ក.យ.ស., ម៉ាថាយ ៤:១, ៥–៦, ៨–៩ (ចូរប្រៀបធៀបនឹងគម្ពីរម៉ាថាយ ៤:១, ៥–៦, ៨–៩; ការកែសម្រួលដូចគ្នា ត្រូវបានធ្វើនៅក្នុងគម្ពីរលូកា ៤:២, ៥–១១)
(ព្រះយេស៊ូវទ្រង់ត្រូវបាននាំទៅដោយព្រះវិញ្ញាណ ពុំមែនដោយអារក្សទេ)។
១គ្រានោះព្រះយេស៊ូវត្រូវបាននាំទៅដោយព្រះវិញ្ញាណទៅឯទីរហោស្ថាន ដើម្បីទៅជួបព្រះ។
៥គ្រានោះ ព្រះយេស៊ូវត្រូវបាននាំឡើងទៅឯក្រុងបរិសុទ្ធ ហើយព្រះវិញ្ញាណបានដាក់ទ្រង់លើកំពូលព្រះវិហារបរិសុទ្ធ។
៦គ្រានោះ អារក្សបានមករកទ្រង់ ហើយទូលថា បើអ្នកជាព្រះរាជបុត្រានៃព្រះមែន ចូរទម្លាក់ខ្លួនទៅក្រោមចុះ ត្បិតមានសេចក្ដីចែងទុកមកថា « ទ្រង់នឹងបង្គាប់ពួកទេវតានៃទ្រង់ពីដំណើរអ្នក ហើយពួកទេវតានឹងទ្រអ្នកដោយដៃ ក្រែងលោជើងអ្នកទង្គិចនឹងថ្ម »។
៨ហើយមួយទៀត ព្រះយេស៊ូវទ្រង់បានគង់នៅក្នុងព្រះវិញ្ញាណ ហើយព្រះវិញ្ញាណបាននាំទ្រង់ឡើងទៅលើកំពូលភ្នំយ៉ាងខ្ពស់ ហើយបានបង្ហាញអស់ទាំងនគរក្នុងលោកិយ និងសិរីល្អរបស់នគរទាំងនោះថ្វាយទ្រង់ទត។
៩ហើយអារក្សបានមករកទ្រង់ទៀត ហើយទូលថា គ្រប់របស់ទាំងនេះ ខ្ញុំនឹងឲ្យដល់អ្នក បើសិនជាអ្នកក្រាបថ្វាយបង្គំខ្ញុំ។
ក.យ.ស., ម៉ាថាយ ៤:១១ (ចូរប្រៀបធៀបនឹងគម្ពីរម៉ាថាយ ៤:១១)
(ព្រះយេស៊ូវបានចាត់ឲ្យពួកទេវតាទៅធ្វើការងារបម្រើយ៉ូហាន-បាទីស្ទ)។
១១ហើយឥឡូវនេះ ព្រះយេស៊ូវបានដឹងថា យ៉ូហានត្រូវគេដាក់គុក នោះទ្រង់ក៏ចាត់ឲ្យពួកទេវតាទៅ ហើយមើលចុះ ពួកទេវតាក៏មក ហើយធ្វើការងារបម្រើគាត់។
ក.យ.ស., ម៉ាថាយ ៤:១៨ (ចូរប្រៀបធៀបនឹងគម្ពីរម៉ាថាយ ៤:១៩)
(ពួកព្យាការីក្នុងព្រះគម្ពីរសញ្ញាចាស់បាននិយាយអំពីព្រះយេស៊ូវ)។
១៨ហើយទ្រង់បានមានព្រះបន្ទូលទៅពួកគេថា ខ្ញុំនេះហើយដែលបានចែងទុកដោយពួកព្យាការី ចូរមកតាមខ្ញុំ ហើយខ្ញុំនឹងតាំងអ្នកឲ្យជាអ្នកនេសាទមនុស្សវិញ។
ក.យ.ស., ម៉ាថាយ ៤:២២ (ចូរប្រៀបធៀបនឹងគម្ពីរម៉ាថាយ ៤:២៣)
(ព្រះយេស៊ូវបានប្រោសបណ្ដាជនឲ្យជាក្នុងចំណោមពួកអ្នកដែលជឿដល់ព្រះនាមទ្រង់)។
២២ហើយព្រះយេស៊ូវ ទ្រង់បានយាងគ្រប់សព្វក្នុងស្រុកកាលីឡេ បង្រៀនក្នុងសាលាប្រជុំទាំងឡាយរបស់ពួកគេ ហើយប្រកាសដំណឹងល្អពីនគរ ព្រមទាំងប្រោសជំងឺគ្រប់មុខ និងអស់ទាំងជនជរាពិការឲ្យជាក្នុងចំណោមបណ្ដាជនដែលជឿដល់ព្រះនាមទ្រង់។