ក.យ.ស., លោកុប្បត្តិ ៤៨:៥–១១ (ចូរប្រៀបធៀបនឹងគម្ពីរលោកុប្បត្តិ ៤៨:៥–៦)
(ពូជរបស់យ៉ូសែបនឹងទៅជាពួកអ្នកដឹកនាំក្នុងការប្រមូលសាសន៍អ៊ីស្រាអែលនៅថ្ងៃចុងក្រោយ)។
៥ហើយឥឡូវនេះ កូនប្រុសរបស់កូនទាំងពីរនាក់ គឺអេប្រាអិម និងម៉ាន៉ាសេ ដែលកើតដល់កូននៅស្រុកអេស៊ីព្ទ គ្រាមុនដែលឪពុកមកឯកូននៅស្រុកអេស៊ីព្ទ មើលចុះ ពួកគេជារបស់ផងឪពុក ហើយព្រះនៃពួកអយ្យកោរបស់កូននឹងប្រទានពរដល់ពួកគេ គឺដូចជារូបេន និងស៊ីម្មានដែរ ពួកគេក៏នឹងបានព្រះពរ ព្រោះពួកគេជារបស់ផងឪពុកដែរ ហេតុដូច្នោះហើយ ទើបពួកគេនឹងត្រូវបានហៅតាមឈ្មោះរបស់ឪពុក។ (ហេតុដូច្នេះហើយ ទើបពួកគេត្រូវបានហៅថា សាសន៍អ៊ីស្រាអែល)។
៦ហើយពូជរបស់កូន ដែលកូនបង្កើតបានក្រោយពីពួកគេតទៅទៀត នោះនឹងបានជារបស់ផងកូន ហើយនឹងត្រូវបានហៅតាមឈ្មោះនៃពួកបងប្រុសរបស់ពួកគេ ក្នុងចំណែកកេរ្តិ៍អាកររបស់ពួកគេនៅក្នុងពូជអំបូរទាំងឡាយ ហេតុដូច្នេះហើយ ពួកគេត្រូវបានហៅថា ពូជអំបូររបស់ម៉ាន៉ាសេ និងពូជអំបូររបស់អេប្រាអិម។
៧ហើយយ៉ាកុបបាននិយាយទៅយ៉ូសែបថា កាលព្រះនៃពួកអយ្យកោរបស់ឪពុកបានលេចមកឯឪពុកនៅភូមិលូស នៅស្រុកកាណាន ទ្រង់បានស្បថនឹងឪពុកថា ទ្រង់នឹងប្រទានដល់ឪពុក និងដល់ពូជរបស់ឪពុកនូវដែនដីមួយទុកជាកេរ្តិ៍អាករដ៏អស់កល្បជានិច្ច។
៨ហេតុដូច្នេះហើយ ឱកូនប្រុសរបស់ឪពុកអើយ ទ្រង់បានប្រទានដល់ឪពុកក្នុងការចិញ្ចឹមកូនឲ្យធំឡើងធ្វើអ្នកបម្រើដល់ឪពុក ក្នុងការជួយសង្គ្រោះគ្រួសារឪពុកឲ្យរួចពីសេចក្ដីស្លាប់
៩ក្នុងការរំដោះប្រជាជនរបស់ឪពុក គឺពួកបងប្អូនរបស់កូន ឲ្យរួចផុតពីអំណត់អត់ ដែលមានដ៏ធ្ងន់ធ្ងរនៅលើដែនដី ហេតុដូច្នោះហើយ ព្រះនៃពួកអយ្យកោរបស់កូននឹងប្រទានដល់កូន និងដល់ផលនៃពោះរបស់កូន ប្រយោជន៍ឲ្យពួកគេបានពរលើសជាងបងប្អូនរបស់កូន និងលើសជាងគ្រួសារនៃឪពុករបស់កូនទៅទៀត
១០ព្រោះកូនបានជោគជ័យ ហើយគ្រួសារនៃឪពុករបស់កូនបានក្រាបចុះចំពោះកូន ដូចដែលបានបង្ហាញដល់កូន មុនកូនត្រូវបានលក់ទៅស្រុកអេស៊ីព្ទដោយដៃនៃពួកបងប្រុសរបស់កូន ហេតុដូច្នោះហើយ ទើបពួកបងប្រុសរបស់កូនត្រូវក្រាបចុះចំពោះកូនពីតំណមួយ ទៅតំណមួយ គឺចំពោះផលនៃពោះរបស់កូនជារៀងដរាបតទៅ
១១ត្បិតកូននឹងទៅជាពន្លឺដល់ប្រជាជនរបស់កូន ដើម្បីដោះលែងពួកគេនៅថ្ងៃជាប់ឃុំឃាំងរបស់ពួកគេឲ្យរួចផុតពីសេវកភាព ហើយដើម្បីផ្ដល់សេចក្ដីសង្គ្រោះដល់ពួកគេ កាលពួកគេបានជួបជុំគ្នា ដោយក្រាបនៅក្រោមអំពើបាប។