1 Olsem ia nao heven mo wol i ^afulwan, wetem evriwan long ol ^bami blong hem.

2 Mo long nambaseven dei, mi, God, mi finisim wok blong mi, mo evri samting we mi bin mekem; mo mi bin ^aspel long evri wok blong mi long ^bnambaseven dei, mo evri samting we mi bin mekem, oli finis; mo mi, God, mi bin luk se oli bin gud.

3 Mo mi, God, mi bin ^ablesem nambaseven dei, mo mi bin mekem i kam tabu; from se long dei ia, mi bin spel long evri ^bwok blong mi we, mi, God, mi bin krietem mo mekem.

4 Mo naoia, luk, mi talem long yu, se hemia nao ol stamba rus blong heven mo blong wol, taem we mi bin krietem olgeta, long tetaem ia we mi, Lod God, mi bin mekem heven mo wol,

5 mo evri grin samting blong garen ^abifo i bin stap long wol, mo evri grin lif blong garen bifo hem i gro. From we mi, Lod God, mi bin ^bkrietem evri samting, we mi bin tokbaot, ^dlong saed blong spirit, bifo oli stap olsem we oli stap long fes blong wol. From we mi, Lod God, mi no bin mekem se i gat ren antap long fes blong wol. Mo mi, Lod God, mi bin ^ekrietem evriwan long ol pikinini blong ol man; be mi no mekem yet wan man blong i wok long ^fgraon; from we mi bin ^gkrietem olgeta long ^hheven; mo i no bin gat yet wan bodi blong mit mo bun long fes blong wol, mo i no bin gat wota, mo i no bin gat ea;

6 Be mi, Lod God, i bin stap toktok, mo wan klaod blong ^asmosmol wota i kamaot long graon, mo i wasem ful fes blong graon.

7 Mo mi, Lod God, mi bin mekem man wetem ^adas blong graon, mo mi bin blo long nus blong hem mo givim win blong laef; mo ^bman i kam wan ^dsol we i stap laef, ^efasfala bodi blong mit mo bun long fes blong wol, mo tu, i fasfala man; be yet, mi bin krietem evri samting fastaem; be mi bin krietem mo mekem olgeta long saed blong spirit, folem toktok blong mi.

8 Mo mi, Lod God, mi bin planem wan garen long Is saed long ^aIden, mo long ples ia nao mi bin putum man we mi bin mekem.

9 Mi, Lod God, mi bin mekem evri tri, we i naes blong man i luk, oli gro gud aot long graon, mo man i bin save luk. Mo i kam wan sol we i laef tu. From se oli bin stap long saed blong spirit long tetaem ia we mi bin krietem olgeta; from se oli bin stap long ples we mi, God, mi bin krietem olgeta, yes, wetem evri samting we mi bin mekem rere blong man i yusum; mo man i bin luk se oli gud blong kakae. Mo mi, Lod God, mi bin planem ^atri blong laef tu long medel blong garen, mo mi bin planem tu ^btri blong save gud mo nogud.

10 Mo mi, Lod God, mi bin mekem se wan reva i kamaot long Iden blong i wasem garen; mo hem i pastru i go seraot, i gat fo ^afok blong hem.

11 Mo mi, Lod God, i bin singaotem nem blong faswan se Pison, mo hem i ron i go raon long ful kantri ia blong Havila, long ples we mi, Lod God, mi bin krietem fulap gol i stap long hem;

12 Mo gol blong kantri ia i bin gud, mo i bin gat deliam mo onikis ston tu.

13 Mo mi singaotem nem blong nambatu reva se, Gihon; reva ia i ron i go raon long ful kantri ia blong Itiopia.

14 Mo nem blong nambatri reva, hem i Hidekel; reva ia i ron i go long Is blong Asiria. Mo nambafo reva, hem i Yufretes.

15 Mo mi, Lod God, mi bin tekem man, mo mi bin putum hem insaed long Garen blong Iden, blong hem i wok long graon, mo blong hem i lukaot gud long hem.

16 Mo mi, Lod God, mi bin givim oda long man, mi talem se: ‘Evri tri blong garen ia, yu save kakae frut blong olgeta olsem we yu wantem,

17 Be long saed blong tri blong save gud mo nogud, bambae yu no kakae frut blong hem; be yu save ^ajusum yuwan wanem yu wantem, from se mi givim long yu; be tingbaot se mi bin blokem yu long hem, from we long sem ^bdei we bae yu kakae frut blong hem, i tru, bae yu ^dded.’

18 Mo mi, Lod God, mi bin talem long ^aWan Stret Pikinini Ia Nomo blong mi, se i nogud blong man ia bae i stap hemwan; taswe, bae mi mekem wan fren blong ^bgivhan, blong hem.

19 Mo wetem graon, mi, Lod God, mi bin mekem evri animol long plantesen, mo evri pijin blong skae; mo mi bin komandem se bae oli stap kam long Adam, blong luk se bae hem i putum nem blong olgeta olsem wanem; mo olgeta tu oli bin ol sol we oli laef; from we mi, God, mi blo long win blong laef insaed long olgeta, mo mi komandem se wanem nem we Adam i singaot ol animol ia we oli laef, bae hemia nao nem blong olgeta.

20 Mo Adam i bin givim nem blong evri animol we oli bigwan o smolsmol, mo long ol pijin long skae, mo long evri animol long plantesen; be long saed blong Adam, i no gat wan fren blong givhan i stap, blong hem.

21 Mo mi Lod God, mi bin mekem Adam i slip we i slip ded olgeta; mo hem i bin slip, mo mi bin tekem wan rib blong hem, mo mi mekem bodi blong hem long ples we mi bin openem, i kam gud bakegen.

22 Mo rib ia, we mi, Lod God, mi bin tekemaot long man ia, mi bin mekem wan ^awoman wetem, mo tekem hem i go long man ia.

23 Mo Adam i bin talem: Hem ia, mi save naoia se i bun we i kamaot long bun blong mi, mo ^amit we i kamaot long mit blong mi; bae mi singaotem hem, Woman, from se hem i kamaot long man.

24 From hemia, man i mas aot long papa mo mama blong hem, mo tingting mo bodi blong hem i mas ^ablong waef blong hem nomo; mo bae tufala i kam ^bwan bodi nomo.

25 Mo tufala tugeta i bin neked, man ia wetem waef blong hem, mo tufala i no bin gat sem.