Josep Smith—Bwebwenato

M̧ōttan Ko Jān Bwebwenato In Josep Smith, Rikanaan Eo

Jepta 1

Josep Smith ej kōnono kōn ro jim̧m̧aan im jibwin im̧aanļo̧k, ro uwaan baam̧le eo an, im jikin ko raar jokwe ie m̧okta—Juon itok-limo ejeja kōn kabun̄ eļap ewaļo̧k ilo turilikin New York—Ej jek ilo būruōn n̄an kappukot mālōtlōt āinwōt ba kake jān Jemes—Jemān im Nejin rej waļo̧k, im Josep kar kūri n̄an jerbal in rikanaan eo an. (Eoon kein 1–20.)

1 Jān wōt ennaan ko rellōn̄ me em̧ōj kar kajeededi jān armej ro rekōņaan wōt kōmour nana im jorrāān, ekkejelļo̧k wōt n̄an ajerkaktok eo im eddekļo̧k eo an bKabun̄ eo an Jisōs Kraist im Armej ro Rekwōjarjar ilo Raan ko Āliktata, aolep ko me kar ļamļami jān rijeje ro aer n̄an tariņae ņae jekjekin āinwōt juon Kabun̄ im eddekļo̧k eo an ilo laļ in—Kar karreel buruō n̄an je bwebwenato in, n̄an kajim̧we ļōmņak ko an armej, im likūt aolep rikajjitōk ro ilo̧kan m̧ool eo ilo aer bōki m̧ool ko, āinwōt aer kar waļo̧k, ekkejeltok jim̧or n̄an eō im Kabun̄ in, toun wōt an m̧ool kein pād wōt ippa.

2 Ilo bwebwenato in inaaj jakem̧aantak elōn̄ men ko rekar bōk jikier im rejelōt Kabun̄ in, ilo m̧ool im jim̧we, āinwōt aer kar waļo̧k, ak āinwōt aer bōk jikier kiiō, kiiō ej [1838] iiō eo kein karuwalitōkjān iien eo ekar ajutak Kabun̄ in ba kake.

3 aIaar ļotak ilo iiō eo an ad Irooj juon to̧ujin ruwalitōkbukwi im ļalem, ilo raan eo kein karon̄ouljilu in Tijem̧ba, ilo jikin eo Sharon, Windsor kounty, Bukwōn in Vermont. … Jema, bJosep Smith, Sen., eaar likūt Bukwōn in Vermont, im em̧m̧akūtļo̧k n̄an Palmyra, Ontario (kiiō Wayne) kounty, ilo Bukwōn in New York, ke Iaar pād ilo iiō eo aō kein kajon̄oul, ak jon̄an kein. Ilo enan̄in emān iiō ko ālikin an jikrōkļo̧k eo an jema ilo Palmyra, eaar kōm̧akūt baam̧le eo an ļo̧k n̄an Manchester ilo ejja kounty in wōt Ontario—

4 Baam̧le eo an ekitbuuj jon̄ouljuon armej, etaer, jema, aJosep Smith; bjinō, Lucy Smith (eo kar etan, m̧okta jān an kar m̧are, eaar Mack, kōrā eo nejin Solomon Mack); ļōm̧aro jeiū im jatū, cAlvin (eo ekar mej ilo Nobōm̧ba 19, 1823, ilo iiō eo kein karon̄ouljiljino iiō dettan), dHyrum, n̄a, eSamuel Harrison, William, Don Carlos; im kōrā ro jeiū im jatū, Sophronia, Catherine, im Lucy.

5 Jet iien ilo iiō eo kein karuo ālikin em̧m̧akūt eo am n̄an Manchester, eaar wōr ilo jikin eo kōm ar jokwe ie juon lim̧otak ejeja kōn wōt men in kabun̄. E kar ijjino ippān Methodist ro, a em̧ōkaj an ererak ilubwiljin aolep tōmak ko ilo peļaakin ijoko ilo laļ eo. Lukkuun m̧ool, aolepān district jab eo an laļ eo kar jelōte jān e, im eļap jar ko rekar kobaļo̧k ippān doon n̄an jarin kabun̄ kein reoktak jān doon, eo ekar ejaake juon poktak ej jab dik im ajej ilubwiljin armej ro, jet rej ba, aLo, ije!” im ro jet, “Lo, ijjuweo!” Jet rekar akwāāl kōn tōmak eo an Methodist, jet n̄an tōmak eo an Presbyterian, im jet n̄an tōmak eo an Baptist.

6 Bwe, jekdo̧o̧n iakwe eo eļap me rioktak rein n̄an tōmak kein reoktak jān doon rekar kwaļo̧k e ilo iien oktak eo aer, im kate eo ealikkar jān minister ro kajjojo, ro rekar kanooj emmourur ilo kajutak im iuunm̧aanļo̧k wāween en̄jake in kabun̄ in, bwe ren maron̄ ukōt aolep, āinwōt aer kar kōņaan ņa etan, rej kobaļo̧k ippān jabdewōt raan tōmak rekōņaan; ijoke ke rioktak ro rej jino diwōjļo̧k, jet n̄an juon jar im jet n̄an bar juon, kar lo e bwe āinwōt en̄jake ko rem̧m̧an an jim̧or pris ro im rioktak ro rekar ļap wōt aer ļōkōm̧ jān m̧ool; bwe wāween in poktak eļap im en̄jake enana eaar ijjino—pris ej akwāālel ņae pris, im rioktak ņae rioktak; bwe aolep en̄jake ko rem̧m̧an an juon n̄an bar juon, eļan̄n̄e ekar wōr ippāer, rekar aolepem jako ilo aaitwerōk in naan im juon jiāi kōn ļōmņak ko.

7 I kar ilo iien in ekar jon̄oulemān iiō detta. Baam̧le eo an jema rekar katak ippāer bwe ren deļo̧n̄eļo̧k tōmak eo an Presbyterian, im emān iaer rekar kobaļo̧k ilo kabun̄ eo, etaer, jinō, Lucy; ļōm̧aro jeiū im jatū Hyrum im Samuel Harrison; im lio jatū Sophronia.

8 Ilo iien in eļap lim̧otak ilo aō ļōmņak kar ļujuri n̄an kanooj kejakļo̧kjeņ im eļap jako̧n; a men̄e en̄jake ko aō rekar m̧wilaļ im ekkā aer ekkan̄, iaar dāpij ettoļo̧k eo aō jān aolep jar kein, men̄e iaar pād ilo elōn̄ ian kwelo̧k ko aer jon̄an wōt ekutkut in an iien kōtļo̧k. Ilo an iien wōnm̧aanļo̧k aō ļōmņak ekar itōn jepiaan raan kabun̄ eo an Methodist, im iaar en̄jake jet ikdeelel ko n̄an kobaļo̧k ippāer; a jon̄an ļap in kar pok im akwāālel eo ilubwiljin tōmak kein, jon̄an ekar jab maron̄ bwe juon armej ej inono wōt āinwōt kar n̄a, im kar kanooj jaje kijjien armej raņ im men ko, n̄an itok n̄an juon jem̧ļo̧k kōn wōn ekar jim̧we im wōn ekar bōd.

9 Ļōmņak eo aō jān iien n̄an iien ekar kanooj m̧weiur, jon̄an an ļap im ejjeļo̧k m̧wijkōk in lam̧ōj im lim̧otak eo. Presbyterian ro rekar kanooj ke aer ļōmņak ņae Baptist ro im Methodist ro, im kar kōjerbal aolep kajoor ko ilo jim̧or koļmānļo̧kijeņ im jeļāļo̧kjeņ n̄an kam̧ool bōd ko aer, ak, ilo diktata in, n̄an kōm̧m̧an bwe aolep armej ren ļōmņak bwe rekar bōd. Jān ijo rājet, Baptist roim Methodist ro ijo ejja jekjek in wōt rekar kūtarre ilo kijejeto eo aer n̄an kapen pedped in katak ko aer im kariab aolep ro jet.

10 Ilo ioļapļap in tariņae in naan ko im lim̧otak in ļōmņak kein, ekkā aō ba n̄an n̄a make: Ta ej aikuj in kōm̧m̧an? Wōn iaan aolep jar kein arejim̧we; ak, aolepāer wōj im bōd ke? Eļan̄n̄e juon iaer ejim̧we, ewi in iaer, im ewi wāween aō naaj jeļā e?

11 Ke iaar kanooj en̄taan ium̧win men pen kein kōm̧m̧an jān jiāi ko an jarin rikabun̄ rein, iaar ekkōnono juon raan jān Lōta eo an Jemes, jebta juon im eoon ļalem, eo ej kōnono āinwōt in: A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wūjlep n̄an armej otemjej, im jab eņo̧ik kake, im naaj leļo̧k n̄an e.

