O Faamatalaga mai le Talafaasolopito o Iosefa Samita, le Perofeta
History of the Church, Voluma 1, Mataupu 1 e oo i le 5

Ua faamatala mai e Iosefa Samita e uiga i ona tuaa, tagata o lona aiga, ma mea sa latou nonofo ai i le amataga—Se vavaō tulaga ese sa i ai e uiga i mea tau lotu i Niu Ioka i sisifo—Ua filifili o ia e saili le poto e pei ona faatonu mai e Iakopo—Ua afifio mai le Tamā ma le Alo, ma ua valaaulia Iosefa i lana auaunaga faaperofeta. (Fuaiupu 1–20.)

 Ona o le tele o tala ua faasalalauina e tagata loto leaga ma fai togafiti, e faatatau i le atulai mai ma le alualu i luma O Le eEkalesia a Iesu Keriso o le Au Paia o Aso e Gata Ai, o ia tala uma ua fuafua e tagata na faia e tau faasaga ai i lona taʼuleleia o se Ekalesia ma lona alualu i luma i le lalolagi—o lea ua uunaʼia ai aʼu e tusia lenei talafaasolopito, e faasaʼo ai mafaufau o tagata lautele, ma tuu atu ai i tagata sailiili uma le mea moni ia maua tala saʼo, e pei ona tutupu mai, e faatatau uma ia te aʼu ma le Ekalesia, e pei ona i ai ia te aʼu le tonu o ia mea.

 I lenei talafaasolopito o le a ou tuu atu ai mea eseese na tutupu e faatatau i lenei Ekalesia, i le moni ma le amiotonu, e pei ona tutupu mai, pe e pei ona i ai nei, i le tausaga lenei lona valu [1838] talu le afaatulagaina o le Ekalesia ua taʼua.

 Na aou fanau i le tausaga o lo tatou Alii e tasi le afe valu selau ma le lima, i le aso luasefulu-tolu o Tesema, i le nuu o Sarona, i le itumalo o Uinisoa, i le Setete o Veromota. … Sa tuua e loʼu tamā, o eIosefa Samita, Matua, le Setete o Veromota, ma sii atu i Palamaira, i le itumalo o Onatario (ua taʼua nei o Ueine), i le Setete o Niu Ioka, ina ua sefulu oʼu tausaga, po o se mea latalata i lena. Pe tusa o le fa tausaga talu ona taunuu loʼu tamā i Palamaira, na sii atu ai o ia ma lona aiga i Manaseta i le itumalo lava lea o Onatario—

 Sa i ai i lona aiga ni tagata e toasefulutasi, o igoa, o loʼu tamā, o aIosefa Samita; loʼu etinā, o Lusi Samita (o lona igoa faaiu, ae lei faaipoipo o ia, o Maki, o le afafine o Solomon Maki); oʼu uso, o iAlevini (o lē na maliu ia Novema 19, 1823, i le tausaga e 26 o lona matua), o oAilama, o aʼu, uSamuel Harrison, Viliamu, Don Carlos; ma oʼu tuafafine o Sophronia, Katerina, ma Lusi.

 I se taimi i le lona lua o tausaga ina ua mavae lo matou o atu i Manaseta, sa i ai i le nofoaga i le mea na matou nonofo ai se vavaō tulaga ese e uiga i le mataupu tau lotu. Sa amata i le Metotisi, ae sa vave ona sosolo atu i totonu o ituaiga uma o lotu i le itulagi lena o le atunuu. E moni, sa foliga mai ua aafia ai le itu atoa o le atunuu, ma sa faapotopoto faatasi tagata e toatele i latou lava au lotu eseese, lea e le o se vevesi ma se fevaevaeaiga itiiti na tupu mai ai i totonu o tagata, sa alalaga ni isi, a“Faauta, o iinei!” ma o isi, “Faauta, o iina!” O ni isi sa finau mo le faatuatuaga Metotisi, o ni isi mo le Peresipeteriana, ma isi mo le lotu Papatiso.

 Ona, e ui i le alofa tele sa taʼua e tagata liliu i ia faatuatuaga eseese i le taimi o lo latou liliu atu, ma le sogasoga tele sa faaalia e faifeau eseese, o e sa toaaga e tutulai ma faalauteleina lenei vaaiga uiga ese o lagona faalelotu, ina ia faaliliu mai tagata uma, e pei ona sa latou fiafia e taʼu ai lena mea, e tuu i latou po o le a le ituaiga e fia auai; ae ina ua amata ona o atu o tagata liliu, o ni isi i se tasi vaega ma ni isi i se tasi, sa foliga mai o lagona lelei o faifeau atoa ma tagata liliu mai sa tele atu ona faatagafai nai lo le moni; ona oʼo ma i lea se tulaga o se faanunununu tele ma le loto leaga—ua finau lea faifeau e faasaga i lea faifeau, ma lea tagata liliu e faasaga i lea tagata liliu mai; sa oo ina o latou lagona lelei uma o le tasi mo le isi, pe afai sa i ai ia i latou ni lagona lelei, sa mou ese atoa i se afeupuaʼiga ma se finauga e uiga i manatu.

 O le taimi lea ua savali ai le sefululima o oʼu tausaga. Sa talai mai le faatuatuaga Peresipeteriana i le aiga o loʼu tama, ma e toafa i latou na auai i le ekalesia lena, o o latou igoa, o loʼu tinā, o Lucy; o oʼu uso o Ailama ma Samuelu Haresoni; ma loʼu tuafafine o Sophronia.

 I le gasologa o lea taimi o le vavaō tele sa faaosoina ai loʼu mafaufau e manatunatu mamafa ma le mautonu tele; ae e ui ina sa loloto oʼu mafaufauga ma malosi i le tele o taimi, ae sa ou le auai lava i se tasi o ia vaega uma, e ui ina sa ou auai i a latou faatasiga eseese i le tele o taimi sa mafai ai. Aʼo solo le taimi sa oo ina tau faapito teisi loʼu mafaufau i le lotu Metotisi, ma sa ou lagona se manao e auai faatasi ma i latou; peitai sa matua tele naʼuā le faanunununu ma le fefinauai i totonu o lotu eseese, sa le mafai e se tagata talavou e pei ona sa ou i ai, ma le lē masani tele i tagata ma mea, ona maua se faaiuga mautinoa po o ai ua saʼo ma o ai foi ua sese.

 Sa faaosoina tele loʼu mafaufau i lea taimi ma lea taimi, ona sa matua tele lava ma le le mataofia le alaga ma le vevesi. Sa malosi tele le au Peresipeteriana e faasaga i le au Papatiso ma le au Metotisi, ma sa latou faaaoga mana uma o le faalemafaufau ma faafilosifia e faamaonia ai o latou sese, pe ina ia, uunaia ai tagata ia manatu ua sese i latou. Ae i le isi itu, sa faapea foi ona tutusa o le sogasoga o le au Papatiso ma le au Metotisi i la latou itu pa i le taumafaiga e faamaumautu a latou lava mataupu ma taʼu sese isi uma.

 10 I le taulotoaiga o lenei taua o upu ma vevesi o taofi, sa masani ona ou fai ifo ai ia te aʼu lava ia: O le a le mea e ao ina faia? O ai o nei vaega uma ua asaʼo; pe, ua sese faatasi ea i latou uma? Afai e i ai se tasi o i latou ua saʼo, o ai lea, ma e faapefea ona ou iloaina?

 11 Aʼo ou punouaʼi i lalo o faigata tetele na mafua mai finauga a nei vaega o tapuaiga, sa ou faitauina i se tasi aso le Tusi a Iakopo, mataupu muamua ma le fuaiupu lima, e faitau faapea: Ae afai ua leai se poto i so outou, inā ole atu ia i le Atua, o lē foai tele mai i tagata uma, ma le lē toe taʼutaʼua; ona foaʼiina mai ai lea ia te ia.

