FIS, Mareko 14:20–25 (faatusatusa i le Mareko 14:22–25; FIS, Mataio 26:22, 24–25)
(Na faatulagaina e Iesu le faamanatuga.)
20 Ma aʼo latou aai, na tago Iesu i le areto ma faamanuiaina ai, ma tofitofi, ma avatu ia te i latou, ma faapea atu, Ina fetagofi ia i ai, ma ia aai.
21 Faauta, o le mea lenei e tatau ona outou faia i le faamanatuina o loʼu tino; aua o taimi uma tou te faia ai lenei mea tou te manatua ai lenei itulā na ou faatasi ai ma outou.
22 Ma sa ia tago foi i le ipu, ma ina ua uma ona ia tuuina atu le faafetai, na ia tuu atu ai ia te i latou; ma sa latou feinu uma i ai.
23 Ma sa ia fetalai atu ia te i latou, O lenei mea e faamanatuina ai loʼu toto lea e faamaligiina mo le toatele, ma le feagaiga fou lea na ou tuuina atu ia te outou; aua tou te molimau atu ai e uiga ia te aʼu i le lalolagi uma.
24 Ma o taimi uma tou te faia ai lenei sauniga, o le a outou manatua ai aʼu i lenei itulā lea na ou faatasi ai ma outou ma ou inu ai faatasi ma outou i lenei ipu, o le taimi mulimuli lava o laʼu galuega.
25 E moni ou te fai atu ia te outou, O lenei mea tou te molimau atu ai; aua ou te lē toe inuina le fua o le vine faatasi ma outou, seia oo i lena aso lea ou te inu fouina ai i le malo o le Atua.
FIS, Mareko 14:36–38 (faatusatusa i le Mareko 14:32–34)
(I Ketesemane, e oo lava i ni isi o le Toasefululua sa lei malamalama lelei i le tulaga a Iesu i le avea o le Mesia.)
36 Ma sa latou oo atu i se nofoaga na igoa ia Ketesemane, lea o le faatoaga; ma sa amata ai ona matuā ofo le au soʼo, ma atuatuvale tele, ua muimui ai i o latou lava loto, i le fia iloa pe lē o le Mesia lenei.
37 Ma sa silafia e Iesu o latou loto, na fetalai atu ai i ona soo, Inā nonofo ia outou iinei, aʼo tatalo aʼu.
38 Ma sa ave faatasi ma ia, o Peteru, ma Iakopo, ma Ioane, ma sa ia aoai malosi i latou, ma sa faapea atu ia te i latou, Ua matuā faanoanoa lava loʼu agaga, e oo lava i le oti; inā nonofo ia outou iinei ma ia mataala.