Pāpa’ira’a mo’a
Mose 5


Pene 5

(Tiunu–’Ātopa 1830)

’Ua fānau Adamu ’e Eva i te tamari’i—’Ua pūpū Adamu i te tusia ’e ’ua tāvini i te Atua—’Ua fānauhia Kaina ’e Abela—’Ua ’ōrurehau Kaina, ’e ’ua rahi atu tōna here ia Sātane i te Atua, ’e ’ua parauhia ’oia ’o te Pohe—’Ua rahi te taparahi ta’ata ’e te ’ohipa ’ī’ino—’Ua porohia te ’evanelia mai te ha’amatara’a mai.

1 ’E i muri a’era, ’ua ti’avaru atu ra vau, ’o te Fatu te Atua, ia rāua i rāpae, ’e ’ua ha’amata ihora Adamu i te fa’a’apu i te fenua, ’e ’ia mana i ni’a i te mau ’ānimara ’āvae maha ato’a o te fenua, ’e ’ia ’amu i tāna mā’a ma te hou i ni’a i tōna rae, mai tā’u tā te Fatu i fa’aue atu iāna. ’E ’ua rave ato’a ’o Eva, tāna vahine, i te ’ohipa i pīha’i iho iāna.

2 ’E ’ua ’ite ihora Adamu i tāna vahine, ’e ’ua fānau mai ra ’oia nāna i te mau tamari’i tamāroa ’e te mau tamari’i tamāhine, ’e ’ua ha’amata ihora rātou ’ia fānau fa’arahi ’e ’ia fa’a’ī i te fenua.

3 ’E mai taua taime atu, ’ua ha’amata ihora te mau tamari’i tamāroa ’e te mau tamari’i tamāhine a Adamu ’ia haere tāta’ipiti i ni’a i te fenua, ’e ’ia fa’a’apu i te fenua, ’e ’ia tīa’i ho’i i te mau nana, ’e ’ua fānau ato’a mai rātou i te mau tamari’i tamāroa ’e te mau tamari’i tamāhine.

4 ’E ’ua ti’aoro atu ra Adamu ’e Eva, tāna vahine, i te i’oa o te Fatu, e fa’aro’o ihora rāua i te reo o te Fatu nō ’ō mai i te pae o te ’Ō i Edene, i te paraura’a mai ia rāua, ’e ’aore rāua i ’ite atu iāna ; ’ua fa’ata’a-’ē-hia ho’i rāua i tōna ra aro.

5 ’E ’ua hōro’a atu ra ’oia i te mau fa’auera’a ia rāua, ’ia ha’amori rāua i te Fatu tō rāua Atua, ’e ’ia pūpū i te mau fanau’a mātāmua o tā rāua mau nana ’ei ō i te Fatu. ’E ’ua ha’apa’o Adamu i te mau fa’auera’a a te Fatu.

6 ’E i muri iho i te mau mahana e rave rahi, ’ua fā mai ra te hō’ē melahi a te Fatu ia Adamu, nā ’ō mai ra : Nō te aha ’oe i pūpū ai i te mau tusia i te Fatu ? ’E ’ua parau atu ra Adamu iāna : ’Aita vau i ’ite, maori rā ’ua fa’aue mai te Fatu iā’u.

7 ’E i reira, ’ua parau mai ra te melahi, nā ’ō mai ra : E hōho’a teie mea nō te tusia a te Fānau tahi a te Metua, tei ’ī i te aroha ’e te parau mau.

8 Nō reira, e rave ’oe i te mau mea ato’a tā ’oe e rave ra nā roto i te i’oa o te Tamaiti, ’e e tātarahapa ’oe ma te ti’aoro atu i te Atua nā roto i te i’oa o te Tamaiti ē a muri noa atu.

9 ’E i taua mahana ra ’ua ma’iri mai ra te Vārua Maita’i i ni’a ia Adamu, ’o tē fa’a’ite ïa nō te Metua ’e te Tamaiti, nā ’ō mai ra : ’O vau te Fānau tahi a te Metua mai te mātāmua mai ā, ’e mai teie nei atu ā ē a muri noa atu, ’e nō te mea ’ua hi’a ’oe, e ti’a ato’a ia ’oe ’ia fa’aorahia, ’e te mau ta’ata ato’a e rave rahi ’o tei hina’aro ra.