 12 E leai lava se mau o tusitusiga paia na oo mai i le loto o se tagata ma le mana tele nai lo o lenei mau i loʼu loto i lea taimi. Sa foliga ua ulu mai ma se mana tele i lagona uma o loʼu loto. Sa ou mafaufau ma saga mafaufau pea i ai, i loʼu iloa afai e i ai se tagata ua ia manaomia le poto mai le Atua, o aʼu lava; ona sa ou le iloa le mea e tatau ona fai, ma e vagana ai e mafai ona ou maua o se poto atili atu nai lo lena sa i ai ia te aʼu i le taimi lena, o le a ou le iloaina lava; aua sa matua eseese lava amalamalama o faiaoga o mea tau lotu o ituaiga eseese i mau e tasi sa lepetia ai le faamoemoe atoa o le liliu atu i le eTusi Paia e tali ai le fesili.

 13 Ina ua mavae se taimi, sa oo ina ou taunuu i le faaiuga o loʼu tumau pea i le pogisa ma le fenumiai, pe ou te faia e pei ona faatonu mai e Iakopo, o lona uiga, ia ole atu i le Atua. Ina ua mavae se taimi sa ou filifili e a“ole atu i le Atua,” i le manatu ifo afai e tuu mai e ia le poto ia i latou ua leai se poto, ma foai tele mai, ma lē taʼutaʼua mai, atonu o le a ou taumafai i ai.

 14 O lea, e tusa ai ma lenei faamoemoe, laʼu filifiliga lea e ole atu ai i le Atua, sa ou alu atu ai i le togavao e faia lenei taumafaiga. O le taeao o se aso matagofie lava ma le manino, i le amataga lava o le tau totogo o le afe valu selau luasefulu na ou faia ai lenei mea. O le taimi muamua lava lea i loʼu olaga na ou faia ai se taumafaiga faapea, ona i le lotolotoi o oʼu atuatuvalega uma, sa ou lei faia lava se taumafaiga e atatalo atu ma le leo.

 15 Ina ua mavae ona ou taunuu i le mea na ou muai filifilia ou te alu atu i ai, ina ua mavae ona ou vaavaai solo faataamilo ane ia te aʼu, ma ina ua ou iloa ua nao aʼu lava, sa ou tootuli i lalo ma amata ona tuu atu manaoga o loʼu loto i le Atua. Sa lei umi lava ona ou faia faapea, ae vave loa ona taofia o aʼu e se mana sa lofitu atoa ai aʼu, ma sa i ai sona mana uiga ese i luga o aʼu sa taofia ai loʼu laulaufaiva ina ia lē mafai ona ou tautala. Sa siomia aʼu i se pouliuli mafiafia, ma sa foliga mai ia te aʼu i se taimi e peiseai ua malaia aʼu i se faafanoga faafuasei.

 16 Peitai, i le faaaogaina o loʼu malosi atoa e avalaau atu ai i le Atua e laveai aʼu mai le mana o lenei fili sa taofia aʼu, ma i le taimi tonu lava na ou sauni ai e goto atu i se tulaga e aunoa ma se faamoemoe ma tuu atu aʼu lava i le faafanoga—e lē i se malaia fai fua faalemafaufau, ae i le mana o se tagata moni lava mai le lalolagi lē vaaia, o lē sa i ai se mana ofoofogia tele faapea ou te lei faalogoina muamua lava i se tagata—i lea lava taimi o le atuatuvale tele, na ou vaaia ai se emalamalama faaniutu i luga aʼe tonu lava o loʼu ulu, ua sili atu le pupula i le ila, ua alu ifo malie lava seia oo mai i oʼu luga.

 17 Sa lei pine lava ona oo mai ae ou faalogoina ua laveaiina aʼu mai le fili na taofia aʼu. Ina ua oo mai le malamalama i oʼu luga, sa ou avaaia ni Tagata e etoalua, o lo laua pupula ma le imamalu e lē mafaamatalaina, o tutu mai i oʼu luga aʼe i le ea. Sa fetalai mai le tasi o i laua ia te aʼu, ma fofoga mai ia te aʼu i loʼu igoa ma fetalai mai, aʼo tusi ane i le tasi—O Loʼu oAtalii uPele lenei. Faalogo ia te Ia!

 18 O loʼu faamoemoe i le alu atu e aole atu i le Alii o le fia iloa lea po o le fea o nei lotu uma ua saʼo, ina ia ou iloa le lotu ou te auai. O lea, sa lei umi ona ou maua o le pule ia te aʼu, ina ia mafai ona ou tautala atu, sa ou fesili atu i Tagata o e sa tutu mai i oʼu luga i totonu o le malamalama, po o le fea o nei lotu uma ua saʼo (ona o le taimi lea sa lei oo mai lava i loʼu loto e faapea ua sese lotu uma)—ma o le fea e tatau ona ou auai.

 19 Sa tali mai ia te aʼu ia ou le auai i se tasi o i latou, aua ua asese i latou uma; ma sa fai mai le Tagata o lē na fetalai mai ia te aʼu e faapea o o latou talitonuga uma o ni mea inosia i lana silafaga; o na polofesa ua sese uma; e faapea: “ua latou efaalatalata mai ia te aʼu i o latou laugutu, a o o latou iloto ua mamao mai ia te aʼu, ua latou aʼoaʼo mo mataupu faavae opoloaiga a tagata, ua ufoliga ua faaleatua, ae ua latou teena le mana o i ai.”

 20 Sa ia toe vavao aʼu mai i le ʼauai i soo se tasi o nei lotu; ma e tele isi mea na ia fetalai mai ia te aʼu, e lē mafai ona ou tusia i le taimi nei. Ina ua ou toe malamalama, sa ou vaai ua ou taoto i loʼu tua, ma vaai i luga i le lagi. Ina ua alu ese atu le malamalama, sa leai soʼu malosi; ae e lei umi ae toe maua sina malosi, sa ou alu i le fale. Ma aʼo ou faalagolago aʼe i le taigafi, sa fesili mai loʼu tinā po o le a se mea ua tupu. Sa ou tali atu, “Aua e te popole, o loo lelei mea uma—o loo lelei lava aʼu.” Ona ou fai atu lea i loʼu tinā, “Ua ou iloa nei mo aʼu lava ia ua lē moni le lotu Peresipeteriana.” Sa foliga mai e peiseai sa iloa e le afili, i le vaitaimi muamua lava o loʼu olaga, ua tuupoina aʼu e avea ma faalavelave ma faasoesa i lona malo; a lē o lea, aisea ua aufaatasi ai mana o le pouliuli e faasaga mai ia te aʼu? Aisea ua tutupu aʼe ai le etetee ma sauaga faasaga mai ia te aʼu, toetoe lava a tupu i loʼu itiiti lava?

Ua teena e ni isi o faifeau ma polofesa o mea tau lotu le tala o le Uluai Faaaliga Vaaia—Ua faafaulai sauaga i luga o Iosefa Samita—Ua molimau o ia i le moni o le faaaliga vaaia. (Fuaiupu 21–26.)

 21 I ni nai aso itiiti ina ua mavae ona ou maua o lenei afaaaliga vaaia, sa ma faatasi ai ma se tasi o faifeau Metotisi, o lē sa malosi lava i le vavaō faalelotu sa taʼua muamua; ma, aʼo ma talanoa ma ia e uiga i le mataupu o mea tau lotu, sa ou faaaogaina, le avanoa e tuu atu ai ia te ia se tala e uiga i le faaaliga lea na ou maua. Sa ou ofo lava i lana amio; sa lē gata ina manatu faatauvaa o ia i laʼu faamatalaga, ae ma le inoino tele, ua fai mai o lea mea atoa ua mai le tiapolo, e faapea ua lē toe i ai ni mea faapea o efaaaliga vaaia po o ifaaaliga i ona po nei; e faapea o mea uma faapena sa gata i aposetolo, ma e faapea o le a lē toe i ai lava ia mea.