12 Ejjan̄in kar wōr jabdewōt eoon jān jeje ko rekwōjarjar enan̄in kar itok kōn eļap kajoor n̄an būruōn armej jān eoon in ilo iien in n̄an buruō. Āinwōt n̄e eaar deļo̧n̄ kōn eļap an̄in ilo aolep en̄jake ko an buruō. Iaar koļmānļo̧kijeņ kake im bar koļmānļo̧kijeņ kake elōn̄ alen, kōnke iaar jeļā ke eļan̄n̄e ekar wōr juon ekar aikuj mālōtlōt jān Anij, ikar aikuji; bwe wāween ōt n̄an m̧akūtkūt iaar jab jeļā, im eļan̄n̄e ikar jab maron̄ bōk eļapļo̧k mālōtlōt jān jon̄an eo ippa, Ij jamin kar maron̄ jeļā; bwe rikaki ro an kabun̄ jān tōmak ko wōj rekar ameļeļe āinjuon jān doon ejja eoon ko wōt jān jeje ko rekwōjarjar āinwōt n̄an rupe aolep lōke ilo pukot mejļan kajjitōk in jān wūjlepeļo̧k n̄an bBaibōļ eo.

13 Etto iaar itok n̄an jem̧ļo̧k in bwe iaikuj pād wōt ilo marok im pok, ak n̄e jaab iaikuj kōm̧m̧an āinwōt an Jemes ba, en̄in, kajjitōk ippān Anij. N̄a etto aō itok n̄an kōttōpar in n̄an a“kajjitōk ippān Anij,” kōnke iaar kōjjem̧ļo̧k bwe eļan̄n̄e Eaar leļo̧k mālōtlōt n̄an ro rekar aikuj mālōtlōt, im kar leļo̧k im wūjlepļo̧k, im jab eņo̧ik, imaron̄ in kajjion̄.

14 Kōn menin, ekkar n̄an kōttōpar in, kōttōpar eo aō n̄an kajjitōk ippān Anij, iaar jibadekļo̧k bukun wōjke ko n̄an kōm̧m̧ane kōttōpar in. Ekar ilo jibbon̄ōn juon raan eaiboojoj, im ej jab ekōdo̧do, jinoin rak ilo juon to̧ujin ruwalitōkbukwi im ron̄oul. Ekar alen kein kajuon ilo mour eo aō iaar kōm̧m̧ane kōttōpar rot in, bwe ilubwiljin aolep abņōņō ko aō Ij jan̄in kar m̧oktaļo̧k kōm̧m̧ane juon kōttōpar n̄an ajar eļļaaj.

15 Ālikin aō kar jibadekļo̧k jikin eo iaar karōke m̧oktaļo̧k bwe in etal n̄an e, ālikin aō reito-reitak ipeļaakū, im kar lo ke iaar make, iaar bukwelōlō im kar jino ajeļo̧k ikdeelel ko an buruō n̄an Anij. Iaar kab itōn kōm̧m̧ane men in, ke ilo iien eo wōt kar nitbwili eō jān jet kajoor ko rekar kanooj anjo̧ ioō, im an jelōt eō eļap āinwōt n̄an dāpij loō bwe in jab maron̄ ekkōnono. Marok jilōn̄lōn̄ eaar kuktok ipeļaakū, im n̄an n̄a ium̧win jidik iien ekar āinwōt n̄e iaar itōn jako ilo ko̧kkure einnitōt.

16 A, kakkōt kōn aolep aō kajoor n̄an akūr ioon Anij n̄an kadeor eō jān kajoor eo an rikōjdat eo ekar nitbwili eō, im ilo ejja iien eo wōt ke iaar pojak n̄an rum̧ļo̧k ļo̧k ilo jorrāān im kōtļo̧k eō make n̄an ko̧kkure—jaab n̄an juon jeepepļo̧k aņto̧o̧ne, a n̄an kajoor eo an juon lukkuun jetōb jān laļ eo jab maron̄ loe, eo kajoor eo an eļap ij jan̄in kar en̄jake jān armej—ilo ejja iien uwōta in eļap wōt, iaar lo juon jurōn bmeram lukkuun ioon wōt bōra, ilōn̄inļo̧k meram eo an cal, eo ar wanlaļtak jidik ilo̧k jidik m̧ae an kar wōtlo̧k ioō.

17 Ej jab etto jān ke eaar waļo̧k iaar lo n̄a make deor jān rikōjdat eo me eaar lukwōj eō. Ke meram eo ar pād ioō iaar alo bruo Armej, ro meram im caiboojoj eo aer eaar eļļāļo̧k jān aolep wāween kōmmeļeļe, rej jutak ilōn̄ū ilo mejatoto. Juon iaer eaar ekkōnono n̄an eō, im kūr eō kōn eta im ba, im jitōn̄e ļo̧k eo juon—En̄in ej dNejū eJitōnbōro. Kwōn ron̄jake E!

18 Jibadbad eo aō ilo etal n̄an akajjitōk jān Irooj ekar n̄an jeļā tōmak ōt iaan aolep ko ijin ekar jim̧we, bwe in maron̄ jeļā eo n̄an kobaļo̧k ippān. Ej jab etto, kōn menin, ke iaar maron̄ bar bōk aō maron̄, bwe in maron̄ in ekkōnono, iaar kajjitōk ippān Armej rein rekar jutak ilōn̄ū ilo meram eo, tōmak ōt ian aolep kein ekar jim̧we (bwe ilo iien in ekar jan̄in deļo̧n̄ tok ilo buruō ke aolepāer rekar bōd)—im ewi wōt eo in kobaļo̧k ippān.

19 Kar uwaake eō bwe iaikuj jab kobaļo̧k ippān jabdewōt iaer, bwe rekar aolep abōd; im Armej eo eaar kōnono n̄an eō eaar ba bwe aolep unleplep in tōmak ko aer rekar juon mennin jōjō im̧aan Mejān; bwe ro rej ba er ritōmak rekar aolep ankeke; bwe: “rekar bruwaaktok n̄an Ippa kōn tieer, ak cburueer rej ettoļo̧k jān Eō, rej katakin kōn dkatak ko im kien ko an armej, im ewōr juon ejekjekin anij, a rej kaarmejjete kajoor eo an.”

20 E ekar bar juon alen kōmo̧ik aō kobaļo̧k ippān jabdewōt iaer; im elōn̄ men ko jet Eaar ba n̄an eō, ko im ijjab maron̄ jei ilo iien in. Ke iaar bar ro̧o̧l n̄an maron̄ eo aō, iaar lo ke n̄a iaar babu ioon ālikū, im reilōn̄ļo̧k n̄an ilo lan̄. Ke meram eo eaar ilo̧k, ekar ejjeļo̧k aō kajoor; a ejjab etto iaar bar bōke jidik, iaar ro̧o̧l n̄an m̧weo im̧ō. Im ke iaar atrak ilo jikin kijeek in kōmāāņāņ eo, jinō eaar kajjitōk ta eo iwōjake. Iaar uwaake, “Āinwōt juon, aolep men rem̧m̧an—N̄a ebwe aō pād.” Innām iaar ba n̄an jinō, “Em̧ōj aō jeļā n̄an n̄a make bwe kabun̄ eo an Presbyterian ej jab m̧ool.” Enan̄in āinwōt n̄e arijum̧ae eo ekar jeļā, ilo tōre in inono ilo mour eo aō, bwe n̄a inaaj kar baj wōt juon ripukwōj im rikabwilōn̄lōn̄ an aelōn̄ eo An; eļan̄n̄e jaab innām etke kajoor ko an marok rekar koba ņae eō? Etke bjum̧ae im matōrtōr rekar jerkak ņae eō, jān wōt ke iaar dik?

Jet rikwaļo̧k im bar jet ritōmak in kabun̄ rekar joļo̧k bwebwenato in Visōn eo M̧oktata—Matōrtōr ej ejoujik ioon Josep Smith—E ej kam̧ool kōn lukkuun m̧ool eo an visōn eo. (Eoon kein 21–26.)

21 Jet wōt raan ko ālikin aō lo avisōn in, iaar pād ippān juon rikwaļo̧k an Methodist, eo ekar kanooj wāmourur ilo lim̧otak eo an kabun̄ ba kake m̧oktaļo̧k; im, em̧m̧ao ippān kōn mennin ekkōnono in kōn kabun̄, iaar bōk iien in em̧m̧an n̄an leļo̧k n̄an e bwebwenato eo kōn visōn eo iaar bōk e. Iaar kanooj bwilōn̄ kōn baaktok eo an; eaar jab wōt watōke ennaan eo aō āinwōt ejjeļo̧k aorōkin, a kōn eļap kōrraat, im ba ekar aolep jān devil, bwe ekar ejjeļo̧k men rot kein āinwōt bvisōn ko ak crevelesōn ko ilo raan kein; bwe aolep men rot kein rekar bōjrak ippān rijjilōk ro, im bwe ejjāmin bar wōr jabdewōt iaer.

