O Le Tusi a Aperaamo

1 I Le laueleele o sā ^aKaletaia, i le nofoaga o o’u tamā, o a’u, o ^eAperaamo, sa vaai ua tatau ia te a’u ona maua se isi ⁱmea ou te nofo ai;

2 Ma, ina ua ou iloa e i ai se ^afiafia tele atu ma se filemu ma se ^emapusaga mo a’u, sa ou saili i faamanuiaga a tamā, ma le aiā e tatau ona faauu i ai a’u e taulimaina ia lava faamanuiaga; aua sa avea a’u o se soo o le ⁱamiotonu, i le manao foi ia avea ma se tasi ua mauaina le ^omalamalama tele, ma avea o se soo sili atu o le amiotonu, ma maua se malamalama sili atu, ma avea o se tamā o atunuu e tele, o se aloalii o le filemu, ma manao e maua faatonuga, ma tausi i poloaiga a le Atua, sa avea a’u ma suli moni, o se ^uFaitaulaga Sili, ua umia le ^faiā e a tamā.

3 Sa ^afaaee mai i o’u luga mai tamā; sa faasolo ifo mai i tamā, mai i le amataga o taimi, ioe, mai i le amataga lava, pe a o le i faavaeina le lalolagi, seia oo mai i le taimi nei, le aiā lava lea a le ^eulumatua, po o le uluai tagata, o ⁱAtamu lea, po o le uluai tamā, e ala mai i tamā ia te a’u.

4 Sa ou saili i lo’u ^atofiga i le Perisitua e tusa ma le tofiga a le Atua i tamā e faatatau i le fanau.

5 Ona sa liliu ese o’u ^atamā mai i lo latou amiotonu, ma mai poloaiga paia na tuu mai ia te i latou e le Alii lo latou Atua, i le ^etapuai atu i atua o tagata faapaupau, sa matua mumusu lava e faalogo mai i lo’u leo;

6 Ona sa naunau o latou loto e fai le leaga, ma sa liliu atoatoa atu i le ^aatua o Elekana, ma le atua o Lipena, ma le atua o Mamakara, ma le atua o Korasi, ma le Atua o Farao, le tupu o Aikupito;

7 O lea na liliu atu ai o latou loto i le taulaga a tagata faapaupau i le taulagaina atu o a latou fanau i ia tupua lē gagana, ma lē faalogo mai i lo’u leo, a ua taumafai e aveese lo’u ola i le lima o le faitaulaga a Elekana. O le faitaulaga a Elekana o le faitaulaga foi lea a Farao.

8 O lenei, o le taimi lea, sa o se tu a le faitaulaga a Farao, le tupu o Aikupito, le osi atu o taulaga i luga o le fatafaitaulaga sa fausia i le laueleele o Kaletaia, mo le taulaga atu i ia atua ese, o tane, fafine, ma tamaiti.

9 Ma sa oo ina osia atu e le faitaulaga se taulaga i le atua o Farao, ma i le atua foi o Sakaira, e tusa lava ma le tu a tagata Aikupito. O lenei o le atua o Sakaira o le la.

10 E oo i le taulaga-faafetai e osi i se tamaitiiti sa faia e le faitaulaga a Farao i luga o le fatafaitaulaga sa tu i tafatafa o le mauga sa ta’ua o le Mauga o Potifara, i le amataga o le fanua laugatasi o Olisema.

11 O lenei, sa osi atu e lenei faitaulaga i luga o lenei fatafaitaulaga ni taupou e toatolu i le taimi e tasi, o afafine ia o Onaita, o se tasi o le gafa tautupu e tupuga tonu lava mai sulugatiti o ^aHamo. O ia taupou sa ofoina atu ona o lo latou amiomamā; sa latou lē fia ^eifo i lalo e tapuai atu i atua laau po o maa, o lea na fasiotia ai i latou i luga o lenei fatafaitaulaga, ma sa faia e tusa ma le tu a tagata Aikupito.

12 Ma sa oo ina faaoo mai e faitaulaga le faasaua i o’u luga, ina ia latou fasioti ia te a’u, e pei ona sa latou faia i na taupou i luga o lenei fatafaitaulaga; ma ina ia outou maua se malamalama e uiga i lenei fatafaitaulaga, o le a ou faasino atu outou i le ata faatusa o loo i le amataga o lenei talafaamaumau.

13 Sa fausia lenei fatafaitaulaga i foliga o se moega, e faapei ona sa i ai i tagata Kaletaia, ma sa tu i luma o atua o Elekana, Lipena, Mamakara, Korasi, ma le atua foi e pei o le atua o Farao, le tupu o Aikupito.

14 Ina ia outou malamalama e uiga i ia atua, ua ou tuu atu ia te outou ni faatusa o i latou i ni faatagata i le amataga, o ni ituaiga o faatagata ua ta’ua e tagata Kaletaia o Relino, o lona uiga o hairokilifi.

