¶ 1 BEA ko au, e kaiga, i he eku alu atu kiate kimoutolu, nae ikai teu alu atu i he malie oe lea, be i he boto, ke fakaha kiate kimoutolu ae fakamooni ae Otua.

2 He nae mau hoku loto, e ikai teu ilo ha mea e taha iate kimoutolu, ka ko Jisu Kalaisi, mo hono tutuki ki he akau.

3 Bea naaku iate kimoutolu i he vaivai, moe manavahe, bea i he tetetete lahi.

4 Bea ko eku lea mo eku malaga, nae ikai i he gaahi lea fakaoloolo oe boto oe tagata, kae i he fakamooni oe Laumalie moe malohi:

5 Koeuhi ke oua naa tuu i he boto oe tagata hoo mou tui, ka i he malohi oe Otua.

6 Ka oku mau lea aki ae boto iate kinautolu oku haohaoa: ka oku ikai koe boto oe mamani, be oe houeiki oe mamani, aia e a‘u o gata:

7 Ka oku mau lea aki ae boto lilo oe Otua i he gaue fufu, aia nae tuutuuni e he Otua i he teeki ai tuu a mamani, ko ho tau leleiaga:

8 Aia nae ikai ilo e ha taha oe gaahi eiki oe mamani: he ka ne nau ilo ia, behe, e ikai te nau tutuki ki he akau ae Eiki lagilagi.

9 Kae hage koia kuo tohi, Oku teeki ai mamata e ha mata, be fanogo e ha teliga, bea oku teeki ai hu ki he loto o ha tagata, ae gaahi mea aia oku teuteu e he Otua ma a nautolu oku ofa kiate ia.

10 Ka kuo fakaha ia e he Otua kiate kitautolu aki hono Laumalie: he oku hakule e he Laumalie ae gaahi, mea kotoabe, io, ae gaahi mea loloto i he Otua.

11 He kohai ha tagata oku ne ilo ae gaahi mea ae tagata, ka koe laumalie be oe tagata oku iate ia? bea oku behe, oku ikai ha tagata oku ne ilo ae gaahi mea ae Otua, ka koe Laumalie be oe Otua.

12 Bea koeni, oku ikai koe laumalie o mamani kuo tau ma‘u, ka koe laumalie oku mei he Otua; koeuhi ke tau ilo ae gaahi mea kuo foaki mataataatā be kiate kitautolu e he Otua.

13 Ae gaahi mea koia oku mau lea ki ai, kae ikai i he gaahi lea oku ako mai e he boto oe tagata, ka koia oku ako aki e he Laumalie Maonioni; o fakamatala ae mea fakalaumalie aki ae mea fakalaumalie.

14 Ka oku ikai ma‘u e he tagata fakakakano ae gaahi mea oe Laumalie oe Otua: he koe vale ia kiate ia: bea oku ikai te ne faa ilo ia, he oku ilo fakalaumalie be ia.

15 Ka ko ia oku fakalaumalie oku ne ilo‘i ae mea kotoabe, ka oku ikai faa ilo‘i ia e ha taha.

16 He kohai oku ne ilo ae finagalo oe Eiki, koeuhi ke ne akonaki‘i ia? Ka oku tau ma‘u ae finagalo o Kalaisi.