iVolanikalou
Ai Vakamacala Taumada


Ai Vakamacala Taumada

Na Mataniciva Talei sai koya na veitikina lavetaki bibi eso me baleta na vakabauta kei na ivunau ni Lotu i Jisu Karisito ni Yalododonu Edaidai. A vakadewataka ka vola na itukutuku eso oqo ko Josefa Simici na Parofita, ka vuqa vei ira era dau tabaki ena veiniusipepa eso ni Lotu ena nona gauna.

Na imatai ni itukutuku vakasokumuni ka vakayacani me Mataniciva Talei a caka ena 1851 mai vei Elder Voreqelini D. Rusiate, a lewena voli ena gauna ko ya na Matabose ni Le Tinikarua ka peresitedi talega ni Tabana ni Kaulotu e Peritania. A kena inaki me vakarawarawataka na kena raici na veitikina bibi eso ka sega ni dau tabaki vakararaba tu ena gauna nei Josefa Simici. Ia ni sa tubu cake tiko ga na iwiliwili ni lewe ni Lotu mai Iurope kei Amerika, sa gadrevi me vakarawarawataki na kena veisoliyaki yani na veitukutuku oqo. A vakayagataki vakalevu sara na Mataniciva Talei ka sa mani yaco kina me ivola tudei ni Lotu ena nodratou cakacaka na Mataveiliutaki Taumada kei na koniferedi raraba mai Salt Lake City ena 10 ni Okotova, 1880.

Sa railesuvi oti vakavuqa na lewe ni ivola oqo, me vaka na gagadre ni Lotu. Ena 1878 a vakacurumi vou yani kina eso na tiki ni ivola i Mosese ka a sa sega ni volai ena itabataba taumada. Ena 1902 sa bokoci tani kina mai na Mataniciva Talei, na veitikina eso sa tabaki oti tu ena Vunau kei na Veiyalayalati. A tuvai tale ga ena yabaki 1902 na veitikina kei na wase yadua, kei na ivakamacala leleka e rukuna. Ia ena 1921 sa qai tabaki kina ena imatai ni gauna me wase vakarua na veidrauna yadua, ka vakacurumi yani na kena idusidusi. A sega tale ni dua na veisau e vakayacori kina me yacova na Epereli ni 1976, sa qai mai vakuri kina ena rua na ivakatakila. Ena 1979 erau sa kau tani tale kina mai na Mataniciva Talei na ivakatakila e rua oqori ka biu ena Vunau kei na Veiyalayalati, erau sa kilai tiko kina ena gauna oqo me wase 137 kei na 138. Ena kena itabataba sa vakayagataki tiko ena gauna oqo sa veisautaki.

Sa koto oqori e ra e dua na ivakamacala lekaleka ena lewe ni ivola oqo:

  1. Veitikina digitaki eso mai na iVola i Mosese. Oqo e tauri mai na iVakatekivu, ena ivakadewa ni iVolatabu ka a tekivutaka ko Josefa Simici ena vula ko June, 1830.

  2. Ai Vola i Eparaama. E dua na ivakavakadewa vakauqeti ni volavola i Eparaama. A tekivutaka o Josefa Simici na vakavakadewa ena 1835 ni oti na nona taura eso na ivolagasau ni Ijipita. A qai tabaki vakaiwasewase na vakavakadewa oqo ena niusipepa na Times and Seasons me tekivu ena 1 ni Maji, 1842, mai Nauvu, Ilinoi.

  3. Josefa Simici—Maciu. E tauri mai na ivakadinadina nei Maciu ena ivakadewa nei Josefa Simici ni iVolatabu (raica na Vunau kei na Veiyalayalati 45:60–61 me baleta na ivakaro vakalou me tekivutaki kina na vakadewataki ni Veiyalayalati Vou).

  4. Josefa Simici—Ai Tukutuku. Na veitikina cavuti mai na ivakadinadina volai kei na itukutuku makawa kei Josefa Simici, ka ra a vakarautaka ko koya kei ira na nona vunivola ena 1838–1839 ka a qai tabaki vakaiwasewase ena niusipepa na Times and Seasons mai Nauvu, Ilinoi, me tekivu mai na 15 ni Maji, 1842.

  5. Na Yavu ni Vakabauta ni Lotu i Jisu Karisito ni Yalododonu Edaidai. Oqo e dua na itukutuku nei Josefa Simici ka a tabaki ena niusipepa na Times and Seasons ena 1 ni Maji, 1842, vata kei na dua na itukutuku makawa lekaleka e baleta na Lotu ka a dau kilai levu ena gauna ko ya me yacana na iVola nei Wedioci.