15 Ma a’o sii a’e o latou lima i o’u luga, ina ia latou osi atu a’u ma aveese lo’u ola, faauta, sa ou siitia a’e i luga lo’u leo i le Alii lo’u Atua, ma sa ^afaafofoga ma lagonaina e le Alii, ma sa ia faatumuina a’u i se faaaliga vaaia o le Malosi Aoao, ma sa tulai mai i o’u tafatafa se agelu mai ona luma, ma ^etatala o’u noanoaga i le taimi lava lea;

16 Ma sa fetalai mai lona siufofoga ia te a’u: Aperaamo, Aperaamo e, faauta, o lo’u igoa o ^aIeova, ma ua Ou faalogoina oe, ma ua Ou sau i lalo e laveai oe, ma aveese oe mai le fale o lou tamā, ma mai i tagata uma o lou aiga, i se ^elaueleele ese e te lē iloa lona uiga;

17 Ma o lenei ona ua latou liliu ese o latou loto mai ia te a’u, e tapuai atu i le atua o Elekana, ma le atua o Lipena, ma le atua o Mamakara, ma le atua o Korasi, ma le atua o Farao, le tupu o Aikupito; o lea ua Ou sau ai i lalo e asiasi mai ia te i latou, ma faaumatia o ia o lē ua siitia a’e i luga lona lima e faasaga ia te oe, Aperaamo e, lo’u atalii, e aveese lou ola.

18 Faauta, o le a Ou taitai oe i lo’u lima, ma o le a Ou ave oe, e tuu i ou luga lo’u igoa, o le ^aPerisitua lava lea o lou tamā, ma o le a i ai i ou luga lo’u mana.

19 E faapei ona sa faia ia Noa o le a faapea foi ona faia ia te oe; ae o lau auaunaga o le a ala atu ai ona iloa o lo’u ^aigoa i le lalolagi e faavavau, ona o A’u o lou Atua.

20 Faauta, o le Mauga o Potifara sa i le laueleele o ^aUro, o Kaletaia. Ma sa lepeti i lalo e le Alii le fatafaitaulaga o Elekana, ma atua o le laueleele, ma matua faaumatia lava i latou, ma taia le faitaulaga na oo ina oti ai o ia; ma sa i ai se faanoanoa tele i Kaletaia, ma i le malae foi o Farao; o le Farao lea o lona uiga o le tupu e ala i le toto tautupu.

21 O lenei o lea tupu o Aikupito o se na tupuga mai i sulugatiti o ^aHamo, ma o se sa i ai le toto o ^esa Kananā i le fanau mai.

22 Mai lea gafa na tupuga mai ai tagata Aikupito uma, ma sa faapea ona faasaoina o le toto o sa Kananā i le laueleele.

23 Ona o le laueleele o ^aAikupito sa maua muamua e se fafine, o lē o se afafine o Hamo, ma se tama teine a Aikupeta, o lona uiga i le faa-Kaletaia o Aikupito, o lona uiga o se mea ua faasaina;

24 Ina ua maua e lenei fafine le laueleele sa i lalo o le vai, o lē na ia faanonofo ai ana tama tane ina ua mavae lea; ma sa faapea, ona tupuga mai ia Hamo o le ituaiga lena na tumau ai le fetuu i le laueleele.

25 O lenei o le uluai malo o Aikupito sa faatuina e Farao, le tama tane matua a Aikupeta, le afafine o Hamo; ma sa faia e tusa ai ma le faiga o le malo o Hamo, sa faapeteriaka.

26 O Farao, ona o ia se tagata amiotonu, sa ia faatuina lona malo ma faamasino lona nuu i le poto ma le fai mea tonu i ona aso uma, ma saili ma le maelega e faataitai i le faatulagaga lena sa faatuina e tamā i tupulaga muamua, i aso o le uluai nofoaiga faapeteriaka, i le nofoaiga lava a Atamu, ma Noa foi lona tamā, o lē na ^afaamanuia ia te ia i faamanuiaga o le lalolagi, ma faamanuiaga o le poto, ae fetuu ia te ia e tusa ma le Perisitua.

27 O lenei, ona o Farao o se tasi o le gafa lena e lē mafai ona maua ai e ia le aiā o le ^aPerisitua, e ui ina fai mai Farao na latou mauaina mai ia Noa, e ala mai ia Hamo, o lea na taitaieseina ai lo’u tamā e lo latou ifo i tupua;

28 Ae o le a ou taumafai, i se taimi o mulimuli mai, e faamatala manino atu le faasologa e agai i tua mai ia te a’u i le amataga o le foafoaga, ona ua oo mai ^atalafaamaumau i o’u lima, ia ua ou umia e oo mai i le taimi nei.

29 O lenei, ina ua uma ona taia o le faitaulaga a Elekana na oti ai o ia, sa oo mai se faataunuuga o mea sa fai mai ia te a’u e uiga i le laueleele o Kaletaia, e faapea o le a oo mai se oge i le laueleele.

30 E tusa ai ma lea, sa faateteleina se oge i le laueleele atoa o Kaletaia, ma sa mafatia tele lo’u tamā ona o le oge, ma sa salamo o ia i le leaga sa gauai o ia e fai faasaga mai ia te a’u, e aveese lo’u ^aola.

31 Ae o talafaamaumau o tamā, le au peteriaka lava lea, e faatatau i le aiā o le Perisitua, sa faasaoina e le Alii lo’u Atua i o’u lava lima; o lea o le malamalama e uiga i le amataga o le foafoaga, ma ^apaneta foi, ma fetu foi, e pei ona faaalia i tamā, ua ou tausia e oo mai lava i le aso nei, ma o le a ou taumafai e tusi ni isi o ia mea i luga o lenei talafaamaumau, mo le manuia o a’u fanau o ē o le a o mai mulimuli mai ia te a’u.