10 ’E i taua mahana ra ’ua ha’amaita’i atu ra Adamu i te Atua ’e ’ua ’ī roa a’era, ’e ’ua ha’amata ihora i te tohu nō ni’a i te mau ’utuāfare ato’a o te fenua, i te nā-’ō-ra’a ē : ’Ia ha’amaita’ihia te i’oa o te Atua, i te mea nō tō’u ’ōfatira’a i te ture ’ua ’ara’ara tō’u mata, ’e i roto i teie orara’a e roa’a mai iā’u te ’oa’oa, ’e i roto i te ’i’o nei e ’ite fa’ahou ai au i te Atua.

11 ’E ’ua fa’aro’o Eva, tāna vahine i teie mau mea ato’a ’e ’ua ’oa’oa, nā ’ō atu ra : ’Āhiri ’aita tāua i ’ōfati i te ture ’aore ïa e noa’a tō tāua hua’ai, ’e ’aore ato’a tāua e ’ite i te maita’i ’e te ’ino, ’e te ’oa’oa o tō tāua fa’aorara’a ra, ’e te ora mure ’ore ’o tā te Atua e hōro’a ia rātou ato’a ’o tē ha’apa’o.

12 ’E ’ua ha’amaita’i Adamu ’e Eva i te i’oa o te Atua, ’e ’ua fa’a’ite rāua i te mau mea ato’a i tā rāua mau tamari’i tamāroa ’e tā rāua mau tamari’i tamāhine.

13 ’E ’ua haere mai ra Sātane i rotopū ia rātou, nā ’ō mai ra : E tamaiti ato’a vau nā te Atua ; ’e ’ua fa’aue ’oia ia rātou, nā ’ō atu ra : ’Eiaha e ti’aturi i te reira ; ’e ’aore atu ra rātou i ti’aturi i te reira, ’e ’ua hau atu ra tō rātou here ia Sātane i te Atua. ’E ’ua ha’amata a’era te ta’ata mai taua taime atu ra ’ia rave i tā te tino, i te mea faufau, ’e i tā te diabolo.

14 ’E ’ua paraparau atu ra te Fatu te Atua i te ta’ata nā roto i te Vārua Maita’i i te mau vāhi ato’a ’e ’ua fa’aue atu ra ia rātou ’ia tātarahapa ;

15 ’E ’o rātou ato’a ’o tei ti’aturi i te Tamaiti ’e ’ua tātarahapa i tā rātou mau hara, e fa’aorahia ïa ; ’e ’o rātou ato’a ’o tei ’ore i ti’aturi ’e ’aore i tātarahapa, e fa’ahapahia ïa ; e reva atu ra te mau parau nō roto i te vaha o te Atua ’ei fa’auera’a mana ; nō reira ’ia hope ana’e te reira i te tupu.

16 ’E ’aore a’era Adamu ’e Eva, tāna vahine, i fa’aea i te ti’aoro atu i te Atua. ’E ’ite ihora Adamu i tāna vahine ia Eva, e hapū a’era ’oia ’e fānau mai ra ia Kaina. Nā ’ō a’era Eva ē : E ta’ata tā’u i noa’a iho nei i te Fatu ; nō reira, e ’ore paha ’oia e pāto’i i tāna mau parau. Inaha rā, ’aore Kaina i ha’apa’o, ’e ’ua nā ’ō mai ra ’oia : ’O vai ho’i te Fatu e ’ite ai au iāna ?

17 ’E ’ua hapū fa’ahou ihora ’oia ’e fānau mai ra i te teina ia Abela. ’E ’ua ha’apa’o Abela i te reo o te Fatu. E ta’ata tīa’i māmoe Abela, ’e e ta’ata fa’a’apu fenua Kaina.

18 ’E ’ua hau atu tō Kaina here ia Sātane i te Atua. ’E ’ua fa’aue mai ra Sātane iāna, nā ’ō mai ra : ’A pūpū atu i te ō i te Fatu.

19 ’E i muri a’era i te tau i ha’apa’ohia ’ua hōpoi atu ra Kaina i te hotu o te fenua ’ei ō i te Fatu.

20 ’E Abela, ’ua hōpoi ato’a atu ra ’oia i te mau fanau’a mātāmua ’e te poria nō tāna ra nana. ’E ’ua fāri’i mai ra te Fatu ia Abela, ’e i tāna ra ō ;

21 ’Āre’a ia Kaina, ’e tāna ra ō, ’aore ïa ’oia i fāri’i mai. I teienei ’ua ’ite Sātane i te reira, ’e ’ua māuruuru ho’i ’oia. ’E ’ua riri roa a’era Kaina, e tu’atu’a atu ra tōna mata.

