1 Nao, Lod God i bin mekem se hadtaem blong kasem kaekae i kam strong long kantri blong Uru, mekem se ^aHaran, brata blong mi, i bin ded; be ^bTera, papa blong mi, i bin laef yet mo i stap long kantri blong Uru, long Koldia.

2 Mo i bin hapen se mi, Ebraham, mi bin tekem ^aSarae olsem waef blong mi; mo ^bNaho, brata blong mi, i bin tekem Milka olsem waef blong hem, we hem i gel blong Haran.

3 Nao, Lod i ^atalem long mi se: “Ebraham, yu mas kamaot long kantri blong yu, mo yu mas livim famli blong yu, mo yu mas aot long haos blong papa blong yu, i go long wan kantri we bambae mi soem long yu.”

4 From hemia, mi bin aot long kantri blong ^aUru, blong Koldia, blong go long kantri ia, Kenan; mo bin bin tekem Lot, boe blong brata blong mi mo waef blong hem, mo waef blong mi, Sarae; mo tu, ^bpapa blong mi bin folem mi, i go long kantri ia we mifala i bin singaotem Haran.

5 Mo hadtaem blong kasem kaekae i kamdaon smol; mo papa blong mi i bin stastap long Haran, mo i bin stap ia nomo from se i gat plante grup blong animol long Haran; mo papa blong mi i tanem hem i gobak long ^afasin blong wosipim ol aedol, from hemia hem i gohed blong stap long Haran.

6 Be mi, Ebraham, mo ^aLot, boe blong brata blong mi, mifala i bin prea long Lod, mo Lod i bin ^bsoemaot hemwan long mi, mo i bin talem long mi: “Girap, mo tekem Lot wetem yu; from se mi gat wan tingting i stap blong tekemaot yu long Haran, mo blong mekem yu kam wan man blong wok blong mi, we i tekem ^dnem blong mi i go long wan narafala ^ekantri we bambae mi givim long laen blong yu afta long yu, blong hem i holem blong hem gogo i no save finis, taem bae hem i lisin gud long voes blong mi.”

7 From se mi mi Lod, God blong yu; mi stastap long heven; wol i ^aples we mi putum leg blong mi antap long hem; mi stretem han blong mi antap long solwota, mo hem i obei long voes blong mi; mi mekem win mo faea i kam olsem ^bhos wilkat blong mi; mi talem long ol bigfala hil—Yufala i kamaot long ples ia—mo luk, wan waelwin i tekemaot olgeta wantaem, kwiktaem nomo.

8 Nem blong mi i ^aJehova, mo mi ^bsave en stat long stat finis; from hemia, han blong mi bae i lukaot long yu.

9 Mo aot long yu, bae mi mekem wan bigfala nesen, mo bae mi ^ablesem yu i bitim mak, mo bae mi mekem nem blong yu i hae long medel blong evri nesen, mo bambae yu stap olsem wan blesing long laen blong yu afta long yu, long wei ia se bae han blong olgeta bae i tekem seves ia mo ^bPrishud ia i go long evri nesen;

10 Mo bambae mi blesem olgeta tru long nem blong yu; from se hamas long olgeta we bae oli akseptem ^aGospel ia, bae mi singaotem olgeta folem nem blong mi, mo bae mi kaontem olgeta olsem ^blaen blong yu, mo bambae oli girap mo blesem yu, olsem ^dpapa blong olgeta;

11 Mo bambae mi ^ablesem olgeta we bae oli blesem yu, mo bae mi sakem strong nogud tok long olgeta we oli sakem strong nogud tok long yu; tru long yu (hemia, hem i tru long Prishud), mo tru long ^blaen blong yu (hemia Prishud blong yu), from se mi givim long yu wan promes se ^draet ia bae i gohed tru long yu mo tru long laen blong yu afta long yu (hemia i minim, stret laen, o tru long laen blong ol pikinini), bae evri famli blong wol ia bae i kasem blesing, we oli ol blesing blong Gospel, we oli ol blesing blong fasin blong sevem man, we i laef we i no save finis.