22 Ijoke, Iaar lo ejjab etto, bwe aō kar kwaļo̧k bwebwenato in n̄an e ekar kalim̧otak eļap ajepiaan ņae eō ilubwiljin ritōmak ro an kabun̄, im ekar unjān eļap matōrtōr, eo ekar wōnm̧aanļo̧k im ļapļo̧k; im men̄e Iaar juon ļaddik ej bjab bun̄bun̄, ikōtaan wōt jon̄oulemān im jon̄oulļalem iiō dettan, im jekjek ko in mour eo aō rej ko rej kōm̧m̧an bwe juon ļaddik en jab bun̄bun̄ ilo laļ in, mekarta em̧m̧aan ro eutiej jikier ekar bwe aer kile n̄an kalim̧otak armej bwe ren ļōmņak ņae eō, im ejaake juon matōrtōr eo emeo̧; im men in ekar āinwōt juon ilubwiljin aolep tōmak ko—aolep rekar koba n̄an matōrtōre eō.

23 Ekar kōm̧m̧an mennin aō kejakļo̧kjeņ ilo iien eo, im ekkā jān wōt iien eo, ekōjkan an kanooj kabwilōn̄lōn̄ bwe juon ļaddik ejjab bun̄bun̄, im jidik wōt an rūttoļo̧k jān jon̄oulemān iiō dettan, im juon, barāinwōt, eo ej iookļo̧k wōt aikuj eo n̄an dāpij juon mour bajjek jān jerbal ko an raan otemjej, aikuj in kar ļōmņake e bwe ej juon armej eaorōk n̄an kan̄ōltok m̧ad ko an ro reļļap an tōmak ko rebun̄bun̄ ilo raan ko, im ilo juon wāween n̄an ejaake ilo er juon jitōbōn matōrtōr eo emeo̧ otem meo̧ im kōnono nana. A kabwilōn̄lōn̄ ak jaab, ekar āindein, im ekar ekkā an unjān eļap būrom̧ōj n̄an n̄a make.

24 Ijoke, jekdo̧o̧n ta ekar juon men em̧ool ke iaar lo juon visōn. Ikar ļōmņake jān iien eo, bwe iaar en̄jake enan̄in āinwōt aPaul, ke eaar kōm̧m̧ane bjojomar eo an im̧aan Kiin̄ Agrippa, im kar kwaļo̧k bwebwenato in visōn eo eaar bōk e ke eaar lo meram eo, im ron̄ juon ainikien; a jet wōt rekar tōmak e; jet rekar ba bwe e ekar riab, jet rekar ba ekar bwebwe; im jet rekar kajjirere kake im ba ņae e. A aolep men in ekar jab ko̧kkure m̧ool in visōn eo an. Eaar lo juon visōn, ekar jeļā ke eaar loe, im aolep matōrtōr ium̧win lan̄ eban kar kōm̧m̧an bwe en āinjuon; im men̄e rekar matōrtōre e n̄an mej, mekarta ekar jeļā, im naaj kar jeļā m̧ae menwan āliktata, bwe ekar jim̧or lo juon meram im kar ron̄ juon ainikien ej ekkōnono n̄an e, im aolepān laļ eban kar kōm̧m̧an bwe e en ļōmņak ak tōmak āinjuon.

25 Āindein kar bar ippa. Iaar lukkuun lo juon meram, im ilo ilubwiljin meram eo iaar lo ruo aArmej, im rekar ilo lukkuun m̧ool ekkōnono n̄an eō; im men̄e rekar dike im matōrtōre eō kōn aō kar ba bwe iaar lo juon visōn, mekarta ekar m̧ool; im ke rekar matōrtōre eō, kajjirere kake eō, im ba aolep naan ko renana ņae eō ilo bōd kōn aō kar ba men in, kar tōl eō bwe in ba ilo buruō: Etke matōrtōre eō kōn ekkōnono m̧ool eo? Iaar lukkuun lo juon visōn; im wōn n̄a bwe in maron̄ jutak ņae Anij, ak etke laļ ej ļōmņak in kōm̧m̧an bwe in kariabe ta eo iaar lukkuun loe? Bwe iaar lo juon visōn; ikar jeļā, im iaar jeļā bwe Anij ekar jeļā, im iban kar maron̄ bkariab e, im jab maron̄ kajjion̄ in kōm̧m̧ane; men eo de in iaar jeļā ke jān kōm̧m̧an āindein inaaj kar kainepataik Anij, im itok ium̧win liaakeļo̧k.

26 Ikar kiiō bun̄-buruō ilo aō ļōmņak n̄an iien in ke laļ ekar n̄irbōktak—bwe ekar jab aō jerbal n̄an kobaļo̧k ippān jabdewōt iaer, a n̄an wōnm̧aanļo̧k āinwōt iaar kōm̧m̧ane m̧ae iien eo bar tōl eō. Iaar lo akam̧ool eo an Jemes bwe ekar m̧ool—bwe armej eo ejjeļo̧k an mālōtlōt emaron̄ kajjitōk jān Anij, im bōke, im jab eņo̧ik.

Moronai ej waļo̧kļo̧k n̄an Josep Smith—Etan Josep naaj jeļā kake n̄an em̧m̧an im nana ilubwiljin aolep laļ ko—Moronai ej jiron̄ e kōn Bok im Mormon im kōn itok in ekajet ko an Irooj im kōnono kake elōn̄ jeje ko rekwōjarjar—Jikin ņojak eo an pileij gold ko ej kwaļo̧ke—Moronai ej wōnm̧aanļo̧k wōt n̄an kwaļo̧k naan in tōl n̄an Rikanaan eo. (Eoon kein 27–54.)

27 Iaar wōnm̧aanļo̧k wōt ilo bōk kuņaō ilo jerbal ko aō ilo mour m̧ae ron̄ouljuon raan in Jeptōm̧ba, juon to̧ujin ruwalitōkbukwi im ron̄ouljilu eo, aolepān iien in en̄taan kōn eļap matōrtōr jān ilo pā ko pein aolep jekjekin armej otemjeļo̧k, jim̧or rikabun̄ im jab rikabun̄, kōnke iaar wōnm̧aanļo̧k n̄an kapene ke iaar lo juon visōn.

28 Ilo kar tōrean iien eo me eaar itok ikōtaan iien eo iaar lo visōn eo im iiō eo juon to̧ujin ruwalitōkbukwi im ron̄ouljilu—kōnke kar kōmo̧ik aō kobaļo̧k ippān jabdewōt ra ko an kabun̄ ilo raan ko, im kōnke iaar inono wōt ilo iiō ko, im kar matōrtōre eō jān aolep ro ren kar jera im ren kar jouj n̄an eō, im eļan̄n̄e rekar kōtmāne eō bwe in juon ejajeļo̧kjen n̄an kijejeto ilo juon jekjek ekkar im jouj n̄an bar kōro̧o̧lo̧k eō—iaar jedmatmat n̄an aolep nemāmeen akapo ko otemjeļo̧k; im, jān wōt koba ippān jekjekin armej otemjeļo̧k, ekkā aō kar wōtlo̧k ilo elōn̄ jirilo̧k ko rebwebwe, im kōjedmatmat m̧ōjņo̧ an jo̧dikdik, im an̄ļo̧k ko an armej; ko, ij būrom̧ōj in ba, rekar tōlļo̧k eō n̄an elōn̄ kapo ko reāinjuon, renana ilo im̧aan mejān Anij. Ilo kōm̧m̧ane kwaļo̧k bōro in, ejjeļo̧k juon eaikuj ļōmņake bwe n̄a ibōd kōn jabdewōt jero̧wiwi ko reļļap ak kanooj nana. Itok wōt in kōm̧m̧ani jero̧wiwi kein ejjan̄in kar pād ilo m̧wilū. A ikar bōd jān kōjak bajjek, im jet iien iiaioļo̧k ippān jar in lem̧ōņōņō, men ko eierļo̧k wōt, ejjab ekkar n̄an m̧wil eo aikuj in pād ippān juon eo kar bkūri jān Anij āinwōt kar kūri eō. A men in eban kar kanooj in ruwamāejet n̄an jabdewōt eo ekar ememejtok ke iaar jo̧dikdik, im ej jeļā kōn itok wōt in lem̧ōņōņō eo aō.

29 Jān wōt men kein, ekkā wōt aō en̄jake eddo eo jān m̧ōjņo̧ eo im jab weeppān ko aō; ke, ilo jo̧tiinin ron̄ouljuon raan in Jeptōm̧ba in ba kake ilōn̄, ālikin aō kar etal n̄an aowej eo aō n̄an bon̄ōn eo, iaar bōpājo̧rjor in itōn ajar im owar n̄an Anij Ekajoor Bōtata kōn jeorļo̧k bōd kōn aolep jero̧wiwi ko im likjab ko aō, im barāinwōt kōn juon kaalikkar n̄an eō, bwe in maron̄ jeļā kōn jekjekū im aō jutak im̧aan Mejān; bwe ekar wōr aō kōjatdikdik epen ilo bōke juon kaalikkar jān lan̄, āinwōt iaar bōke juon m̧oktaļo̧k.