22 ’E ’ua parau mai ra te Fatu ia Kaina : Nō te aha ’oe i riri ai ? Nō te aha tō ’oe mata i tu’atu’a ai ?

23 ’Āhiri ’oe i rave maita’i ra, ’ua fāri’ihia mai ïa ’oe. ’E ’āhiri ’aore ’oe i rave maita’i ra, tei mua ïa te hara i te ’ūputa na, ’e tē hina’aro nei Sātane ia ’oe ; ’e ’ia ’ore ’oe ’ia ha’apa’o i tā’u mau fa’auera’a, e tu’u atu ïa vau ia ’oe, ’e e ravehia ïa ’oe mai te au i tōna ra hina’aro. ’E e fa’atere ’oe i ni’a a’e iāna ;

24 Mai teie atu ho’i taime e riro ’oe ’ei metua nō tāna ra mau ha’avare ; e parauhia ’oe ’o te Pohe ; i vai ato’a na ho’i ’oe hou teie nei ao.

25 ’E e parauhia i te mau taime i mua nei ē—nō ’ō mai ia Kaina ra teie mau ’ohipa ’ino rahi ; ’o ’oia i pāto’i i te a’o rahi nō ’ō mai i te Atua ; ’e ’o te ’anatema teie tā’u e tu’u i ni’a ia ’oe, maori rā ’ia tātarahapa ’oe.

26 ’E ’ua riri roa a’era Kaina, ’e ’aore atu ra i fa’aro’o fa’ahou i te reo o te Fatu, ’aore ato’a ia Abela, tōna taea’e ’o tei haere ma te mo’a i mua i te Fatu.

27 ’E ’ua ’oto ihora Adamu ’e tāna vahine i mua i te Fatu, nō Kaina ’e tōna ra mau taea’e.

28 ’E i muri a’era ’ua rave ihora Kaina i te hō’ē o te mau tamāhine a tōna mau taea’e ’ei vahine nāna, ’e ’ua hau a’e tō rāua here ia Sātane i te Atua.

29 ’E ’ua parau atu ra Sātane ia Kaina : ’A tapu mai iā’u i tō ’oe na ’arapo’a, ’e mai te mea e fa’a’ite ’oe ra e pohe ïa ’oe ; ’e ’a fa’atapu i tō ’oe mau taea’e i tō rātou ra upo’o, ’e i te Atua ora, ’eiaha rātou ’ia fa’a’ite i te reira ; ’e mai te mea e fa’a’ite rātou, e pohe mau ïa rātou ; ’e ’ia nā-reira-hia ïa ’ia ’ore tō ’oe metua tāne ’ia ’ite i te reira ; ’e i teie mahana e tu’u atu vau i tō ’oe taea’e ia Abela i roto i tō ’oe nā rima.

30 ’E ’ua tapu mai ra Sātane ia Kaina ē e rave ’oia mai te au i tāna ra mau parau. ’E ’ua ravehia teie mau mea ato’a nā roto i te huna.

31 ’E ’ua parau atu ra Kaina : ’Oia mau, ’o Mahani au, te ra’atira nō teie ’ohipa huna rahi, i ti’a ai ho’i iā’u ’ia taparahi ’ia roa’a mai te faufa’a. Nō reira ’ua parauhia Kaina te Ra’atira Mahani, ’e ’ua fa’ateitei ’oia iāna iho i roto i tāna mau ’ohipa ’ī’ino.

32 ’E ’ua haere atu ra Kaina i roto i te ’āua fa’a’apu, ’e ’ua paraparau Kaina ia Abela, tōna taea’e. ’E i muri a’era ’a pārahi ai rāua i roto i te ’āua fa’a’apu ra, tei ni’a mai ra Kaina ia Abela, tōna taea’e, ’e taparahi pohe roa ihora iāna.

33 ’E ’ua fa’ate’ote’o ihora Kaina iāna iho nō tāna i rave ra, nā ’ō ihora : ’Ua ti’amā vau ; ’oia mau e riro mai te mau nana a tō’u ra taea’e i roto i tō’u nei rima.

34 ’E ’ua parau mai ra te Fatu ia Kaina : Tei hea tō ’oe taea’e ’o Abela ? ’E ’ua parau atu ra ’oia : ’Aore au i ’ite. ’O vau ānei te tīa’i i tō’u taea’e ?

