ជំនួយ​ការសិក្សា
ក.យ.ស., ម៉ាថាយ 21


ក.យ.ស., ម៉ាថាយ ២១:៣៣ (ចូរ​ប្រៀបធៀប​នឹង​គម្ពីរ​ម៉ាថាយ ២១:៣២–៣៣)

(មនុស្ស​ត្រូវ​តែ​ប្រែ​ចិត្ត​មុនគេ​អាច​ជឿ​ដល់​ព្រះ​គ្រីស្ទ)។

៣៣ត្បិត​អ្នក​ណា​ដែល​មិន​ជឿ​តាម​យ៉ូហាន​ដែល​ស្ដី​អំពី​ខ្ញុំ​ទេ នោះ​ពុំ​អាច​ជឿ​ដល់​ខ្ញុំ​ដែរ លើក​លែងតែ​អ្នក​នោះ​ប្រែ​ចិត្ត​ជា​មុន​សិន។

ក.យ.ស., ម៉ាថាយ ២១:៤៧–៥៦ (ចូរ​ប្រៀបធៀប​នឹង​គម្ពីរ​ម៉ាថាយ ២១:៤៥–៤៦)

(ព្រះ​យេស៊ូវ​ទ្រង់​បាន​ប្រកាស​ប្រាប់​ថា ទ្រង់​ជា​ថ្ម​ជ្រុង​យ៉ាង​ឯក។ ដំណឹង​ល្អ​ត្រូវ​បាន​ប្រទាន​ដល់​ពួក​សាសន៍​យូដា រួច​ទើប​ទៅ​ដល់​ពួក​សាសន៍​ដទៃ។ ពួក​ទុច្ចរិត​នឹង​ត្រូវ​បំផ្លាញ​ចោល កាល​ព្រះ​យេស៊ូវ​ទ្រង់​យាង​មក​វិញ)។

៤៧ហើយ​កាល​ពួក​សង្គ្រាជ និង​ពួក​ផារីស៊ី​បាន​ឮ​ពាក្យ​ប្រៀប​ប្រដូច​ទាំង​ឡាយ​របស់​ទ្រង់​ហើយ នោះ​ពួក​គេ​ដឹង​ថា ទ្រង់​មាន​ព្រះ​បន្ទូល​អំពី​ពួក​គេ។

៤៨ហើយ​ពួក​គេ​និយាយ​គ្នា​ថា តើ​មនុស្ស​នេះ​គិត​ថា មាន​តែ​ខ្លួន​គាត់​ម្នាក់​ឬ​ដែល​អាច​បំផ្លាញ​នគរ​ដ៏​ធំ​នេះ​បាន? ហើយ​ពួក​គេ​ក៏​ខឹង​នឹង​ទ្រង់។

៤៩ប៉ុន្តែ​កាល​ពួក​គេ​រកហេតុ​ដើម្បី​ចាប់​ទ្រង់ ពួក​គេ​ខ្លាច​ហ្វូង​មនុស្ស ពី​ព្រោះ​ពួក​គេ​បាន​ដឹង​ថា បណ្ដាជន​រាប់​ទ្រង់​ទុកជា​ព្យាការី​ម្នាក់។

៥០ហើយ​ឥឡូវ​នេះ ពួក​សិស្ស​របស់​ទ្រង់​បាន​មក​រក​ទ្រង់ ហើយ​ទ្រង់​មាន​ព្រះ​បន្ទូល​នឹង​ពួក​គេ​ថា តើ​អ្នក​រាល់​គ្នា​ឆ្ងល់​អំពី​ពាក្យ​ប្រៀប​ប្រដូច​ដែល​ខ្ញុំ​បាន​និយាយ​អំពី​ពួក​គេ​ឬ​អី?

៥១ខ្ញុំ​ប្រាប់​អ្នក​រាល់​គ្នា​ជា​ប្រាកដ​ថា ខ្ញុំ​ជា​ថ្ម ហើយ​ពួក​ទុច្ចរិត​ទាំង​នោះ​បាន​ចោល​ខ្ញុំ​ចេញ។

៥២ខ្ញុំ​ជា​ថ្ម​ជ្រុង​យ៉ាង​ឯក។ ពួក​សាសន៍​យូដា​ទាំង​នេះ​នឹង​ធ្លាក់​លើ​ខ្ញុំ ហើយ​នឹង​ត្រូវ​បាក់​បែក។

៥៣ហើយ​នគរ​ព្រះ​នឹង​ត្រូវ​បាន​ហូត​ចេញ​ពី​ពួក​គេ ហើយ​នឹង​ត្រូវ​បាន​ប្រគល់​ទៅ​ឲ្យ​សាសន៍​មួយ ដែល​នឹង​បង្កើត​ផល​ចេញ​ពី​នគរ​នោះ (មាន​ន័យ​ដល់​ពួក​សាសន៍​ដទៃ)។

៥៤ហេតុ​ដូច្នោះ​ហើយ អ្នក​ណា​ដែល​ធ្លាក់​លើ​ថ្ម​នេះ វា​នឹង​កិន​អ្នក​នោះ​ទៅ​ជា​ម្សៅ។

៥៥ហើយ​ដូច្នេះ កាលណា​ព្រះ​អម្ចាស់​នៃ​ចំ​ការ​យាង​មក នោះ​ទ្រង់​នឹង​បំផ្លាញ​ពួក​មនុស្ស​ទុច្ចរិត និង​អាក្រក់​ទាំង​នោះ​ចោល ហើយ​នឹង​ប្រគល់​ចម្ការ​របស់​ទ្រង់​ដល់​អ្នក​ធ្វើ​ការ​ផ្សេង​ទៀត នៅ​ជាន់​ក្រោយ​បង្អស់ គឺ​ដល់​អ្នក​ណា​ដែល​នឹង​ផ្ដល់​ផល​ទាំង​ឡាយ​ដល់​ទ្រង់ តាម​រដូវ ផ្លែ​ទាំង​ឡាយ។

៥៦ហើយ​នៅ​គ្រា​នោះ ទើប​ពួក​គេ​យល់​អំពី​ពាក្យ​ប្រៀប​ប្រដូច ដែល​ទ្រង់​បាន​មាន​ព្រះ​បន្ទូល​ដល់​ពួក​គេ​ថា ពួក​សាសន៍​ដទៃ​ក៏​នឹង​ត្រូវ បំផ្លាញ​ចោល​ដែរ កាល​ព្រះ​អម្ចាស់​ទ្រង់​នឹង​យាង​ចុះ​មក​ពីលើ​ស្ថាន​សួគ៌ ដើម្បី​មក​សោយរាជ្យ​នៅ​ក្នុង​ចម្ការ​របស់​ទ្រង់​ដែល​ជា​ផែនដី ព្រម​ទាំង​បណ្ដាជន​នៅ​លើ​ផែនដី។