30 Ke iaar āindein pād ilo jekjek in n̄an kūr ioon Anij, iaar lo juon meram ej waļo̧ktok ilo ruum̧ eo aō, eo eaar wōnm̧aanļo̧k ilo an ļapļo̧k m̧ae ruum̧ eo eaar meramļo̧k jān lukwolpān raelep, ke ejidimkij an juon aarmej kar waļo̧k iturin aowej eo aō, ej jutak ilo mejatoto, bwe ne ko neen ļein rekar jab un̄ūr laļ.

31 Eaar kōņak juon liboror ebbooļoļ ekanooj amouj otem mouj. Ekar juon mouj ļo̧k jān jabdewōt ilaļ ikar loe ioon laļ; im ij jab tōmak bwe jabdewōt men ilaļ maron̄ in kōm̧m̧an bwe en āinwōt jon̄an mouj otem mouj im ejjatōltōl eo. Pā ko pein rekar keelwaan, im pein itulōn̄ barāinwōt, im itulōn̄ jidik in jem̧ļo̧kin lo̧piden pein; āindein, barāinwōt, juurlaļ in neen rekar keelwaan, āinwōt bar ne ko neen, jidik ilōn̄in kwōleleen ko ilo neen. Bōran im kōnwaan rekar barāinwōt jab libobo. Ikar maron̄ lo bwe e ekar bar ejjeļo̧k nuknuk eaar kōņake ak liboror in, āinwōt ke ekar peļļo̧k, bwe in maron̄ reilo̧k ilo ubōn.

32 Ejjab liboror eo an wōt ekar mouj otem mouj, a aolepān ānbwinnin eo eaar aaiboojoj ilōn̄in kōmmeļeļeiki, im paotokin lukkuun āinwōt bjarom. Ruum̧ eo ekar meram otem meram, a ekar jab lukkuun meram āinwōt peļaakin ānbwinnin ļein. Ke iaar kalimjek e m̧okta, iaar cmijak; a mijak in ejjab to ekar likūt eō.

33 E eaar kūr eō kōn aeta, im ba n̄an eō bwe e eaar juon ribōktok ennaan jilkintok jān im̧aan mejān Anij n̄an eō, im bwe etan ar Moronai; bwe Anij ekar wōr juon an jerbal n̄an eō n̄an kōm̧m̧ane; im bwe eta naaj watōke kōn em̧m̧an im nana ilubwiljin aolep laļ ko, nokwe ko, im lo ko, ak bwe enaaj kōn jim̧or em̧m̧an im nana kōnono kake ilubwiljin armej otemjej.

34 Eaar ba ekar wōr juon abok kar doore, ej jeje ioon bpileij gold ko, eo ej letok juon bwebwenato in ro rekar jokwe m̧oktaļo̧k ilo kontinent in, im unjān ijo jān e rekar jebar. Eaar barāinwōt ba bwe ctarlep in Gospel eo ejjeļo̧k jem̧ļo̧kin ekar pād ie, āinwōt Rilo̧mo̧o̧r eaar leļo̧k n̄an ro raar jokwe ijin etto;

35 Barāinwōt, bwe ekar wōr ruo dekā ilo silver bow ko—im dekā kein, rej ekkejelļo̧k n̄an juon adipil, rej ejaake men eo etan bUrim im Tumim—kar doori ippān pileij ko; im bōki im kōjerbali dekā kein rekar booje c“rilolo ro” etto ak iien ko m̧oktaļo̧k; im bwe Anij eaar kōpooji n̄an un in ukōte bok eo.

36 Ālikin ba n̄an eō men kein, eaar jino kōnono jān kanaan ko jān aKallim̧ur M̧okta. Eaar m̧okta kōnono jān m̧ōttan bjebta eo kein kajilu in Malakai; im eaar kōnono barāinwōt jān jebta eo kein kāāmen ak āliktata in ejja kanaan in wōt, ijoke kōn jidik oktak jān wāween eo kōnono jān e ilo Baibōļ ko ad. Ijello̧kun kōnono jān eoon eo kein kajuon āinwōt waļo̧k ilo bok ko ad, eaar kōnono jān e āindein:

37 Bwe lo, araan eo ej itok n̄e enaaj bbwil āinwōt juon um̧, im aolep rijuwa, aaet, im aolep ro rej kōm̧m̧an nana renaaj bwil āinwōt cujooj em̧ōrā; bwe er ro rej itok renaaj tile er, Irooj in Inelep eo ej ba, bwe enaaj door er ejjeļo̧k okar ak ra.

38 Im bar juon alen, eaar kōnono eoon kein kaļalem āindein: Lo, Inaaj kwaļo̧k n̄an kom̧ aPriesthood eo, jān pein bIlaija rikanaan eo, m̧okta jān itok eo an raan eo eļap im kaammijak an Irooj.

39 Eaar barāinwōt kōnono jān eoon eo tok āinjuon: Im enaaj kalbwin ilo bōro ko būruōn ro nejier akallim̧ur ko kar kōm̧m̧ani n̄an ro jemāer, im bōro ko buruō ro nejier renaaj boktakļo̧k n̄an ro jemāer. Eļan̄n̄e en kar jab āindein, aolepān laļ naaj kar kanooj ko̧kkure ilo itok eo An.

40 Kobaļo̧k ippān men kein, eaar kōnono jān jebta kein kajon̄ouljuon in Aiseia, im ba bwe enan̄in kar kūrm̧ool. Eaar kōnono barāinwōt jān jebta eo kein kajilu in Jerbal, eoon kein ron̄oulruo im ron̄ouljilu, lukkuun jejjetier āinwōt aer waļo̧k ilo Kallim̧ur Ekāāl eo ad. Eaar ba bwe arikanaan en ekar Kraist; a raan eo ejjan̄in itok n̄e “er ro rem̧akoko in ron̄jake Ainikien naaj bbukweļo̧k er jān ilubwiljin armej ro,” a ejjab to enaaj itok.

41 Eaar barāinwōt kōnono jān ajebta eo kein karuo in Joel, jān eoon eo kein karon̄oulruwalitōk n̄an eo āliktata. Eaar barāinwōt ba bwe kanaan in ejjan̄in kūrm̧ool, a ejjab etto enaaj. Im eaar bar ba bwe tarlep in ro briAelōn̄ ko eban to enaaj itok. Eaar kōnono jān elōn̄ bar eoon ko jān jeje ko rekwōjarjar, im jakem̧aantak elōn̄ kōmmeļeļe ko me ban maron̄ ba kaki ijin.

42 Bar juon alen, eaar ba n̄an n̄a, bwe n̄e em̧ōj aō bōki pileij ko me eaar ekkōnono kaki—bwe iien eo n̄an bōki ej jan̄in kar kūrm̧ool—In jab naaj kwaļo̧ki n̄an jabdewōt armej; im bar jab dipil eo ippān Urim im Tumim eo; n̄an wōt ro im naaj jiron̄ eō n̄an kwaļo̧ki n̄an er; eļan̄n̄e inaaj kar naaj ko̧kkure eō. Ke eaar kōm̧m̧ao ippa kōn pileij ko, visōn eo eaar peļļo̧k n̄an aļōmņak eo aō bwe in lo jikin eo kar doori pileij ko ie, im bwe eaar kanooj alikkar im kanooj jejjet jon̄an iaar bar jeļā jikin eo ke iaar etal n̄an e.

43 Ālikin ekkōnono in, iaar lo meram eo ilo ruum̧ eo ekar jino kuktok ipeļaakin wōt armej eo im ekar ekkōnono n̄an eō, im ekar wōnm̧aanļo̧k im kōm̧m̧an āindein m̧ae iien ruum̧ eo ar bar marok, ijello̧kun wōt ipeļaakin; ke, ilo wōt iien eo iaar lo, āinwōt n̄e ekar, juon iaļ epeļļo̧k kajjuļo̧k ilo lan̄, im eaar wanlōn̄ļo̧k m̧ae an kar maat im jako, im ruum̧ eo eaar bar ro̧o̧l n̄an jekjek eo an m̧okta jān ke meram in jān lan̄ eaar jino an waļo̧k.

44 Iaar babu im ļōmņak wōt kōn jekjek in eaar bōk jikin, im kanooj bwilōn̄ kōn ta kar ba n̄an eō jān ribōktok ennaan in ekabwilōn̄lōn̄; ke, ilo ilubwiljin aō akoļmānļo̧kijeņ, iaar lo ilo iien eo wōt bwe ruum̧ eo eaar bar jino an meram, im em̧ōkaj, āinwōt n̄e ekar, ejja ribōktok ennaan in jān lan̄ wōt eaar bar pād iturin aowej eo aō.

