¶ 1 OKU behe e Jihova, i he gaahi aho koia te nau omi mei ho nau gaahi faitoka, ae hui oe gaahi tu‘i o Juta, moe gaahi hui oe houeiki, moe hui oe kau taulaeiki, moe hui oe kau balofita, bea moe gaahi hui oe kakai o Jelusalema.

2 Bea te nau fofola akinautolu i he ao oe laa, bea moe mahina, moe mea kotoabe oe lagi, aia kuo nau ofa ki ai, bea kuo nau tauhi, bea kuo nau muimui ki ai, bea kuo nau kumi bea kuo nau lotu ki ai; bea e ikai tanaki akinautolu, be tanu; ka te nau hoko koe kinohaa i he fuga oe kelekele.

3 Bea e fili ae mate i he moui ekinautolu kotoabe oku toe i he faahiga kovi ni, akinautolu kotoabe oku toe i he gaahi botu kuou kabuji akinautolu ki ai, oku behe e Jihova oe gaahi kau tau.

¶ 4 Bea te ke lea kiate kinautolu foki, oku behe e Jihova; Te nau higa, bea e ikai toe tuu? Te ne alu atu bea e ikai toe foki mai?

5 Ka koeha kuo fakaholomui ai ae kakai ni o Jelusalema o fakaholomui mau ai be? Oku nau kuku mau ki he kākā, oku ikai te nau fie tafoki mai.

6 Bea naaku fakafanogo bea ogo‘i, ka nae ikai te nau lea totonu: nae ikai ha tagata kuo fakatomala i he ene kovi, o ne behe, Koeha kuou fai? kuo taki taha foki ki he ene aga aana, o hage koe oho ae hose ki he tau.

7 Io, oku ilo e he motuku i he lagi hono gaahi aho kuo tuutuuni; bea moe lube, moe kelene, bea moe sualo ho nau aho ke ha‘u ai; ka oku ikai ilo e hoku kakai ae fakamāu a Jihova.

8 Oku fefe hoo mou behe, Oku mau boto, bea oku iate kimautolu ae fono a Jihova? koe mooni kuo liliu ae mea ni koe loi, e he beni kākā ae kau tagata tohi.

9 Kuo ma ae kau tagata boto, kuo tauhele mo fakailifia akinautolu: Vakai, kuo nau jiaki ae folofola a Jihova; bea koeha ae boto oku iate kinautolu?

10 Koia teu foaki ho nau gaahi unoho ki he kakai kehe: he oku manumanu akinautolu taki taha mei he iki io o a‘u ki he lalahi, oku taki taha fai kākā mei he balofita o a‘u ki he taulaeiki.

11 He kuo nau fakamoui kākā ae lavea oe ofefine o hoku kakai, o nau behe, Fiemalie, fiemalie; ka oku ikai ha fiemalie.

12 He naa nau ma i he hili e nau fai ae mea fakalielia? nae ikai; nae ikai aubito te nau ma, be fekulai ho nau mata: koia te nau to hifo fakataha mo kinautolu oku higa: e fakato ki lalo akinautolu, o kau ka tautea akinautolu, oku behe e Jihova.

¶ 13 Oku behe e Jihova, koe mooni teu fakaauha akinautolu: e ikai fua ae gaahi vaine, bea e ikai fua ae gaahi fiki, ka e mae hono lau; bea e mole iate kinautolu ae gaahi mea naaku foaki kiate kinautolu.

14 Koeha oku tau nofo fakafiemalie ai? Ke tau fakataha bea alu ki he gaahi kolo malohi, bea ke tau tatali fakalogologo i ai: he kuo fakalogo‘i akitautolu e Jihova ko ho tau Otua, bea kuo ne foaki kiate kitautolu ae huhua kona oe ahu ke inu, koeuhi kuo tau fai agahala kia Jihova.

15 Naa tau amanaki ki he fiemalie, ka nae ikai ha‘u ha lelei; ki he fakamoui, ka e vakai koe mamahi!

16 Nae ogo mai mei Tani ae tagi o ene faga hose, nae galulu ae fonua kotoabe i he uulu ae tagi ae faga hose tau; he kuo nau ha‘u mo kai o oji ae fonua, moe mea fulibe nae i ai; koe kolo, mo kinautolu oku nofo ai.

17 He oku behe e Jihova, Vakai, teu fekau kiate kinautolu ae faga gata moe faga gata fekai, aia oku ikai faa fakalata, bea te nau uuji akinautolu.

¶ 18 O kau ka fakafiemalie‘i au i he eku mamahi, oku vaivai hoku loto iate au.

19 Vakai koe le‘o oe tagi ae ofefine o hoku kakai, koeuhi ko kinautolu oku nofo i he fonua mamao: Ikai oku i Saione e Jihova? Ikai oku iate ia hono tu‘i? Koeha oku nau fakaita ai au aki e nau gaahi tamabua kuo togi, bea moe gaahi mea vaiga?

20 Kuo oji ae ututa‘u, kuo hili ae faahita‘u mafana, bea oku heeki ai fakamoui akitautolu.

21 He koe mamahi o hoku kakai, oku ou mamahi ai; oku ou alu mamahi, kuo bukea au i he fakatumutumu.

22 Ikai oku ai ae lolo faitoo i Kiliati? Ikai oku ai ha faitoo i ai? Bea koeha oku ikai moui ai ae ofefine o hoku kakai?