 22 E ui i lea, sa vave ona ou iloa, o loʼu faamatala atu o le tala sa faaosoina ai se faailoga tagata tele faasaga mai ia te aʼu i totonu o polofesa o mea tau lotu, ma sa avea ma pogai o asauaga tetele, sa faateteleina pea lava; ma e ui o aʼu o se tama e lauiloa, nao le sefulufa i le sefululima tausaga le matua, ma o oʼu tulaga i le olaga o le ituaiga e faia ai se tama e lē taulia i le lalolagi, peitai sa lava ona matau lelei e tagata tulaga maualuluga e faaoso ai mafaufau o tagata lautele e faasaga mai ia te aʼu, ma faatupu ai se sauaga tele; ma sa taatele lenei mea i totonu o ituaiga uma—sa aufaatasi uma e sauaina aʼu.

 23 O ia mea sa mafua ai ona ou mafaufau loloto ai i le taimi lena, ma i le tele o taimi talu mai ai, i le uiga ese moni lava, o le avea o se tama lē lauiloa, e sili laitiiti atu i le sefulufa tausaga le matua, ma o se tasi foi, o se sa faamalosia i le tatau ai ona maua o ni nai mea iti e ola ai i ana galuega i aso taitasi, ma se tagata sa mafaufauina ua lava lona taua e amanaia ai e tagata maualuluga o ituaiga lotu sili ona lauiloa o le taimi, ma faatupuina ai ia te i latou i se ala se agaga o le sauaga sili ona malosi ma le taufaifai. Ae e uiga ese pe leai, sa faapea lava, ma sa avea ma pogai o le faanoanoa tele ia te aʼu i le tele o taimi.

 24 E ui i lea, o se mea moni lava na ou vaai i se faaaliga vaaia. Sa ou mafaufau talu mai lena mea, pei e tai tutusa oʼu lagona ma aPaulo, i le taimi na faia ai e ia lana faamatalaga etetee i luma o le Tupu o Akeripa, ma faamatala atu le tala e uiga i le faaaliga vaaia na maua e ia i le taimi na vaai ai o ia i se malamalama, ma faalogoina se leo; ae sa toaitiiti lava e sa talitonu ia te ia; sa fai mai ni isi ua lē faamaoni o ia, o ni isi sa fai mai ua fasa o ia; ma sa tauemuina ma faifai o ia. Peitai o nei mea uma sa lē faaumatia ai le moni o lana faaaliga vaaia. Sa vaai o ia i se faaaliga vaaia, sa mautinoa e ia sa vaai i ai, ma e lē mafai e sauaga uma e i lalo ifo o le lagi ona faia i ai se isi mea; ma e tusa pe latou te sauaina ai o ia e oo i le oti, peitai sa iloa e ia, ma o le a ia iloa pea e oo lava i lana toe manava, sa vaai o ia i se malamalama ma faalogoina se leo o fetalai mai ia te ia, ma e lē mafai lava e le lalolagi atoa ona faia o ia ia manatu pe talitonu i se isi mea.

 25 Sa faapea foi ia te aʼu. Sa ou vaai moni lava i se malamalama, ma i totonu o lena malamalama na ou vaai ai i ni aTagata se toalua, ma sa laua fetalai moni mai lava ia te aʼu; ma e ui ina sa inosia ma sauaina aʼu i loʼu fai atu sa ou vaai i se faaaliga vaaia, ae ua moni; ma aʼo latou sauaina aʼu, faifai aʼu, ma tautalaina sese ituaiga uma o mea leaga e faasaga mai ia te aʼu i loʼu fai atu faapea, sa taitaiina aʼu e fai ifo i loʼu loto: Aisea ua sauaina ai aʼu i loʼu taʼu atu o le mea moni? Sa ou vaai moni lava i se faaaliga vaaia; ma o ai aʼu ou te vavao atu ai i le Atua, pe aisea ua manatu ai le lalolagi e faia ia te aʼu ia ou faafitia ai le mea na ou vaai moni lava i ai? Aua sa ou vaai i se faaaliga vaaia; sa ou mautinoa lena mea, ma sa ou mautinoa sa silafia e le Atua lena mea, ma e lē mafai ona ou efaafitia lena mea, pe ou te fiatoa e fai; sa ou iloa lava o le faia o lea mea o le a ou faatausuai ai i le Atua, ma oo ai i lalo o le tausalaga.

 26 Ua faamalieina nei loʼu mafaufau e faatatau i le lalolagi faalelotu—e lē o soʼu tiute le auai faatasi ma soo se tasi o i latou, ae ia ou tumau pea e pei ona sa ou i ai seia toe faatonuina atili. Sa ou iloa ua moni le amolimau a Iakopo—e faapea e mafai e se tagata o se ua leai se poto ona ole atu i le Atua, ma maua mai, ma le lē taʼutaʼua.

Ua oo mai Moronae ia Iosefa Samita—O le igoa o Iosefa o le a lauiloa mo le lelei ma le leaga i totonu o atunuu uma—Ua faamatala mai e Moronae ia te ia e uiga i le Tusi a Mamona ma e uiga i faamasinoga a le Alii o le a oo mai ma ua ia sii mau e tele—Ua faaali mai le mea o natia ai papatusi auro—Ua faaauau pea ona aoao e Moronae le Perofeta. (Fuaiupu 27–54.)

 27 Sa ou faaauau pea ona faia o aʼu galuega masani ai i le olaga seia oo i le aso luasefulu-tasi o Setema, tasi le afe valu selau luasefulu-tolu, aʼo ou mafatia i taimi uma i sauaga malolosi i lima o vasega eseese uma o tagata, e lolotu ma lē lolotu, aua sa ou taʼutino atu pea sa ou vaai i se faaaliga vaaia.

 28 I le va o le taimi na sosoo ane ma le va o le taimi na ou maua ai le faaaliga vaaia ma le tausaga e afe valuselau ma le luasefulu-tolu—ina ua faasaina aʼu e auai i soo se ituaiga o lotu o le vaitaimi, ma ona sa ou itiiti lava i tausaga, ma sa sauaina e i latou o e sa tatau ona avea ma aʼu uo ma agalelei mai ia te aʼu, ma afai sa latou manatu ua faaseseina aʼu sa tatau ona taumafai i se ala tatau ai ma le alofa e toe aumai ai aʼu—sa tuua aʼu i ituaiga uma o afaaosoosoga; ma, i loʼu faatasitasi ai ma ituaiga uma o tagata eseese, sa masani ona ou paʼū atu soo i sese valea e tele, ma faaalia vaivaiga o le talavou, ma sese o uiga faalenatura o le tagata; o se mea, ou te faanoanoa e taʼu atu, sa taitai atu ai aʼu i faaosoosoga eseese, e inosia i le silafaga a le Atua. I loʼu fai atu o lenei taʼutinoga, e lē tatau ona manatu ane se tasi na ou sala i ni agasala tetele pe matuia. Sa lē i ai lava se uiga e fai se mea faapena i loʼu natura. Ae sa ou sala i le manatu faatauvaa, ma le faatasi ai i ni isi taimi ma aumea totoē, ma isi mea faapena sa lē tusa ai ma le amio lena e tatau ona tu ai se tasi o lē ua evalaaulia e le Atua e pei ona sa ou i ai. Peitai o le a lē foliga uiga ese lenei mea i soo se tasi o lē na te manatua loʼu talavou, ma ua masani i loʼu uiga masani o le fiafia.

 29 Ona o nei mea, sa ou lagona soo ai le tausalaina i oʼu vaivaiga ma lē atoatoa; ae i le po o le aso luasefulu-tasi o Setema e pei ona taʼua i luga, ina ua mavae ona ou malolo atu i loʼu moega i le po, na ou atatalo ma aioi atu ai i le Atua Malosi Aoao mo se faamagaloga o aʼu agasala uma ma sese, ma mo se faaaliga mai ia te aʼu, ina ia mafai ona ou iloa e uiga i loʼu tulaga ma le mea ou te tu ai i ona luma; ona sa ia te aʼu se faamoemoe atoa i le mauaina o se faaaliga paia, talu ai ona sa ou mauaina se tasi muamua.