45 Eaar jinoe, im bar kwaļo̧ki ejja lukkuun men ko me eaar kōm̧m̧ani ilo lotok eo an kein kajuon, kōn ejjeļo̧k irļo̧k; im ke eaar dedeļo̧k an kōm̧m̧ane, eaar karon̄ eō kōn ekajet ko reļļap me renaaj kar itok ioon laļ, kōn eļap lo̧urō jān n̄ūta, jāje, im nan̄inmej ko; im bwe ekajet kōmetak kein renaaj itok ioon laļ ilo epepen in. Ālikin an kwaļo̧ki men kein, eaar bar weaaklōn̄ļo̧k āinwōt an kar kōm̧m̧ane m̧oktaļo̧k.

46 Tok n̄an iien in, ekar kanooj m̧wilaļ maalkan ko likūti ilo koļmānļo̧kijeņ eo aō, jon̄an kiki eaar ko jān meja, im iaar babu n̄akļo̧kjeņ ilo bwilōn̄ kōn ta eo iaar jim̧or lo im ron̄. Innām iaar ilbōk ke bar juon alen iaar lo ejja ribōktok ennaan in wōt iturin aowej eo aō, im ron̄jake an bar kōnono im bar ba ejja men ko wōt m̧oktaļo̧k; im kobaik juon kakkōl n̄an n̄a, im ba n̄an eō bwe aSetan enaaj kajjion̄ bkapo eō (kōn wōt jekjek ko an rijeram̧ōl an baam̧le eo an jema), n̄an bōki pileij ko n̄an kōttōpar eo n̄an m̧weiie. Men in eaar kōmo̧ik eō, im ba bwe iaikuj in ejjeļo̧k bar aō kōttōpar ilo loi im bōki pileij ko a n̄an wōt kaiboojoj Anij, im iaikuj in jab bōk ājinkōj jān jabdewōt ckōttōpar ijello̧kun wōt kalōk aelōn̄ eo An; eļan̄n̄e jaab iban bōki.

47 Ālikin lotok in kein kajilu, eaar bar weaaklōn̄ļo̧k ilo lan̄ āinwōt m̧okta, im kar bar kōmake eō n̄an koļmānļo̧kijeņ kōn ruwamāejet eo an ta ij kab kar iioone; ke enan̄in iien eo wōt ālikin an ribōktok ennaan in jān lan̄ kar wanlōn̄ļo̧k jān eō iien eo kein kajilu, kako eo eaar ikkūr, im iaar lo bwe raan eaar itōn jededļo̧k, āindein bwe ekkōnono ko amro rekar bōk enan̄in aolepān bon̄ōn eo.

48 Ejjab etto iaar jerkak jān aowej eo aō, im, āinwōt ekkā aō kōm̧m̧ane, iaar etal n̄an jerbal ko reaikuj kōm̧m̧an an raan eo; a, ilo kajjion̄ in jerbal āinwōt ilo kar iien ko jet, iaar lo ke kajoor eo aō eaar kanooj ejjeļo̧k āinwōt n̄e n̄an kōm̧m̧an bwe in kanooj ban maron̄. Jema, eo ekar jerbal ippa, eaar lo bwe ewōr men eo ej jab em̧m̧an ippa, im eaar jiron̄ eō bwe in ro̧o̧l n̄an m̧weo im̧ō. Iaar jino kōn ļōmņak in n̄an etal n̄an m̧weo; a, ilo kajjion̄ in n̄an kijoone wōrwōr eo jān meļaaj eo ijo kōm ar pād ie, kajoor eo aō ekar kanooj maat jān eō, im iaar wōtlo̧k ilo ban ioon laļ, im n̄an jidik iien iaar n̄akļo̧kjeņ kōn jabdewōt.

49 Men eo m̧oktata imaron̄ kar ememeje eaar ainikien eo ej ekkōnono n̄an eō, im kūr eō kōn eta. Iaar reilōn̄ļo̧k, im lo ejja ribōktok ennaan in wōt ej jutak ilōn̄ ioon bōra, em̧ōj jepooļe kōn meram āinwōt m̧okta. Innām eaar bar juon alen kwaļo̧k n̄an eō aolep men ko eaar ekkōnono n̄an eō bon̄ōn inne, im jiron̄ eō n̄an etal ippān ajema im ba n̄an e kōn visōn eo im kien ko me iaar bōki.

50 Iaar pokake; iaar ro̧o̧lļo̧k n̄an jema ilo jikin kallib eo, im tipdiki n̄an e aolepān men kein. Eaar uwaake eō bwe men in ekar jān Anij, im ba n̄an eō bwe in etal im kōm̧m̧an āinwōt kar jiron̄ eo jān ribōktok ennaan eo. Iaar likūti jikin kallib eo, im iaar etal n̄an jikin eo me ribōktok ennaan eo eaar ba n̄an eō bwe kar doori pileij ko; im jān wōt alikkar in visōn eo me iaar lo kake ijo, iaar jeļā ke jikin eo in iien eo wōt iaar tōprakļo̧k ijo.

51 Epaakeļo̧k jikin in edik Manchester, Ontario kounty, New York, ej jutak juon abat ebwe jon̄an, im ej make wōt utiej jān ko jet ipeļaakin ijin. Iturilik in bat in, ejjab ettoļo̧k jān jeban, ium̧win juon dekā ebwe jon̄an, ekar pād pileij ko, doori ilo juon bo̧o̧k dekā. Dekā in eaar mijel im doulul ilo ioļapļap in ilo tulōn̄, im māniļo̧k n̄an tōrerein, ekōm̧m̧an bwe ioļapļap in en alikkar ioon bwidej, a tōrerein aolep ipeļaakin rekar libobo kōn bwidej.

52 Ālikin aō kar kōm̧akūt bwidej eo, iaar bōke juon lakilulu, eo iaar katōtļo̧k ium̧win tōrerein dekā eo, im kōn jidik kōļo iaar kotak e. Iaar reilo̧k n̄an ilowaan, im ijo lukkuun m̧ool iaar lo apileij ko, bUrim im Tumim eo, im cdipil eo, āinwōt ribōktok ennaan eo eaar ba. Bo̧o̧k in me rekar babu ilowaan eaar ejaak jān kōbabuik dekā ko ippān doon ilo jet jekjekin jimāāņ. Ilo kapin bo̧o̧k eo kar kōbabuik ruo dekā rej ettōr ijelmāne bo̧o̧k eo, im ioon dekā kein ej babu pileij ko im men ko bar jet ippāer.

53 Iaar kajjion̄ in kwaļo̧ki tok, a kar kōmo̧ik eō jān ribōktok ennaan eo, im kar bar karon̄ eō bwe iien eo n̄an kwaļo̧ki tok ejjan̄in kar jejjet, im bwe eban kar, m̧ae emān iiō jān iien eo; a eaar jiron̄ eō bwe in itok n̄an jikin in jejjet in wōt juon iiō jān iien eo, im bwe enaaj kar pād ijo n̄an iioone eō, im bwe in wōnm̧aanļo̧k im kōm̧m̧an āinwōt m̧ae iien eo ej itok n̄an bōk pileij ko.

54 Ekkar n̄an men in, āinwōt kar jiron̄ eō, iaar etal ilo jem̧ļo̧k in kajjojo iiō, im ilo kajjojo iien iaar lo ejja ribōktok ennaan eo wōt ijo, im bōk naan in tōl im jeļāļo̧kjeņ jān e ilo kajjojo iien ekkōnono ko amro, im ikijjien wōt ta eo Irooj ekar itōn kōm̧m̧ane, im wāween im ilo jekjek ōt naaj tōl aaelōn̄ eo An ilo raan ko āliktata.

Josep Smith ej m̧areik Emma Hale—Ej bōk pileij gold ko jān Moronai im ukōt jet ian jeje ko—Martin Harris ej kwaļo̧ki jeje ko im ukok eo n̄an Professor Anthon, eo ej ba, “Ij jab maron̄ kōnono jān juon bok em̧ōj sili.” (Eoon kein 55–65).

55 Āinwōt jekjek ko ilo laļ in an jema rekar kanooj in jejjo, kōm ar pād ium̧win mennin aikuj in n̄an jerbal kōn pā ko peim, kōļļā wōt jān jerbal ko am kajjojo raan im ko jet, āinwōt am maron̄ bōk iaļan jerbal. Jet iien ilo m̧weo im̧ōm, im jet iien ijoko jet, im jān wōnm̧aanļo̧k wōt ilo jerbal kar maron̄ in kakke aikuj ko am.

