Koe Gaue ae Kau Abosetolo

¶ 1 ETIOFILUSI, koe fuofua tohi naaku fai, koe fakaha oe mea kotoabe nae kamata fai mo ako aki e Jisu,

2 O a‘u ki he aho nae ave ai ia ki oluga, i he hili ene tuku ae gaahi fekau i he Laumalie Maonioni ki he kau abosetolo naa ne fili:

3 Akinautolu naa ne fakaha ia ki ai kuo moui, i he hili ene mate, i he gaahi fakamooni ilogofua bea lahi, he naa nau mamata kiate ia i he aho e fagofulu, bea lea ia ki he gaahi mea oe buleaga oe Otua:

4 Bea i he e nau fakataha mo ia, naa ne fekau kiate kinautolu ke oua te nau alu i Jelusalema, kae tatali ki he talaofa ae Tamai, aia,  nae behe ai eia, kuo mou fanogo ai iate au.

5 He nae babitaiso mooni e Jone aki ae vai; kae aho jii be, bea e babitaiso akimoutolu aki ae Laumalie Maonioni.

6 Bea i he e nau fakataha, naa nau fehui kiate ia, o behe, Eiki, te ke toe age i he kuoga ni ae buleaga ki Isileli?

7 Bea behe eia kiate kinautolu, Oku ikai ma amoutolu ke ilo ki he gaahi kuoga moe gaahi aho, aia oku faiteliha toko taha be ki ai ae Tamai.

8 Ka te mou ma‘u ae malohi, oka hoko mai ae Laumalie Maonioni kiate kimoutolu: bea ko eku kau fakamooni akimoutolu i Jelusalema, mo Jutea kotoabe, mo Samelia, bea ki he gataaga o mamani.

9 Bea hili ene gaahi folofola ni, lolotoga e nau jiofia ia, nae ave ia ki oluga; bea fakabuli ia e he ao meiate kinautolu.

10 Bea i he e nau kei jio fakamama‘u ki he lagi, i he ene alu hake, iloage, kuo tuu mai kiate kinautolu ae ogo tagata kuo kofu hinehina;

11 O na behe, Ae kau tagata Kaleli, koeha oku mou tutuu mo jio fakamama‘u ai ki he lagi? koe Jisu koia, kuo ave iate kimoutolu ki lagi, e behe be ene toe ha‘u o hage ko hoo mou mamata ene alu hake ki loto lagi.

12 Bea naa nau toki liu mai ki Jelusalema mei he mouga oku ui ko Olive, ko hono vahaa mo Jelusalema koe mamao oe fonoga i he aho sabate.

13 Bea kuo nau hoko mai, bea nau alu hake ki he botu ki oluga, aia nae nonofo ai a Bita, mo Jemesi, mo Jone, mo Anitelu, mo Filibe, mo Tomasi, mo Batolomiu, mo Matiu, mo Jemesi  koe foha o Alefiusi, mo Saimone Selote, mo Jutasi  koe tokoua o Jemesi.

14 Bea nae nonofo loto taha akinautolu ni kotoabe, i he lotu moe hufekina, fakataha moe kau fefine, mo Mele koe fa‘e a Jisu, mo hono kaiga.

¶ 15 Bea i he gaahi aho koia, nae tuu hake a Bita i he ao oe kau akoga (koe lau fakataha oe kakai koe toko teau moe toko uofulu,) o ne behe,

16 Ae kau tagata moe kaiga, nae totonu ke fakamooni ae tohi ni, aia nae lea aki i mua e he Laumalie Maonioni, i he gutu o Tevita, kia Jutasi, aia naa ne tataki akinautolu nae buke a Jisu.

17 He nae lau ia mo kitautolu, bea nae ai hono tufakaga i he gaue ni.

18 Bea nae fakatau e he tagata ni ae botu fonua aki ae totogi o ene agahala; bea nae to o tuu hono mata, bea mafahi hono kete, bea oho kitua hono tootooga kotoabe.

19 Bea nae ilo ia e he kau nofo kotoabe i Jelusalema: koia nae ui ai ae botu fonua koia i he e nau lea, Ko Akeletama, koe behe, Koe botu fonua oe toto.

20 He oku tohi i he tohi oe gaahi Same, Ke lala hono fale, bea oua e nofo ai ha taha: bea, Ko ene gaue ke ma‘u e ha taha.

21 Koia i he kau tagata ni kuo tau nonofo mo kinautolu, i he kuoga kotoa nae felemofafo ae Eiki ko Jisu iate kitautolu,

22 O fua fai mei he babitaiso a Jone, o a‘u ki he aho be koia nae ave ai ia ki oluga meiate kitautolu, oku totonu ke ai ha taha koe fakamooni mo kimautolu o ene toetuu.

23 Bea naa nau fili ae toko ua, ko Josefa nae ui ko Basaba, bea fakahigoa foki ko Jusitasa, mo Mataiasi.

24 Bea naa nau lotu, o behe, E Eiki, ko koe oku ke ilo‘i ae loto kotoabe, ke fakaha be kohai iate kinaua ni kuo ke fili,

25 Koeuhi ke ai ene tufakaga i he gaue ni bea ke abosetolo, aia kuo higa mei ai a Jutasi i he agahala, kae alu ia ki hono botu oona.

26 Bea naa nau talotalo; bea totonu kia Mataiasi; bea nae lau fakataha ia moe toko hogofulu ma toko taha oe kau abosetolo.