 30 Aʼo faapea ona ou valaau atu i le Atua, sa ou vaaia se malamalama ua oo mai i loʼu potu, sa faaauau pea ona faateleina seia oo ina sili atu le malamalama o le potu nai lo le aoauli, ae tu mai loa se atagata i tafatafa o loʼu moega, ua tu i le ea, ona sa lē papai ona vae i le fola.

 31 Sa ofu o ia i se ofu talaloa ōō sa matuā apaepae ma lava. O se paepae sa silisili atu nai lo soo se mea faalelalolagi ua ou vaai i ai; ou te le talitonu foi e i ai se mea faalelalolagi e mafai ona faia ia foliga mai e faapea lona paepae ma le iila. Sa aliali mai ona alofilima, ma ona lima foi, i luga aʼe teisi o tapulima; sa faapea foi, ona aliali mai o ona alofivae, faapea ma ona vae, i luga aʼe teisi o tapuvae. Sa lē ufitia foi lona ulu ma lona ua. Sa mafai ona ou iloaina sa leai se isi ona ofu sa ofuina ae nao lea ofu talaloa, aua sa matala, ina ia mafai ona ou vaai atu i lona fatafata.

 32 Sa lē gata ina matua paepae tele lona ofu talaloa, ae o lona tagata atoa sa matua amamalu e lē mafai ona faamatalaina, ma o ona fofoga sa pei moni lava o le euila. Sa malamalama tele lava le potu, ae sa lē pupula tele atu e pei ona latalata faataamilo i lona tagata. I le taimi muamua na ou vaai atu ai ia te ia, sa ou ifefe; peitai sa vave ona alu ese o le fefe mai ia te aʼu.

 33 Sa fetalai mai o ia ia te aʼu i loʼu aigoa, ma fetalai mai ia te aʼu o ia o se avefeau na auina mai mai le Atua ia te aʼu, ma e faapea o lona igoa o Moronae; e faapea o i ai i le Atua se galuega mo aʼu ou te faia; ma e faapea o loʼu igoa o le a tauleleia ma tauleagaina i totonu o atunuu uma, ituaiga, ma gagana, po o le a tauleleia ma tauleagaina i totonu o nuu uma.

 34 Sa fai mai o ia o loo i ai se atusi ua teuina, ua tusia i luga o epapatusi auro, ua tuu mai ai se tala e uiga i tagata muamua sa nonofo i le konetineta lenei, ma le mea na latou tupuga mai ai. Sa fai mai foi o ia o loo i ai i totonu o lenei tusi le iatoatoaga o le Talalelei tumau-faavavau, e pei ona sa tuuina atu e le Faaola i tagata sa i ai anamua;

 35 Sa i ai foi, ma ni maa e lua i totonu o ni faavaa siliva—ma o ia maa, pe a faapipii i se aufifatafata, ua tino aʼi le mea ua taʼua o le eUrima ma le Tumena—ua teuina faatasi ma papatusi; ma o le umia ma le faaaogaina o ia maa sa taʼua ai tagata o i“tagatavāai” i aso anamua po o taimi ua mavae; ma e faapea ua saunia e le Atua ia mea mo le faamoemoe o le faaliliuina o le tusi.

 36 Ina ua uma ona ia taʼu mai o ia mea ia te aʼu, sa amata ona ia sii mai o valoaga o le aFeagaiga Tuai. Sa ia sii muamua mai se vaega o le mataupu lona tolu o le eMalaki; ma sa ia sii mai foi le mataupu fa po o le mataupu mulimuli o lea lava valoaga, ae sa i ai sina eseesega itiiti mai le ala ua faitauina ai i a tatou Tusi Paia. Nai lo le sii mai o le fuaiupu muamua e pei ona faitauina i a tatou Tusi Paia, sa sii mai e ia faapea:

 37 Auā faauta, e oo mai le aaso o le a emu ai e pei o se umu, ma o e uma e faamaualuluga, ioe, ma e uma e fai amioleaga o le a mu e pei o itagutugutu o saito; ona o le a susunuina i latou e i latou o le a o mai, ua fetalai mai ai le Alii o ʼAu, e lē faatoeina ai mo i latou se aʼa po o se lala.

 38 Ma le tasi, sa sii mai foi e ia le fuaiupu lima e faapea: Faauta, o le a ou faaali atu ia te outou le aPerisitua, e ala i le lima o eElia le perofeta, ae lei oo mai le aso tele ma le matautia o le Alii.

 39 Sa ese foi ona ia sii mai o le fuaiupu ua sosoo ai: Ma o le a ia totoina i loto o fanau afolafolaga na faia i tamā, ma o le a eliliu atu loto o fanau i o latou tamā. Afai e lē faapea, o le a faaumatia atoa le lalolagi i lona afio mai.

 40 E faaopoopo i ia mau, sa ia sii mai le mataupu sefulutasi o le Isaia, ua fai mai ua lata ona faataunuuina. Sa sii mai foi e ia le mataupu tolu o Galuega, fuaiupu luasefulu-lua ma le luasefulu-tolu, e pei tonu lava ona i ai ia fuaiupu i la tatou Feagaiga Fou. Sa fai mai o ia o lena aperofeta o Keriso; ae lei oo mai le aso e e“vavae ese ai mai totonu o le nuu i latou o e e lē faalogo i lona leo,” ae ua lata ona oo mai.

 41 Sa ia sii mai foi le mataupu lona lua o le aIoelu, mai le fuaiupu luasefulu-valu seia oo i le mulimuli. Sa fai mai foi o ia e lei faataunuuina foi lenei mea, ae ua lata ona faataunuuina. Ma sa ia fetalai faaopoopo mai e faapea ua lata ona oo mai o le atoatoaga o eNuuese. E tele isi mau o tusitusiga paia sa ia sii mai, ma tuuina mai faamalamalamaga e lē mafai ona taʼua iinei.

 42 Ma le tasi, sa fai mai o ia ia te aʼu, e faapea a ou mauaina na papatusi sa tautala i ai o ia—ona e lei oo mai le taimi e tatau ona maua ai i latou—e lē tatau ona ou faaali atu i latou i soo se tagata; po o le ufifatafata faatasi ma le Urima ma le Tumena; nao i latou o e o le a poloaiina aʼu e faaali atu i ai; afai ou te faia o le a faaumatia aʼu. Aʼo talanoa mai o ia ia te aʼu e uiga i papatusi, sa tatalaina se faaaliga vaaia i loʼu amafaufau sa mafai ai ona ou vaai i le mea sa teuina ai papatusi, ma sa matua manino ma malamalama tele sa ou toe iloa lea mea i le taimi na ou asiasi atu ai i ai.

 43 Ina ua mavae lenei fesootaiga, sa ou vaai i le malamalama i totonu o le potu ua amata ona faapotopoto vave ane faataamilo i le tagata o ia o lē na fetalai mai ia te aʼu, ma sa faapea lava ona faia pea seia oo ina toe tuua le potu i le pogisa, sei vagana ai le latalata ane faataamilo ia te ia; ae, faafuasei ona ou vaaia, se mea e peiseai, o se ave ua tatala saʼo aʼe lava i luga i le lagi, ma ua alu aʼe ai o ia i luga seia oo ina mou atoa atu o ia, ma sa tuua ai le potu e pei ona sa i ai ae lei oo mai lenei malamalama faalelagi.

 44 Sa ou taoto ma mafaufau i le uiga ese o lenei vaaiga, ma ofo tele i mea na taʼu mai ia te aʼu e lenei avefeau uiga ese; ae, i le lotolotoi o oʼu amafaufauga, sa faafuasei lava ona ou iloa ua amata ona toe malamalama mai loʼu potu, ma i lea lava taimi, e pei ona sa i ai, ua toe tu mai ai lea lava avefeau faalelagi i tafatafa o loʼu moega.

