Fesoasoaniga mo Suesuega
O Le Faatomuaga


O Le Faatomuaga

O le Taiala i Tusitusiga Paia ua faamatala mai ai mataupu faavae, mataupu autu, tagata, ma nofoaga na filifilia o loo maua i le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele. O loo i ai foi mau autu mai tusitusiga paia e te suesue ai i autu taitasi. E mafai ona fesoasoani le Taiala ia te oe i lau lava suesuega ma suesuega a le aiga i tusitusiga paia. E mafai e lenei taʼiala ona fesoasoani ia te oe i le taliina o fesili e uiga i le talalelei, autū e suesue i ai i tusitusiga paia, saunia o lauga ma lesona, ma faateleina ai lou poto ma le molimau o le talalelei.

E tolu vaega o loo i ai i le Taiala: (1) o le faasologa o autu e faavasega i le faasologa o mataʼi tusi, (2) vaega na filifilia mai i le Faaliliuga a Iosefa Samita o le Tusi Paia (FIS), (3) le faasologa o mea na tutupu i le Ekalesia, faafanua, ma ata; ma faafanua ma ata fale tusi paia.

  1. O le faasologa o autū e faavasega i le faasologa o mataʼi tusi. O lenei vaega ua tuuina mai ai se faamalamalamaaga puupuu o autu taitasi ma ni isi o mau e sili ona taua e uiga i lena autu. O mau taitasi o loo muamua mai ai se upusii po o le tala otooto o le mau. E faapenei le faasologa o mau mai tusitusiga paia: o le Feagaiga Tuai, Feagaiga Fou, Tusi a Mamona, Mataupu Faavae ma Feagaiga, ma le Penina Tau Tele.

  2. O Vaega na filifilia mai i le Faaliliuga a Iosefa Samita o le Tusi Paia. I le 1830, na faatonuina ai e le Alii le Perofeta o Iosefa Samita e amata le galuega o se toeteuteuina po o le faaliliuga o le Faaliliuga a le Tupu o Iakopo o le Tusi Paia. O le faamoemoega o le Perofeta o le toefuataiina lea o nisi o upumoni manino ma le taua na leiloa mai i tusi faavae o le Tusi Paia. Na maea le tele o le galuega ia Iulai 1833. Ae ui i lea, seia oo i le taimi o lona maliu i le 1844, sa faaauauina pea ona faia e ia ni teuteuga ao saunia ai kopi tusilima mo le lomiga. E ui lava sa lei maea le teuteuina o le tusi atoa, sa lei taliaina aloaʼia foi e le Ekalesia, ae o loo i ai i le Faaliliuga a Iosefa Samita le tele o vaaiga loloto i uiga o tusitusiga paia ma o se fesoasoani taua tele e malamalama ai i le Tusi Paia. O nisi o teuteuga sili ona taua o loo i ai lea i le Taiala i Tusitusiga Paia. (Mo nisi faamatalaga, tagai i le autu lea “Faaliliuga a Iosefa Samita” i le Taiala.)

    O le Ekalesia a Iesu Keriso o le Au Paia o Aso e Gata Ai ua faaaogaina le faaliliuga Faa-Peretania o le Tusi Paia mai le Faaliliuga a le Tupu o Iakopo. O lea faaliliuga sa avea o se vaega autu i le toefuataiga o le talalelei ma ua faaauau pea ona avea o se faatosinaga taua tele i le tele o atunuu i le lalolagi atoa.

  3. O le faasologa o mea na tutupu i le Ekalesia, faafanua, ma ata, ma faafanua ma ata fale tusi paia. O lou iloa o le tala i laufanua oloo taʼua i tusitusiga paia, e mafai ona e malamalama atili ai i mea faatusitusiga paia na tutupu. E aofia i le Taiala o faafanua 6 o eria taua i le talafaasolopito o le Ekalesia, faafanua 14 o laufanua faatusi paia, ma le faafanua e 1 o le lalolagi. Ina ia vaaia se nofoaga, ia faaaoga le faasinoupu mo faafanua e te fia malamalama atili i ai. E taitaiina oe e le faasinoupu i le faafanua tonu ma laina faasinotulaga o le nofoaga i le faafanua. E i ai foi faamatalaga e fesoasoani ia te oe e te malamalama atili ai i mea faatusitusiga paia ma le faapitoa na tutupu i ata 18 o le talafaasolopito o le Ekalesia ma ata 32 faale tusi paia.

    Oloo tusi faasolo ai e le talafaasolopito o le Ekalesia aso na tutupu ai mea taua i le toefuataiga ma le tutupu ae o le Ekalesia a Iesu Keriso o le Au Paia o Aso e Gata Ai.

Ina ia fesoasoani atili ia te oe i au suesuega i tusitusiga paia, o loo i ai i le Taiala le tele o isi faamatalaga e aoga tele. Mo se faataitaiga, afai e te sue ane i le faaupuga lea “Iesu Keriso,” o le a e maua ai se lisi maoae o autu uma i le Taiala o loo tuuina mai ai faamatalaga e faatatau tonu i le Faaola ma lana misiona. Ua pau lenei o le autu i le Taiala ua i ai se lisi lautele faapena, lea ua faamamafa mai ai le tāua o Keriso i tagata uma. E le gata i lea, i lalo o le autu lea, “Faasologa o mea na tutupu,” o nisi o mea sili ona tāua na tutupu i ona po o le Tusi Paia ma le Tusi a Mamona o loo tusia ai, faatasi ma aso taumate. O le autū lea “Evagelia” e aofia ai le lotogatasi o Evagelia. O lenei lotogatasi ua faatusatusa ai aoaoga a le Faaola e pei ona maua i le Mataio, Mareko, Luka, Ioane, ma faaaliga i aso e gata ai.