ក.យ.ស., លោកុប្បត្តិ ១៤:២៥–៤០ (ចូរប្រៀបធៀបនឹងគម្ពីរលោកុប្បត្តិ ១៤)
(ការងារបម្រើដ៏មហិមារបស់ម៉ិលគីស្សាដែកត្រូវបានប្រាប់ អានុភាព និងព្រះពរទាំងឡាយនៃបព្វជិតភាពម៉ិលគីស្សាដែកត្រូវបានអធិប្បាយប្រាប់)។
២៥ហើយម៉ិលគីស្សាដែកបានបន្លឺសំឡេងរបស់លោក ហើយបានប្រទានពរដល់អាប់រ៉ាម។
២៦ឥឡូវនេះ ម៉ិលគីស្សាដែក គឺជាបុរសនៃសេចក្ដីជំនឿ ដែលបាននាំមកនូវសេចក្ដីសុចរិត; ហើយកាលនៅវ័យក្មេង លោកបានកោតខ្លាចដល់ព្រះ ហើយបានបិទមាត់សិង្ហ ហើយបានពន្លត់អំណាចភ្លើង។
២៧ដូច្នេះហើយ ដោយបានទទួលការអនុមតិពីព្រះ ទើបលោកត្រូវបានតែងតាំងជាសង្ឃជាន់ខ្ពស់ តាមរបៀបនៃសេចក្ដីសញ្ញាដែលព្រះទ្រង់បានធ្វើជាមួយនឹងហេណុក។
២៨បព្វជិតភាពនោះគឺតាមរបៀបនៃព្រះរាជបុត្រានៃព្រះ របៀបនោះពុំបានមកដោយមនុស្ស ឬដោយបំណងនៃចិត្តមនុស្សទេ ឬដោយឪពុក ឬម្ដាយ ឬដោយការផ្ដើមនៃថ្ងៃ ឬទីបញ្ចប់នៃឆ្នាំឡើយ ប៉ុន្តែដោយសារព្រះវិញ។
២៩ហើយបព្វជិតភាពត្រូវបានប្រគល់ដល់មនុស្សលោក ដោយសារការហៅដោយសំឡេងរបស់ទ្រង់ផ្ទាល់ ស្របតាមព្រះហឫទ័យរបស់ទ្រង់ផ្ទាល់ ដល់អស់អ្នកណាដែលជឿដល់ព្រះនាមរបស់ទ្រង់។
៣០ត្បិតព្រះទ្រង់បានស្បថនឹងហេណុក និងពូជលោក ដោយសេចក្ដីសម្បថព្រះអង្គទ្រង់ថាមនុស្សគ្រប់រូបត្រូវបានតែងតាំងតាមរបៀប និងការហៅ នោះគប្បីមានអំណាច ដោយសារសេចក្ដីជំនឿ ដើម្បីបំបាក់ភ្នំទាំងឡាយ ដើម្បីញែកទឹកសមុទ្រ ដើម្បីធ្វើឲ្យទឹករីងស្ងួត ដើម្បីបំបែរដំណើរទឹកចេញពីផ្លូវវា។
៣១ដើម្បីទប់ទល់ពួកពលទ័ពនៃសាសន៍ទាំងឡាយ ដើម្បីចែកផែនដី ដើម្បីបំបាក់ចំណងគ្រប់មុខដើម្បីឈរនៅក្នុងវត្តមាននៃព្រះ ដើម្បីធ្វើគ្រប់អ្វីៗទាំងអស់ ស្របតាមព្រះហឫទ័យរបស់ទ្រង់ ស្របតាមព្រះបញ្ញត្តិរបស់ទ្រង់ ដើម្បីមានអំណាចលើក្សត្របុរី និងអំណាចទាំងឡាយ ហើយនេះគឺដោយសារព្រះហឫទ័យនៃព្រះរាជបុត្រានៃព្រះដែលមានតាំងពីមុនកំណើតលោកិយមកម្ល៉េះ។
៣២ហើយមនុស្សលោក ដោយមានសេចក្ដីជំនឿនេះបានឡើងមកដល់របៀបនេះ ដែលជារបៀបនៃព្រះ ទើបបានផ្លាស់ប្រែរូប ហើយត្រូវបាននាំឡើងទៅលើស្ថានសួគ៌។
៣៣ហើយឥឡូវនេះ ម៉ិលគីស្សាដែក គឺជាសង្ឃជាន់ខ្ពស់តាមរបៀបនេះ ហេតុដូច្នេះហើយ ទើបលោកបានសេចក្ដីសុខសាន្តនៅក្រុងសាឡិម ហើយត្រូវបានហៅថា ស្ដេចនៃសេចក្ដីសុខសាន្ត។
៣៤ហើយប្រជារាស្ត្រលោកបាននាំមកនូវសេចក្ដីសុចរិត ហើយបានទទួលស្ថានសួគ៌ ហើយស្វែងរកទីក្រុងហេណុក ដែលបានលើកឡើងយកទៅ ដោយបានបំបែកទីក្រុងនោះចេញពីផែនដីទុកចំពោះថ្ងៃចុងក្រោយ ឬចំពោះចុងបំផុតផែនដី។
៣៥ហើយបានមានព្រះបន្ទូល ហើយស្បថដោយសម្បថមួយថា ផ្ទៃមេឃ និងផែនដីនឹងត្រូវបានមករួមគ្នា ហើយពួកកូននៃព្រះនឹងត្រូវបានសាកល្បងហាក់ដូចជាដោយភ្លើង។
៣៦ហើយម៉ិលគីស្សាដែកនេះហើយ ដោយបានតាំងសេចក្ដីសុចរិត ទើបបានហៅថា ស្ដេចពីស្ថានសួគ៌ ដោយប្រជារាស្ត្ររបស់លោក ឬម្យ៉ាងទៀតថា ស្ដេចនៃសេចក្ដីសុខសាន្ត។
៣៧ហើយលោកបានបន្លឺសំឡេងរបស់លោក ហើយលោកបានប្រទានពរដល់អាប់រ៉ាម ដោយព្រោះម៉ិលគីស្សាដែកជាសង្ឃជាន់ខ្ពស់ ហើយជាអ្នករក្សាឃ្លាំងនៃព្រះ
៣៨លោកនេះហើយដែលព្រះទ្រង់បានតាំងឲ្យទទួលដង្វាយ១ភាគ១០ ដើម្បីមនុស្សទាល់ក្រ។
៣៩ហេតុដូច្នោះហើយ ទើបអាប់រ៉ាមបានថ្វាយដល់លោកនូវដង្វាយ១ភាគ១០ចំពោះអ្វីៗទាំងអស់ដែលលោកមាន ចំពោះទ្រព្យសម្បត្តិទាំងអស់ដែលលោកមាន ដែលព្រះទ្រង់បានប្រទានដល់លោក លើសជាងដែលលោកត្រូវការ។
៤០ហើយហេតុការណ៍បានកើតឡើងថា ព្រះទ្រង់បានប្រទានដល់អាប់រ៉ាម ហើយបានប្រទានដល់លោកនូវទ្រព្យសម្បត្តិទាំងឡាយ និងកិត្តិយស និងដែនដីទាំងឡាយ ដើម្បីទុកជាកេរ្តិ៍អាករដ៏អស់កល្បជានិច្ច ស្របតាមសេចក្ដីសញ្ញាដែលលោកបានធ្វើ និងស្របតាមព្រះពរទាំងឡាយ ដែលម៉ិលគីស្សាដែកបានប្រទានដល់លោក។