1 Sa talaiina le talalelei i le amataga e ala i le Alo. Ma o le talalelei o le afioga lea, ma o le afioga sa faatasi ma le Alo, ma o le Alo sa faatasi ma le Atua, ma o le Alo e mai le Atua.

2 O ia lava sa faatasi ma le Atua i le amataga.

3 Na ia faia mea uma lava; e leai foi se mea e tasi na faia e lei faia e ia.

4 Sa ia te ia le talalelei, ma o le talalelei o le ola lea, ma o le ola o le malamalama lea o tagata;

5 Ma e susulu mai le malamalama i le lalolagi, ae le iloaina ai e le lalolagi.

6 Na auina mai le tagata mai le Atua, o Ioane lona igoa.

7 Na sau o ia lava i le lalolagi e avea o se molimau, e molimau atu e uiga i le malamalama, e molimau atu e uiga i le talalelei e ala i le Alo, i tagata uma, ina ia talitonu ai tagata e ala ia te ia.

8 E le o ia o lena malamalama, ae na sau o ia e molimau atu e uiga i lena malamalama,

9 O ia lena o le malamalama moni, na te faamalamalamaina tagata uma lava o e o mai i le lalolagi;

10 O le Alo lava o le Atua. O lē na i ai i le lalolagi, ma sa faia e ia le lalolagi, ae sa lē iloa o ia e le lalolagi.

11 Na maliu mai o ia i ana lava, ae lei talia o ia e ana lava.

12 Aʼo i latou uma o e na talia o ia, na ia avatu i ai le mana e avea ma atalii o le Atua; naʼo latou lava o e talitonu i lona suafa.

13 Na fanau mai o ia, e lē o le toto, e lē o le loto foi o le tino, e lē o le loto foi o le tagata, aʼo le Atua lava.

14 Ma o le afioga lava lea sa liu tino tagata, sa mau foi ma i tatou, ma sa matou vaaia lona mamalu, o le mamalu pei o le Toatasi na Fanaua e le Tamā, ua tumu i le alofa tunoa ma le upumoni.

15 Na molimau Ioane ia te ia, ma sa alaga, ua faapea mai, O ia lenei na ou fai atu ai; O lē e mulimuli mai ia te aʼu, e sili o ia ia te aʼu; aua na muamua o ia ia te aʼu.

16 Aua sa i le amataga le Lokou, o le Alo lava, o lē na liu tino tagata, ma sa auina mai ia i tatou i le finagalo o le Tamā. Ma o i latou uma e talitonu i lona suafa e mauaina lona atoatoaga. Ma ua matou mauaina uma lona atoatoaga, o le ola pea ma le ola e faavavau lava, i lona alofa tunoa.

17 Aua na tuuina mai le tulafono e ala ia Mose, aʼo le ola ma le upumoni na oo mai e ala ia Iesu Keriso.

18 Aua sa tusa le tulafono ma le poloaiga faaletino, i le pulea o le oti; aʼo le talalelei sa tusa ma le mana o le ola e le iu, e ala ia Iesu Keriso, le Alo e Toatasi na Fanaua, o lē o loʼo i le loto o le Tamā.

19 Ma e leai se tagata ua vaai i le Atua i soo se taimi, vaganā ua molimau atu o ia i le Alo; aua sei vaganā ua ala mai ia te ia e leai lava se tasi e mafai ona faaolaina.

20 Ma o le talafaamaumau lenei a Ioane, ina ua aauina atu e Iutaia o ositaulaga ma sa Levī mai Ierusalema, e fesili atu ia te ia; O ai ea oe?

21 Ma sa ia taʼutino atu, ma sa lei faafiti o ia lava o Elaia; ae na ia taʼutino atu, ua faapea atu; E lē o aʼu o le Keriso.

22 Ma sa latou fesili atu ia te ia, ua faapea atu; Pe faapefea la ona avea oe ma Elaia? Ma sa ia tali atu, E le o aʼu o lena Elaia lea e toe fuataiina mai mea uma. Ma sa latou fesili atu ia te ia, ua faapea atu, Po o oe ea o lena perofeta? Ma sa ia tali atu, E leai.

23 Ona latou fai atu ai lea ia te ia, O ai ea la oe? ina ia matou avatu ai se tali ia te i latou na aauina mai i matou. O le ā ea sau upu e uiga ia te oe?

24 Sa fai atu o ia, O aʼu o le leo o lē alaga i le vao, Inā faasaosao ia le ala o le Alii, faapei ona fai mai ai le perofeta o Isaia.

25 Ma o i latou o e na aauina atu o lo le au faresaio.

26 Ma sa latou fesili ia te ia, ma fai atu ia te ia; Aiseā la ua e papatiso atu ai, pe afai e lē o le Keriso oe, pe Elaia o lē e toe fuataiina mai mea uma, po o lena foi perofeta?

27 Sa tali atu Ioane ia te i latou, ua faapea atu; Ou te papatiso atu i le vai, aʼo loʼo tu mai i totonu ia te outou le tasi, o lē tou te le iloa;

28 O ia lena ou te molimau i ai. O ia o lena perofeta, o Elaia lava, o lē ua mulimuli mai ia te aʼu, ae sili lava ia te aʼu, e lē agavaa aʼu e tatalaina le nonoa o lona seevae, po o lona tulaga e lē mafai ona ou faataunuuina; aua e papatiso atu o ia, e le gata i le vai, aʼo le afi foi, atoa ma le Agaga Paia.

29 O le aso na sosoo ai na vaai ai Ioane ia Iesu ua maliu mai ia te ia, ma sa faapea atu; Faauta i le Tamai Mamoe a le Atua, o lē na te aveesea le agasala a le lalolagi!

30 Ma sa molimau Ioane i tagata e uiga ia te ia, ua faapea atu, O ia lenei o lē na ou fai atu ai; E mulimuli mai ia te aʼu le tagata o lē sili ia te aʼu; aua na muamua o ia ia te aʼu, ma sa ou iloa o ia, ma e tatau ona faaali atu o ia ia Isaraelu; o lea ua ou sau ai e papatiso atu i le vai.

31 Ma sa molimau atu Ioane, ua faapea atu: Ina ua papatisoina o ia e aʼu, na ou vaaia le Agaga na afio ifo mai le lagi e pei o se lupe, ma sa nofo ai i ona luga.

32 Ma sa ou iloa o ia; aua lē na auina mai aʼu e papatiso atu i le vai, o ia lava na fetalai mai ia te aʼu; O lē e te vaai e afio ifo i ai le Agaga Paia, ma nofo ai i ona luga, o ia lava lea na te papatiso atu i le Agaga Paia.

33 Ma sa ou vaai, ma molimau atu o ia lava lenei o le Alo o le Atua.

34 O mea nei na faia i Petapara, i ona talatu o Ioritana, lea na papatiso atu ai Ioane.

42 Ma sa ia aumaia o ia ia Iesu; ma ina ua silasila atu Iesu ia te ia, na ia fetalai atu, O Simona oe, le atalii o Iona, e faaigoa oe ia Kefa, o lona uiga, pe a faamatalaina, o le tagatavaai, po o le maa. Ma o i latou o ni tagata faifaiva. Ma sa latou tuua loa mea uma, ma mulimuli atu ia Iesu.