¶ 1 KOIA, e kaiga maonioni, oku kau i he ui mei he lagi, tokaga lahi ki he abosetolo moe fugani taulaeiki oe tau lotu, ko Kalaisi Jisu;

2 Aia nae agatonu kiate ia ne fakanofo ia, o hage foki ko Mosese i hono fale kotoabe.

3 He nae totonu ke ne ma‘u eia ae ogoogo lelei lahi ia Mosese, o hage oku ma‘u eia oku laga ae fale ae  ogoogo lelei lahi i he fale.

4 He kuo laga kotoabe ae fale e ha taha; ka ko ia kuo ne laga ae gaahi mea kotoabe koe Otua.

5 Bea nae agatonu mooni a Mosese i hono fale kotoabe, o hage koe tamaioeiki, koe fakamooni oe gaahi mea koia e lea aki;

6 Ka ko Kalaisi koe Alo ia i hono fale oona; bea ko hono fale akitautolu, o kabau te tau kuku mau ae tui moe fiefia oe amanaki lelei o a‘u ki he ikuaga.

7 Koia (o hage koe lea ae Laumalie Maonioni, Koe aho ni, o kabau te mou fanogo ki hono le‘o,

8 Oua naa mou fakafefeka ho mou loto, o hage koia i he fakahouhau i he aho oe ahiahi i he toafa:

9 Aia nae ahiahi‘i au e hoo mou gaahi tamai, bea nau ahiahi kiate au, o nau mamata ki he eku gaahi gaue i he ta‘u e fagofulu.

10 Koia neu fehia ai ki he toutagata koia, beau behe, Oku nau he mau ai be i ho nau loto: bea oku ikai te nau ilo hoku gaahi hala.

11 Koia neu fuakava ai i he eku houhau, E ikai te nau hu ki hoku mālōlōaga.)

12 Tokaga, e kaiga, telia naa ai i ha mou toko taha ha loto kovi o taetui, he mavahe mei he Otua moui.

13 Ka ke feakonakiaki akimoutolu i he aho kotoabe, oku lolotoga hono ui, Koe aho ni; telia naa mataila ha mou toko taha i he fakakākā‘i e he agahala.

14 He kuo ma‘u ekitautolu a Kalaisi, o kabau te tau kuku mau ae tau fuofua tui o a‘u ki he ikuaga;

15 Bea lolotoga oku behe, Koe aho ni, o kabau te mou fanogo ki hono le‘o, oua naa fakafefeka ho mou loto, o hage koia i he fakahouhau.

16 He kohai nae fakahouhau i he hili e nau fanogo? ikai ko kinautolu kotoabe nae ha‘u mei Ijibite ia Mosese?

17 Ka kohai ne houhau ai ia i he ta‘u e fagofulu? ikai ko kinautolu nae agahala, bea to ho nau agaaga i he toafa?

18 Bea nae fuakava ia ki ahai e ikai te nau hu ki hono mālōlōaga, ka kiate kinautolu be nae taetui?

19 Koia oku tau ilo, nae ikai faa hu atu akinautolu koe mea i he taetui.