12 Nao, afta we Lod i bin aot long mi afta we hem i toktok long mi, mo mi nomo luk fes blong hem, mi bin talem insaed long hat blong mi: “Wokman blong yu i bin ^alukaotem yu wetem strong tingting, mo naoia mi faenem yu;

13 Yu yu bin sendem enjel blong yu blong mekem mi mi ^afri long ol god blong Elkena, mo i gud blong mi lisin gud long voes blong yu; from hemia, letem wokman blong yu i girap mo i aot long pis.”

14 Mekem se mi, Ebraham, mi bin aot olsem we Lod i bin talem long mi, mo Lot i kam wetem mi; mo mi, Ebraham, mi bin gat ^asikstitu yia taem mi bin aot long Haran.

15 Mo mi bin tekem ^aSarae, we mi tekem olsem waef blong mi taem mi bin stap long ^bUru, long Koldia, mo mi tekem Lot, boe blong brata blong mi, mo evri samting we mifala i karem i kam wanples, wetem ol sol we mifala i bin ^dwinim long Haran, mo mifala i bin go long rod i go long kantri ia, ^eKenan, mo mifala i bin stap long ol tenet taem mifala i bin stap long rod blong mifala;

16 From hemia, hem we i no save finis i bin protektem mifala, i bin ^astrong ston blong mifala, mo i bin fasin blong sevem mifala long taem we mifala i stap wokbaot stat long Haran, i go tru long Jerson blong go kamaot long kantri ia, Kenan.

17 Nao mi, Ebraham, mi bin bildim wan ^aolta long kantri ia, Jerson, mo mi bin mekem wan ofring i go long Lod, mo mi bin prea se ^bhadtaem blong kasem kaekae bae i kamaot long haos blong papa blong mi, blong mekem se bae oli no ded.

18 Mo mifala i bin aot long Jerson i go tru long kantri ia blong go long ples ia, Sekem; hem i bin stap long ol flat ples blong More, mo mifala i go insaed finis long ol boda blong kantri ia blong Ol ^aMan Kenan; mo mi bin mekem wan ^bsakrifaes, long ples ia, long ol flat ples blong More, mo mi bin prea long Lod wetem ful tingting, from se mifala i kam finis insaed long kantri blong nesen ia we i stap wosipim ol aedol.

19 Mo Lod i bin kamaot long mi, olsem ansa blong prea blong mi, mo i bin talem long mi se: “Long laen blong yu, bambae mi givim ^akantri ia.”

20 Mo mi, Ebraham, mi bin girap long ples ia we mi bin bildim olta long Lod, mo stat long ples ia, mi aot, mi go long bigfala hil long Is blong ^aBetel, mo mi stanemap tenet blong mi long ples ia, wetem Betel long Wes, mo ^bEae long Is; mo long ples ia, mi bildim wan narafala olta long Lod, mo mi bin ^dprea bakegen long nem blong Lod.

21 Mo mi, Ebraham, mi gohed long rod blong mi, mi stap gohed i go long Saot; mo hadtaem blong kasem kaekae i bin stap gohed long kantri; mo mi, Ebraham, mi mekem tingting blong mi blong go daon long Ijip, blong stap smol taem long ples ia, from se hadtaem blong kasem kaekae i bin strong tumas.

22 Mo i bin hapen se taem mi kam kolosap blong go insaed long Ijip, Lod i bin talem long mi: “Luk, ^aSarae, waef blong yu, i wan naes woman tumas blong stap lukluk;

23 From hemia, bambae i kam blong hapen se, taem Ol Man Ijip bae oli luk hem, bae oli talem—Woman ia i waef blong hem; mo bambae oli kilimded yu, be bae oli letem hem i laef; from hemia, yu mas lukaot gud blong mekem olsem ia:

24 Hem i mas talem long Ol Man Ijip se hem i sista blong yu, mo bae sol blong yu bae i laef.”

25 Mo i bin hapen se mi, Ebraham, mi bin talem long Sarae, waef blong mi, evri samting ia we Lod i bin talem long mi—From hemia, mi askem yu, talem long olgeta se yu yu sista blong mi, blong mekem se i blong gud blong mi, mo sol blong mi bae i laef from givhan blong yu.