¶ 1 KOE kakai nae aeva i he bouli kuo mamata ki he māmalahi: kokinautolu nae nofo i he fonua oe ata oe mate, kuo ulo kiate kinautolu ae māma.

2 Kuo ke fakatokolahi ae buleaga, bea fakalahi mo e nau fiefia: oku nau fiefia i ho ao o hage koe fiefia i he ututa‘u, bea hage koe fiefia ae kakai i he e nau tufa ae koloa kuo vete.

3 He kuo ke feji‘i ae haamo o ene kavega, bea moe tokotoko oku ai ki hono uma, moe mea ta a hono fili, o hage koia ne fai i he aho o Mitiane.

4 He koe tau kotoabe oe tagata tau oku i he logoaa fakamaveuveu, moe gaahi kofu kuo takai i he toto; ka e hoko eni i he vela moe fefie oe afi.

5 He kuo fanau‘i kiate kitautolu ae tamajii, kuo foaki kiate kitautolu ae foha: bea e i hono uma ae bule: bea e ui hono huafa ko Fakaofo, ko Akonaki, koe Otua Mafimafi, koe Tamai Taegata koe Eiki oe Melino.

6 I he tubu o ene bule moe melino e ikai hano gataaga, i he nofoaga o Tevita, bea i hono buleaga, ke fakatonutonu ia, bea ke fokotuu mau ia i he fakamāu bea moe agatonu mei he aho ni o taegata. Koe ofa a Jihova oe gaahi kau tau te ne fai ae mea ni.

¶ 7 Nae fekau e Jihova ae lea kia Jekobe, bea kuo to ia ki Isileli.

8 Bea e ilo e he kakai kotoabe, io e Ifalemi mo ia oku nofo i Samelia, aia oku behe i he laukau moe malohi oe loto,

9 Kuo to ki lalo ae maka umea, ka te mau laga aki ae maka kuo ta: kuo tuuji ki lalo ae gaahi sukamino, ka te mau fetogi aki ia ae gaahi sita.

10 Koia e fokotuu e Jihova kia Lesini hono gaahi fili, bea fakakau fakataha hono gaahi fili;

11 Ae kau Silia i he botu hahake, bea moe kau Filisitia i he luluga; bea te nau keina a Isileli aki ae gutu kuo fakamaga. Bea ne ogo ae mea ni kotoabe oku ikai taofi hono houhau, ka oku kei mafao hono nima.

¶ 12 He oku ikai tafoki mai ae kakai kiate ia oku ta‘i akinautolu, oku ikai te nau kumi kia Jihova oe gaahi kau tau.

13 Koia e tuuji e Jihova mei Isileli ae ulu moe iku, ae vaa moe tefito, i he aho be taha.

14 Koe motua mo ia oku ogoogolelei, koe ulu ia; bea koe balofita oku ako aki ae loi, koe iku ia.

15 He koe kau takimua oe kakai ni oku nau fakahala‘i akinautolu; bea e auha akinautolu kuo takiekina iate kinautolu.

16 Koia e ikai fiemalie a Jihova i ho nau kau talavou, be aloofa ki he e nau kau tamai mate moe kau fefine kuo mate ho nau unoho: he koe malualoi moe fai kovi akinautolu kotoabe, bea oku lea vale ae gutu kotoabe. Bea ne ogo ae mea ni kotoabe oku ikai taofi hono houhau, ka oku kei mafao hono nima.

¶ 17 He oku vela ae agahala o hage koe afi; e keina ia ae gaahi akau talatala, bea e tutu i he matolu oe vao lahi, bea te nau alu hake o hage koe buna hake oe ohuafi.

18 Koe mea i he houhau o Jihova oe gaahi kau tau oku fakabouli ai ae fonua, bea koe kakai te nau hage koe fefie oe afi: e ikai mamae ha tagata e toko taha ki hono tokoua.

19 Bea te ne hamuji i he botu toomatau, kae fiekaia; bea te ne kai i he botu toohema, ka e ikai te nau makona: e kai e he tagata taki taha ae kakano o hono nima oona:

20 Ko Manase, kia Ifalemi; mo Ifalemi, kia Manase: bea ko kinaua fakatouoji te na kau fakataha ke fakamamahi‘i a Juta. Bea ne ogo ae mea ni kotoabe oku ikai taofi hono houhau, ka oku kei mafao hono nima.