Vaega na Filifilia mai le Faaliliuga
a Iosefa Samita o le Tusi Paia

O vaega ua taʼua i lalo na filifilia mai le Faaliliuga a Iosefa Samita o le Tusi Paia a le Tupu o Iakopo (FIS). Na musuia e le Alii le Perofeta o Iosefa Samita e toe fuatai upumoni i le Tusi Paia na aveesea pe na suia mai uluai upu na tusia ai i le amataga. O le toe fuataiina mai o nei upumoni ua faamanino ai mataupu faavae ma ua faateleina ai le malamalama i tusitusiga paia. O mau ua filifilia mo le Taiala o le a fesoasoani e faateleina ai lou malamalama e tusa lava po o le a le gagana ua faaliliu i ai.

Talu ai ina sa faaali e le Alii ia Iosefa ni isi o upumoni faapitoa na tusia e uluai tusitala, o lea ua tulaga ese ai lava le Faaliliuga a Iosefa Samita i soo se isi lava faaliliuga o le Tusi Paia i le lalolagi. I lenei tulaga, o le upu faaliliuga o loo faaaogaina i se uiga loloto ma le tulagaese lava nai lo le ala e masani ai, auā o le faaliliuga a Iosefa na sili atu le tele o faaaliga na aofia ai nai lo le faaliliuga saʼo mai lava i le tasi gagana i le tasi gagana. Mo ni isi faamatalaga e uiga i le FIS, tagai i le “Faaliliuga a Iosefa Samita (FIS)” i le faasologa o autū i le alafopeta i le Taiala.

O faamalamalamaga ua taʼua i lalo ua faaali atu ai le faataitaiga o se mau ua filifilia mai le FIS:

Ata

vaega

FIS, Mataio 4:1, 5–6, 8–9 (faatusatusa i le Mataio 4:1, 5–6, 8–9; e faapea foi suiga na faia i le Luka 4:2, 5–11)

(Na taitaiina Iesu e le Agaga, ae lē o Satani.)

1 Ona aveina ai lea o Iesu e le Agaga, i le vao, ina ia faatasi ai ma le Atua.

5 Ona ia aveina ai lea o Iesu i le aai paia, ma sa tuu ai o ia e le Agaga i luga o le tumutumu o le malumalu.

6 Ona sau ai lea o le tiapolo ia te ia ma faapea atu, Afai o oe o le alo o le Atua, inā oso ia oe i lalo: aua ua tusia, o le a Ia tuuina atu i ana agelu le vaaiga mo oe: ma o le a latou tauaveina oe i o latou lima, ina nei tuʼia lou vae i se maa i soo se taimi.

8 Ma sa toe aveina Iesu e le Agaga, ma sa aveina aʼe o ia i se mauga e matuā maualuga lava, ma sa faaali atu ai ia te ia malo uma o le lalolagi ma o latou mamalu.

9 Ma sa toe sau le tiapolo ia te ia, ma faapea atu, O nei mea uma o le a ou tuu atu ia te oe, pe afai e te paʼū i lalo ma ifo ia te aʼu.

O le mau lenei e pei ona faaliliuina e Iosefa Samita.

O le faamatalaga lenei ua faamalamalama mai ai le mataupu faavae na faamanino mai e Iosefa Samita i lana faaliliuga.

O le faamatalaga o i totonu o puipui-afamasina o le mau lena o loo i ai i lau Tusi Paia e tatau ona e faatusatusaina i le Faaliliuga a Iosefa Samita.

O le mau lenei o loo i mataitusi olaola—o le mau lena i le faaliliuga a Iosefa Samita o le Tusi Paia a le Tupu o Iakopo. Ona o lana faaliliuga ua toe fuataiina ai upu i mau o le Tusi Paia, atonu e ese numera o fuaiupu mai le Tusi Paia o loo e faaaogaina.