Ngaahi Folofolá
Koe Tohi a Isikieli 37


Vahe 37

1 Koe fakatātā oe toetuu ae gaahi hui momoa. 11 Ae toe moui ae amanaki lelei a Isileli. 15 Koe hoko ae ogo vaa akau. 18 Koe fakaha mei ai ae hoko o taha be a Isileli mo Juta. 20 Ae gaahi talaofa oku kau ki he buleaga o Kalaisi.

1 NAE iate au ae nima o Jihova, bea ne ave au i he laumalie o Jihova bea nae tuku hifo au i he loto telea nae fonu i he gaahi hui,

2 Bea ne bule‘i au keu alu fakatakamilo ai; bea vakai, nae lahi aubito ia i he ataatā oe telea; bea vakai nae momoa aubito.

3 Bea naa ne behe kiate au, Foha oe tagata, e faa moui ae gaahi hui ni? bea naaku beheage, E Jihova koe Otua, ko koe be oku keafio‘i.

4 Bea ne toe behe kiate au, Kikite ki he gaahi hui ni, bea ke behe ki ai, E gaahi hui momoa, fanogo mai ki he folofola a Jihova.

5 Oku behe e Jihova koe Otua ki he gaahi hui ni; Vakai, teu gaohi ae mānava ke hu kiate kimoutolu, bea te mou moui:

6 Bea teu kofuaki kimoutolu ae uoua, bea teu fakatubu ae kakano kiate kimoutolu, mo ufiufi aki kimoutolu ae kili, bea ai moe mānava kiate kimoutolu, bea te mou moui; bea te mou ilo ko Jihova au.

7 Koia naaku kikite o hage koia nae fakaha mai: bea i he eku kei lea, nae i ai ae uulu, bea vakai nae gau‘e, bea fehokotaki ae gaahi hui bea taki taha ki hono hui be oona.

8 Bea i he eku jio, vakai ne tubu mai ki ai ae uoua bea moe kakano, bea ne ufiufi aki kotoabe ae kili: ka nae teeki ai ha mānava kiate kinautolu.

9 Bea naa ne toki behe mai kiate au, Kikite ki he matagi, kikite, foha oe tagata, bea ke behe ki he matagi, Oku behe e Jihova koe Otua; Ae mānava e! ha‘u mei he feituu matagi e fa, bea mānava hifo ki he kau mate na, koeuhi ke nau moui.

10 Koia naaku kikite o hage koia nae fekau mai, bea nae hoko mai ae mānava kiate kinautolu, bea naa nau moui, mo tuu ki oluga i ho nau va‘e, koe fuu kau tau toko lahi aubito.

11 Bea naa ne toki behe mai kiate au, Foha oe tagata, koe gaahi hui na koe fale kotoa ia o Isileli: vakai, oku nau behe, Kuo momoa ho tau hui, bea kuo mole e tau amanaki, bea kuo tuuji ke motu akitautolu.

12 Koia te ke kikite, bea ke lea kiate kinautolu, Oku behe e Jihova koe Otua; Vakai, E hoku kakai, teu fakaava ho mou gaahi faitoka, bea teu bule ke mou toetuu mei ho mou gaahi faitoka, bea e omi akimoutolu ki he fonua o Isileli.

13 Bea te mou ilo ko Jihova au, o kau ka fakaava ho mou gaahi faitoka, E hoku kakai, bea e o hake akimoutolu mei ho mou tanuaga,

14 Bea e ai hoku laumalie kiate kimoutolu, bea te mou moui, bea teu tuku akimoutolu ki ho mou fonua omoutolu: te mou toki ilo ai ko au ko Jihova neu lea ki ai bea kuou fai: oku behe e Jihova.

15 Nae toe hoko mai ae folofola a Jihova kiate au, o behe.

16 Koeni foki, akoe foha oe tagata, too kiate koe ha vaa akau, bea ke tohi ki ai, Kia Juta, moe fānau a Isileli ko ene gaahi kaumea: bea ke too ae vaa akau kehe e taha, bea tohi ki ai, Kia Josefa, koe vaa akau a Ifalemi, moe fale kotoa o Isileli ko ene gaahi kaumea:

17 Bea ke hoko fakataha ia koe vaa akau be taha; bea e hoko ia o taha be i ho nima.

18 Bea ka lea mai kiate koe ae fānau a hoo kakai, o behe, E ikai te ke fakaha mai be koeha hono uhiga o hoo behe na?

19 Lea koe kiate kinautolu, Oku behe e Jihova koe Otua; Vakai teu too ae vaa akau a Josefa, aia oku i he nima o Ifalemi, bea moe gaahi faahiga o Isileli ko ene gaahi kaumea, bea teu ai ke fakataha akinautolu mo ia, io ae vaa akau a Juta, ke hoko akinaua koe vaa akau be taha, bea te na taha be i hoku nima.

20 Bea koe ogo vaa akau aia naa ke tohi ki ai, e i ho nima ia i ho nau ao.

21 Bea ke lea kiate kinautolu, Oku behe e Jihova koe Otua; Vakai, teu too ae fānau a Isileli mei he lotolotoga oe hiteni, aia kuo nau alu ki ai, bea teu tanaki akinautolu mei he botu kotoabe, bea e omi akinautolu ki ho nau fonua onautolu.

22 Bea teu gaohi akinautolu koe buleaga be taha i he fonua, i he gaahi mouga o Isileli; bea koe tu‘i be toko taha e tu‘i kiate kinautolu kotoabe; bea e ikai kei ua a ho nau buleaga, bea e ikai aubito kei vahe kehekehe akinautolu koe buleaga e ua:

23 Bea e ikai te nau toe fakauli‘i aki akinautolu ha gaahi tamabua, be koe nau gaahi mea fakalielia, be koe nau gaahi agahala: ka teu fakamoui akinautolu mei ho nau gaahi nofoaga, aia kuo nau fai agahala ai, bea e fakamaa akinautolu: e behe be ae nau hoko ko hoku kakai, bea teu hoko ko ho nau Otua au.

24 Bea e tu‘i kiate kinautolu a eku tamaioeiki ko Tevita; bea e ai ae tauhi be taha kiate kinautolu kotoabe: te nau eveeva foki i he eku gaahi tuutuuni, mo tokaga ki he he eku gaahi fekau, ke fai ki ai.

25 Bea te nau nofo i he fonua, aia kuou foaki ki he eku tamaioeiki ko Jekobe, aia nae nofo ai a hoo mou gaahi tamai; bea te nau nofo i ai, io, akinautolu, moe nau fānau, moe hako oe nau fānau o taegata; bea ko eku tamaioeiki ko Tevita, e bule ia kiate kinautolu o taegata.

26 Teu fai foki ha fuakava fakamelino mo kinautolu; koe fuakava ia mo kinautolu ke taegata; bea teu fakanofo akinautolu, mo fakatokolahi‘i akinautolu, bea teu fokotuu a hoku fale tabu i ho nau lotolotoga ke lauikuoga.

27 E iate kinautolu foki a hoku fale fehikitaki: io, teu i ai ko ho nau Otua au, bea ko hoku kakai akinautolu.

28 Bea e ilo e he hiteni, ko au ko Jihova, oku ou fakamaonioni‘i a Isileli, o kau ka tuku a hoku fale tabu i ho nau lotolotoga, ke lauikuoga.