 45 Sa amata o ia, ma toe faamatala mai mea tonu lava ia e tasi na ia faia i lana asiasiga muamua, e aunoa ma se eseesega itiiti; o se mea ina ua uma ona faia, sa ia taʼu mai ia te aʼu e uiga i faamasinoga tetele o le a oo mai i luga o le lalolagi, ma faafanoga tetele e ala mai i le oge, le pelu, ma faamaʼi; ma e faapea o le a oo mai ia faamasinoga mamafa i le lalolagi i le tupulaga lenei. Ina ua uma ona ia faamatala mai o ia mea, sa toe afio aʼe o ia e pei ona faia muamua e ia.

 46 E oo mai i le taimi lea, sa faapea ona matua loloto lava uunaiga ua oo mai i loʼu mafaufau, ua sola ese le fia moe mai i oʼu mata, ma sa ou taoto lofituina i le maofa i mea sa ou vaaia ma faalogoina. Ae sa ou ofo ina ua ou toe vaaia lea lava avefeau e tasi i tafatafa o loʼu moega, ma faalogo atu ia te ia ua toe faamatala pe ua toe taʼu mai ia te aʼu ia lava mea e tasi e pei o taimi muamua; ma faaopoopo mai se lapataiga ia te aʼu, i le fai mai ia te aʼu o le a taumafai aSatani e efaaosooso ia te aʼu (ona o le tulaga mativa o le aiga o loʼu tamā), ia maua mai papatusi mo le faamoemoe ia mauʼoa ai. O lenei mea sa ia faasa mai ia te aʼu, ua fai mai e ao lava ona lē i ai ia te aʼu se isi lava faamoemoe i le maua mai o papatusi tau lava o le faamamaluina o le Atua, ma e ao ona lē tosina i se isi lava imanaoga nai lo le atinaega o lona malo; a lē o lea e lē mafai ona ou mauaina papatusi.

 47 Ina ua mavae lenei asiasiga lona tolu, sa toe afio aʼe o ia i le lagi e pei o taimi muamua, ma sa toe tuua ai aʼu e mafaufau i le uiga ese o mea na faatoa oo mai nei ia te aʼu; ae sa toeitiiti vave ane lava ina ua mavae ona afio aʼe o le avefeau i le lagi mai ia te aʼu i le taimi lona tolu lea, ona vivini lea o le toa, ma sa ou iloa ai ua lata mai le ao, o lea o la ma faatalanoaga sa alu ai lena po atoa.

 48 Sa lei umi ona mavae lea ae ou tu i luga mai loʼu moega, ma, e pei ona masani ai, sa ou alu i galuega tatau ai o le aso; peitai, aʼo ou taumafai e galue e pei o isi taimi, sa ou iloa sa matua itiiti lava loʼu malosi sa lē mafai ai ona ou faia se mea. O loʼu tamā, o lē sa galue faatasi ma aʼu, sa vaai mai e i ai se mea ua faaletonu ia te aʼu, ma fai mai ia te aʼu ou te alu i le fale. Sa amata ona ou alu ma le faamoemoe ou te alu i le fale; peitai, ina ua ou taumafai e sopoia le pa i fafo atu o le fanua lea sa ma i ai, sa matua leai lava soʼu malosi, ma ou paʼū vaivai ai i luga o le eleele, ma ou matua lē iloa ai se mea mo se taimi.

 49 O le mea muamua lava e mafai ona ou manatua o se leo na fetalai mai ia te aʼu, ua valaau mai ia te aʼu i loʼu igoa. Sa ou tepa aʼe i luga, ma vaaia le avefeau lava lea e tasi o tu mai i luga aʼe o loʼu ulu, na siomia i le malamalama e pei o taimi muamua. Ona ia toe faamatala mai foi lea ia te aʼu mea uma na ia faamatala mai ia te aʼu i le po ua mavae, ma poloaiina aʼu ou te alu i loʼu atamā ma taʼu atu ia te ia e uiga i le faaaliga vaaia ma poloaiga na ou mauaina.

 50 Sa ou usiusitai; sa ou toe foi atu i loʼu tamā i le faatoaga, ma faamatala atu ia te ia le mea atoa. Sa tali mai o ia ia te aʼu ua mai le Atua, ma fai mai ia te aʼu ou te alu ma fai e pei ona poloaiina e le avefeau. Sa ou tuua le faatoaga, ma ou alu i le mea na taʼu mai e le avefeau ia te aʼu o loo teuina ai papatusi; ma ona o le manino o le faaaliga vaaia na ou maua e uiga i ai, sa ou iloa lea mea i le taimi lava na ou taunuu ai iina.

 51 Latalata i le nuu o Manaseta, i le itumalo o Onatario, i Niu Ioka, o loo tu ai se amaupuepue telē lava, ma ua sili ona maualuga i lo soo se isi i le vaiaai. O le itu i sisifo o lenei maupuepue, e lē mamao mai le tumutumu, i lalo o se maa telē lava, sa taatitia ai papatusi, sa teuina i totonu o se pusa maa. O lenei maa sa mafiafia ma lapotopoto i le ogatotonu i le itu i luga, ma manifinifi agai atu i pito, ina ia aliali ai lona ogatotonu i luga o le eleele, ae o le autafa faataamilo atoa sa tanumia i le eleele.

 52 Ina ua uma ona ou aveese o le eleele, sa ou aumai se taumoa, lea na ou sulu i lalo o le pito o le maa, ma laga i luga i sina uunaiga itiiti lava. Sa ou tilotilo i totonu, ma o iina na ou vaaia moni ai lava apapatusi, le eUrima ma le Tumena, ma le iufifatafata, e pei ona sa taʼu mai e le avefeau. O le pusa sa i ai i totonu ia mea sa faia i le faapipii faatasi o ni maa i le ituaiga o simā. I le taʼele o le pusa sa taatitia faalava ai i le pusa ni maa se lua, ma o luga o ia maa sa taatitia ai papatusi faatasi ma isi mea.

 53 Sa ou faia se taumafaiga e aumai i latou i fafo, ae sa vavao mai e le avefeau, ma sa toe taʼu mai e lei oo i le taimi e aumai ai i latou, pe e oo mai, seia fa tausaga mai le taimi lena; ae sa fai mai o ia ia te aʼu e tatau ona ou sau i le mea lena i le taimi tonu lava e atoa i ai le tasi o le tausaga mai le taimi lena, ma o le a ia feiloai ai ma aʼu iina, ma e tatau ona ou faia pea lava faapea seia oo mai le taimi e tuu mai ai papatusi.

 54 Sa faapea lava, e pei ona sa poloaiina ai aʼu, ona ou alu i le faaiuga o tausaga taitasi, ma o taimi taitasi na ou maua ai lea lava avefeau iina, ma maua faatonuga ma le malamalama mai ia te ia i taimi taitasi o ā ma faatalanoaga, e faatatau i mea o le a faia e le Alii, ma pe faapefea ma o le a le ala e taitaia ai lona amalo i aso e gata ai.

Ua faaipoipo Iosefa Samita ia Emma Hale—Ua maua e ia papatusi auro mai ia Moronae ma faaliliuina ni isi o faailoga tusitusi—Ua faaali atu e Matini Harisi ni isi o faailoga tusitusi ma le faaliliuga ia Polofesa Anthon, o lē na fai mai, “E lē mafai ona ou faitauina se tusi ua faamauina.” (Fuaiupu 55–65.)

 55 Ona o tulaga faalelalolagi o loʼu tamā sa faalēlava tele, sa tatau ai ia te i matou ona galulue i o matou lima, i le galulue totogi i le aso ma isi mea, pe a matou maua le avanoa. O ni isi taimi sa matou i le fale, ma o ni isi taimi sa matou i fafo, ma o le galulue pea lava na mafai ai ona matou maua se olaga lelei.

