¶ 1 HE uluaki  aho oe uike, nae ha‘u hegihegi a Mele Makitaline ki he fonualoto, i he kei fakabouli, o ne mamata kuo ave ae maka mei he fonualoto.

2 Bea lele ia, o ha‘u kia Saimone Bita, moe akoga e toko taha, aia nae ofa ai a Jisu, o ne behe kiate kinaua, Kuo nau ave ae Eiki mei he fonualoto, bea oku ikai te mau ilo be kuo nau tuku kife ia.

3 Koia nae alu atu ai a Bita, moe akoga koia e taha, o na hoko atu ki he fonualoto.

4 Bea na felele‘i fakataha: bea lia a Bita e he akoga koia e taha, bea tomua hoko ia ki he fonualoto.

5 Bea tulolo ki lalo ia, bea mamata kuo tuku ae u kofu ka nae ikai hu ia ki ai.

6 Bea ha‘u muimui iate ia a Saimone Bita, bea hu ia ki he fonualoto, o mamata kuo tuku ai ae u kofu,

7 Moe holoholo nae fau aki hono ulu, nae ikai tuku  fakataha moe u kofu, ka kuo fatufatu, o tuku kehe ia.

8 Bea toki hu atu ae akoga koia e taha, aia nae fuofua hoko ki he fonualoto, bea mamata ia, bea tui.

9 He oku heeki ai ke nau ilo ae tohi, kuo totonu ke toe tuu ia mei he mate.

10 Bea toe o ae ogo akoga ki ho na abi.

¶ 11 Ka nae tuu tagi be a Mele itua fonualoto: bea i he ene tagi, nae tulolo ia ki lalo  ke fakaaji ki he fonualoto.

12 Bea nae mamata ia ki he agelo e toko ua oku  kofu hinehina, mo nofo, koe toko taha i he fofoga, moe toko taha i he va‘e, i he botu koia nae tokoto ai ae jino o Jisu.

13 Bea naa na behe kiate ia, Fefine, koeha oku ke tagi ai? Bea beheage eia kiate kinaua, Koeuhi kuo nau ave hoku Eiki, bea oku ikai teu ilo be kuo nau tuku kife ia.

14 Bea hili ene lea koia, bea tafoki ia ki mui, bea mamata ia kia Jisu oku tuu mai, ka nae ikai te ne ilo ko Jisu ia.

15 Bea lea a Jisu kiate ia, Fefine, koeha oku ke tagi ai? kohai oku ke kumi? Bea ne mahalo koe tauhi goue ia, bea ne behe ki ai, Eiki, kabau kuo ke ave ia mei heni, tala mai kiate au be kuo ke tuku kife ia, bea teu ave ia.

16 Bea beheage e Jisu kiate ia, Mele. Bea ne tafoki mai, o behe kiate ia, Laboni; ko hono uhiga, Eiki.

17 Bea talaage e Jisu kiate ia, Oua naa ala kiate au; he oku teeki ai teu alu hake ki he eku Tamai: ka ke alu ki hoku kaiga, o tala kiate kinautolu, oku ou alu hake ki he eku Tamai, mo hoo mou Tamai; bea ki hoku Otua, mo ho mou Otua.

18 Bea nae ha‘u a Mele Makitaline, o fakaha ki he kau akoga a ene mamata ki he Eiki, bea kuo ne lea aki ae gaahi mea ni kiate ia.

¶ 19 Bea kuo efiafi i he aho koia, koe uluaki  aho i he uike, kuo katoa ae kau akoga, bea tabuni ae gaahi mataba, i he  e nau manavahe ki he kakai Jiu, moe ha a Jisu, o tuu i loto, o ne behe kiate kinautolu, Fiemalie be akimoutolu.

20 Bea hili ene lea behe, nae fakaha eia kiate kinautolu hono nima mo hono vakavaka. Bea toki fiefia ae kau akoga, i he e nau mamata ki he Eiki.

21 Bea toe lea a Jisu kiate kinautolu, Fiemalie be akimoutolu: o hage koe fekau au e he Tamai, bea oku behe eku fekau‘i akimoutolu.

22 Bea hili ene lea ni, bea mānava hifo ia kiate kinautolu, o ne behe, Ma‘u ekimoutolu ae Laumalie Maonioni:

23 Koe agahala oe kakai fulibe te mou fakamolemole, oku fakamolemole ia kiate kinautolu; bea  koe agahala o ia fulibe oku mou tuku be, oku tuku be ia.

¶ 24 Ka ko Tomasi, nae ui ko Titimasi, koe toko taha i he toko hogofulu ma toko ua, nae ikai iate kinautolu, i he ha‘u a Jisu.

25 Koia nae tala ai e he kau akoga niihi kiate ia, Kuo mau mamata ki he Eiki. Ka nae behe eia kiate kinautolu, Kabau e ikai teu mamata i hono nima ae mata‘i fa‘o, bea ai hoku tuhu ki he mata‘i fa‘o, mo velo hoku nima ki hono vakavaka, e ikai teu tui.

¶ 26 Bea hili ae aho e valu, nae toe katoa ene kau akoga, bea nae iate kinautolu a Tomasi: bea tabuni ae gaahi mataba, moe ha‘u a Jisu, o tuu i loto, o ne behe, Fiemalie be akimoutolu.

27 Bea toki behe eia kia Tomasi, Mafao mai ho tuhu, bea vakai mai ki hoku nima; bea tuku mai ho nima, o velo ia ki hoku vakavaka: bea oua naa ke taetui, kae tui.

28 Bea leaage a Tomasi, o ne behe kiate ia, Ko hoku Eiki mo hoku Otua.

29 Bea talaage e Jisu kiate ia, Tomasi, koe mea i hoo mamata kiate au, koia kuo ke tui ai: oku monuia akinautolu oku ikai mamata, kae tui.

¶ 30 Bea nae fai mooni e Jisu moe gaahi fakailoga kehekehe i he ao o ene kau akoga, aia kuo ikai tohi i he tohi ni:

31 Ka kuo tohi eni, koeuhi ke mou tui koe Kalaisi a Jisu, koe Alo oe Otua; bea ke mou ma‘u i hoo mou tui ae moui i hono huafa.