35 ’E ’ua parau mai ra te Fatu : E aha tā ’oe i rave iho nei ? ’Ua pi’i mai ho’i te reo o te toto o tō ’oe taea’e iā’u nei mai te repo mai.

36 ’E i teienei e ’anatemahia ’oe i te fenua nei ’o tei hāmama iho nei i tōna vaha nō te fāri’i i te toto o tō ’oe taea’e tā tō rima i ha’amani’i ra.

37 ’Ia fa’a’apu ’oe i te fenua e’ita ïa te reira e fa’atupu mai i te mā’a nā ’oe ma tōna pūai. E riro ho’i ’oe ’ei ’ōere ’e ’ei ta’ata orihaere noa i te fenua na.

38 ’E ’ua parau atu ra Kaina i te Fatu : ’Ua fa’ahema mai Sātane iā’u nō te mau nana a tō’u ra taea’e. ’E ’ua riri ato’a vau ; nō te mea ’ua fāri’i ’oe i tāna ō ’e ’aore i tā’u nei ; ’ua rahi roa tā’u utu’a ’e e’ita e ti’a iā’u ’ia fa’a’oroma’i.

39 Inaha ’ua ti’avaru ’oe iā’u i teie nei mahana mai mua atu i te aro o te Fatu, ’e mai mua atu i tō ’oe nā aro e tāpuni ai au ; ’e e riro ho’i au ’ei ’ōere ’e ’ei ta’ata orihaere noa i te fenua nei ; e muri a’era, te ta’ata e fārerei noa mai iā’u nei e riro ïa i te taparahi mai iā’u, nō tā’u ra mau ’ohipa ’ino, ’aore ho’i teie mau mea i hunahia i te Fatu ra.

40 ’E ’ua parau atu ra vau ’o te Fatu iāna : ’O te taparahi ia ’oe ra, e tāta’ihituhia te tāho’o i ni’a iāna. ’E ’ua tu’u ihora vau o te Fatu i te tahi tāpa’o i ni’a ia Kaina, ’ia ’ore roa te hō’ē ta’ata ’o tē fārerei mai iāna ’ia taparahi iāna.

41 ’E ’ua ’ōpanihia ihora Kaina mai mua atu i te aro o te Fatu, ’e ’ua pārahi rāua ’o tāna ra vahine ’e tōna mau taea’e e rave rahi i te fenua ra nō Noda, i te pae i te hiti’a o te rā i Edene ra.

42 ’E ’ite ihora Kaina i tāna ra vahine ; ’e tō ihora ’oia ’e fānau mai ra ia Enoha, ’e ’ua fānau ato’a mai ra ’oia e rave rahi mau tamari’i tamāroa ’e te mau tamari’i tamāhine. ’E ’ua patu ihora ’oia i te hō’ē ’oire i reira, e ma’iri ihora ’oia i tō taua ’oire ra i’oa i te i’oa o tāna ra tamaiti, ’o Enoha.

43 ’E fānau ihora tā Enoha ’o Irada, ’e te tahi atu ā mau tamari’i tamāroa ’e mau tamari’i tamāhine. ’E fānau ihora tā Irada ’o Mehuiaela, ’e te tahi atu ā mau tamari’i tamāroa ’e mau tamari’i tamāhine. E fānau ihora tā Mehuiaela ’o Metusaela, ’e te tahi atu ā mau tamari’i tamāroa ’e mau tamari’i tamāhine. E fānau ihora tā Metusaela ’o Lameha.

44 E rave ihora Lameha e piti vahine nāna, ’o Ada te i’oa o te hō’ē, ’e ’o Zila te i’oa o te tahi.

45 E fānau mai ra tā Ada ’o Iabela ; ’o ’oia te metua tāne o te feiā i pārahi i te ti’ahapa ra, ’e e mau tīa’i ’ānimara rata ’āvae maha rātou ; ’e te i’oa o tōna taea’e ra, ’o Iubala ïa, ’o ’oia ho’i te metua tāne nō te feiā fa’a’oto kinura ’e te vivo ra.

46 ’E fānau ihora ho’i tā Zila ’o Tubala-Kaina, e ’orometua nō te mau ’ohipa veo ato’a ’e te mau ’ohipa ’āuri ato’a. E te tuahine o Tubala-Kaina ’o Na’amaha ïa.