 56 I le tausaga e 1823 na feagai ai lo matou aiga ma se puapuaga tele i le maliu o loʼu uso matua, o aAlevine. I le masina o Oketopa, 1825, na ou galue totogi ai i se alii matua e suafa ia Josiah Stoal, o lē sa nofo i le itumalo o Seneko, i le Setete o Niu Ioka. Sa faalogo o ia i se tala e uiga i se maina siliva e faapea sa eliina e tagata Sepania i Heremoni, i le itumalo o Susikuana, i le Setete o Penisilevania; ma sa ia eli, ae ou te lei faigaluega ia te ia, ina ia mafai, pe a mafai, ona maua le maina. Ina ua mavae ona ou alu atu e nofo faatasi ma ia, sa ia ave aʼu, faatasi ma le vaega na totoe o ana tagata faigaluega, e eli e suʼe le maina, o se mea sa ou galue ai pea e lata i le masina, e aunoa ma se faamanuiaina o la matou taumafaiga, ma sa iʼu ina ou faatalitonuina le alii matua e taofi le eli e suʼe le maina. O le mea lena na tupu mai ai le tala salalau e faapea o aʼu o se tagata eli-tupe.

 57 I le taimi na ou faigaluega ai faapena, sa tuu atu ai aʼu ou te nofo totogi i le fale o le Susuga a Isaako Hale, o le nuu lena; o iina na ou vaai muamua ai i loʼu toalua o aEmma Hale (lona afafine). O le 18 o Ianuari, 1827, na ma faaipoipo ai aʼo ou galue pea i le galuega a le alii o Sitolo.

 58 Ona o loʼu fai atu pea sa ou vaai i se faaaliga vaaia, sa mulimuli mai pea asauaga ia te aʼu, ma sa tetee tele le aiga o le tamā o laʼu avā i lo ma faaipoipo. O lea, sa tatau ai ia te aʼu, ona ou ave o ia i se tasi mea; o lea na ma o ai ma faaipoipo i le fale o Squire Tarbill, i Peniperisi i Saute, i le itumalo o Seneko, Niu Ioka. I se taimi vave lava ina ua uma laʼu faaipoipoga, na ou tuua ai le Susuga a Sitolo, ma ou alu i le fale o loʼu tamā, ma faifaatoaga faatasi ma ia i le tau lena.

 59 Sa oo ina oo mai le taimi mo le aumaia o papatusi, le Urima ma le Tumena, ma le ufifatafata. O le aso luasefulu-lua o Setema, tasi le afe valu selau luasefulu-fitu, ina ua ou alu atu e pei ona masani ai i le faaiuga o se tausaga i le mea na teu ai ia mea, na tuu mai ai ia te aʼu e lea lava avefeau faalelagi ma le poloaiga lenei: e faapea ua ia te aʼu le tausiga o ia mea; e faapea afai ou te tuua solo ia mea ma le faatalalē, pe i soʼu afaatamala, o le a vavaeeseina aʼu; ae afai ou te faaaoga aʼu taumafaiga uma e efaasaoina ai, sei oo ina sau ai o ia, le avefeau lea, mo ia mea, o le a puipuia lava ia mea.

 60 Sa vave ona ou iloa le pogai na ou mauaina ni poloaiga lotomau ia tausia saogalemu ia mea, ma le pogai na fai mai ai le avefeau a uma ona ou faia o le mea ua manaomia mai loʼu lima, o le a ia sau mo ia mea. Ona sa lei umi lava ona iloa ua ia te aʼu ia mea, ae faaaoga taumafaiga malolosi silisili e aveese ai mai ia te aʼu. Sa faaaoga togafiti uma sa mafai ona faia mo lena faamoemoe. Sa oo ina matua faateleina le oona ma le malosi o sauaga nai lo muamua, ma sa nofouta pea lava motu o tagata e fao ia mea mai ia te aʼu pe a mafai. Peitai o le poto o le Atua, na tumau malupuipuia ai pea ia mea i oʼu lima, seia oo ina maea ona ou faataunuuina ia ai mea na manaomia mai loʼu lima. Ma oo ai e tusa ma tuutuuga, ina sau o le avefeau mo ia mea, ma ou tuu atu ai ia te ia; ma ua i ai ia mea i lana tausiga seia oo mai i le aso nei, le aso lua lea o Me, tasi le afe valu selau ma le tolu sefulu-valu.

 61 E ui i lea, sa faaauau pea lava le vavaō, ma o tala aave ma ona laulau e afe sa galue i taimi uma e faasalalau ai tala sese e uiga i le aiga o loʼu tamā, ma e uiga ia te aʼu. Afai ou te faamatala atu le tasi vae afe o i latou, e tutumu ai tusi e tele. E ui i lea, sa oo ina matuā lē magafatia sauaga sa tatau ai ia te aʼu ona tuua Manaseta, ma o atu ma laʼu avā i le itumalo o Susikuana, i le Setete o Penisilevania. Aʼo ma sauni e amata ona malaga atu—i le matitiva tele, ma le mamafa tele o sauaga i luga o i maʼua sa leai se mea atonu o le a ma i ai i se isi tulaga ese mai—i le lotolotoi o lo ma puapuagatia na ma maua ai se uo i se alii e suafa ia aMatini Harisi, o lē na sau ia i maʼua ma tuu mai ia te aʼu se limasefulu tālā e fesoasoani ia i maʼua i la ma malaga. O le Susuga a Matini Harisi o se sa alala i le nuu o Palamaira, i le itumalo o Ueine, i le Setete o Niu Ioka, ma o se faifaatoaga aloaia.

 62 O lea lava fesoasoani na oo mai i le taimi na manaomia ai, na mafai ai ona ou oo atu i le nofoaga o loʼu faamoemoe i Penisilevania; ma i le taimi lava ina ua mavae loʼu taunuu atu na amata ai ona ou kopiina togitogiga mai papatusi. E tele togitogiga na ou kopiina, ma sa ou faaliliuina ni isi o i latou e ala i le aUrima ma le Tumena, o se mea sa ou faia i le va o le taimi na ou taunuu ai i le fale o le tamā o laʼu ava, i le masina o Tesema, ma Fepuari na sosoo ai.

 63 I se taimi o le masina lenei o Fepuari, na sau ai i lo ma fale le Susuga a Matini Harisi sa taʼua muamua, ave togitogiga ia na ou tusia mai papatusi, ma alu ma ia i le aai o Niu Ioka. O le mea na tupu e faatatau ia te ia ma togitogiga, o le a ou tuu atu i lana lava tala, e pei ona ia faamatala mai ia te aʼu ina ua mavae lona foi mai, e faapenei:

 64 “Sa ou alu atu i le aai o Niu Ioka, ma tuu atu togitogiga ua uma ona faaliliuina, faatasi ma lo latou faaliliuga, ia Polofesa Charles Anthon, o se alii sa taʼutaʼua i lona atamai i mea tau tusitusiga. Sa fai mai Polofesa Anthon ua saʼo le faaliliuga, ua sili atu le saʼo nai lo soʼo se isi na ia vaai muamua i ai ua faaliliuina mai le gagana Aikupito. Ona ou faaali atu lea ia te ia togitogiga na sa lei faaliliuina, ma sa fai mai o ia o ni togitogiga Faa-Aikupito, Faa-Kaletaia, Faa-Asuria, ma Faa-Arapi; ma fai mai o ia o ni togitogiga ua moni. Sa ia tuu mai ia te aʼu se tusi faamaonia, e faamaonia atu ai i tagata o Palamaira o ni togitogiga moni, ma o le faaliliuga o na mea ua uma ona faaliliuina ua saʼo. Sa ou ave le tusi faamaonia ma tuu i totonu o le taga o loʼu ofu, ma toetoe ina ou tuua lava le fale, ae valaau mai le Susuga a Anthon ou toe foi atu, ma sa fesili mai ia te aʼu pe na faapefea ona iloa e le alii talavou o loo i ai ni papatusi auro i le mea na ia maua ai. Sa ou tali atu sa faaalia e se agelu a le Atua ia te ia.