56 Ilo iiō eo 1823 baam̧le eo an jema eaar ioon juon en̄taan jān mej eo an ļeo jeiū, aAlvin. Ilo allōn̄ in Oktoba, 1825, iaar jerbal n̄an juon em̧m̧aan erūtto kar etan Josaia Stoal, eo eaar jokwe ilo Chenango kounty, Bukwōn in New York. Eaar ron̄ jet ennaan kōn juon silver mine eo riSpain ro ilo Harmony, Susquehanna kounty, Bukwōn in Pennsylvania, rekar kōpeļļo̧ke; im ekar, m̧oktaļo̧k jān an kōjerbale eō, kōb, bwe en, eļan̄n̄e emaron̄, lo mine eo. Ālikin aō kar etal im jokwe ippān, eaar bōke eō, ippān aolep rijerbal ro an, n̄an kūbwiji silver mine eo, ijo me iaar wōnm̧aanļo̧k wōt im jerbal ie enan̄in juon allōn̄, ilo ejjeļo̧k tōprak in jibadbad eo am, im āliktata iaar karreel būruōn ļōļļap em̧m̧anm̧ōn in n̄an kabbōjrak kōb ālikin e. En̄in ej jerkaktok in bwebwenato eo ebun̄bun̄ kōn aō juon rikōb m̧ani.

57 Ilo iien eo iaar pād ilo jerbal eo, kar leļo̧k eō bwe in jokwe ippān ļein Mr. Aisak Hale, jān jikin eo; ekar ilo jikin in iaar lo alen kein kajuon lio pālleō (kōrā eo nejin), aEmma Hale. Ilo 18 raan in Jānwōde, 1827, kōmro ar m̧are, ke iaar jerbal wōt ilo jerbal eo an Mr. Stoal.

58 Jān wōt aō wōnm̧aanļo̧k im pen ke iaar lo juon visōn, amatōrtōr ekar ļoore wōt eō, im baam̧le eo an ļeo jemān kōrā eo pālleō rekar kanooj jum̧ae amro kar m̧are. Iaar, kōn menin, pād ium̧win aikuj eo n̄an bōk e n̄an bar ijoko jet; āindein kōmro ar etal im kar m̧are ilo m̧weo im̧ōn Squire Tarbill, ilo South Bainbridge, Chenango kounty, New York. Iien eo wōt ālikin m̧are eo aō, iaar likūt m̧weo im̧ōn Mr. Stoal, im etal n̄an m̧weo im̧ōn jema, im kallib ippān ilo tōre eo.

59 Āliktata iien eo eaar jejjet n̄an būki pileij ko, Urim im Tumim eo, im dipil eo. Ilo raan eo kein karon̄oulruo in Jebtōmba, juon to̧ujin ruwalitōkbukwi im ron̄ouljiljilimjuon, ālikin ilo̧k āinwōt iien ko m̧okta kajjojo jem̧ļo̧kin juon iiō n̄an ijo kar likūti ie, ejja rilotok in wōt jān lan̄ eaar litoki n̄an peiū kōn kakkōl in: Bwe ij aikuj bōk eddoier; bwe eļan̄n̄e inaaj kōtļo̧ki ilo ejjeļo̧k kōjparok, ak kōn aō ajerwaan, naaj bukweļo̧k eō; a bwe eļan̄n̄e inaaj kōjerbal aolep aō maron̄ n̄an bkōjparoki, m̧ae iien e, rilotok eo, enaaj kūr n̄ani, en aikuj tiljek aer pād.

60 Ejjab etto iaar jeļā un eo etke iaar bōk kakkōl in epen n̄an oņaaki, im etke rilotok in eaar ba bwe n̄e inaaj kōm̧m̧ane ta eo aikuji jān peiū, enaaj kūr n̄an eō. Bwe ejjab to jān ke naan eo ajeeded ke repād ippa, kijejeto ko reļļaptata kar kōjerbali n̄an būki jān eō. Jabdewōt kōttōbalbal kar maron̄ ļōmņake ekar n̄an jibadbad in. Matōrtōr eo eaar meo̧ļo̧k im kajoorļo̧k jān m̧okta, im jarlepju ko raar jab jem̧ļo̧k kairuj er n̄an būki jān eō n̄e remaron̄. Ak kōn jeļāļo̧kjeņ an Anij, raar pād wōt ilo oņaake eo ilo peiū, m̧ae iien eo iaar kōtōprake kaki ta eo kar aikuji jān peiū. Ke, ekkar n̄an karōk ko, rilotok eo eaar bar kūr n̄an eō, iaar liļo̧ki n̄an e; im repād ippān ilo kōjparok eo an n̄an rainin, ej ruo raan in Māe, juon to̧ujin ruwalitōkbukwi im jiln̄uulruwalitōk.

61 Ijoke, lim̧otak eo, eaar wōnm̧aanļo̧k wōt, im ruruwe kōn lo ko to̧ujin an eaar jerbale aolep iien ilo kajeeded riab ko kōn baam̧le eo an jema, im kōn n̄a. Eļan̄n̄e inaaj kar kwaļo̧k juon m̧ōttan to̧ujin in m̧ōttaer, enaaj kar koobrak elōn̄ bok ko. Ijoke, matōrtōr eo, ekar lukkuun pen delm̧ae jon̄an ikar aikuj in likūti Manchester, im etal ippān kōrā eo pālleō n̄an Susquehanna kounty, ilo Bukwōn in Pennsylvania. Ke kōm ar kōppojak in jinoe—kōm ar kanooj jeram̧ōl, im matōrtōr eo eaar kanooj eddo ioom ejjeļo̧k bar juon jekjek kōm naaj kar pād ie ijello̧kun—ilubwiljin en̄taan ko am kōm ar lo juon jeram̧ ilo juon em̧m̧aan em̧m̧anmōn etan aMartin Harris, eo eaar itok n̄an ippām im letok n̄an n̄a lemn̄oul taļa n̄an jipan̄ kōm ilo ito-itak in am. Mr. Harris eaar juon rijokwe ilo Palmyra township, Wayne kounty, ilo Bukwōn in New York, im juon rikallib eļap kautieje.

62 Jān wōt jipan̄ in ejejjet iien an itok iaar maron̄ tōpar jikin eo iaar jibadekļo̧k ilo Pennsylvania; im iien eo wōt ālikin aō tōprakļo̧k ijo iaar jino copy jeje ko jān pileij ko. Iaar copy jon̄an oran eo ebwe an ļap jāni, im jān jipan̄ ko an aUrim im Tumim eo iaar ukōte jet iaer, ko iaar kōm̧m̧ani ikōtaan iien eo iaar tōprakļo̧k jān m̧weo im̧ōn ļeo jemān kōrā eo pālleō, ilo allōn̄ in Tijem̧ba, im Pāpode eo ej itok.

63 Juon iien ilo allōn̄ in Pāpode in, Mr. Martin Harris eo kar ba kake im̧aanļo̧k eaar itok n̄an ijo jikūm̧, bōki jeje ko me iaar maleni jān pileij ko, im jino etal kaki n̄an jikin kwelo̧k New York. Kōn ta ekar bōk jikin ikijjien e im jeje kein, ij etal n̄an bwebwenato eo an make kōn jekjek kein, āinwōt an kar tipdiki tok n̄an eō ālikin an kar ro̧o̧ltok, eo ej ellaajrak āinwōt in:

64 “Iaar etal n̄an jikin kwelo̧k New York, im jakim̧aanļo̧k jeje ko me ekar m̧ōj ukōti, ippān ukok eo aer, n̄an Professor Charles Anthon, juon em̧m̧aan em̧m̧anmōn eo kar nebare kōn tōprak ko an ilo kajin. Professor Anthon eaar kwaļo̧k bwe ukok eo ekar jim̧we, eļapļo̧k jān jabdewōt eaar loe m̧okta jān kajin Ijipt. Innām iaar kwaļo̧k n̄an e jeje ko me rejjan̄in kar ukok, im eaar ba bwe rej kajin Ijipt, Kaldia, Assiria, im Arab; im eaar bwe rej lukkuun m̧ool in jeje ko. Eaar letok n̄an n̄a juon peba in kam̧ool, eo ej kam̧ool n̄an armej in Palmyra bwe rekar m̧ool jeje kein, im bwe ukok eo aer āinwōt kar ukōte ekar barāinwōt jim̧we. Iaar bōke peba in kam̧ool in im likūti ilo bōjo̧ eo aō, im iaar itok etal jān m̧weo, ke Mr. Anthon eaar bar kūrļo̧k eō, im kajjitōk ippān ekōjkan an likao eo edik kar lo ke ewōr pileij gold ko ilo jikin eo im eaar lo er ie. Iaar uwaake bwe juon enjeļ an Anij eaar kwaļo̧kļo̧ki n̄an e.

