Ngaahi Konga Naʻe Filifili mei he Liliu ʻe Siosefa Sāmita ʻa e Tohi Tapú

ʻOku ʻoatu heni ʻa e ngaahi konga naʻe filifili mai mei he Liliu ʻe Siosefa Sāmita ʻa e pulusi ʻa Kingi Sēmisi ʻo e Tohi Tapú (LSS). Naʻe hanga ʻe he ʻEikí ʻo fakahinohinoʻi ʻa e Palōfita ko Siosefa Sāmitá ke ne fakafoki mai ʻa e ngaahi moʻoni ki he ngaahi tohi ʻi he Tohi Tapú ʻa ia naʻe mole pe liliu talu mei hono tohi ʻo e ngaahi ʻuluaki folofolá. Naʻe hanga ʻe he ngaahi moʻoni naʻe fakafoki mai ko ʻení ʻo fakamahinoʻi ʻa e tokāteliné pea mahino ange ai hono lau ʻo e folofolá. Naʻe ngāue ʻaki ʻa e ngaahi potufolofola ko ia naʻe filifili ke kau ʻi he Ngaahi Fakahinohino ki he Folofolá tuʻunga ʻi ha fakangofua naʻe maʻu mei he Poate ki he Akó ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ni Hono Uá, ʻi Tauʻatāina, ʻi Mīsuli, pea ʻoku totonu ke tokoni ia ke toe mahino ange kiate kimoutolu ʻa e ngaahi folofolá ʻo tatau ai pē pe ko e faʻahinga lea fē ʻoku liliu ia ki aí.

Koeʻuhi ko hono fakahā mai ʻe he ʻEikí kia Siosefa ha ngaahi moʻoni naʻe ʻosi tohi ia ʻe kinautolu naʻa nau ʻuluaki hiki ʻa e ngaahi tohí, ka ʻoku ʻikai faitatau ʻa e Liliu ʻa Siosefa Sāmitá mo ha toe liliu kehe ʻo e Tohi Tapú ʻi he māmaní. ʻI heʻene peheé ʻoku ngāue ʻaki heni ʻa e foʻi lea ko e liliú ʻi ha ʻuhinga ʻoku fālahi ange mo kehe ia mei hono ʻuhinga mahení, he ko e liliu ʻa Siosefá naʻe lahi ange hono fai ia ʻi he fakahā ka ʻoku ʻikai ko hano liliu mei ha lea ʻe taha ki ha lea kehe. Vakai ki he “Liliu ʻa Siosefa Sāmitá (LSS)” ʻi he fakahokohoko fakamotuʻalea ʻi he ngaahi kaveinga ʻi he Ngaahi Fakahinohinó ke maʻu mei ai ha fakamatala lahi ange ʻo kau ki he LSS.

ʻOku hanga ʻe he fakatātā ʻoku hā atu ʻi lalo ní ʻo fakaʻaliʻali atu ha sīpinga ʻo e ngaahi meʻa naʻe toʻotoʻo mei he LSS:

ʻĪmisi

sīpinga

LSS, Mātiu 4:1, 5–6, 8–9 (fakafehoanaki mo e Mātiu 4:1, 5–6, 8–9; naʻe fai ʻa e ngaahi liliu tatau ʻi he Luke 4:2, 5–11)

(Naʻe tataki atu ʻa Sīsū ʻe he Laumālié, ka ʻoku ʻikai ko Sētane.)

1 Pea naʻe toki tataki atu ʻa Sīsū ʻe he Laumālié ki he feituʻu maomaonganoá, ke ne ʻi he ʻOtuá.

5 Pea naʻe toki ʻohake ʻa Sīsū ki he kolo tapú, pea tuku ia ʻe he Laumālié ʻi he tumutumu ʻo e temipalé.

6 Pea naʻe toki haʻu ʻa e tēvoló kiate ia ʻo pehē ange, Kapau ko e ʻAlo koe ʻo e ʻOtuá, fakatō hifo koe ki lalo; he kuo tohi, Te ne tuku ki heʻene kau ʻāngeló ʻa e fekau ke nau vakai kiate koe: pea te nau hapahapai koe ʻi honau nimá, telia naʻa touia ho vaʻé ʻi ha maka.

8 Pea naʻe toe ʻi he Laumālié ʻa Sīsū, peá ne ʻohake ia ki ha moʻunga māʻolunga ʻaupito, ʻo ne fakaʻaliʻali kiate ia ʻa e ngaahi puleʻanga kotoa ʻo e māmaní pea mo honau nāunaú.

9 Pea naʻe toe haʻu ʻa e tēvoló kiate ia, ʻo pehē ange, Te u ʻoatu ʻa e ngaahi meʻá ni kotoa pē maʻá u, ʻo kapau te ke fakatōmapeʻe ki lalo ʻo hū kiate au.

Ko e potufolofola ʻuliʻuli matolu ko ʻení ko e potufolofola ia ʻi he liliu ʻe Siosefa Sāmita ʻa e Tohi Tapu Kingi Sēmisí. Ka koeʻuhi ko e hanga ʻe heʻene liliú ʻo fakafoki mai ʻa e ngaahi foʻi lea ʻe niʻihi ki he Tohi Tapú, kuo pau leva ke kehekehe ʻa e fika ʻo e ngaahi vēsí mei he pulusi ko ia ʻokú ke ngāue ʻakí.

ʻOku haʻi atu ʻi heni ʻa e potufolofola ʻi hoʻo Tohi Tapú ʻa ia ʻoku totonu ke ke fakafehoanaki ki ai ʻa e liliu ʻa Siosefa Sāmitá.

ʻOku hanga ʻe he fakamatala ko ʻení ʻo fakamatalaʻi ʻa e tokāteline naʻe fakamahinoʻi ʻe Siosefa Sāmita ʻi heʻene liliú.

Ko e fakalea ʻeni ʻo e tohí ʻo hangē ko hono liliu ia ʻe Siosefa Sāmitá.