 65 “Ona ia fai mai lea ia te aʼu, ‘Seʼi tuu mai le tusi faamaonia lena seʼi ou vaai i ai.’ Sa faapea ona ou ave i fafo le tusi faamaonia mai le taga o loʼu ofu ma tuu atu ia te ia, ma ua ia ave ma saesae lilii, ua fai mai ua lē o toe i ai nei ni mea faapena o auaunaga a aagelu, ma afai ou te aumai papatusi ia te ia, o le a ia faaliliuina. Sa ou fai atu ia te ia ua efaamauina se vaega o papatusi, ma ua faasaina aʼu ou te aumaia. Sa tali mai o ia, ‘E lē mafai ona ou faitauina se tusi ua faamauina.’ Sa ou tuua o ia ma ou alu i le Filosofia o Mitchell, o lē na faamaonia mea na fai mai ai Polofesa Anthon e faatatau i togitogiga ma le faaliliuga.”

· · · · · ·

Ua auauna Oliva Kaotui o se tusiupu i le faaliliuga o le Tusi a Mamona—Ua maua e Iosefa ma Oliva le Perisitua Arona mai ia Ioane le Papatiso—Ua papatisoina i laua, ma faauuina, ma maua le agaga o valoaga. (Fuaiupu 66–75.)

 66 O le aso 5 o Aperila, 1829, na sau ai aOliva Kaotui i loʼu fale, ma ou te lei vaai ia te ia seʼi oo mai i le taimi lea. Sa fai mai o ia ia te aʼu ona sa faiaoga o ia i le vaiaai sa nofo ai loʼu tamā, ma o loʼu tamā o se tasi lea o i latou o e na auina atu a latou fanau i le aoga, sa alu atu o ia ma nofo totogi i lona fale i se vaitau, ma aʼo i ai iina sa faamatala atu e le aiga ia te ia tulaga o loʼu mauaina o papatusi, ma ua faapea ona sau ai o ia e fesili mai ia te aʼu.

 67 E lua aso talu ona mavae le taunuu mai o le Susuga a Kaotui (o le aso 7 lea o Aperila) sa amata ona ou faaliliuina le Tusi a Mamona, ma sa amata ona tusitusi o ia mo aʼu.

· · · · · ·

 68 Sa faaauau pea ona ma galulue i le faaliliuina o le tusi, ae, i le masina na sosoo ai (o Me, 1829), na ma o atu ai i se aso faapitoa i le vao e tatalo ma ole atu i le Alii e uiga i le apapatisoga mo le efaamagaloina o agasala, lea na ma maua o taʼu mai i le faaliliuga o papatusi. Aʼo faapea ona ma faia, o tatalo ma valaau atu i le Alii, sa afio ifo mai le lagi se iavefeau i se oao o le malamalama, ma ina ua faaee ona ulima i luga o i maʼua, sa ia ffaauuina i maʼua, ua fetalai mai:

 69 I luga o oulua oʼu uso a auauna e, i le suafa o le Mesia, ou te faaee atu i ai le aPerisitua o Arona, ua umia ki o le auaunaga a agelu, ma o le talalelei o le salamo, ma o le papatisoga i le faatofuina mo le faamagaloina o agasala; ma o le a lē toe aveesea lava lenei perisitua mai le lalolagi, seia toe osia e atalii o eLevi se taulaga i le Alii i le amiotonu.

 70 Sa fai mai o ia ua lē o i ai i lenei Perisitua Arona le mana o le faaee atu o lima mo le ameaalofa o le Agaga Paia, ae o le a faaee mai lea mana i luga o i maʼua i se taimi o mulimuli mai; ma sa ia poloaiina i maʼua ma te o ma papatisoina, ma tuu mai ia i maʼua faatonuga e tatau ona ou papatiso Oliva Kaotui, ma a uma lena ona tatau lea ona ia papatisoina aʼu.

 71 E tusa ma lea sa ma o atu ma papatisoina. Sa ou papatisoina muamua o ia, ma ina ua uma sa ia papatisoina aʼu—ina ua uma lea sa ou faaee oʼu lima i luga o lona ulu ma faauu o ia i le Perisitua Arona, ma ina ua uma lea sa ia faaee ona lima i oʼu luga ma faauu aʼu i lea lava Perisitua—aua sa faapea ona poloaiina ai i maʼua.*

 72 O le avefeau na asiasi mai ia i maʼua i lea taimi ma faaee mai lenei Perisitua i luga o i maʼua, na fai mai o lona igoa o Ioane, o lea lava ua taʼua o aIoane le Papatiso i le Feagaiga Fou, ma ua galue o ia i lalo o le taitaiga a ePeteru, iIakopo ma oIoane, o e na umia uki o le Perisitua fMekisateko, o le Perisitua lea, na fai mai o ia, o le a faaee mai i luga o i maʼua i le taimi e tatau ai, ma e tatau ona taʼua aʼu o le gToeaina muamua o le Ekalesia, ma ia (Oliva Kaotui) o le lona lua. O le aso sefululima o Me, 1829, na faauu ai i maʼua i lalo o le lima o lenei avefeau, ma papatisoina.

 73 O le taimi lava na ma o aʼe ai i luga mai le vai ina ua uma ona papatisoina i maʼua, na oo mai ai ia i maʼua faamanuiaga tetele ma le mamalu mai lo tatou Tamā Faalelagi. O le taimi lava na maeʼa ai ona ou papatisoina Oliva Kaotui, na oo ifo ai le aAgaga Paia i luga o ia, ma sa tulai o ia ma evaloia mea e tele ua lata ona oo mai. Ma le tasi, e lei umi lava ona papatisoina aʼu e ia, sa ia te aʼu foi le agaga o valoaga, ma sa ou tu, ma ou vavalo atu e uiga i le tulai mai o le Ekalesia lenei, ma isi mea e tele e faatatau i le Ekalesia, ma le tupulaga lenei o le fanauga a tagata. Sa faatumulia i maʼua i le Agaga Paia, ma olioli i le Atua o lo maʼua olataga.

 74 Ona ua faapupulaina nei o maʼua mafaufau, sa amata ona tatala faataatitiaina tusitusiga paia i o maʼua amalamalamaaga, ma faaali mai ia i maʼua i se ala sa lē mafai ona ma maua muamua, pe sa ma mafaufau i ai muamua, uiga emoni ma faamoemoega o o latou mau sili ona lilo. I le va o lea taimi, sa uunaia i maʼua e tausi faalilolilo tulaga o le ma mauaina o le Perisitua ma le papatisoina o i maʼua, ona o se agaga o sauaga ua uma ona faaalia i le vaiaai.

 75 Sa faamataʼuina i maʼua i le osofaia, mai lea taimi i lea taimi, ma o lenei foi mea, sa faia e polofesa o mea tau lotu. Ma o o latou faamoemoega e osofai i maʼua, sa nao le uunaiga a le aiga o le tamā o laʼu ava (i lalo o le taitaiga Paia), o e sa alolofa tele ia te aʼu, ma o e sa tetee i tagata leaga, ma sa finagalo malilie e tatau ona tuu o aʼu e faaauau le galuega o le faaliliuga e aunoa ma se faalavelaveina, sa punitia ai; ma o lea na latou ofo ma folafola mai ai ia i maʼua le puipuiga mai taualumaga uma e lē tusa ai ma le tulafono, i mea latou te mafai ai.

 * Ua faapenei ona faamatalaina e Oliva Kaotui ia mea na tutupu: “O nei aso e lē mafai ona faagaloina—o le nofo i lalo o le leo o se siufofoga na fetalai mai e ala i le musumusuga a le lagi, na fagua ai le faafetai silisili i lenei loto! O lea aso ma lea aso, sa ou faaauau ai, e aunoa ma le faalavelaveina, e tusia mai lona fofoga, aʼo ia faaliliu i le Urima ma le Tumena, pe, e pei ona taʼua e tagata sa Nifaē, ‘O faamatala gagana,’ le talafaasolopito po o le talafaamaumau ua taʼua o le ‘Tusi a Mamona.’

