ឈាម (លូកា ២២:៤៤); ពី​ការ​ពិភាក្សា​ដែល​ព្រះ​យេស៊ូវ​ទ្រង់​បាន​មាន​ព្រះ​បន្ទូល​ជាមួយ​នឹង​ពួក​ចោរ ដែល​ជាប់​នៅ​លើ​ឈើ​ឆ្កាង (លូកា ២៣:៣៩–៤៣); និង​ពី​ព្រះ​យេស៊ូវ​ទ្រង់​សោយ​ត្រី និង​ទឹកឃ្មុំ បន្ទាប់​ពី​ទ្រង់​បាន​មាន​ព្រះ​ជន្ម​រស់​ឡើង​វិញ (លូកា ២៤:៤២–៤៣)។

ចំពោះ​ជំពូក​សង្ខេប សូម​មើល « ដំណឹង​ល្អ​ទាំង​ឡាយ »។