បទជម្រើសនានាចេញពីការបកប្រែព្រះគម្ពីរប៊ីបដោយយ៉ូសែប ស៊្មីធ
តទៅនេះ គឺជាភាគជម្រើសទាំងឡាយចេញពីការបកប្រែព្រះគម្ពីរប៊ីបច្បាប់ស្ដេចយេម្ស ដោយយ៉ូសែប ស៊្មីធ (ក.យ.ស.)។ ព្រះអម្ចាស់ទ្រង់បានបំផុសគំនិតដល់យ៉ូសែប ស៊្មីធ ឲ្យសាងឡើងវិញនូវសេចក្ដីពិតទាំងឡាយ ចំពោះឯកសារនៅក្នុងព្រះគម្ពីរប៊ីប ដែលបានបាត់បង់ ឬបានប្រែប្រួល ចាប់តាំងពីបានសរសេរពាក្យពេចន៍នោះលើកដំបូងមក។ សេចក្ដីពិតទាំងឡាយដែលបានសាងឡើងវិញនេះ បានបញ្ជាក់នូវគោលលទ្ធិ ហើយបានពន្យល់បទគម្ពីរឲ្យបានច្បាស់លាស់ឡើង។ វគ្គទាំងឡាយដែលបានជ្រើសរើសឡើងសម្រាប់សេចក្ដី ណែនាំដល់បទព្រះគម្ពីរ នឹងអាចជួយឲ្យអ្នកយល់បទព្រះគម្ពីរកាន់តែច្បាស់លាស់ឡើង ទោះជាបានបកប្រែចូលភាសាណាក្ដី។
ពីព្រោះព្រះអម្ចាស់ទ្រង់បានបើកសម្ដែងប្រាប់ដល់យ៉ូសែប អំពីសេចក្ដីពិតខ្លះៗ ដែលពួកអ្នកនិពន្ធដើមបានកត់ទុកនៅគ្រាមួយ នោះការបកប្រែដោយយ៉ូសែប ស៊្មីធ មិនដូចការបកប្រែព្រះគម្ពីរប៊ីបឯទៀតនៅក្នុងពិភពលោកឡើយ។ តាមន័យនេះ ពាក្យថា ការបកប្រែ គឺបានយកមកប្រើក្នុងបែបដ៏ទំលំទូលាយមួយ ហើយខុសពីធម្មតា ព្រោះការប្រែដោយយ៉ូសែប គឺជាវិវរណៈ ជាជាងការបកប្រែចំៗពីភាសាមួយទៅភាសាមួយទៀត។ សម្រាប់ព័ត៌មានបន្ថែមទៀត សូមមើល « ការបកប្រែដោយយ៉ូសែប ស៊្មីធ (ក.យ.ស.) » នៅក្នុងបញ្ជីរាយមុខប្រធានបទតាមលំដាប់អក្ខរក្រម នៅក្នុងសេចក្ដីណែនាំដល់បទព្រះគម្ពីរ។
ការពន្យល់ដែលមានដូចតទៅនេះ បង្ហាញនូវបទជ្រើសរើសជាឧទាហរណ៍ចេញពី ក.យ.ស. ៖
ក.យ.ស., ម៉ាថាយ ៤:១, ៥–៦, ៨–៩ (ចូរប្រៀបធៀបនឹងគម្ពីរម៉ាថាយ ៤:១, ៥–៦, ៨–៩; ការកែសម្រួលដូចគ្នា ត្រូវបានធ្វើនៅក្នុងគម្ពីរលូកា ៤:២, ៥–១១)
(ព្រះយេស៊ូវទ្រង់ត្រូវបាននាំទៅដោយព្រះវិញ្ញាណ ពុំមែនដោយអារក្សទេ)។
១គ្រានោះព្រះយេស៊ូវត្រូវបាននាំទៅដោយព្រះវិញ្ញាណទៅឯទីរហោស្ថាន ដើម្បីទៅជួបព្រះ។
៥គ្រានោះ ព្រះយេស៊ូវត្រូវបាននាំឡើងទៅឯក្រុងបរិសុទ្ធ ហើយព្រះវិញ្ញាណបានដាក់ទ្រង់លើកំពូលព្រះវិហារបរិសុទ្ធ។
៦គ្រានោះ អារក្សបានមករកទ្រង់ ហើយទូលថា បើអ្នកជាព្រះរាជបុត្រានៃព្រះមែន ចូរទម្លាក់ខ្លួនទៅក្រោមចុះ ត្បិតមានសេចក្ដីចែងទុកមកថា « ទ្រង់នឹងបង្គាប់ពួកទេវតានៃទ្រង់ពីដំណើរអ្នក ហើយពួកទេវតានឹងទ្រអ្នកដោយដៃ ក្រែងលោជើងអ្នកទង្គិចនឹងថ្ម »។
៨ហើយមួយទៀត ព្រះយេស៊ូវទ្រង់បានគង់នៅក្នុងព្រះវិញ្ញាណ ហើយព្រះវិញ្ញាណបាននាំទ្រង់ឡើងទៅលើកំពូលភ្នំយ៉ាងខ្ពស់ ហើយបានបង្ហាញអស់ទាំងនគរក្នុងលោកិយ និងសិរីល្អរបស់នគរទាំងនោះថ្វាយទ្រង់ទត។
៩ហើយអារក្សបានមករកទ្រង់ទៀត ហើយទូលថា គ្រប់របស់ទាំងនេះ ខ្ញុំនឹងឲ្យដល់អ្នក បើសិនជាអ្នកក្រាបថ្វាយបង្គំខ្ញុំ។
សេចក្ដីយោងនៅក្នុងអក្សរធំនេះ គឺជាវគ្គដែលយ៉ូសែប ស៊្មីធ ធ្វើការបកប្រែពីព្រះគម្ពីរប៊ីបច្បាប់ស្ដេចយេម្ស។ ពីព្រោះការបកប្រែរបស់លោកបានសាងពាក្យពេចន៍ឡើងវិញដល់ឯកសារនៅក្នុងព្រះគម្ពីរប៊ីប នោះខទាំងឡាយប្រហែលខុសពីគម្ពីរដែលអ្នកប្រើ។
នៅក្នុងវង់ក្រចក គឺជាសេចក្ដីយោងនៅក្នុងព្រះគម្ពីររបស់អ្នក ដែលអ្នកត្រូវប្រៀបធៀបនឹងការបកប្រែដោយយ៉ូសែបស៊្មីធ។
សេចក្ដីថ្លែងនេះ ពន្យល់ប្រាប់ពីប្រភេទគោលលទ្ធិ ដែលយ៉ូសែប ស៊្មីធ បានបញ្ជាក់ប្រាប់ឲ្យបានច្បាស់លាស់នៅក្នុងការបកប្រែរបស់លោក។
នេះគឺជាឯកសារ ដែលយ៉ូសែប ស៊្មីធបានបកប្រែ។
© 2007 by Intellectual Reserve, Inc.
រក្សាសិទ្ធិគ្រប់យ៉ាង
Printed in Cambodia 7/2007
19932006
Translation of the Book of Mormon
Cambodian