 “O le faailoa atu, i nai upu itiiti lava, le tala malie na tuuina mai e Mamona ma lona atalii faamaoni, o Moronae, e uiga i se nuu sa pele ma alofagia e le lagi, e mamao atu mai loʼu faamoemoe o le taimi nei; o lea o le a ou tuu ai lea faamoemoe i se taimi o i le lumanai, ma, e pei ona ou fai atu i le faatomuaga, o le a ou faasolo tonu atu lava i ni nai mea itiiti faapitoa e faatatau i le tulai mai o le Ekalesia lenei, o ni mea atonu o le a fiafia i ai ni afe o e ua tutulai mai i luma, i le lotolotoi o le mata faasiasia o e faailoga tagata ma le tuuaiga a tagata pepelo, ma opoopo le Talalelei a Keriso.

 “E leai ni tagata, e mafaia i lo latou manatu malamalama, ona faaliliu ma tusia faatonuga na tuuina atu i tagata sa Nifaē mai le fofoga o le Faaola, e uiga i le ala tonu lava e tatau ai i tagata ona atiaʼe Lana Ekalesia, aemaise lava i se taimi aʼo faasosolo e le amioleaga se lē mautonu i luga o ituaiga ma ala eseese uma ua faia i totonu o tagata, e aunoa ma se naunau i se avanoa e faaali atu ai le naunauga o le loto e ala i le tanumia i se tuugamau vai, e tali atu ai i ‘se mafaufau fuatiaifo lelei i le toetu mai o Iesu Keriso.’

 “Ina ua uma ona tusia o le tala na tuuina mai e uiga i le auaunaga a le Faaola i le toe vaega o le fanau a Iakopo, i luga o le konetineta lenei, sa faigofie ona vaaia, e pei ona fai mai ai le perofeta, le ufitia o le lalolagi i le pouliuli ma le pouliuli tele i mafaufau o tagata. I le manatunatu atili i ai sa faapea foi ona faigofie ona vaaia, i le totonugalemu o lenei vevesi tele ma le vavaō e uiga i mataupu tau lotu, sa leai se tasi na i ai le pule mai le Atua e fai ai sauniga o le Talalelei. Ona e mafai ona fesili o le fesili, e i ai i ni tagata se pule e auauna ai i le suafa o Keriso, o e e faafitia faaaliga, ae o Lana molimau ua lē o le agaga ea lea o valoaga, ma o Lana tapuaiga sa faavae, atiina aʼe, ma lagolagoina i faaaliga tuu saʼo mai, i tupulaga uma o le lalolagi aʼo i ai sona nuu i luga o le lalolagi? A na fai na tanumia nei mea moni, ma natia faaeteete e ni tagata o lo latou faiva po ua lamatia pe a na tuu e susulu atu i mata o tagata, sa lē toe faapea ia te i maʼua; ma sa nao lo ma faatalitali mo le tuuina mai o le poloaiga ‘Tulai ia ma papatiso.’

 “Sa lei umi ona manaomia o lenei mea ae faataunuuina. O le Alii, o lē ua tumu i le alofa mutimutivale, ma o se e finagalo pea i taimi uma e tali mai i le tatalo fai pea a lē ua agamalu, ina ua uma ona ma valaau atu ia te Ia i se auala faatauanau, e ese mai nofoaga o tagata, sa afio ifo e faaali mai ia te i maʼua Lona finagalo. Sa faafuasei lava, e pei e mai le totonugalemu o le faavavau, ona fetalai mai e le siufofoga o le Togiola le filemu ia i maʼua, aʼo tatalaina le veli ma afio mai i lalo le agelu a le Atua sa ofu i le mamalu, ma tuuina mai le savali sa tulimatai i ai ma le naunau tele, ma ki o le Talalelei o le salamo. E o le olioli e! E o le ofoofogia e! E o le maofa e! Aʼo fālō tigaina ma fenumiai le lalolagi—aʼo tau tagotago le miliona ma miliona o tagata e pei o le tauaso mo le puipui, ma aʼo nonofo i le lē mautinoa, o se anoano lautele, sa vaai o ma mata, sa faalogo o ma taliga, e pei o le ‘malamalama o le aoauli’; ioe, e sili atu—i lo le pupula o ave o le la i le masina o Me, ona susulu ifo ai lea o lona pupula i luga o mea uma! Ona oo mai lea o lona siufofoga, e ui ina mālū, ae sa ati i le totonugalemu, ma o ana upu, ‘O aʼu o lo oulua uso-a-auauna,’ na aveesea ai mea uma na fefefe ai. Sa ma faalogologo, sa ma sioa, sa ma saafi! O le leo o se agelu mai le mamalu, o se savali mai le Silisili Ese! Ma aʼo ma faalogologo atu sa ma olioli, aʼo mumū aʼe lona alofa i o maʼua agaga, ma sa fusia i maʼua i le faaaliga vaaia o lē ua Malosi Aoao! O fea se avanoa mo le masalosalo? Sa leai se mea; ua sola ese le lē mautonu, ua goto ifo le masalosalo ma ua lē toe tu mai, aʼo tala fatu ma taufaasese ua sosola ese e faavavau!

 “Peitai, le uso pele e, mafaufau ifo, toe mafaufau ifo i se taimi, i le olioli na faatumuina ai o ma loto, ma le ofo tele atonu na ma ifo ai, (ona o ai e lē tootuli le tulivae mo se faamanuiaga faapea?) ina ua ma mauaina mai lalo o lona aao le Perisitua Paia aʼo fetalai mai, ‘I luga o oulua oʼu uso a auauna e, i le suafa o le Mesia, ou te faaee atu ai lenei Perisitua ma lenei pule, lea o le a tumau i luga o le lalolagi, ina ia mafai e Atalii o Levi ona osia se taulaga i le Atua i le amiotonu!’

 “O le a ou lē taumafai e faaali atu ia te outou lagona o loʼu nei loto, po o le matagofie malualii ma le mamalu sa siomia ai i maʼua i lena mea; ae tou te talitonu mai ia te aʼu pe a ou fai atu, e lē mafai e le lalolagi, po o tagata, i le maoae o le taimi, ona amata ona faamatalaina i le gagana i se ala uiga ese ma le mamalu e pei o lenei tagata paia. E leai; po o i ai foi i luga o lenei lalolagi le mana e tuuina mai ai le olioli, pe tuuina mai ai le filemu, pe malamalama ai i le poto sa i ai i fuaiupu taitasi e pei ona tuuina mai i latou e le mana o le Agaga Paia! Atonu e mafai e le tagata ona faasese ona uso-a-tagata, atonu e mulimuli mai lea taufaasese i lea taufaasese, ma atonu e maua e le fanau a lē amioleaga le mana e tosina ai tagata valelea ma le lē aoaoina, seia leai se mea ae nao pepelo e fafaga ai tagata e toatele, ma ave atu ai e le fua o le pepelo i ona tafega e valevale i le tuugamau; ae o le paʼi tasi mai o le tamatamai aao o lona alofa, ioe, o se ave e tasi o le mamalu mai le lalolagi i lugā, po o se upu e tasi mai le fofoga o le Faaola, mai le loto o le faavavau, e taia uma ai i le faatauvaa, ma soloiesea ai e faavavau mai le mafaufau. O le mautinoa na ma i ai i luma o se agelu, o le mautinoa na ma faalogo i le siufofoga o Iesu, ma le moni aʼiaʼi aʼo tafe mai se tagata mamā, na faatonuina e le finagalo o le Atua, ia te aʼu lava ia, e lē mafai ona faamatalaina, ma o le a ou vaai pea i luga o lenei faaaliga o le agalelei o le Faaola ma le maofa ma le faafetai aʼo faatagaina pea aʼu ou te tumau; ma i maota na ua i ai le atoatoaga ma e lē sao atu i ai se agasala, ou te faamoemoe o le a ou faapelepeleina i lena aso e lē gata.”—Messenger and Advocate (Avefeau ma le Fautua), vol. 1 (Oketopa 1834), itulau 14–16.