47 ’E ’ua parau atu ra Lameha i tāna nā vahine ia Ada ’e Zila : ’A fa’aro’o mai na i tō’u reo, e nā vahine a Lameha, ’e ’a ha’apa’o i tā’u nei parau ; ’ua taparahi ho’i au i te ta’ata i pēpē ai au, ’e i te ta’ata ’āpī i māuiui ai au.

48 Mai te mea e tāta’ihituhia tō Kaina tāho’o ra, e riro ïa i te tāta’ihitu ’ahuru ’e ’ia hitu ti’ahapa tō Lameha ;

49 I tapu na ho’i Lameha ia Sātane, mai tā Kaina ra, i riro atu ai ’oia ’ei Ra’atira Mahani, te ra’atira nō taua ’ohipa huna rahi tei tu’uhia atu e Sātane ia Kaina ra ; ’e ’o Irada, te tamaiti a Enoha, ’o tei ’ite ato’a i tā rātou mau ’ohipa huna, ’ua ha’amata ihora i te fa’a’ite i te reira i te mau tamari’i tamāroa a Adamu ;

50 Nō reira Lameha, i roto i tōna riri, i taparahi ai iāna, ’eiaha mai tā Kaina i tōna taea’e ia Abela, ’ia roa’a te faufa’a, ’ua taparahi rā ’oia iāna nō taua parau tapu ra.

51 Nō te mea, mai te mau mahana mai ā o Kaina tē vai ra te pupu huna, ’e tā rātou mau ’ohipa tei roto ïa i te pōiri, ’e ’ua ’ite ho’i rātou tāta’itahi i tō rātou taea’e.

52 Nō reira ’ua ’anatema ihora te Fatu ia Lameha, ’e tōna ra ’utuāfare, ’e ’ia rātou ato’a ’o tei tapu ia Sātane ; ’aore ho’i rātou i ha’apa’o i te mau fa’auera’a a te Atua, ’e ’aore te Atua i māuruuru, ’e ’aore ’oia i tauturu ia rātou, ’e e mea ’ino rahi ho’i tā rātou mau ’ohipa, ’e ’ua ha’amata i te parare i rotopū i te mau tamari’i tamāroa ato’a a te ta’ata. ’E tei rotopū te reira i te mau tamari’i tamāroa a te ta’ata.

53 ’E i rotopū i te mau tamari’i tamāhine a te ta’ata ’aore teie mau mea i parauhia, nō te mea ’ua parauhia atu taua ’ohipa huna ra e Lameha i tāna nā vahine, ’e ’ua ’ōrure mai ra rāua iāna, ’e ’ua fa’a’ite atu ra i teie mau mea ē ’ati noa a’e te fenua, ’e ’aore i aroha ;

54 Nō reira ’ua vahavaha-roa-hia a’era Lameha, ’e ’ua ti’avaruhia atu ra i rāpae, ’e ’aore ho’i i haere fa’ahou i rotopū i te mau tamari’i tamāroa a te ta’ata, ’o te Pohe ’oia ra.

55 ’E ’o te ha’amatara’a ïa o te mau ’ohipa pōiri i te tupu i rotopū i te mau tamari’i tamāroa ato’a a te ta’ata ra.

56 ’E ’ua ’anatema ihora te Atua i te fenua i te ’anatema māuiui rahi, ’e ’ua riri roa a’era i te feiā hara ra, i te mau tamari’i tamāroa ato’a a te ta’ata tāna i hāmani ra ;

57 ’Aore ho’i rātou i ha’apa’o i tōna reo, ’aore ato’a i ti’aturi i tāna ra Tamaiti fānau tahi, ’o ’oia ’o tāna i fa’a’ite ē e tae mai i te ’āfa ti’a o te mau tau, ’o tei fa’aineinehia hou te fa’atumura’ahia o teie nei ao.

58 ’E ’o te ha’amatara’a ïa o te porora’a o te ’Evanelia mai te mātāmua mai, ’o tei fa’a’itehia e te mau melahi mo’a i tonohia mai nō ’ō mai i te aro o te Atua, ’e i fa’a’ite-ato’a-hia e tōna iho reo, ’e nā roto ho’i i te hōro’a nō te Vārua Maita’i.

59 ’E inaha ’ua fa’a’ite-pāpū-hia mai te mau mea ato’a ia Adamu, nā roto i te ’ōro’a mo’a, ’e ’ua porohia te ’evanelia, ’e ’ua tu’uhia atu te fa’auera’a mana, ’ia vai te reira i roto i te ao nei, ē tae noa atu i tōna ra hope’a ; ’e ’oia mau atu ra. ’Āmene.