65 “Innām e eaar ba n̄an n̄a, ‘In lale m̧ōk peba in kam̧ool ne.’ N̄a iaar bōk e jān bōjo̧ eo aō āinwōt an ba im leļo̧k e n̄an e, eaar bōk e im kekōl e bwe en tipdikdik, im ba bwe ekar ejjeļo̧k men rot in lotok an aenjeļ raņ kiiō, im bwe eļan̄n̄e inaaj kar bōkitok pileij ko n̄an e enaaj kar ukōti. Iaar karon̄ e bwe m̧ōttan pileij ko ekar bsil, im bwe kar kōmo̧ik aō bōki. Eaar uwaak, ‘Ij jab maron̄ kōnono jān juon bok em̧ōj sili.’ Iaar likūt e im etal n̄an ippān Dr. Mitchell, eo eaar kapen men ta eo Professor Anthon eaar ba ikijjien jim̧or jeje kein im ukok eo.”

· · · · · · ·

Oliver Cowdery eaar jerbal āinwōt juon rijeje ilo ukok eo an Bok in Mormon—Josep im Oliver rej bōk Priesthood eo an Aron jān Jon Peptaij—Erro ej peptaij, ekkapit, im bōk jitōbōn kanaan. (Eoon kein 66–75.)

66 Ilo ļalem raan in Eprōļ, 1829, aOliver Cowdery eaar itok n̄an m̧weo im̧ō, m̧ae iien eo ijjan̄in kar lo e. Eaar ba n̄an eō bwe kōnke ekar rikaki ilo jikuuļ ilo jukjukin pād eo ijo jema eaar jokwe ie, im jema kōnke eaar juon ian ro kar jilkinļo̧k n̄an jikuuļ eo, eaar ilo̧k im jokwe ium̧win jidik iien ilo m̧weo im̧ōn, im ke eaar pād ijo baam̧le eo eaar ekkōnono n̄an e kōn jekjek ko in aō kar bōki pileij ko, im āindein eaar itok n̄an kajjitōk kake eō.

67 Ruo raan ālikin tōpraktok eo an Mr. Cowdery (im ekar 7 raan in Eprōļ) iaar jino ukōte Bok in Mormon, im eaar jino jeje n̄an eō.

· · · · · · ·

68 Kōmro ar wōnm̧aanļo̧k wōt kōn jerbal in ukok eo, ke, ilo allōn̄ eo tokālik (Māe, 1829), kōmro ilo juon raan kar etal ilo bukun wōjke ko n̄an jar im kajjitōk ippān Irooj ikijjien apeptaij n̄an bjeorļo̧k in jero̧wiwi ko, bwe kōmro ar lo kar ba kake ilo ukok eo an pileij ko. Ke kōmro ar āindein m̧adjake, jar im kūr ioon Irooj, juon cribōktok ennaan jān lan̄ eaar wanlaļtak ilo juon dkōdo̧ in meram, im ālikin an kar likūt pā ko epein ioon bōramro, eaar fkapit kōmro, im ba:

69 Ioomiro ro rikarejera, ilo etan Messaia Ij likūt aPriesthood eo an Aron, eo ej kabwijer ki ko an kōjeraam̧m̧an ko an enjeļ raņ, im an gospel in ukeļo̧k eo, im an peptaij jān tulo̧k n̄an jeorļo̧k jero̧wiwi ko; im men in naaj jamin bar bōke jān laļ, m̧ae em̧m̧aan ro nejin bLivai rej bar katok juon katok n̄an Irooj ilo jim̧we.

70 Eaar ba bwe Priesthood in an Aron eaar ejjeļo̧k an kajoor n̄an likūt pā ko n̄an mennin aletok eo an Jetōb Kwōjarjar, a bwe naaj likūti ioomro tokālik; im eaar jiron̄ kōmro n̄an etal im peptaij, im kar letok n̄an kōmro naan in tōl ko bwe in peptaiji Oliver Cowdery, im bwe ālikin e en peptaiji eō.

71 Āindein kōmro ar etal im kar peptaij. Iaar peptaiji e m̧okta, im tokālik eaar peptaiji eō—ālikin iaar likūt pā ko peiū ioon bōran im kapit e n̄an Priesthood eo an Aron, im tokālik eaar likūt pā ko pein ioō im kapit eō n̄an ejja Priesthood in wōt—bwe āindein kar jiron̄ kōm.*

72 Ribōktok ennaan eo eaar lotok kōmro ilo iien jab in im likūt Priesthood eo ioomro, eaar ba bwe etan eaar Jon, ejja eo wōt im kar ņa etan aJon Peptaij ilo Kallim̧ur Ekāāl, im bwe eaar m̧akūtkūt ium̧win tōl an bPiter, cJemes im dJon, ro rekar kabwijer eki ko an Priesthood eo an fMelkizedek, Priesthood eo, eaar ba, enaaj ilo iien eo ekkar likūti ioomro, im bwe naaj kūr eō gElder eo kein kajuon an Kabun̄ eo, im e (Oliver Cowdery) eo kein karuo. Ekar ilo raan eo kein kajon̄oulļalem in Māe, 1829, ke kōmro ar ekkapit ium̧win pein ribōktok ennaan in, im kar peptaij.

73 Iien eo wōt ke kōmro ar wanlōn̄tak jān dān eo ālikin amro kar peptaij, kōmro ar iiooni kōjeraam̧m̧an ko reļļap im reaiboojoj jān Jemām Ilan̄. Ejjab etto jān aō kar peptaiji Oliver Cowdery, ke aJetōb Kwōjarjar ar wōtlo̧k ioon, im eaar jutaklōn̄ļo̧k im bkanaan elōn̄ men ko me ejjab to reaikuj kar kūrm̧ool. Im bar juon alen, āindein ālikin wōt aō kar peptaij jān e, iaar barāinwōt bōk jitōbōn kanaan, ke, jutaklōn̄ļo̧k, iaar kanaan kōn jerkaktok eo an Kabun̄ in, im elōn̄ men ko ekkejeltok ippān Kabun̄ in, im epepen in an ro nejin armej raņ. Kōmro ar obrak kōn Jetōb Kwōjarjar, im kar m̧ōņōņō ilo Anij in am lo̧mo̧o̧r.

74 Ļōmņak ko amro kiiō kōnke rekar meramļo̧k, kōmro ar jino lo jeje ko rekwōjarjar repeļļo̧k n̄an ameļeļe ko amro, im meļeļe im jibadbad ko brem̧ool in eoon ko eļapļo̧k mennin ittino ko ie kar kwaļo̧kitok n̄an kōmro ilo jekjek im me kōmro jan̄in kar tōpare m̧oktaļo̧k, im jan̄in kar ļōmņak kake m̧oktaļo̧k. Ilo iien eo ālikin kar kipel kōmro n̄an dāpij ilo ittino jekjek ko in amro kar bōke Priesthood eo im amro kar peptaij, kōn wōt jitōbōn matōrtōr eo me ekar make alikkar kadede ilo jukjukin pād eo.

75 Em̧ōj kar kaammijak kōm kōn ko̧kkure an jar ko, jān iien n̄an iien, im men in, barāinwōt, jān ritōmak ro an kabun̄. Im kōttōpar ko aer n̄an ko̧kkure kōm kar wōt jum̧ae jān jelōt eo an baam̧le eo an jemān kōrā eo pālleō (ium̧win tōl jān Lan̄), ro rekar oktak im jouj n̄an eō, im ro rekar jum̧ae jar ko, im kar m̧ōņōņō bwe in maron̄ rōļo̧k n̄an wōnm̧aanļo̧k wōt ilo jerbal in ukok eo ilo ejjeļo̧k mennin kabbōjrak; im kōn menin rekar ajetok im kallim̧uri kōm oņaake jān aolep em̧m̧akūt kein rerupe kakien, toun wōt aer maron̄.

  • Oliver Cowdery eaar kōmmeļeļeik men kein raar waļo̧k āindein: “Erkein kar raan ko iban meļo̧kļo̧ki—n̄an jijet n̄irļo̧k in ainikien kōnono jān tōl an lan̄, ekaruj kam̧m̧oolol eo eļaptata ilo buruō! Raan n̄an raan iaar wōnm̧aanļo̧k, ilo ejjeļo̧k kabbōjrak, n̄an jeje jān lo̧n̄iin, āinwōt an ukok kōn Urim im Tumim eo, ak, āinwōt an riNipai ro ba, ‘Kein Ukok ko,’ bwebwenato eo ak ļo̧o̧k eo ņa etan ‘Bok in Mormon.’

    “N̄an kile, em̧ool ilo jet wōt naan ko, bwebwenato eo ekāitoktok-limo letok jān Mormon im ļeo nejin etiljek, Moronai, kōn juon armej juon iien kar jitōnbōro im utiej ippān lan̄, enaaj ļapļo̧k jān karōk ko aō; kōn menin inaaj doore men in n̄an juon iien ilju im jekļaj, im, āinwōt iaar ba ilo kadkad eo, naaj jeje wōt kōn jet wōt men ko rej ekkejeltok ippān jerkaktok eo an Kabun̄ in, ko remaron̄ kāitoktok-limo n̄an jet to̧ujin ko rekar kaalikkar er, ilubwiljin kōrraat ko im etao ko im m̧oņ ko an rietao, im atbo̧kwōje Gospel eo an Kraist.

    “Ejjeļo̧k armej, ilo koļmānļo̧kijeņ ko aer realikkar, remaron̄ kar ukōte im je naan in tōl ko kar liļo̧ki n̄an riNipai ro jān lo̧n̄iin Rilo̧mo̧o̧r, kōn lukkuun jekjek eo me armej rej aikuj kalōkļo̧k Kabun̄ eo An, im eļaptata ke ankeke ekar kajeeded juon jako in kōjatdikdik ioon aolep ļamļam ko im jekjek ko imminene kaki ilubwiljin armej raņ, kōn ejjeļo̧k ikdeelel juon utiej in kwaļo̧k em̧ōņōņō in bōro jān kallib ilo lōb in dān, n̄an uwaake ‘bōklōkōt em̧m̧an jān jerkakpeje eo an Jisōs Kraist.’

    “Ālikin jeje bwebwenato eo kar letok kōn jerbal eo an Rilo̧mo̧o̧r n̄an m̧ōttan eo an ro ineen Jekab, ioon kontinent in, ekar pidodo n̄an loe, āinwōt rikanaan eo eaar ba bwe enaaj kar āinwōt, bwe marok jilōn̄lōn̄ eaar kalbubu laļ im marok jilōn̄lōn̄ ekanooj nana ilo ļōmņak ko an armej. Ilo eļapļo̧k kejakļo̧kjeņ ekar n̄an aer lo kōm ioļapļap in eļap en̄taan im eļap lam̧ōj kōn kabun̄, ejjeļo̧k kōmaron̄ jān Anij n̄an kōm̧akūtkūti kain̄i ko an Gospel in. Bwe kajjitōk in maron̄ in kwaļo̧ke, ewōr ke an armej raņ maron̄ n̄an em̧m̧akūtkūt ilo etan Kraist, ro rej kariab revelesōn ko, ke kam̧ool eo An ej jab āinjuon jān jitōbōn kanaan, im kabun̄ eo An ekar pedped ioon, ekkal, im kar rejetake jān revelesōn ko kiiō, ilo aolep epepen ko an laļ ke E eaar wōr an armej ioon laļ? Eļan̄n̄e m̧ool kein em̧ōj kar kalbwini, im kanooj ņooji jān armej ro kōttōbalbal ko aer renaaj kar pād ilo kauwōtata eļan̄n̄e kar kōmālim aer romaakļo̧k ilo im̧aan mejān armej raņ, rekar jab ņojak ļo̧k wōt kōm; im kōm ar kōttar wōt n̄an letok eo an kien eo ‘Kom̧in jerkak im peptaij.’

    “En̄in ekar jab ikdeelel eo etto jan̄nuwaade m̧okta jān an kar jejjet kūtien. Irooj, eo em̧weiie ilo tūriam̧o, im em̧ōņōņō iien otemjej n̄an uwaake jar eo ej jab jokwōd an eo ettā, ālikin am kar kūr n̄an E ilo juon jekjekin owar, jekadļo̧k jān jikin ko an armej raņ, Eaar wanlaļļo̧k n̄an kaalikkar n̄an kōj Ankilaan. Ilo jidimkij, āinwōt jān ilubwiljin indeeo, ainikien Ripinmuur ekar kōnono aenōm̧m̧an n̄an kōj, ke rōn̄el nuknuk eo eaar jepelļo̧k im enjeļ eo an Anij eaar wanlaļtak im nuknuk kōn aiboojoj, im bōktok ennaan eo kar reim̧aanļo̧k im jan̄nuwaade, im ki ko an Gospel in ukeļo̧k eo. Ta lan̄lōn̄ eo! ta kabwilōn̄lōn̄ eo! ta n̄akļo̧kjeņ eo! Ke laļ ekar poktak im m̧ad—ke milien ko rekar etto̧ļ āinwōt ripilo kōn wōrwōr eo, im ke aolep armej raņ rekar pedped ioon jab lōke, āinwōt juon jarlepju eļap, mājāmro rekar lo, lo̧jiln̄ōmro rekar ron̄, āinwōt ilo ‘bwiltōn̄tōn̄ in raan’; aaet, eļapļo̧k—ilōn̄in tam̧tam̧ in ko in aļ ilo Māe, eo ekar jojān ejjatōltōl eo an ioon mejān peļaak eo! Innām ainikien, men̄e emera, eaar wākare n̄an lukkuun lowatata, im naan ko an, ‘N̄aij rikarejeran ippemi,’ eaar joļo̧k mijak otemjeļo̧k. Kōm ar ron̄jake, kōm ar kalimjeke, kōm ar nebare! Ekar ainikien juon enjeļ jān aiboojoj, ekar juon ennaan jān eo Eutiej Tata! Im ke kōm ar ron̄ kōm ar lan̄lōn̄, ke An iakwe eaar kōmāāņāņ jetōb ko amro, im kar kūtimi kōmro ilo visōn eo an eo Ekajoor Bōtata! Ia eo ekar wōr jikin n̄an pere ie? Ejjeļo̧k; jab lōke eaar ko, pere eaar rum̧ļo̧k im jab bar wanlōn̄tak, ke ino̧n̄ im m̧oņ rekar jako indeeo!

    “A, jeiū im jatū jitōnbōro, ļōmņak, ļōmņak ļo̧k kōn jidik iien, ta lan̄lōn̄ eo eaar koobrak būruōmro, im kōn ta ilbōk eo kōmro ar aikuj bun̄badik, (bwe wōn ej jamin kar kabukwelōlō bukien n̄an kōjeraam̧m̧an rot in?) ke kōmro ar bōk ium̧win pein Priesthood eo Ekwōjarjar ke eaar ba, ‘Ioomiro ro rikarejera, ilo etan Messaia, ij likūt Priesthood in im maron̄ in, eo enaaj pād ioon laļ, bwe Ļōm̧aro nejin Livai ren maron̄ katok juon katok n̄an Irooj im jim̧we!’

    “Iban kajjion̄ in itōn kōmmeļeļeik n̄an kom̧ en̄jake ko an buruō, im jab bwiltōn̄tōn̄ in wōj im aiboojoj eo me eaar jepooļe kōmro ilo iien in; a kwōnaaj tōmak eō n̄e ij ba, bwe laļ, im jab armej ro ie, ippān wājepdik eo an ālikin iien, eban jino in kanuknuk kajin ilo juon jekjek eo ekāitoktok-limo im elo̧udin̄din̄ āinwōt armej in ekwōjarjar. Jaab; im ejjeļo̧k an laļ kajoor n̄an letok lan̄lōn̄ eo, n̄an likūt aenōm̧m̧an eo, ak meļeļe mālōtlōt eo me ekar pād ilo kajjojo jāntōj āinwōt aer kar tipdiki jān kajoor eo an Jetōb Kwōjarjar! Armej emaron̄ m̧oņe ro m̧ōttan, m̧oņ emaron̄ ļoore m̧oņ, im ro nejin eo enana emaron̄ wōr an kajoor n̄an karreel ribwebwe im ro kar jab katakin er, m̧ae ejjeļo̧k ak ino̧n̄ rej naajdik elōn̄, im leen riab ej bōk ilo ņoōn m̧ōņōņō waan n̄an lōb; a juon un̄ūr jān akkiin pā in iakwe eo an, aaet, juon ko in aiboojoj jān laļ eo ilōn̄ļo̧k, ak juon naan jān lo̧n̄iin Rilo̧mo̧o̧r eo, jān ubōn indeeo, ej m̧anļo̧k aolepān n̄an ejjeļo̧k tokjān, im bukweļo̧k e indeeo jān ļōmņak. Kapen eo bwe jekar pād ilo im̧aan mejān juon enjeļ, bab-laļ eo bwe kōmro ar ron̄ ainikien Jisōs, im m̧ool eo ejjeļo̧k kabodān ie ke eaar itok jān juon eo erreo, kōnono jān ankilaan Anij, ej n̄an n̄a eļļā jān kōmmeļeļe, im inaaj aolep iien mejōk men in ej kaalikkar em̧m̧an eo an Rilo̧mo̧o̧r kōn bwilōn̄ im kam̧m̧oolol ilo iien in kōtļo̧k n̄an eō bwe in pād wōt; im ilo im̧ōn irooj ko ijo weeppān ej jokwe im jero̧wiwi ejamin itok, ij kōjatdikdik n̄an wūjtak ilo raan eo me ej jamin bōjrak.”—Messenger and Advocate, vol. 1 (Oktoba 1834), pp. 14–16.